الحلقه الخامسه

.¸.•'´¯'*•.¸¸.¸.•'´

ماليكا: عصام !!

رن عند فون الشاب الى واقف قدامها بصوت ماسنجر
رفعت عنيها وبصت للشاب ده

عصام: ماليكا يعقوب مش كده !

ماليكا شايفاه ومكسوفه اوى انه شافها هنا !!
عرفته من صوره عالفيس

عصام : عرفانى صح ...ياريتنى كنت اتمنيت مليون جنيه
مكانوش هييجوا بنفس السرعة !

__

اخت رشا: يانهاارى ! يعنى عرفها من نايت !
واتجوزها ازاى ؟

رشا : اهو اتجوزها بقى ( عاوجه بوقها) سحرتله
صدقها
حبها بجد ...الله اعلم

( راجعت نفسها فالكلام) لا لو حبها مكانش استغنى عنها
بسهوله
وحبنى انا

اختها: يابنتى اكيد بعد الى حصل منها ده كان هيستغنى
هيخليها ازاى تانى فالبيت ..
اكيد ده كان هيحصل

رشا: عاوزة تقولى انه لولا الى عملته سابها ،لكن هو لسه
بيحبها مثلا ؟

اختها: اه ...انا شايفه ان الحب مش بينتهى بين يوم وليلة يعنى

رشا( بغيظ) طب قومى ..قومى من جنبي

اختها: هقوم ياستى اهو ..

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'

بتفتح الباب ...تنزل ع اول يوم شغل عندها فمكتب
سمسرة العقارات ،ولاقته فوشها!

يونس: هو انا عملت حاجه زعلتك ؟

ماليكا واقفه وبصاله ومش عارفه ترد

يونس: هو انتى نازله ؟

ماليكا: اه ...اول يوم ليا انهاردة

يونس: طيب انزلى عشان معطلكيش ..ولما ترجعى
هنتكلم

نزلت ماليكا ع طول حتى من غير م تستأذنه ،وهو واقف باصصلها
من غير كلام ..

كان اول يوم شغل ليها ، عرفت حجات من زميلة معاها
ودربتها ع كام حاجه
شوية بشوية بدات تطلع برة خنقتها ودايرتها المخنوقه ، يمكن بدأت تنسي
٣ سنين فاتوا فذل وانتظار الموت..

يمكن وبدأت تنسى ٥سنين قبلهم فتعب وحيرة وحرب نفسيه

وسنتين قبلهم فمواجهة اكبر تعب تعبته فحياتها ، اكبر منها واكبر من ان اى
حد يستحمله

لا !
السنتين دول بالذات عمرها م هتنساهم ...لانهم بعمرها كله .
ولا هتنسى بنتها الى محكوم عليها انها تفضل باقى عمرها...من غيرام !

لو مرة واحدة كنت فحلم ،من غير سابق انذار
فحلم جميل مالوش نهاية ...
يعنى ايه حلم جميل من وجهة نظر ماليكا ؟
يعنى يومها كله بيضحك ،يعنى فرحانه ومبسوطه طول الوقت
يعنى كل حاجه حواليها معاها وبتضحكلها..لحد م فوفت
حدث مالم يحمد عقباه !
خبطة واحدة فالراس بتوجع ...فما بالك بخبطتين ..

ماليكا بنوتة جمالها عادى ، وشخصيتها ممكن نقول طيبة ع هبله شوية
عفوية بتاخد عالناس بسرعة
لكن من جواها ابيض اوى ...
مش زى بنات كتير انها تاخد بالها من جسمها ووزنها ،بتحب الاكل ومهما
جسمها ملى فشايفه انه بيزيدها جاذبيه

بتحب تجرب الجديد حتى لو فيه خطر عليها ، مش بتعمل حساب
لبكرة او لبعدين
بتعيش يومها كله لحد م تنام ...كأنه آخر يوم !

سايبه بكره لله ،دايما صاحبة مقوله " حتى لو شيلت هم بكرة ،وجه منيل
بنيله
هتفيدنى ب ايه شيلة الهم غير ان عمرى قصر حبه "

ترتيب يومها اتغير ، بدل م كانت مع بنتها وجوزها وفبيتها
بقت وحدها فشقه خايفه تكون مسكونه !

بدل م كانت بتخرج وليها بدل الصاحبة ٢٠ والخروجات ب كذا خروجه فالاسبوع

الصاحبة بقت واحدة
ومفيش خروج غير عالشغل ، ومفيش ونيس...الا يونس!

ثقة ماليكا مش مهزوزة فنفسها ابدا ،مع ان معندهاش مميزات جامدة تميزها
عن غيرها
حتى وان كانت خديجة توأمتها اجمل منها وبتحافظ ع رشاقة جسمها
عنها طول الوقت لحد م ربنا اختارها ..

فماليكا عندها شخصية مستقله وحباها اوى ..

المهم ...عدى اول يوم شغل
وراجعه ...جابت لها اكل وماشية بتفكر فالبنت القتيله
ملامحها غريبة
تحس انها مش من البلد ...مدية ع بنوتة من بنات الصعيد الى بيتميزوا
عن غيرهم بسمار البشرة والعيون الواسعه ..

ماليكا كانت خايفه لاتدخل شقتها تلاقيها مستنياها زى المرتين الى فاتوا!
من يوم م اتفزعت منها وهى مجاتش ليها تانى ...ولسه ماليكا فى انتظارها.
بس انتظار مرعب جدا..

مجاش فبالها يونس الى مستنيها ع احر من الجمر عشان يعرف هى واخدة
منه جنب ليه من يومها ؟

لكن هو مش ناسى ومستنى اهو ..

روحت شقتها واخدت دوش ، حضرت اكلها واتعشت

يومها لسه فيه باقيه والوحدة بتفوت كل ثانية سنين .
افتكرت يونس انه مستنيها ، دخلت الفراندا تتلكك تشوفه قاعد ولا لا

ولاقته فعلا !

يونس: حمدلله عالسلامه

ماليكا: الله يسلمك

يونس: كان يوم كويس؟

ماليكا: اه

سكتوا الاتنين ...

يونس: ماليكا فيه ايه؟ هو انا عملتلك حاجه

ماليكا: ( ببرود وباصه للشارع) لا معملتش

يونس حس انها فاترة فطريقتها معاه فسكت ..مرضيش يفرض
نفسه عليها اكتر من كده

عدت دقايق فسكوتهم وباصين للشارع .

يونس: طيب انا هدخل ،عاوزة منى حاجه ؟

ماليكا حست انها مش عاوزاه يمشى عاوزاه يفضل معاها يحكوا
زى الاول
وفنفس الاول متضايقه وعاوزة تسكت ومش عارفه مالها وبتعمل ليه كده !

تفكيرها بين الامرين اخد ثوانى كان هو فعلا دخل لانها مردتش عليه ..
وبقت لوحدها باصة من الفراندا ...

سرحت وبصت فوق للقمر ، اتنهدت ...طلعت فونها
وجابت صور هنا بنتها من ولادتها لحد قبل م تسيبها ، كل الصور كانت حلوة
اوى وكل م بتتنقل من صورة للتانية كانت بتبسم وتنبسط

م عدا صورة وقفت قدامها شوية ..
كانت يوم ولادتها ليها ...هى نايمه ع السرير ولابسه لبس المستشفى

معاوية اخوها جمبها بيضحك ...والناحية التانية عصام وشايل هنا
ونص وش مامتها ظاهر فالصورة فالجنب بتاع معاوية
وصوابعين من دينا الى بتصورهم اصلا ..هههه حبت يكونلها شئ فالصورة

ورجعت لذكرى حلوة ،اول مرة تعدى حاجه بحلاوتها بعد الى شافته
ماليكا

فلاش بااااك ...

معاوية : الله اكبر ماشاء الله ( بيأذن فودان هنا)

مامت ماليكا: واخدة عيون المرحومة خديجة الملونه

دينا: تصدقى فعلا ياطنط شبه كبير لخالتها رغم انها توأم ماليكا
بس تحسيها شبه خديجه

ماليكا( بتعب) انا طول حملى كنت ببص لصور خديجه عشان ييجى البيبي منها

عصام واقف وساكت وامه بتبص عليه وبتمصمص شفايفها

مامت ماليكا: ايه ياعصام ،مالك يابنى

عصام: مفيش سلامتك

دينا اخدت هنا من ايد معاوية

دينا( بتناولها لام عصام) بصى الحلاوة ياطنط

ام عصام: ( ماسكة هنا عادى مش بحب) نحمد ربنا ع الى جابه

مامت ماليكا بصت لمعاوية وماليكا وسكتت

ماليكا: عصام اعدلنى تعبانه من قعدتى هنام ع ضهرى ،الجرح شد

عصام جه ناحيتها وعدلها مع معاوية

ماليكا: ااااه حاسة انى تعبانه اوى

مامت عصام: ياختى اومال لو كنتى جبتى الولد كنتى عملتى ايه
عالدلع ده كله

دينا: كلها عطايا ربنا ياطنط

ام ماليكا: الى يجيب البنت هو الى بيجيب الولد يا ام عصام

ماليكا عامله نفسها مش سامعه حماتها ومسكت ايد عصام بحب

ماليكا: هنسميها هنا يا عصام ...عشان تبقى اسم ع مسمى
وتجيب معاها الهنا

عصام: قومى انتى بالسلامة ونبقى نشوف موضوع الاسم ده

دينا: جميل اوى اسم هنا بصراحه يا ماليكا

ام عصام ( بعصبيه) هنا ! هنا ده ايه
انت مش قولت انك لو طلعت بنت هتسميها ع اسمى ..والمحروسة مراتك
مكانتش راضية تعمل سونار عشان نعرف النوع لحد م ولدت

ماليكا ( بنرفزة شوية برغم التعب) والله يا نينة دى بنتى وتعبت فيها
عصام يحدد اسمها لوحده

عصام: هو انا مش ابوها ولا ايه

معاوية: ياجماعة مش هينفع خناق هنا بالمستشفى، نمشى ونفكر
فموضوع الاسم بعدين

ام عصام : هاه ياعصام ...هتسميها ايه ياخويا

دينا: لو سمحتى بس ياطنط هو اسم حضرتك ايه
ونشوف

ام عصام : أسمى شفيقه ياروح طنط ، ايه وحش؟
دينا كتمت الضحكة وميلت ع ودان ماليكا

دينا( بهدووء) يبقى يجيبلها تيمور بقى ههههه

بضحكة ساكته كانت لسه مكمله بص عالصورة ، فضلت تتنقل كده
طول الليل عالصور والذكريات

لحد م عدى وفات وقت الليل ...وجه وقت النوم .

