الحلوين أوى 

الحلوين أوى أوى واللى باحبهم كلهم واحدة واحدة البنات القمورات اللى من سن 11 ل 20 سنة 

مهما تصورتى وصور لك صديقاتك إن الحب إكسير الحياة وإنك لازم تحبى طول الوقت يا إما تبقى منبوذة وفى صندوق الزبالة 

ده كلام مش صحيح 

أقسم بالله العظيم مش صحيح 

هاحكيلك قصة قصيرة حزينة حقيقية وحصلت قدامى بالحرف؛ فى يوم من ذات الأيام وانا راكبة ميكروباص فيه عدد من الشباب.

فجأة لقيت اللى قاعد جنبى بيزق اللى قدامه فى كتفه وبيعمل بايده إشارة ( اتكلم فى التليفون ) 

وإذ فجأة بسم الله الرحمن الرحيم لقيت اللى قاعد قدامى بيقول آلو بصوت عالى جدا 

انتى فين ؟ 

تليفونك مقفول 

فى البيت ؟ 

طب افتحى الكاميرا 

باقولك افتحى الكاميرا 

التليفون بايظ ؟ 

باظ فجأة كدا ؟ 

ماشى 

وقفل المكالمة 

إذ فجأة بردو اللى جنبى بيقوله ( أنا عارف هى هتبقى فين ) 

كنا فى وسط كوبرى عباس وفجأة قال للسواق ( نزلنا هنا ) فى نص الكوبرى تقريبا 😂

والطريق كان واقف مما ساعدنى انى اشوف الفيلم العرة ده ؛ لقيتهم نزلوا وقربوا من السور واللى كان جنبى بيقول للعاشق اللى قلبه مكسور؛ شفت مش قلتلك انى عارف مكانها ؟ 😂

طب هو ليه العاشق المكسور مش ملاحظ ان صاحبه عارف مكانها وطلع عارفه بجد وهو لاء. 😂😂😂

صاحبه عارف مكان صاحبته اكتر منه …. ليه ؟ 😂

طلعت صاحبته مع واحد صاحبهم فى مركبة معفنة كدا فى النيل وبتقوله انا فى البيت وهو بيتعامل مع الموضوع بحكمة وتريث. 😂

الكلام ده حقيقة والله ما أفورة ولا أفلام ولا قصص مختلقة.

ده كان عندنا فى المنيل. 😂

طب احكيلك حكاية تانية أقذر ؟ 

فى يوم من ذات الأيام كنت قاعدة مع حد أعرفه؛ واحد كلمه فى التليفون قاله انه عايز يتجوز واحدة معاهم فى الشغل بس حاسس انها كانت مقضياها !!

اللى قاعد معايا قاله آه هى كانت بتروح أماكن مغلقة بس الموضوع بيبقى حاجات خفيفة. 😂😣

بس مافيش داعى تتجوزها يعنى ؛ خليك فى المضمون. 😂

الشخص اللى بينصح ده كان قضى معاها شوية من الحاجات الخفيفة دى اصلا. 😖

القصص المعفنة المعلمة دى بتعلمنا ايه ؟ 

إن اللى هيمثل انه بيحبك علشان يعملك تسلية لنفسه أو لاصحابه ويسيبك بعد شوية علشان يجرب اللى شعرها طويل واللى لابسة نضارة والقصيرة والغنية واللى اجزاء معينة فى جسمها كبيرة أو صغيرة أو بحجم معين حسب ذوقه وأهو كله تجارب!!!وكله متاح … ما هم بيوافقوا وكل واحدة بتوافق تدينى رقمها وتكلمنى واكلمها وتقابلنى وتحكيلى أسرارها وتصدق إنى باحبها وهاتجوزها. 

وانتى يا حبة عينى ( مصدقة ) مصدقة إنه بيحبك 😂

مصدقة ايه ؟ 

انه بيحبك

بتقولوا ايه يا ولاد ؟ 

مصدقة انه بيحبك 😂( بصوت فؤاد المهندس ).

