لف وارجع
كان ياما كان فى قديم الزمان؛ إنسان عادى جداً مش فاهم أى حاجة ماشي على الفطرة فى كل حاجة؛ بياكل ويشرب وينام ويتكاثر ويعمل تجمعات ومدن ودُوَل وماشي على الفطرة بردو.
وإذ فجاة طلع علم إسمه علم الفلسفة قالك إحنا لازم نعمل علوم كتير، علشان الإنسان لازم يتقدم ويتطور ويحل مشكلاته، هنعمل علم جغرافيا علشان الإنسان يتنقل ويتبادل الحضارات والموارد الطبيعية والمواد الخام وهنعمل علم تاريخ علشان نحكى قصص الماضى ونستفيد منها ونعرف جذور الأحداث الحالية ونعمل علم الطب علشان مش كل شوية الناس تموت علشان عندهم برد ولا زايدتهم انفجرت، وهنعمل فلك علشان نحسب الأيام والشهور والمواقيت وهنعمل هندسة علشان نعمر الأرض ونبنى قرى ومدن ونعمل حدود بين الدول اللى اتكونت ونعمل كل العلوم اللى الفلسفة اخترعتها لنا وقالت لنا إنها كلها علوم مهمة ومفيدة لحل مشكلات الإنسان على الأرض.
ماشي ؟
وبعد ما طلعت كل العلوم دى، طلعوا يقولوا لنا إحنا لازم نعمل علم إسمه علم النفس؛ علشان (((( ينظم))) سلوك الإنسان ويسيطر عليه ويفهمنا دماغه فيها إيه علشان الناس تعرف تتعامل مع بعض بعد ما الدنيا وسعت كدا وبقى فيه دول وتعاملات تجارية كبيرة !!!
طب هو حد جاب سيرة إن الناس مش بتعرف تتعامل مع بعض ؟
أبداً، ده احنا بنقول إن الناس عملوا علوم جديدة علشان تسهل عليهم الحياة وتطلعهم قدام وتخلى الحياة ألطف، طب إحنا لو فهمنا دماغ بعض هنستفيد إيه يا علماء ؟
هتستفيدوا إنكوا تفهموا السلوك البشرى.
طب وده هينفعنا بإيه ؟
هينفعكوا … هينفعكوا …
طب هينفعنا إزاى ما احنا ناس عايشين على الفطرة وكله تمام التمام !
لاء إحنا علماء، إنتوا هتفهموا أكتر من العلماء ؟
وعملوا علم جديد إسمه علم النفس؛ بيعرفنا سلوك الإنسان جاى منين وبيتغير ليه ولو اتغير المفروض يعمل إيه وحط قواعد للتعاملات بين الناس وبين الشخص ونفسه وإيه هى السمات الحلوة والوحشة وإزاى النوايا بتأثر على السلوك وإزاى المشاعر بتأثر على السلوك وإزاى نفهم سلوكيات الناس اللى حوالينا ونحطها فى إطار ونحط سلوكياتنا فى إطار وواحدة واحدة دخلوا فى تفاصيل كتييييييييير مش هندخل فيها دلوقتى.
وبعد ما عملوا علم النفس وقعدوا على مر العصور بيحشروا فى دماغنا إزاى ندقق فى سلوك الإنسان اللى هو أصلاً مالوش ظابط معين ومالوش قاعدة ثابتة ومالوش مسكة ومافيش أى سيطرة عليه؛ حتى الإنسان نفسه مالوش سيطرة عليه، وخلونا بندقق فى النظرة واللمسة والهمسة واللفتة ويقولوا لنا كل حاجة من دول ليها مدلول؛ طلعوا دلوقتى يطلبوا منا ( مالكش دعوة بنوايا الآخرين، عيش حياتك وابسط نفسك ودلع نفسك وإعمل تأمل وافصل عن العالم وقلل علاقاتك ومتركزش مع حد وخليك فى حالك واشتغل على نفسك ( واررررجع للفطرررة ) !
بيطلبوا منا كدا بعد ما خلونا نفهم كم القرف اللى جوا دماغ الإنسان وكم الشر اللى مالى نوايا الإنسان وكم الأذى اللى بيتمناه للى حواليه، طب ما كنا كويسين لوحدنا … إيه لازمة الفرهدة من الأول ؟
ما الإنسان كان عايش محترم ومبيفكرش فى النفس اللى عملولها علم؛ حطوا له قواعد تنظم وتفهم سلوكه وبعدين القواعد دى خرجته من فطرته وخلته يمشى عليها ويلتزم بيها، بوظت له دماغه وودته ورا الشمس، ودلوقتى بنحاول نرجع للنقطة صفر؛ ( متفكرش كتير ) ( إرجع يا ابنى للفطرة، إحنا آسفين، مكناش نقصد نبوظ لك دماغك ونحط لك ضوابط بدل ما تظبطك بوظتك !)!
بس دلوقتى بقى علم النفس مهم جداااااااً علشان هو الوحيد اللى هيصلح اللى هو عمله من الأول.
علماء النفس فكرونى بالناس اللى عملوا الكورونا علشان يبيعوا اللقاح؛ اللى هو ( بص يا إنسان؛ إحنا هنبوظلك سلوكك الأول وبعدين نصلحهولك ) !
2
-2