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

" انتى هتذاكرى ولا اخد اللابتوب ده مش هتشوفيه
الا فالاجازة ؟"

ايمان : ياماما والله بذاكر كنت بس ببص ع حاجه كده

اخت عمر ( ام ايمان) : بتبصى كل ده ،انتى الظاهر الدلع زاد معاكى
انا لما باباكى يتصل هقوله ع استهتارك ده

ايمان: ياماما بقى

بتاخد اللابتوب وتفصله وماشية من اوضة ايمان وقفها عمر وهو
داخلها ...

عمر: فيه ايه

اخته: الهانم مش بتذاكر والمدرسين بيشتكوا منها ، وكل م ادخل
الاقاها يا ماسكة الزفت الموبايل
يا ماسكة الهباب ده

ايمان: والله ياخالو بذاكر

عمر: بالراحه طيب ،كله بالهداوة مش كده

اخته: انا اول م يتصل باباها هقوله يعرف شغله معاها

خرجت وسابتهم وهى متنرفزة ، دخل عمر ل ايمان ..

عمر : وبعدين فاللعب ده ،هو ده ياخالو هذاكر وادخل حقوق زيك
وابقى محامية شاطرة

ايمان: وربنا بذاكر ماما هى الى مش بتصدق ،دايما تدخل فوقت
اكون باخد فيه ريست
او بقلب فالفيس
او برد ع حد من صحابي فالفون ...هى بقى بتفتكر انى كده طول
الوقت

عمر: طيب خلاص انا مصدقك وهقولها ، يلا سمى بالله
وابدئى
هروح اعملك مج اد كده نسكافيه عشان تركزى
وسندوتش كمان يلا هيصى

ايمان : ( قامت باسته فخده) هتعبك ياخالو كده

عمر: لا مفيش تعب لايمو حبيبة قلبي ،انا هجيب المذكرة
اكتبها جمبك هنا عشان اونسك

ايمان: تونسنى ولا تراقبنى هههههههه

عمر: ماهو لسانك ده الى موديكى فداهيه...يلا عالمذاكرة
وانا هعمل الحجات دى واحصلك

عمل فعلا النسكافيه ، وسندوتشات
وجاب ورق شغله جمبها وا بدات هى تذاكر وهو بيكتب فالمذكرة
بتاعت قضية ماسكها المحامى الى بيشتغل معاه..

عدت ساعتين وشوية فسكوتهم وانهماكهم ...وقطعت الصمت
ايمان !

ايمان( بتفرد دراعاتها وضهرها) ينفع ناخد بريك ياخالو

عمر( بيكتب وبيرد عليها وهو مميل ) لا مينفعش

ايمان: والنبي والنبي ربع ساعة بس

عمر: ايمان وبعدين!

ايمان: نعمل ريفريش للمخ ياخالو ...الله!

عمر: لا يبقى مامتك عندها حق بقى

ايمان: ليه بس مانا قعدت اهو ساعتين بحالهم ولا نطقت مجاتش
من ربعايه

عمر : ربعايه !! ماشى هما ١٠ دقايق ونرجع لقواعدنا سالمين

ايمان ( بفرحه ) هييييه ماشى

بيكتب هو

ايمان: ياعم بريك ليا وليك مش ليا وحدى

عمر : لا انا مش عايز بريك

ايمان قامت من ع مكتبها وقعدت جمبه ع سريرها واخدت من ايده الورق
وقلعته النضاره

ايمان: ياخالو هاخد البريك مع نفسي...تعالى ندردش العشرايه دى
ونرجع تانى
حتى نفصل المود

عمر باصصلها بقرف يضحك

ايمان : هههههه حبيبى ياخالو ( باسته تانى) تعالى نحكى بقى

عمر: نحكى ف ايه يا رغايه

ايمان: بص ...ف اى حاجه حلوة تخليك تضحك

عمر: انا مفيش حاجه بتخلينى اضحك الا اسماعيل ياسين
نروح نتفرج عليه ؟

ايمان: لا فيه غير سمعه ياخالو ، ايزيس ( غمزتله)

عمر: وبعدين معاكى بقى

ايمان: احكيلى اى حاجه بالله عليك من حكاياتكم اى حاجه

عمر: اولا انتى المفروض مكانوش يسموكى ايمان
يسموكى كائن اللت والعجن
ثانيا كل الحكاوى حكتهالك وعرفتيها وحفظتيها يا سئيله

ايمان: وعاوزة اسمعهم تانى وتالت وعشروميه

عمر: بتستفادى ايه افهم النقطة سعادتك

ايمان: هقولك ...انا بعشق قصص الحب الحية
مش كلام الافلام
وبحبكم اوى ...وبالذات هى بحبها اكتر منك ييجى ١٠ مرات

عمر( بيضحك) عشر مرات!

ايمان: اه وبحب سيرتها اوى ، وبحب لمعة عيونك وانتى بتحكى عنها
وابتسامتك
وفرحتك اصلا اول م اقولك ايزيس
وبعدين انت مبتحكيش مع حد ياخااالو ...انا بس حبيبتك

يلا احكى بقى ال ١٠ دقايق هيخلصوا

عمر: احكى ايه بس يا ايمان

ايمان: مممم احكى اى حاجه
( افتكرت حاجه) اقولك ...احكى لما انقذتها من الحرامى

عمر: انا م انقذتهاش هى يا ام مخ نضيف انقذت شنطتها

ايمان: شوفت بقا ...انا مش حافظة اهو
يلا احكى يلا

عمر ضحك ع اصرار ايمان ،بس قبل ضحكته
دبت فقلبه نبضة مبتسمه زى روحه
اول م سمع اسمها!!

فلاش باااااك

ماليكا: خديجة مديانى الحلق عشان ابيعه بقت بتستخف شكله

دينا: ورهول. كده يمكن اخده انا منك

طلعت الحلق وهما ماشيين فالشارع وشافته دينا ...كان فى اتنين عيال متسولين
وشكلهم مجرم الى حد ما

فالوقت ده عمر كان طالع زيهم من الحامعه وهيعدى ياخد اول ميكروباص للمترو

دينا: مممم ده حلو اوى،تعالى نتمنه واشوف اخد من بابا وادى لخديجه
تجيب غيره

ماليكا: يابت لايكون غالى عليكى ،ده تقيل اوى

دينا: لا مانا عيد ميلادى قرب هدبس بابا فيه

ماليكا ( حطته تانى فشنطتها) هههههههههه

مشيوا خطوتين وعمر وراهم بشوية ، قرب واحد العيال المتسوله دى عليهم

الولد: اى حاجه ياست

ماليكا: الله يسهلك

الولد: ياست اى حاجه ربنا يستر عرضك

دينا: استنى فيه معايا فكه

ودينا بتبص فشنطتها وماليكا واقفه ،خطف الولد التانى شنطه ماليكا
وجرى بسرعة

ماليكا( باعلى صوت وبخضه) حراااااااانى يالهوى حرااامى

عمر كان شايف من الاول وانتبه لما اخد الولد الشنطه ،جرى وراه بصعوبه
عشان اعاقه رجله
والبنات بيجروا وراه ...والولد سرعته محدش واصلها

عمر بيبص حواليه وهو بيجرىلقى واحد راكن عجله قدام محل

عمر( متلهف وبيركبها) عن اذنك ...هجبهالك

باقصى سرعة بيسوق ورا الولد والولد قدامه وماليكا ودينا بيصرخوا عشان الناس
تلحقه

عمر سبق الولد وكسر عليه ونزل من عالعجله ضرب الولد ضربتين

خافوا منه وسابوا الشنطة وجريوا منه ..

اخدها واخد العجله بعد م اتقطع نفسه ، لحقته ماليكا ودينا

دينا: متشكرين ياعمر ،ىبنا بعتك لينا والله

عمر ( بياخد نفسه بصعوبه) شوفيها لا يكون ناقصها حاجه

ماليكا بتشوفها

ماليكا: الحمدلله الخلق موجود والمحفظة ...( بتبص لعمر بامتنان) متشكرة ياعمر

عمر: على ايه اى حد مكانى كان هيعمل كده

ماليكا : انت بجد انقذت حاجتى ، رغم ...( بصت ع رجله)

عمر( مبتسم) ياستى ربنا بيسهلها ، انا سرقت عجلة الراجل
الحق اروح ارجعهاله قبل م يعمل فيا محضر هو كمان

ابتسمت ماليكا ودينا ضحكت ...

ماليكا: طيب هو انا عاوزة اشكرك بس مش عارفه

عمر : انا مبسوط ان حاجتك رجعت زى م هى ...بس ابقى خدى بالك
عن اذنكم

مشى وفضلت ماليكا متنحاله ، واخدتها دينا من ايدها وكملوا طريقهم..

وتانى يوم فالجامعه ...

بعد محاضرة من المحاضرات ، كان عمر قاعد وحده بيبض محاضرة لحد
م تيجى الى وراها

جت عليه ماليكا وجايبه ف ايدها شنطه صغننه

ماليكا: عمر ...ممكن من وقتك دقيقه!

عمر: ( انتبه وابتسم فوشها لأول مرة) اه طبعا

ماليكا: ( بتديله الشنطه) هو انا مش جايبالك حاجه جزاء الى عملته
ويايا امبارح
هو بس وانا بعملها افتكرتك فقولت اجيبلك منها حته ع أساس اشكرك
باى طريقه يعنى

عمر( الابتسامه مراحتش من ع وشه) ايه دى بقى

ماليكا: مكرونة بالوايت صوص والمشروم ،يارب تعجبك
اكيد جعان

عمر( بيفتح بلهفه) جدا ...لو كل الشكر كده فانا موافق انقذ شنطتك كل يوم
جت فوقتها لانى جعاان

ماليكا ضحكت وفرحت لترحيبه بهديتها

عمر : مش هتاكلى منها ولا ايه

ماليكا: لا سبقتك مع اصحابي

عمر ( بابتسامه حلوة) طب زودى ...حتى يبقى شكر
وعيش وملح

ضحكت ماليكا وقعدت جمبه تاكل وهى مكسوفه لاول مرة !!
__

ايمان: يا دييييينى عالجمال ، كل مرة بسمع فيها حكاية
بمووووت من الهييييح

عمر: طب كفاية هيييح بقى وقومى ذاكرى

ايمان: لا طب استنى ،احكيلى ع الى حصل ففرح صحابكم

عمر: لا والعشر دقايق خلصوا

ايمان: عشان خاطرى عشان خاطرى

عمر: هنادى ع مامتك ..يانجووى!

قامت جرى ع مكتبها وفتحت الورق

ايمان : انا بذاكر اهو خلاص

عمر ضحك عليها ومسك ورقه وكمل الى كان بيعمله ،وقطعته
ايمان بذكرياته الحلوة ????

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

فسابع نومه ...حاسة انها رايحه فيها ف امان
بسبب محاوطة دراعات خديجه اختها ليها
زى م بتقول وهى نايمه ...