لااااازم تعرفى حاجتين مهمين جدا 

الأولى إن اللى بيفهمك انه بيحبك وبتاعته وهيتجوزك فى يوم من الايام لما يخلص دراسة او لما يكون نفسه ده عمره ما هيتجوزك ومش هيكون حاجة غير عقد واضطرابات نفسية عندك انتى 😂

ولما هيفكر يتجوز مش هيتجوز واحدة عرفها شهرين او تلاتة او سنة او تلاتة ، هو اصلا عارف ان الموضوع ملئ فراغ أو علشان يغيظ واحدة تانية بيكى أو يرضى شعوره بانه ميساويش 75 قرش.

ومهما أبدى ليكى حب ومشاعر واهتمام، هتلاقيه بيحكى كل حاجة عنك لاصحابه بالتفصيل وبيفتح الspeaker وبيسمعهم كلامكوا وبيحكى لهم عن شكلك وشعرك وجسمك حتة حتة وريحتك وضوافرك وبشرتك ومشاكلك واسرارك اللى انتى فاكرة انه بيصونها وانها فى بير. 😏

الحاجة التانية؛ إنك لو فاكرة إن علاقاتك دى بريئة ومافيهاش أى تجاوز ومش بتتنازلى أى تنازل فيها من أى نوع !!

فيه صدد آخر خالص وبعيد عن الكلام ده؛ هو إن فيه حاجه إنتى مش شايفاها دلوقتى وممكن متشوفيهاش خالص !

هى إنك لما تقنعى نفسك إن الناس كلها بتدخل علاقات وبتفشل وبتطلع منها وبتكمل وبتدخل علاقة تانية وبتفشل وبتكمل وهكذا ومبيحصلش حاجة !

لاء هما بيحصلهم حاجة وحشة جدا اسمها ( تبلد ) واحساسهم بيضعف وممكن يموت ويبقوا ولا بيحسوا بالمشاعر الصح فى الوقت الصح ولا حاسين بحاجة أصلا ! 

ما اللى بيتصدم وعلاقته تفشل بيعدى فى فترة صعبة ومعاناة واحساس بالرفض بتبقى صعبة عليه وقاسية وبيتعب فيها فعلا.. لما بتتكرر … العقل بيقوله ( لاء بقى احنا مش هنقعد نحزن ونتصدم كل شوية …. قضيها تناحة وبرود …. احنا كدا هنفضل نعانى ) وفعلا بيتحول إلى البرود علشان يقدر يعيش وبكدا بيكون فقد من روحه واحساسه جزء كبير اللى احنا بتسميه ( شغف) ويقضى حياته من غير نِفس 

ويكون ضيع شغفه مع ناس متستحقوش وقابل بعد كدا اللى يستحقه بس للأسف مافيش 😒

حد هيقولى لاء انا مش بالرخص ده ومش فى مكان البنات اللى فى القصص دى

اقولك لاء للاأسف الشباب اللى بيقضوا كل شهرين تلاتة مع واحدة بيشوفوا كل واحدة من دول زى بطلات القصتين دول 

مادام فتحت الطريق وبتكلمنى حديث منفرد على الواتساب وبنتكلم فى كلام حب ومشاعر وعشق وهيام تبقى زى بطلات القصتين دول. 

طب انا باقول الكلام ده علشان اكرهكوا فى الرجالة ؟ 

‏absolutely not

أنا باقول الكلام ده علشان متعمليش الكلام ده غير لما تقابلى راااااجل هيتجوزك ويبقى معتبرك عرضه وكدا عمره ما هيتسلى بيكى ولا بأسرارك ولا بعلاقتكوا.

أو ده اللى نتوسمه فيه وننتظره منه 😂😒

غير كدا خلى طاقتك ووقتك يروحوا على الدراسة أو هواية مفيدة أو قرب من ربنا أو شغل أو أى حاجة تنفعك بدل ما تروح على ناس خسارة فيها ربع ساعة من عمرك. ❤️

فكرى فى كلامى 3 دقايق قبل ما تقررى انه كليشيه؛ يمكن يطلع صح. 😉❤️

لو حد عايز شير؛ اللينك فى أول كومنت❤️