بيقولوا إن القلق من أكبر المعوقات اللى بتقف فى طريقك وانت بتعمل أى حاجة

تخيل حاجة بتطلع تعطلك فى كل حاجة بتعملها كل يوم !

إحنا بنتكلم هنا عن القلق المرضى مش القلق اللى بيشجعك تنجز أو تحسن من نفسك أو تنافس منافسة شريفة

توءتوءتوءتوءتوء خالص 

ده حاجة تانية منيلة بنيلة 😂

هنتصور مع بعضشينا إن القلق ده عيل صغير 😂

معلش تخيل معايا 😂

علشان انا هاساعدك 😂

عيل صغير من النوع الرخم الزنان. الزنان جدا ! الزنان أوى ! 

اللازق فى نفس الوقت هو لازق فيك مش عايز يسيبك 

مش حب خالص ابسلوتلى 

ده لازق علشان تعمله اللى هو عايزه 

إبنك يقولك مثلاً إنه خارج 

تقوله أوكى

ساعة كدا ويطلعلك العيل يقولك ده كدا اتأخر كلمه 

تكلمه. تلاقى التليفون مغلق 

يقولك يبقى اتخطف 

تقوله يمكن فى مكان مافيهوش شبكة 

يقولك لا اتخطف والخاطفين قفلوا تليفونه وبيعذبوه وبعد شوية هيقطعوه وياخدوا أعضائه 

أعوذ بالله من الشيطان الرجيم لا لا ان شاء الله الموضوع كله شبكة بس 

يقولك لاء هو اتخطف

تقوله لا ماتخطفش 

يقولك لا اتخطف 😂 

أو راح يركب خيل ووقع واتصاب وجاله شلل أو مات واصحابه مش عايزين يقولولك 

أو راح يركب مركب وغرقت وكمان شوية هيقولوا فى الاخبار عن انتشال الجثث افتح التليفزيون واستنى الخبر.

كلمه تانى

مغلق 

شفت يبقى أكيد اتخطف 

وهو عمال يقول الكلام ده وهو بيتنطط حواليك ومبسوط مستمتع وبيعمل هوايته !

شوية وربنا يستر وابنك يرجع تتبسط بقى وتبقى سعيد لاااااااا 

هيستلمك فى حاجة تانية. مراتك مثلا 

راحت عند باباها 

يطلع يقولك. دى اتأخرت كلمها

تكلمها تقولك انا فى الطريق 

يقولك الوقت اتأخر دى كدا هتتخطف فى الميكروباص. ما انت سيبتها تيجى بالمواصلات 

السواق هيخطفها فى الصحراء ويغتصبها وبعد كدا يسرقها وبعدين يوديها عند جوارى داعش ! 

أو هتتخطف من الشارع وهى ماشية واللى خطفوها هيغتصبوها كلهم وبعدين يسرقوها وبعدين يرموها لداعش مع الجوارى !😂

أو الميكروباص هيعطل فى مكان ضلمة وهتنزل وحد هيخطفها فى المكان الضلمة ويغتصبها ويسرقها ويرميها لبتوع داعش ! 😂

شوية وتلاقى مراتك رجعت كويسة الحمد لله تتبسط وتزأطط بقى ؟ 

لاااااا أبدا. ما هو مجهزلك أداة جديدة والأدوات كتير. مثلاً إن مديرك هيقلب عليك ويتسبب فى نقلك أو طردك وهتشحت ومش هتلاقى تأكل ولادك 

وكل ده علشان قالك مثلاً ( ركز على الموضوع الفلانى ) ! 

ويطلع العيل الصغير يتنطط حواليك ويشدك من هدومك ويبدع فى الاحتمالات والتوقعات بتاعته ! 

هو فعلا معطل ومعيق بشكل فوق الخيال 

مش احنا قاعدين بنتخيل من الصبح

لا. ده فوق الخيال 

مع إنه جاى من الخيال 

بس للأسف الخيال مالوش حدود 😏

علشان كدا بيجرى ويبرطع براحته 

القلق ده بيبقى فى الأول قلق رضيع 😂 

بتسيطر عليه بسهولة

لكن بعد شوية بيكبر وبيبقى العيل الزنان 

ممكن يقلب معاك بعد كام سنة إضطراب القلق العام 

ثم يقلب كمان سنتين اضطراب هلع

ثم يقلب كمان سنتين وسواس 

ثم يقلب كمان سنتين اكتئاب

وهو مش عايز يكبر ويعقل ويبطل زن 

هو وراك وراك لحد ما يجننك بنسبة 100%

هتلاقى دماغك بتضرب 😂

هتروح لدكتور نفسى يكتبلك أدوية. شوية هتتحسن وبعد كدا الأدوية دى مش هتبقى بتعمل حاجة 

تروح لمعالج نفسى يقولك. انت اللى لازم تساعد نفسك 😎

تحاول تساعد نفسك متعرفش 😂

تيجى تحكيلى علشان نلاقى حل. أقولك ساعد نفسك بردو 😂

وهيبقى لازم تساعد نفسك وفى نفس الوقت تمشى parallel مع حياتك وواجباتك الاجتماعية والأسرية وشغلك ومسئولياتك وكل ده parallel مع العيل الزنان بردو 😂😂😂😂

يبقى الconclusion هنا 😂 ساعد نفسك من الأول علشان متندمش! ❤️