بتتقلب ،وفوسط تقليباتها
لاقتها قاعدة جمبها عالسرير !!

قامت واتعدلت ماليكا وهى بترجع لورا بخوف ...

ماليكا ( بخوف ) لابقيت اخد دوا ولا زفت انتى عاوزة منى
ايه

القتيله: عاوزة تاخدى حقى

ماليكا( جسمها بيرتعش) همووووت هتموتينى ،روحى هتطلع
دلوقتى

القتيله عيطت دموع دم وبصت للارض

ماليكا: وايشمعنا انا ...ايشمعنا انا من دون الارض
جايالى اخد حقك

القتيله بص لها بحزن وعيونها كلها احمر دم ومفيش سواد

القتيله: عشان انتى عندك نفس الروح ،انتى بتحسى
بينا اكتر من العايشين زيك عالارض

ماليكا حست لوهله ان خوفها سكت وصعبت عليها
عفريته!

رغم انها خايفه جدا وشكل البنت مخيف لما عيونها
قلبت
بس بعد جملتها الاخيرة حست انها عاوزة تسمعها

ماليكا: طول الوقت كنت مترقبه مجيتك دى
وعارفه انك مش هتسيبينى فحالى

انتى ساكنه الشقه صح

القتيله بصالها وبتعيط دم برضو

ماليكا: الشقة دى مسكونة مش كده

القتيله: حتى لو روحتى فين هجيلك وهنبقى معاكى

ماليكا: هنبقى ! يانهار اسود انتو كتير بقى واتكاترتوا عليا

القتيله قامت وقفت من جنبها

القتيله: اسمى ميرڤت ...ودى حكايتى الى عاوزاكى تعرفيها
عشان تعرفى تاخدى حقى

قامت ولوحت بايدها بحركة شيطانيه ...ظهرت
قدام ماليكا حاجه زى شاشه السينما
ناس ومكان وهى البنت القتيله

اتعمقت ماليكا وبدات تشوف احداث وكانها بتتفرج
ع فيلم !

الحلقه السادسه

.¸.•'´¯'*•.¸¸.¸.•'´

القتيله: اسمى ميرڤت ...ودى حكايتى الى عاوزاكى تعرفيها
عشان تعرفى تاخدى حقى

قامت ولوحت بايدها بحركة شيطانيه ...ظهرت
قدام ماليكا حاجه زى شاشه السينما
ناس ومكان وهى البنت القتيله

اتعمقت ماليكا وبدات تشوف احداث وكانها بتتفرج
ع فيلم !

ميرڤت ماشية وسط بنتين لابسين يونيفورم مدرسى برضو
بتضحك وبيتكلموا

وفجاة ظهر ٣ رجاله مغطيين وشوشهم بلفافه كده زى العمة
بنفس القماشه

وقفوا البنات واتخضوا ،كان فى كلام مش فاهماه ولاسامعاه
كويس
وكأن الشباب دى كانت بتزعق فيهم ،واحد فيهم مسك ميرفت
وزعق
جريوا البنتين التانين وهما بيصرخوا

وجاية ميرڤت تجرى زيهم وتصرخ ،التانى جاب صاعق وعمله فجسمها
اتشلت حركتها ووقعت عالارض فاقدة الوعى ..

وبعدها ال ٣ شباب كانوا ماسكين عصيان خشب عريضة وشكلها قوى وتقيل
نزلوا ع راس البنت دى ال هى ميرفت دى ورابعض ضرب ضرب
لحد م دماغها اتدشدشت...وماتت ????

الصورة اختفت ...من قدام ماليكا
واختفت ميرڤت معاها من جنب ماليكا ...ماليكا عيونها مبحلقين
مش قادرة تصدق الى بيحصل ده بجد ولا كانت بتحلم ؟!

مجاش النوم لحد م الصبح طلع وهى خايفه وقاعدة صاحية عشان تتأكد
انه كان بجد ومش حلم ...

ماليكا لما شافت بعيونها مقتل البنت دى ، وكأن ده عاد حاجه تانيه قصادها

عمرها م هتنساها ...

دموعها مبطلتش من وقت م شافت ....صعبت عليها البنت
ولا اتقلب عليها مواجع حاجه تانية ..

جواها ١٠٠ سؤال وسؤال وحجات ملخبطه ، ومنين يودى ع فين ✋

تعبت تعب فوف تعبها اضعاف ،حاسة انه حمل جديد فوق احمالها
ومش هتقدر عليه المرة دى زى كل مرة..

وهتعمل ايه ؟

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

"مش عارف اكلمك ب انهى صفه ،بس اصل انا...
قلقت عليكى معرفش ليه ...جيتى ع بالى "

ماليكا فطريقها للرجوع من الشغل وهلكانه من عدم نومها وقلقها من امبارح
وشرب قهوة كتير

ماليكا ( فون) تكلمنى بالصفه الى تحبها ياعمر ..ومكالمتك جت فوقت
فعلا انا تعبانه فيه

عمر: ( اتنهد) ربنا يساعدك ويطمن قلبك

ماليكا: ايوة كده ادعيلى ...عشان بجد محتاجه دعوات
محتاجه اوى معجزات تحصل معايا

عمر: ماليكا حتى وان كنت مش جنبك ...فدعائى ليكى دايما حواليكى

ماليكا ( ابتسمت وقلبها وجعها) ربنا يخليك ياعمر

عمر: خدى ىبالك من نفسك ...

ماليكا: حاضر ...سلميلى عالكل
وبالذات ايمان

عمر: يوصل بإذن الله ، عاوزة حاجه قبل م اقفل ياماليكا؟

ماليكا(بتضحك بسخريه ) اومال فين ايزيس ؟!

عمر ( ابتسم بوجع) ماهو مبقتش تنفع ايزيس خلاص ...

قفلوا الاتنين ، وكل حد منهم فى حته منه عند التانى !
لكن لازم توقف ع كده
مجبورين جبر مفيش بعده نقاش ..؛
ظرف قهرى اصعب من انه يبقاله حل ...بس الى مسهل الدنيا بالنسبة لهم
ان احتماليه يفضلوا موجودين فحياة بعض لسه
موجودة ...

#لنورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

وبعدها بيومين ...

كانت حياة ماليكا بتمشى عادى ، الصبح شغل للساعة ٥
وبعد كده تتمشى شوية
وترجع عالبيت
تقعد مع نفسها وكتبها وصورها ويهبط عليهاالنوم ،فتنام ..

مظهرتش تانى ليها ميرفت ، ولابتخرج تحكى مع يونس

اتصلت ب دينا اكتر من مرة فاليومين الى فاتوا
بس دينا فونها عطلان وبتصلحه وبالتالىمش بتتلقى اى اتصالات..

جواها كلام كتيييير عاوزة تفضفضه واجعها ،برغم مكالمه عمر
الى خفت عنها شوية
لكن برضو عاوزة كانها تترمى فحضن حد وتعيط

هشه جدا روحها ...لدرجة الكسر لو عدت اى نسمة قوية عليها!????

خرجت للفراندا بتدعى ربنا تلاقى يونس ، بس مكانش واقف!

اتخنقت بزيادة وحست انها زدوتها معاه بدون داعى ..

بين تفكير وسرحان مع القمر والليل ، طلع يونس

فرحت من جواها وكانت عاوزه تكلمه الاول ، لكن طيبته هو
خلته يبدء معاها كلام ...

يونس: مساء الخير ياماليكا

ماليكا: مساء النور ( مبتسمه)

يونس: الحمدلله انهاردة مزاجك رايق ، يارب ع طول

ماليكا قامت وقفت من عالكرسي ،ووقفت جمبه ع استقامه سور
الفراندتين

ماليكا: كنت رزله معاك الفترة الى فاتت مش كده

يونس ضحك وبص قدامه

ماليكا: بتضحك ليه

يونس: خايف اتكلم تكدبينى

ماليكا: لا اتكلم

يونس: حسيت بيكى وبلخبطك وحيرتك ، ومش عارفه تتكلمى
مع مين ومتتكلميش مع مين

ماليكا استغربت

يونس بصلها وقلها بهمس

يونس: روحك فتنت عليكى ( غمزلها بطريقه تضحك)

ضحكت ماليكا اوى من طريقته

ماليكا: حكيم روحانى حضرتك!

يونس: لا والله ايش وصلنا ، بس بجد بقرا روحك
وده جديد علياع فكرة

ماليكا ابتسمت وبصت قدامها عالشارع وساكته

يونس: وجواكى كلام ودوشه وتوهه كتيييرة ( رجع بصلها بثقه)
احكى يا ماليكا

ماليكا ( بصاله باعجاب لثقته فنفسه) واثق ان فى كلام وانى هحكى

يونس: وواثق كمان انى هخرجك من الحالة دى فورا اول م تخلصى
كلام

ماليكا حست ان الحمل الى ع اكتافها بدأ ينزل وحد يساعدها
وياخدها عنها شوية

حكتله الى حصل لما شافت ميرفت القتيله والى شافته وكانه فيلم
والكلام الى دار بينهم

يونس كان بيسمع منصت لكل حرف ، مركز ومنتبه
ماليكاحست انه مهتم فعلا وانه مش شايفها مجنونة او بتكدب

كانت بتحكى بتلقائية وبراحه شديدة ...ولما خلصت ..؛

يونس: طيب انا عندى راى تاخدى بيه ؟

ماليكا: ياريت قول

يونس: من كلامك...شبح ميرفت ده بيظهر فالاوضة دى
انقلى اوضتك لاوضة غيرها
وغيرى ترتيب الشقة والروتين ده

لو روح ساكنه المكان هيبقى لها مكان خاص ولو مثلا اوضتك
لو عاوزاكى فعلا تساعديها
هتجيلك اوضتك الى هتنقلى فيها

ماليكا: جبتك ياعبد المعين ...وبعد م انقل وتطلع اعمل ايه
انا بخاااف بموت فجلدى

يونس: واجهيها يا ماليكا ...متخافيش
جمدى قلبك واحكى معاها زى المرة الى فاتت
شوفى عاوزة ايه

ماليكا: انت اتجننت ..دى عفريته

يونس: طيب م انتى قولتى انك بتشوفى روح اختك واهى ميته
وبتحضنك كمان
مبتخافيش منها ليه؟

ماليكا سكتت وحست ان كلامه صح

يونس: ع فكرة لو ساعدتيها روحها هتتحرر ، ومش هترجعلك تانى
وهتخلصى بقى من القرف ده

ده اذا ظهرت بعد م تظبطى الشقه

ماليكا: وانا هقعد يتهد حيلى فالشقه دى ، طلعت عينى اول مرة
مع ست جبتها

يونس: ويطلع عينك وحدك ليه ، وانا روحت فين

ماليكا ضحكت: ايه هتيجى تساعدنى؟

يونس: اه طبعا لازم نوقف وقفه رجاله

ماليكا سكتت وفكرت فالكلام ،

ماليكا: موافقه ...بس نخليها الجمعه اكون اجازة من الشغل

يونس( مد ايده) تمام موافقه بالاغلبيه

ضحكت ماليكا واحساس الاطمئنان رجعلهاتانى ...

#لنورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

من موبايل مامت دينا ، كانت بتتصل بماليكا تطمن عليها
لحد م فونها يتصلح

بعد م دخلت فيها شمال الاول ماليكا وازاى هى ندلة وسايباها
وحدها وكانت اتصرفت وكلمتها

نزلت زى الجردل وحكت كل التفاصيل الى فاتت دينا ، مكالمة عمر
ظهور القتيلة وحكايتها والليلة الصعبة الى عدت عليها
كلام يونس ...
كل حاجه مخلتش ولا حرف الا لما اتحكى ،،
دينا سمعت وايدت جدا كلام يونس وانها موافقه تعمل كده،صعب عليها
حوارها هى وعمر

والحواجز الى اتحط بينهم بالاكراه رغم كل الحب ده ،استغربت حكاية ميرفت
ومقتلها
سمعت بشغف وكانه فيلم اجنبي اكشن بيتعرض قدامها
خافت ع ماليكا لكن مقالتش ...قوتها بالكلام وان زى م قال يونس
متخافش منها زى خديجة !

خلصت المكالمة ودينا لسه قلقانه ع ماليكا من الى اتحطت فيه، طلعت من
نقرة تدخل فحفرة
بس كل الى بتقدر عليه ان تتابعها اول ب اول وتدعى ربنا يفضل معاها
حتى لو متستحقش
يعامله بكرمه مش بالى تستاهله .

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

مامت ماليكا فشقتها ،بتنضف وترتب وتروق
ومشغولة

وهى بتشيل اوراق وصور فدرج من الادراج ، وقعت
صورة لماليكا مع عصام ففرحهم ..

وقفت الام قدامها دقايق ،وكأن ودتها الصورة لحته تانية
خالص
سافرت بيها كام سنه ورا ...

فلاش باااااك

ماليكا: اه عاوزاه يا ماما

الام: انا مش عجبانى طريقة معرفتكم ببعض يابنتى
ولا اهله
ابوه وامه تحسى انهم كده مش صافيين من جوه
ومش حبينك

ماليكا: ومنين يا امى حكمتى ،بالعكس عمو بيعاملنى معاملة
كويسة جدا
وبالنسبة لطنط فهى مع الوقت هنتطبع بطباع بعض
هى بس بتحب عصام لدرجة انها غيرانه انه يتجوز
مثلا ويسيب حضنها ك امه

الام: انا مش مرتاحه للجوازه دى

ماليكا سكتت وميلت فالارض،جت مامتها وطبطبت ع كتفها

الام: لو عشان الشكل هتضطرى تتجوزى وخلاص،تغور الجوازات
الى زى دى

ماليكا: تقصدى ايه يا ماما بس

الام: يعنى هتتجوزى كده زى العروسة اللعبه ،من غير احساس
ولا مشاعر

ماليكا: عصام بيحبنى يا ماما وانا مصدقاه

الام: وانتى بتحبي مين ؟

ماليكا سرحت واتخنقت

الام:لو سلمتيه جسمك واسمك وقلبك مع واحد تانى
يبقى حرام
ده ميرضيش ربنا

ماليكا ( قالت بوجع) ويعنى هو الى قلبى معاه كان طريقه
مفتوح
مانا قابلت الحيط السد ورجعت ورا لاقيت عصام فطريقى
وموافقه
عشان مفيش غير كده يا امى ..

_

اتنهدت ام ماليكا، وقالت فنفسها

الام: كان عنده حق معاوية ...دايما توقعى نفسك القرف
وتندمى بعدها لكن بعد فوات الاوان ..

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

بيشيلوا قدام بعض اثاثات البيت ، وبتزعف حيط الاوضة الجديدة
وواخد يونس السجاد وبيحطه فالفراندا

غيروا سوا شكل الصاله ، كان ليه رؤية حلوة ومتميزة عنها حتى ترتيبه
ادى شكل حلو للشقه عن الاول واداها روح كده

اتهلكوا تعب ،طلبت اكل ماليكا وجه وبياكلوا

ماليكا: تعبت اوى صح

يونس: يابنتى عادى ،المهم انك عندك طاقه جبارة ع فكرة
متستهونيش بنفسك تانى

ماليكا ( ابتسمت وبتاكل)

يونس: بس بعد كده هتحسي نفسيتك فرقت ،حتى عن لما جيتى الشقه
هتفرق نفسيتك عن الاول

ماليكا: اه فعلا

يونس هز راسه وبياكل معاها ..

ماليكا( فبوقها اكل ) م تحكيلى عنك شوية ،انا معرفش ولا حاجه

يونس: عاوزة تعرفى ايه

ماليكا: فمرة سالتك حبيت قولتلى قتلنى الحب ،وعجبنى التعبير اوى
احكيلى قصتك

يونس: هو يعنى انتى حكتيلى قصتك

ماليكا: انا حكيت حجات ،لكن انت انا معرفش اى حاجه عنك

يونس : مممم طب ابتديلك منين

ماليكا: من الى انت عاوزه ...عرفتوا بعض ازاى؟

يونس سرح وبدا يحكى ...

يونس: بصى ،عارفه الديسكوهات الهاى كلاس دى الى مش اى حد يدخلها
دى

ماليكا: اه

يونس: انا كنت بروحها

ماليكا( بتريقه) انت ابن ناس بقى واحنا منعرفش

يونس: ( عدل ياقته) ياستى ع قدنا بس كنت بروح يعنى

ماليكا: وبعدين

يونس: مرة من مرات مرواحى هناك...قابلتها !

فلااااااش باااااك

داخل يونس من الباب ، لابس لبس شيك جدا وهييئته جذابه
يلفت نظر اى حد بوسامته

بكل ثقه داخل وبيتحرك ...قعد ع تربيزة وكعادته اتفرج ع الموجودين
الى بيرقصوا
والى بيستهبلوا
والى قاعدين عادى ...كلهم ولاد ناس وضاربين الدنيا طناش
فلوسهم كتير وعاوزين ينبسطوا بالدنيا
وبس

قاعد وراسى ...نزل مشروبه وبيشرب
لمح من بعيد عنه بتربيزتين حاجه ...فضل مركز معاها

وبعدين قام مرة واحدة راح ناحية بنت كانت مميلة وبتتعدل فقاعدتها
جه شاب والتانى يطلبوها للرقص ومترضاش عشان قاعدة وحدها
ومسك ايدها يونس باقتحام لذيذ

يونس: ترقصى معايا

البنت بصاله باستغراب

يونس: هترقصى معايا ع فكرة ( غمزلها)

قامت معاه ع البيست وسط جمع شبابي وبصاله بقلق
وهو بيرقص وياها كأنه يعرفها اصلا

يونس( بصوت عالى ) انا يونس ...وانتى

البنت :.....

يونس: اصل هنتقابل تانى ( مسك ايدها من معصمها كانه بيلمح لحاجه
)

البنت استسلمت انها تعرفه ع نفسها وكانها مجبورة

االبنت: اسراء ...

يونس: عاشت الاسامى ياقمراية ،هاتى موبايلك

اسراء مستغرباه ع مخنوقه منه متفهموش

يونس: يابنتى موبايلك هكتبلك نمرتى

ادتله فونها وكتب نمرته ورن ع نفسه ، حط الفون فايدها

يونس: هكلمك ( غمزلها)

___

ماليكا: هههههههه ايه الغلاسه دى ،ع كول كده

يونس،: وش من غير تفاهم

ماليكا: وايشمعناهى الى لفتتك فالبنات

يونس: معرفش بس هو كده ههههههه

ماليكا : وسيبتوا بعض ليه

يونس: يعنى انا عرفت كل حكايتك لما هتعرفى حكايتى
فقاعدة واحدة

انا هقوم بقى

ماليكا بصاله وهى مبتسمه

ماليكا: متشكرة يا يونس

يونس: على ايه ...انا فالخدمه

قام ومشى وقفلت وراه ...وبدأت تخلى عقلها يستعد
ان ميرفت لو جت هتواجهها ااازااااى؟!

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

١٥ ميسد كول ع فون عصام من مامته ،بس هو عنده جرد فالبنك
الى شغال فيه
ومش فاضى يرد
وبعد ملل من رنات امه رغم انه مشغول ،اتلكك يدخل الحمام يرد عليها

عصام: ايوة يا امى

الام: بنتك مرجعتش لحد دلوقت ، اتوبيس المدرسة جاب ابن الست جارتنا
وكلهم جم وبنتك مجاتش

عصام: يا امى تلاقيها جت ومخدتيش بالك وراحت تلعب مع حد من اصحابها

الام: يا واد افهم هتموتنى بقولك مجاتش مجاتش
هنا اتخطفت
اتصرف اعمل اى حاجه

عصام اتخض من كلمة امه

عصام: اختطفت يعنى ايه ؟
الام: انا عارفه اتصرف ياسبع البرومبا ،اتحرك بنتك هتضيع من ايدينا

عصام قام وحاول يستأذن ومرضيوش ،اتوسل وقال ظرفه المفاجئ

وامه قلقانه ودماغها ان اهل ماليكا اخدوها ومش عارفه تروح الحضانه تسال

كل ده ..

وباليونيفورم الملائكى بتاع طفله فسنها ،وشنطة المدرسة ع ضهرها
وبخطوات هادية

ماشية هنا فالشوارع الى بالنسبة لها كلها شبه بعضها
وكبيرة والعمارات تخوف والناس كتيييير وهى مش فاهمة حاجه

متعرفش بس غير انها خرجت من الحضانه ومركبتش الباص ومحدش
خدباله

وفبالها هتروح لامها او لدينا توديها لامها

وفبلد واسعه زى القاهرة هتعرف منين طفلة بنت ٤ سنين!!

مشيت كتييير وهى بتتلفت حواليها ،ولما تعبت قعدت عالرصيف
رجلها وجعتها وجاعت

كانت معدية ست فسن التلاتينات شافتها وقربت ناحيتها

الست: مالك يا حبيبتى ،انتى تايهه؟

هنا: لا انا رايحه لطنط دينا تودينى لماما

الست: طب فين طنط دينا

هنا: معرفش بس انا عارفه بيتها كبيير ولونه اصفر

الست صعبت عليها هنا واخدتها فحضنها وقعد جمبها

الست: طب انتى سبتى المدرسة ليه ،زمان ماما قلقانه عليكى
وكانت جايه تاخدك

هنا: لا ماما مش بتاخدنى انا بروح بالباص ،بس انا قولت لازم اروحلها
عشان هى وحشتنى
وبابا وتيتة مش عايزنى اروحلها

الست ( بتمسح ع راس هنا بلطف) اسمك ايه ياقلبي

هنا: هنا عصام عبدالصبور

الست: طيب قومى معايا ع بيتى وانا هعرف نعمل ايه عشان نوصل لطنط
دينا او لماما بس بلاش الشارع

هنا( ابتسمت) هتودينى لماما؟

الست: ان شاء الله حبيبتى ..يلا بينا

هنا: يلا ياطنط

الحلقه السابعه.

