بسم الله الرحمن الرحيم أنا هاتجوز
أنا باستغرب جداً من الناس اللى بيكونوا من أصحاب الطبقة المتوسطة واللى هما متواجدين فى الوضع الاقتصادى الحالى وبيتجوزوا إتنين أو أكتر !
والله بمنتهى الحيادية والموضوعية مش علشان أنا ست؛ باستغرب لأن أغلب الرجالة بتعانى من الغلاء ومن طلبات أولادها اللى لا تتوقف؛ أكل ولبس وعلاج وفسح ودروس وتمرين وتعليم، أغلب الرجالة بتستجير فعلاً من المصاريف وبعدين تلاقى واحد طلع فى وسط الزحمة كدا وراح متجوز واحدة تانية. ????
هو مش عارف يصرف على بيته الأول فقرر يفتخ بيت تانى، يمكن يعرف يصرف على التانى. ????
أو تلاقى راجل بيجتمع بمراته مرتين فى الشهر مثلاً وبعدين يتجوز واحدة تانية ويقولك أصلى عندى إحتياجات فى الفراش مراتى متقدرش عليها.????
أو واحد مبيشوفش وش أولاده غير كل أسبوع ساعة يبقى قاعد فيها يتشات ويقلب فى الفيسبوك والواتس آب ويتجوز واحدة تانية ويقولك أنا أقدر أشيل مسئولية بيتين. ????
أنا والله باتكلم بموضوعية تامة؛ الحياة فيها حاجات مهمة غير الجواز والتعدد؛ يعنى أنا لو راجل ومعايا فلوس وعندى وقت؛ عمرى ما هافكر أتجوز تانى ولا تالت، لأن الجواز أصلا مش حاجة حلوة، آه والله العظيم ده حاجة وحشة جداً كمان. ????
وكل الناس المتجوزين عايزين يتطلقوا أصلاً إلا من رحم الله.
هو الجواز أساساً فى زمننا الحالى بقى مجرد وسيلة لتفريغ طاقة جنسية ده إن استمرت العلاقة الجنسية سوية أساساً، وبمرور الوقت أغلب الناس بتحس إنه مش مستاهل التضحيات اللى بتتقدم فيه، هو بس الوسيلة الوحيدة لإنجاب أطفال وهى دى الميزة الوحيدة فى الموضوع كله وحتى دول فى الغالب بيطلعوا قللات الأدب ومش متربيين. ????
يمكن لحد من 30 40 سنة كان فيه المودة والرحمة والإيثار والإحساس بالمسئولية والحاجات اللى بتصبر على قرف الجواز، لكن اللى موجود دلوقتى بقى القرف بس من غير الحاجات الحلوة دى، اللى موجود دلوقتى بقى ( إحنا هنستحمل بعض لحد ما نتطلق أو حد فينا يموت ) ! ????
لو كنت راجل ومعايا وقت وفلوس كنت هاتشطر فى شغلى وهاجيب فلوس كتير وأسافر كتير وأقرأ كتير وأعمل صداقات كتير وأقرب من ربنا وأشوف أى حاجة تنفعنى وتحسن من نفسى،واعمل أعمال خيرية وصدقات؛ هأبر أمى وأبويا أكتر، هاعمل حاجات تنفعنى لما أموت وأتدفن وميبقاش فاضل غير أعمالى، لكن مراتاتى هينفعونى فى القبر بإيه ؟ …. فيه حاجات كتيييييير أوى أهم وأفيد من الجواز والله.
ده لو كان معايا وقت وفلوس، لكن لو معنديش وقت ولا فلوس كنت هاتلهى على عينى وأشوف أوَفّر وقت وفلوس إزاى علشان أعرف أعيش حياة واحدة أصلاً !
فكر فى كلامى بعيد عن أهوائك يمكن يطلع صح !
اللينك فى الكومنتات لو حد عايز شير. ❤️
2
-2