.¸.•'´¯'*•.¸¸.¸.•'´

"انت بتستعبط ولا شكلك كده ، يعنى ايه البت مش لاقينها ؟"

عصام: انت هتحور ،البت انتو خدتوها وانا حذرت قبل كده
والله او حد جه ناحيتها ..

معاوية ( قاطعه) بقولك محدش اخدها يابنى ادم انت بتفهم ازاى ،
لو هاخدها فانا هاخدها بالقانون مش زي الحراميه
هسرقها

عصام: البت فين يا معاوية متجننيش ،قالوا خرجت من المدرسة
مع زمايلها وركبت الباص
يعنى ايه موصلتش هنا

معاوية : هعملك محضر فالقسم ياعصام ع ضياع البت
عناد مالوش لازمه
ومحدش فيكوا يستحقها ولا حد بياخد باله منها

عصام: انت هتدينى درس ولا ايه ، انا الى هشتكيكم انكم خطفتوا البت

معاوية: انت واحد معندكش فهم ماشاء الله عليك
بقولك مش عندنا محدش خدها

عصام: يبقى الانسة المحامية ،والله لاعمل محضر فيكوا
كلكم
انتو كنتوا ناوينها اصلا

معاوية : مين يعمل فمين ، انت يتعملك فاهمالك
ليها انت والست والدتك
انا هنزل اقلب الدنيا عليها

قفل معاوية السكة ف وشه واتنرفز ...لبس هدومه
واعتذر عن شغله انهاردة
واول م جه فباله ،انه قال لدينا

دينا( اتخضت) يالاهوى ! هنا
يوم بحاله بره

معاوية : هنزل ادور عليها فنواحى بيته والمدرسة
هتكون راحت فين

دينا: معقول تكون هربت يا معاوية ،طفلة فسنها يجيلها تفكير زى ده

معاوية: والله الى يعاشر بنى ادم زىعصام وعيلته يطلع من هدومه

دينا: عشان تعذر اختك

معاوية: اختى السبب فالمعرفه الزفت دى ،اختى بعنادها وراسها الناشفه
هى الى صممت تربطنا مدى الحياه بناس زى دول
اختى الى جابت حته منه ضايعه بينهم قبل م تضيع دلوقت

دينا: مفيش منه الكلام دلوقت خلاص ..انا هلبس هدومى ونازلة معاك

معاوية :( سكت وقال بحزن) متقوليش لماليكا ... ممكن يحصل لها حاجه

دينا: انا اصلا مرضتش اقولها ع جوازه عشان ميبقاش عندها
امل وتفقده ان هناترجع حضنها

معاوية : ماشى ....هنزل واكلمك

دينا: ماشى

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

بتلم حاجاتها وبتحطها فشنطة ايدها ،وقفت شوية
وسرحت

زميلتها: مالك ....حاسة انك مش طبيعيه من ساعة م جيتى

ماليكا: حاسة بخنقه معرفش سببها من ساعة م صحيت

زميلتها: استغفرى بس وهتفكى ، انتى مبتقريش قرآن ولا ايه

ماليكا بحزن: والله مقصرة اوى بقالى فترة كبيرة لاصلاه ولا قران

زميلتها: لا يبقى الخنقه جايلك بسبب كده
حاولى تلتزمى فعباداتك ...ده ربنا بيقول الا بذمر الله تطمئن القلوب

ماليكا: ونعم بالله

مشيوا الاتنين ومروحين ، متملك ماليكا شعور وحش
قلبها مقبوض
حاسه ان عيونها فيها دموع بس مش عارفه تعيط !
محبوسة جوه عينها وقلبها
ومتعرفش السبب

رجعت ، طلعت فونها واتصلت ب دينا

وكانت مع معاوية فالقسم بيعملوا نشرة ب أوصافها

دينا( بتبص فالفون) ماليكا !

معاوية: اوعى تجيبي سيرة
دينا ردت عليها

دينا: ايوة يا ماليكا اخبارك حبيبتى

ماليكا: دينا انا مخنوقه اوى ، اتطمنى ع ماما كده
ومعاوية وهنا بنت كويسين

دينا كشرت وصعبت عليها

دينا: كويسين يا روحى ،انا لسه مكلمه معاوية
هما تمام بفضل ربنا

ماليكا: طيب حاولى تطمنى ع هنا ، كلمى عصام
معلش استحملى قلة ذوقه
بس اتطمنى انها بخير

دينا: يا لوووك مالك بس كويسة اكيد متقلقيش

ماليكا: معلش يا دينا عشان خاطرى ، قلبي مقبوض
وحاسة بغصه فحلقى مش طبيعيه

دينا( اتنهدت وقالت بخنقه) حاضر ..هكلمه واطمنك
متقلقيش بس وخليكى فالى انتى فيه

قفلت معاها ...

دينا: حست ( باصه لمعاويه)

معاوية: ام ! مشاعر فطرية
يارب نلاقيها يارب

دينا : يارب
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

طبق فيه رز وحته فرخه وطبق خضار صغنن جمبه..ع صنيه
مودياها

الست الى لاقت هنا ل هنا

الست: يلا عشان ناكل يا هنا

هنا قاعدة مكشرة

الست: ايه زعلانه ليه ؟

هنا: انتى مودتنيش لماما زى م قولتيلى

الست: طيب بكرة والله هدور عليها ، بس كلى دلوقتى
يلا
بتحبي البسلة بالجزر

ولا اعملك حاجه تانيه؟

هنا ساكته ومكشرة

الست( حضنتها) انا وعدتك ...والله هدور عليها واوديكى ليها

هنا: طيب احلفى

الست ( ضحكت) طيب ايه رايك اوديكى تانى مدرستك ، وبابا
يوديكى لماما ...هاه ؟

هنا: بابا مش عاوز يودينى لماما ابدا ،هو مش بقى يحبها

الست فهمت انهم منفصلين باين من كلام هنا

هنا: بابا هيتجوز واحدة غير ماما وبيقولى انها سافرت
بس هى مسافرتش
هى موجوده
طنط دينا لما بتكلمنى من وراهم بتقول كده

الست: يعنى انتى مش عاوزة تروحى لبابا ؟

هنا: لا ...انا عاوزة ماما
ماما بتحبنى اكتر منه وبتعملى ضفاير
وبتلعب معايا بالعروسات بتاعتى
وبنسميهم وبنعملهم كيك وشاى
لكن بابا كل م يشوفنى يزعق ، وتيتة كمان بتضربنى بالعصايه
بتاعتها

الست اتأثرت اوى لكلام ملاك فصورة طفله ،مالهاش ذنب فكل
الى بيحصل
فى اختلاف بين زوجين اودى لطلاق!
فقساوة اب
وجدة
فبعد حضن امها
كل الى تعرفه ان طفله فسنها لازم تكون لها ام ولازم يكون لها
حضن يحميها ..
هى مخها ميستوعبش كل الحروب دى ، يستوعب مدام
جت الدنيا يبقى لازم تعيش زى طفل بيتمتع ب امان
وحب وحنيه ..بس فين ؟

#لنورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

يونس: مالك

ماليكا : مخنوقه ومعرفش من ايه

يونس: ظهرتلك تانى القتيله ولا ايه ؟

ماليكا : لا

يونس: طب ايه بس الى خنقك

ماليكا : م قولت معرفش يا يونس بطل الحاح بقى
( بتتصل ب دينا)

يونس شايفها وساكت

دينا: الو

ماليكا: اتصلتى بعصام؟

دينا( بلعثمه) اه ...وكويسة هنا متقلقيش

ماليكا مصدقتش لاول مرة دينا تقولها حاجه

دينا: معلش يا لولو هقفل عشان انا فالشارع بس ومش
سامعه حاجه

ماليكا قفلت وسرحت

يونس: طب سؤال بس ممكن؟

ماليكا: قول

يونس: بنتك تمام؟

ماليكا: بتقول كده دينا بس مش مصدقاها
وبرضو معرفش ليه ؟

يونس،: بصى ممكن تكون خنقه وخلاص وانتى مكبراها

سكتوا ،بس يونس عاوز يخرجها من الى هى فيه باى طريقة
وكأن دى بقت مهمته طول الوقت

يونس: بقولك ايه ؛عمرك سمعتى عن قصة حب جت بالغتاته؟

بصتله نص بصة ماليكا وابتسمت ورجعت بصت قدامها تانى عالشارع

يونس: اهو حكايتى بقا انا ابتدت بالغتاته وبالعافيه
وهو كده ومفيش كلام تانى ههههههه

ماليكا: تعرف بجد بيجيلك اوقات تكون غتت ،انا ذات نفسي حسيت كده
اومال حالها هى ايه

يونس: لا ميغركيش ...حبتنى ودابت فدباديبي كمان
اومال

ماليكا: ياسلام ...ايه الثقه دى بس
ازاى يا يونس باشا

يونس: هقولك ...

فلاش باااااك

اسراء: الو ...

يونس: ايوة ازيك يا اسراء
انا يونس

اسراء: نعم ! انت عاوز منى ايه

يونس: طب م انتى عارفه ،معرفش ليه بتلفى وتدورى

اسراء: انت فاكر نفسك مثلا بتخوفنى ،لا معرفش عاوز ايه
ومتتصلش بالنمرة دى تانى
يونس: اصبرى بس بلاش الوش ده ، اصلك هتتخلقى عليا
مش هسيبك برضو

قفلت ف وشة السكة ،جرب يتصل بعدها عملته بلاك ليست

وضاعت منه اسراء !
لكن هو مستسلمش خالص ، حطها فدماغه ولازم يوصلها باى شكل

الى شد يونس لاسراء ، مش دقة قلب
مش لهفه
مش الحجات الى بنعرفها بتحصل بغرابه وبعدها بنعرف انه حب !
لا يونس شده حاجه اغرب من اى ان اى حد يتوقعها
ومصمم عليها ومش هيسيبها

مجربش يونس يتصل برقم تانى والحركات العيالى دى ، جاتله فكرة
متخطرش ع بال ابليس

يونس بيتصل واول م ردت اداها لبنت كانت قاعدة جمبه

البنت: الووو يافندم
شركة ......مع حضرتك

اسراء: ايوة يافندم

البنت: يافندم حضرتك كنتى طلبتى اوفر الميكاب الى عندنا مش كده

اسراء( باستغراب) لا مطلبتش

البنت: يافندم طلبتى اوردر الميكاب السينمائى الى عليه
هدية بتختاريها
رقمك مدون عندنا مش انسة اسراء محسن

اسراء: لا يا فندم مش انا يمكن اختلط عليكم الاسماء

البنت: مفيش مشكله متأسفين
يافندم

اسراء: ثوانى بس ، هو عرض الميكاب عبارة عن ايه

البنت غمزت ل يونس

قالتلها وقالت عالهدايا ، اسراء اغراها الموضوع
والصنارة غمزت
اخدوا عنوانها عشان يوصلوا لها عليه الاوردر ...

والى وصل الاوردر كان ...يونس!

بتفتح باب شقتهم اسراء ..

اسراء( بخضه) ايه ده !

يونس: عرض الميكاب يافندم ( غمزلها وكمل كلامه بصوت واطى)
قولتلك مش هسيبك

اسراء( بتقفل الباب) اتفضل من هنا مش عاوزة

يونس( زق بايده الباب) لا مش هينفع كده،لحسن
بعدها هتحصل حجات مش كويسه ( مسكها تانى من معصم ايدها)
هاه !

اسراء حست ان غصب عنها لازم تتقبله تشوف عايز ايه

اسراء: انت عاوز منى ايه ،هى المعرفه بالعافيه !

يونس،: هى مش بالعافيه ،بس لينا احنا الاتنين
لازم نعرف بعض
ولازم جدا( بيلمح لحاجه هى فهمتها)

اسراء: ارخم انسان شوفته فحياتى

يونس: بالعكس انا طيب جدا وربنا
( نازل) افتحى البلاك ليست وهكلمك
ولو معملتيش كده
هعرف اجيبك حتى لو غيرتى عنوانك( غمزلها بعينه وضحك ونزل)

____
ماليكا ( بتضحك ) يابنى ايه السخافه الى انت فيها دى ،م ليها حق
تسيبك هو بالعافيه

يونس سمع كلمه ليها حق تسيبك وسرح وبص بعيد
عن ماليكا

ماليكا: انت زعلت منى ولا ايه؟

يونس: لا بس كلمة ليها حق تسيبك ...

ماليكا( قاطعته) ضايقتك؟

يونس: لا بس الى بيسيبوا بعض بيبقى باتفاق
بيبقوا عارفين انهم هيبسيبوا بعض
لكن الى بيتاخد ع مشمه ومفهمش ...ولحد دلوقت مش فاهم

ماليكا: حاولت تكلمها تانى ؟

يونس: هى قطعت كل الطرق الى ممكن توصل ليها ...سيبك
فكيتى ولا لسه مخنوقه

ماليكا : يعنى انشغلت فكلامك ولاهانى شوية ...ميرسى يا يونس

يونس: ع ايه حكاياتى فخدمتك ،ع بال م تكمليلى انتى باقى حكاياتك

ماليكا: انا دلوقتى مبقاش ليا حكاية ولا شاغل بالى
الا ميرفت دى والى عايزاه منى

يونس: شايفه نفسك اقل من انك تساعديها

ماليكا: هعمل ايه انا لواحدة اتقتلت ؟ هتحول لمخبر واحقق فقضيه
اذا كنت كل القضايا بتاعتى خسرتها خسارة مفيش بعدها

يونس: ممممم عندك حق
بس عارفه ، انا مستغربتش ان مجرد روح طلعت لك وبتطلب حقها منك

ماليكا: ليه بتقرا فعالم الارواح كتير؟

يونس: اه بقرأ بس مش ده السبب ، انتى قوة كامنه يا ماليكا
بلاش استهانه بنفسك
انتى بس بتحسى انك بالى حواليكى اقوى
بس انتى وحدك اقوى بكتير من ناس كتير

ماليكا سمعت كلام يونس وحست فعلا ان جاتلها شجاعة وقوة غريبة بمجرد
ايمان حد متعرفوش
بيها وبالى تقدر عليه كده

يونس: انا معرفش حكاياتك ،بس الى اعرفه
انك الى عديتى بيه مش سهل ، ووصلك لهنا
اعتقد ان الى جاى فحياتك اقل بكتير من الى عدى

ماليكا: عندك حق ...ف دى بقى ارفعلك القبعه
انا شوفت واستحملت الى لو انكتب فرواية
محدش يصدقوا

يونس: يبقى هتقدرى يا ماليكا

ماليكا: يا اخى عاوزة اعرف بجد ، ثقتك فيا وف ارائك ليا جايبها منين

يونس: هههههههه مش قولت روحك فتنتلى ( غمزلها)

ماليكا: هو احنا هنطبق غتاتك ع اسراء معايا ولا ايه ،لا انا لابياكل معايا
الغتاته دى ولا غيرها
انا عديت بمطبات فحياتى تخلينى امشى عالصراط

يونس ضحك وبص قدامه وهى كمان ضحكت ع كلامها ...

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

هيصة كبيرة ولمه فقاعة من قاعات الافراح ...

الكل مستعد دخول العروسين ، تعالو نعرفكم ع ملابسات المناسبة دى

العروسة والعريس طالب وطالبة من زمايل ماليكا وعمر ودينا فدفعتهم
كانت بتجمعهم قصة حب والحمدلله اتكللت بالتوفيق والدبلتين ...

مطولش عليكم كانت فرحة كل دفعتهم لما سمعوا الخبر وعزموهم
بقوا يعزموا الناس معاهم وبقوا يرتبوا لليوم ده وياهم ...

فاليوم ده ، كانت ماليكا ليها اطلاله غير عادية ، فستان سواريه
وحاطه ميكاب وشكلها متغير واحلى !

وباقى بنات دفعتهم طبعا ،شوية وجت شباب الدفعه وقعدوا وياهم
وعملوا فريق كبير كده منتظرين دخول العرايس من باب القاعة

وبالصدفه داخل عمر من ضمن الحضور ،عمر مش بيحب لبس البدل
بتقيده !
كان لابس فيست رمادى وبنطلون نفس اللون وقميص من تحته لونه بينك
وكرافت
شكله كان ملفت
وهو داخل ، تابعته ماليكا بالنظر اول م دخل
قلبها دق دقه هى مش فاهماها ...هى ليه اهتمت انه يحضر وتشوفه
عيونها عليه

اما هو فهو برسيانه وعقله ، كان من غير م حد يحس بيدور برضو عليها
بس من تحت لتحت !

عيونهم اتلاقت !
وكان بينها كلام كتير ، ماليكا كانت هتموت وييجى يسلم عليها زى بقية زمايلهم

وهو كمان كان عاوز اى تلكيكه توصله لتربيزة البنات يسلم عليها
ويقرب يشوفها اوضح بجمالها ده
وشكلها الجديد الى مش متعود عليه ...

ماليكا مستغربه ايه اهتمامها المفاجئ بعمر ده !
حتى هو مستغرب هو ليه حابب يشوفها عن الاول وبدات تشغل تفكيره ..

اشرف: ابه الحلاوة دى ياعمور ،الى يشوفك يقول انت العريس ياعم

عمر: ههههههه من بعض م عندكم يا اشرف باشا

اشرف: لا ده الى باشا والله وبرنس البرانيس كمان
سلمت عالبنات

عمر( اتلعثم) لا اصل لسه جاى

اشرف : تعالى شوف اتبدلوا ياراجل ،ده احنا معانا غفر الصبح

عمر ضحك ورايح ناحية البنات مع اشرف ، ماليكا وهى بتتكلم
مع البنات

اخدت بالها
قلبها بقى يدق سريع ورا بعض مش ملاحق ،خبت فرحتها ببصه بعيد
عنهم ورجعت مسكت نفسها وبصت تانى وكأن عادى زى الاول

عمر سلم عالبنات ،وجه عند سلامهم لبعض كان فى هداوة وتطويل كده
متفهموش ليه؟
اتكلموا شوية وجت العرسان ...كل الى فالقاعه اتلفت لهم
وانتبه وبقوا البنات يرشوا عليهم ورد وهما داخلين

وفرحانين زمايلهم اوى بيهم ، دخلوا وهيصولهم ورقصوا وياهم
وفرحوهم

وجت الرقصة السلو ..كله ركز معاهم
الى اتمنت حبيبها فبالها ،والى بص ع بنوتة بيحبها منهم ومش طايلها
وبيتمنى يوم زى ده وياها

واتلاقت من وسط كل دول ،عيون عمر وماليكا !

هما مش عارفين ليه بصوا لبعض فالوقت ده ومع بعض
وكان اشارة جت للاتنين فوقت واحد
طولت البصه وكانها بتقول كلام تفهمه بس عنيهم ، ابتسمت
وابتسم ...

بخطوات هادية جه ناحيتها ووقف وكلمها ،فمسمعتش من صوت
المزيكا عالى فالقاعه
ميل قرب ودانها ...كانت الحركة دى لوحدها مع انها عادية
كفيله ان اعصابها تسيب بدون داعى

عمر : مبسوط لعلاقتنا اتغيرت من الخناق كل م نشوف بعض
وسخافات اننا بقينا حتى عارفين نسلم ع بعض

ماليكا ( ابتسمت بخجل) دى حاجه حلوة يعنى

عمر( مبتسم ) بالنسبة لى اه...وانتى؟

ماليكا: ( مخبية خجلها) وانا كمان

عمر : ايه رأيك يا ماليكا تحبي تدربي عند حد من المحامين عشان بعد التخرج
تلاقى شغل ع طول؟

ماليكا( بتحاول تعلى صوتها) الشغل مش فدماغى ...انا هاخد الكلية واركن
ههههههه

عمر ابتسم وسكت وهو بيبص عالعرايس ،هى حست انها مدب وانها فوتت فرصة
متعرفهاش ايه هى بس حست انها ردت بغباء

ماليكا: هو ممكن اتدرب اه ،حتى اعمل بيها الكلية الى مش بتأكل عيش دى

عمر ( ابتسم) تمام ونقول لدينا بالمرة وتعالو انتو الاتنين اتدربوا عند المحامى
الى بتدرب عنده

ماليكا: تمام

خلصت الرقصة وجت هيصة للبنات حوالين العروسه زمايلها وقرايبها ،والشباب
حوالين العروسه

جم شوية بنات اخدوا ماليكا ودينا وراحو ناحية البيست

لكن عمر مراحش مع الشباب ،مش عشان بس اعاقة رجله
لكن هو هادى وساكت بطبعه مش بتاع تنطيط

وهما بيهيصوا البنات ،كانت ماليكا مبسوطه وبترقص وياهم وبيعملوا حركات مع
بعض

عمر كان موجه نظره عليها ومش بيبص لا كده ولا كده ، وكأنها بتتحرك بالبطئ
قدامها عالاغنيه وبترقص
وتهزر وتضحك وتعمل حركات بايديها معاهم ، كانت وشه بيضحك تلقائى وهو بيراقب
حركاتها ..

خلصت الخطوبة ، وكله مروح

ماليكا بتوقف تاكس وبتقول عالمكان كان عمر موقف واحد وبيقول ع نفس المكان
الى رايحاه ماليكا !

دينا: طيب م تركبواسوا احسن م كل حد منكم فتاكس

ماليكا: هو انت ساكن فشارعنا ؟ اول مرة اعرف

عمر : لا رايح لواحد صاحبي هناك ..

بسمة: خلاص اركبوا سوا حتى تونسوا بعض ،يلا احنا يا دينا
سلام

ماليكا ابتسمت ،فتح لها الباب الى ورا عمر ،وركب قدام جمب السواق

طول الطريق كانت ماليكا بصاله فالمرايه ،لكن هو كان اتقل من مسمار وقع فميه!
باصص من الشباك عالشارع ولاهو هنا

وصلوا ونازلين

ماليكا بتطلع فلوس

عمر حط ايده ع ايدها واتكسفت واتكسف وياها ! وبعد كده رجع ايده

عمر: هو انا مش راكب معاكى ولا ايه؟

ماليكا: بس انا كنت هاخده لوحدى

عمر: الكلام ده لو مكانش معاكى راجل ( اتدور يدفع للسواق وماليكا حاسة برفرفه
هو موقف عادى لكن دقات قلبها كانت بتتلكك )

ماليكا وهو اتمشوا جوه الشارع ووصلوا لعمارة ماليكا

ماليكا: اتفضل

عمر: تسلمى ،حمدلله ع السلامة

مشى خطوتين ورجع تانى

عمر: ماليكا!

ماليكا: نعم؟

عمر: رقمك بس عشان ( سكت ثوانى ومتوه ) ال..الشغل
التدريب

ماليكا: اه ... اكتب
٠١.......

عمر كتب

عمر: تصبحى ع خير

ماليكا وانت من اهله

كانت فرحانه والسبب مجهول ،او السبب معروف بس هى بتضحك ع روحها
ومصدقه انها مش عارفه زيه بالظبط
اما اتلكك بالتدريب عشان ياخد نمرتها ...ويكلمها !

___

عمر ايزيس بخط عريض عالورق ورايح فيها خالص ، جت وقعدت جمبه
منة زميلته فنفس مكتب المحامى الى بيشتغل معاه ..

باصة للاسم واتضايقت بس مسكت نفسها ..

منة : عمر ...قضية دكتورة ضحى الالفى اتأجلت لامتى عشان ابلغ

عمر مش سامع

منة: عمر انا بكلمك

عمر ( ركز معاها) نعم يامنة مخدتش بالى

منة: ولايهمك ، قضية دكتورة ضحى

عمر: اه اتاجلت ،الملف عندك عالجهاز بتاعها

منة ( هزت راسها ) ماشى ...
عمر هو انا ينفع اسأل سؤال ؟

عمر: اتفضلى ( وهو بيظلل الاسم)

منة: هى مش حكاية ايزيس دى خلصت ، لسه شاغلة بالك
اوى كده
كان فيهاايه مختلف

عمر: وده سؤال واحد ولا ٣ اسئله يامنة ؟
ارد على انهى

منة: على الى انت عاوزة يا عمر

عمر: هى اجابة واحدة عالتلاته ...حياتى الشخصية مش
باب للحديث يامنة

منة: انا مبتدخلش فيها ،بس احنا زمايل من زمان
وبينا عشرة
وحالك صعبان عليا

عمر: ومطلبتش انى اصعب ع حد ...

منة ( بغيرة وعصبيه) هى مش الحكاية خلصت! ومش هتنفع تانى
هى مش اتجوزت وخلفت

عمر : انا مش فاهم بتتكلمى بحرقه ليه

منة: ع فكرة ، الجرايد كتبت وكل الناس عارفه
انك واقع فواحدة قتالة قتله ومدمنة برشام

عمر: وانتى مالك !
منة: مالى انى متضايقه عشانك !! انت تهمنى ياعمر وربنا العالم

عمر: يامنة ....انا مقدر كلامك وانا مشتكتش لحد
انا تمام وكويس
بشتغل
منة: متضايقه عشانك شاغل بالك وتاعب قلبك عشان واحدة
بيهون عليها كل حاجه حتى الناس الى بتاكل معاهم عيش وملح !
دى قتلت ابو جوزها ..جد بنتها
راجل داخلت بيته وكلت وشربت معاه
انت ازاى شايفها ملاك

عمر: معرفش مدية لنفسك ولتفكيرك مساحه كبيرة فالموضوع ده ليه
انا عاوز اقفله يا منة
ومش عاوزك تتكلمى معايا فيه تانى

قام وسابها متضايقه لسذاجته فحب واحدة مش بتاعته ،وهى بكل حاجه فيها بتحبه!

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

نخل كتيرة ....وترعه قصادها
اراضى زراعيه واسعه ....وبيوت وسط الزرع مبنيه بالطوب الاحمر

والصورة بتتشوش
وترجع بتلمح كلمة فيها س ....ط
زى يافطة محطه

وبتتشوش الصورة وتسمع طلقات نار ...وتختفى الصورة !

وتصحى من النوم مفزوعه ماليكا ...تقوم متوقعه تلاقى ميرفت القتيله موجودة
جمبها
بس مش بتبقى موجودة

ابتدت تفهم ايه الى شافته ممكن يكون له علاقه بميرفت ولانها اتعودت ان تلاقاها ع فجاة توقعت وجودها

لكن توقعها كان خاطئ ، معرفتش ترجع للنوم تانى

جابت ورقه وقلم وحاولت ترسم البلد الى شافتها دى عشان متروحش من دماغها ،،

وكتبت س...ط
الحرفين الى شافتهم من الكلمة الممسوحه

واتكملت باقى الكلمة وحدها بس بالدم !!
اهتزت الورقه بين ايديها وخافت ،جسمها كله ارتعش بوجودها

بصت قدامها ولاقت ميرفت واقفه وهى الى شاورت عالورقه وكملت الكلمه

ميرفت: اقريها !

ماليكا( بخوف) اسيوط !!
بلدك اسيوط ...طب فين بالظبط

ميرفت شاورت عالنخل الموجود بالرسمه

ماليكا: النخل !!
كل بلد زراعيه فيها نخل ؟ تقصدى قرية طيب

ميرفت بصالها

ماليكا: قوليلى طيب مش بتكلمينى ليه

ميرفت: هتساعدينى ؟

ماليكا سكتت وصعبت عليها ميرفت باستنجادها ليه

ماليكا: وانا اعرف ايه فبلادكم دى واساعدك ب انهى طريقة ،انا عمرى م عملت كده
انا طول الوقت فحالى

ميرفت رجعت تبكى دم

ماليكا: والله انتى صعبانه عليا ونفسي اعمل اى حاجه اريح بيها روحك
بس انا مقدرش

ميرفت اختفت !!

وماليكا رجعت لحيرتها ، كام يوم ومظهرتش ميرفت تانى
بتفكر لوحدها
لا دخلت دينا معاها ولا يونس

ووسط تفكير كتير ،بتيجى عيونها ع صورةهنا الى عاملاها خلفية شاشة موبايلها

عيونها بتحزن فسكوت ،جواها مش متطمن عليها كل م تيجى فبالها ومش عارفه ايه السبب
يمكن عشان مش متطمنه عليها اصلا مع عصام وحماتها
بس هى هناك خلاص بقالها فترة ،ليه الاحساس الجديد ده ؟

ماليكا طردت الفكرة وان هنا بخير ومش هتشوف فيها اى حاجه
ورجعت لمرجوعها
ميرفت واسيوط وحجات لا هى فاهماها ولا عارفاها..

روحها بتستنجد بيها اوى ،وعاملالها قلق ..

جواها عاوزة تساعدها ،شكل روحها مظلومه ..
بس هى حتى مبتعرفش تساعد نفسها !

افتكرت كلام يونس ان جواها قوة بس هى بتستهين بروحها ..

مشوشة
مدووشة
جواها كذا رأى زمش عارفه ترسى ع حال..وايه العمل؟!

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

يونس: هتروحى طبعا

ماليكا: اروح فين ؟ وشغلى ودنيتى الى هنا

يونس: يومين اجازة مش موضوع

ماليكا: وتفتكر هعرف كل حاجه فيومين ؟ انت بتهزر
وهروح فين فيها اسيوط
ادور بمنادى

يونس: بتقولى شاورت عالنخل؟( بيفكر)

ماليكا: اه ،انا فهمت تقصد بلد زراعية قرية او حاجه

يونس: او النخيلة ف اسيوط

ماليكا سرحت وسكتت وحست ان صح كلام يونس

ماليكا: انت كنت مخبر قبل كده؟

يونس: اه ليه ههههه ،انجزى بس وفكك من الهزار

ماليكا: وهعمل ايه فبلد معرفهاش ...وهروح ازاى لوحدى ؟
يونس: هنروح ...!

الحلقه الثامنه

تنوية بسيط
(قصة القتيلة ميرفت حدثت بالفعل )

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

"هموت لو ملاقيتوش هنا "

معاوية: ( بحزن) ياامى والله بلغت فكل الاقسام ،ودورت فكل حته
ومستنى اشارة حتى
حتى المتخلف الى اسمه عصام بيقولى ان هو كمان لسه ملاقاهاش

ام ماليكا: هنا اتخطفت يعنى ! ممكن يكون جرالها حاجه ( فعيونها
دموع)

معاوية: ان شاء الله هنلاقيها ،ربنا مش هيسوءنا فيها
هى مالهاش ذنب
ودينا كمان بتدور بمعرفتها والله م ساكتين

ام ماليكا: انت عارف كده هنا بقالها اد ايه برة البيت ؟
اهى مع عصام كانت ف امان
بتاكل وبتشرب ونايمة فسريرها!
دلوثت هى فالشارع يا معاوية ...بنت اختك فالشارع
بايته فيه ومتلطمه!
ده لو لسه عايشة يا معاوية !!( انهارت فالعياط)

معاوية : بعد الشر يا امى باذن الله هتتلاقى ،والله
انا واثق فربنا

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

فقطر الصعيد ...
كانت ماليكا ويونس سوا رايحين لمهمة البحث الى اتحط فيها ماليكا مرغمه ؛
الى اسيوط !

يونس: حركة مجنونة انى اروح معاكى مش كده ؟

ماليكا كانت حاطه الهاند فرى فودنها وبتسمع فالفون ،غمزها فكتفها انه بيكلمها
ف انتبهت

ماليكا: ايوة يا يونس

يونس:بقولك مجنون عشان جاى معاكى

ماليكا: لأ بالعكس،وجودك بصراحه مقوينى اكمل المشوار ده

يونس: طب ليه مرفضتيش تروحى اسيوط اصلا ،ومقولتيش وانا مالى
وكده

ماليكا: بص...انت شجعتنى
والبنت دى حسيت انها مظلومه وصعبانه عليا اوى
حاسة ان روحها عاوزة ترتاح ...بس الى مش فاهماه بجد
هو ايشمعنا انا الى ظهرتلى
هى من اسيوط وانا من القاهرة وعايشة فطنطا ...يعنى ايشمعنا انا الى عاوزانى
اجيب حقها

يونس: حفهمك حاجه انا عارفها ، الروح مش لازم تكون من نفس البلد
والجو الى انت. بتقولى عليه ده
هو مش مكنب تنسيق
الروح بتختار الى بيحس بيها ، عنده حاجه مشابهه له
بينه وبين الشخص ده لينك محدش عارفه
حاجه بتخليه يروح للشخص ده وبس لافاهم ليه ولا عارف ليه
فجأة بقت روحه شفافه لحد بيشوفه وبيسمعه ،فبيطلب ياخد حقه
لان روحه بتتعذب
لانه قتيل ...مش ميت موته طبيعيه

ماليكا( بصاله باستغراب) انت بتعرف الحجات دى منين

يونس: ( بافتخار) قريت كتييير وعارف كتييير

ماليكا: بستغرب ان روح البنت دى اختارتنى انا اجيب حقها
الى هو انا نفسى معرفتش اجيب حقى
فاى حاجه

سكتت وكملت كلام وهى بتقول بحزن

ماليكا: اترميت فشقه مهجورة من سنين ،بين ناس معرفهمش
بشغل اول مرة اشتغله
بنتى مش فحضنى
سيبت بيتى واتهجرت بسبب غلطة غير ارتكبها مش انا !
اهلى بيستعروا من الى انا فيه ...
توأمتى ونص روحى راحت ومعرفتش اعمل ليها اى حاجه

دموعها نزلت وهى بتتكلم ، فوجئت ب يونس مطلع منديل
وبيمسح دموع عنيها من ع خدودها !
وكان بيعمل كده باهتمام ...فرح قلبها نوعاً ما
ف وسط كم الهموم الى بتشوفها وبتعيشها !!
#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

مكالمة دايرة بين الست الى لاقت هنا وصديقة ليها ، كان مضمونها
هو هنا ووجودها عندها
ملابسات الامر عند الست دى غريب جدا ،هى ربنا مرزقهاش ب اولاد طول
فترة جوازها كام سنة لحد م زوجها اتوفى قضاء وقدر وفاة طبيعيه
لكن حان اجله!

بقت وحيدة من غير ولد ولا زوج ولا عاوزة تتجوز ، حست ان هنا وقعت
فطريقها وكأن ربنا عوضها ،وخصوصا بعد م عرفت ان مامتها وباباها منفصلين
وشكل كده فى مشاكل عليها
وبقالها اهو كام يوم عندها ...ومحدش سأل او شافت نشرة باوصافها فحتة من المتغيبين

هى حست انها هدية ربنا ليها ،هتربيها وتعلمها كويس
واحسن من اهلها وتوفرلها الحنان والامان الى عاوزاه
لكن صديقتها شافت انه حرام،وان اكيد اهلها هيموتوا عليها دلوقت
واكيد امها هتتجنن لانها بنتها وحته منها وخرجت فالاصل تدور عليها

قالتلها لازم توديها لاقرب قسم وجايز عاملين نشرة بغيابها والاقسام تبلغ بعض
لحد م يوصلوا لاهلها

لكن الست الى لاقت البنت مش بتفكر بانانيه ع اد مصلحة هنا ،شايفه ان ممكن باباها
يلاقيها ويضربها ويحبسها بعد عملتها دى
خافت عليها وشافت فوجودها امان عندها...حتى لو كانت كل يوم هنا بتزن عشان
تروح لطنط دينا ..او ماما
ومش بتنسي ابدا هى خرجت عشان ايه ،مهما الست دى قدمتلها ..

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

بنتين قاعدين جمب بعض وشكلهم اخوات ، فيهم شبه كبير من بعض
بيحكوا وبيغمزوا بعض شكل فى موضوع بينهم متفقين عليه????

واحدة فيهم بتظهر فونها للتانية وباين فى مسج او صورة
المهم انهم منسجمين تماما وكانهم مش فقطر وهاتك يا ضحك ومسخرة..

ماليكا عيونها معاهم وابتسمت ...كانها شايفه نفسها هى وخديجه
ايام زمان اما كانوا منسجمين سوا مش بيفرقهم غير جسمين وبس
هما فالاساس روح واحدة ومش روحين !

مناغشة البنتين دول لبعض ،فكرتها باحلى ذكرياتها
ذكرى بتجمع م بين حب عمرها ...وتوأم روحها !

فلاااااااش بااااااك

عالسرير سوا ومتغطين بالغطا وجو شتا ،ولابسين فروات وسويت شيرتات
ومجات الكاكاو باللبن فايديهم وضوء هادى ف اوضة البنات

وصوت الحكاوى هادى وواطى ...لكن الضحكات فضحتهم ...

خديجة: م تخلصى وتقولى هتحايل على اهلك

ماليكا: هقولك ياجزمة استنى ، بس بصى متتريقيش زى كل مرة

خديجة:لا مش هتريق هبلع لسانى اهو( حطت ايدها ع بوقها)

ماليكا: هو كان بيحكى معايا وكده زى كل يوم ( عيونها لمعت)
وصوته كان حنين اوى
وكان هادى اوى

خديجة: كل ده عارفاه انجزى

ماليكا: استنى واحدة واحدة ياحمارة اكروت يعنى

خديجة : لا يا امى متكروتيش ...هاه وبعدين

ماليكا: كلام كتير عن الكلية وكده وشغل التدريب صعب ولاسهل
وكام موقف من اصحابنا حكيناهم وجت سيرة اشرف وبسمة
يعنى عشان مرتبطين وقريب هيتخطبوا

فكان بيقولى فكرة حب واتنين يحبوا بعض دى مش فكرته هو طول
عمره لا قلبه دق لحد ولا حب ولا شدته بنت لحد ما ...
وراح سكت يابت وانا قلبي فضل يدق يدق كأنه جرس والمصحف

خديجة( بشغف ) اه كملى كملى لحد ما يعنى انتى لحد م حصل اللينك معاكى يابومبو
( بتغمزلها)

ماليكا: بجد يعنى! انتى شايفه انه يقضد كده ؟

خديجة : طبعاااا ...اومال بيرغى معاكى كتير ليه
واخدك المكتب الى هو فيه تدربي ليه وايشمعنا انتى

ماليكا: معرفش يا ديچا ...حاسة انى يومى حلو بسببه
وكل حاجه كمان

خديجة: طب كملى وبعد م قالك لحد ما وسكت

ماليكا: بس وقالى انتى ايه بقى ايه؟
انا اتكسفت اووووى ،روحت قولتله لا الى فات يعنى كان عبط وكده
ابن الجيران والهبل ده
واد فشارعنا يعنى

وده سمع كلمة واد فشارعنا وسخسخ ضحك مبطلش

خديجة: عنده حق ماهو بيسال واحدة هبلة اساسا

ماليكا: بس يابت اسكتى،والا مش هكمل

خديجة: لا كملى فعرضك

ماليكا: بس روحت انت محبتش ليه طيب
عشان مفيش حد شدك
ولا شايف انه حرام مثلا وعاوز تحب البنت الى هتتجوزها؟

راح قالى لا مش عشان حرام
الحب مش حرام يا ماليكا ...احنا الى بنعمل حجات حرام باسم الحب

سكت ومفهمتش قالى ساكته ليه
قولتله هقول ايه
قالى لا خلاص خليكى ساكته ...حتى سكوتك حلو زى كلامك

خديجة( سقفت) اللهم صل عالنبي ،اوووى بقى
وبعدين

ماليكا: اتلخبطت وعرقت واتبرجلت وقولتله هقفل لانى هنام
يالاااااهوى عالوقت الى بيعدى وياه
معرفش ازاى مكنتش بستظرفه فالاول
معرفش ازاى كنت بعامله من مناخيرى
ده سُكروعسول اوى ...بيحلى اليوم والوقت وكل حاجه

خديجة( بتغنى بتريقه ) مش بس اوقاتى بتحلو ..دى الدنيا والناس
والجو
وايييييييه

سقفت معاها ماليكاومسكت فرشة الشعر وكملت معاها غنا ونطنطه عالسرير
وحاجه اخر جنان..

__

يونس: شكلى جبتك من اخر الدنيا ( باصصلها) مالك
كنتى سرحانه ف ايه؟

ماليكا بصتله وابتسمت وبصت لشباك القطر

ماليكا: كنت ف اخر الدنيا فعلا يايونس...

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
رشا:مالك ياعصام بتكلمنى كده ليه

عصام: ايه يارشا مالك ،مخنوق ومش طايق نفسي

رشا: انا بتصل اتطمن عليك تروح ترد عليا بالشكل ده

عصام: هو انتى يعنى عاوزة اتعامل معاكى ازاى ؟

رشا: ايه الطريقة دى ياعصام انت بقالك كام مصدرلى وش مش حلو

عصام: ياناس واحد تايهة ولا مخطوفه ،مش عارف اراضيها
وخايف تكون ماتت
ودى عاوزة اقعد احب فيها
واقول كلام حب

رشا: هو انا قولتلك حب فيا وقول كلام حب ؟
انا بتصل اتطمن عليك ترد عليا كويس

عصام: خاضر ياست رشا ابعتيلى ليست بالطريقة ازاى اعاملك بيها يارشا
وياريت الكلمات وعدد الحروف لو تكرمتى

رشا( بعصبيه) انت مستفز !
انا هقفل...باى

قفلت وهو نفخ ورمى الفون جمبه ولا اهتم .

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
وصلوا الاتنين يونس وماليكا لاسيوط ...وبدأت رحلة البحث!
نزلوا النخيلة وقالوا يسألوا

يونس: اسمعى ...مش هنقول بنسال عن جريمة قتل
هنقول اننا صحفيين مثلا بندور عن قضية جديدة كده
وبنكتبها وحد قالنا ع موضوع ميرفت ده فهمتى

ماليكا: تمام

زى م قال يونس عملت ،كانت متقمصه دور صحفيه
وبتسال عن كقتل بنوتة اسمها ميرفت فسن ثانوية عامه كده
من فترة

لفت وسالت كتييير ناس تدل ع حجات وناس مش عارفه وناس تستعبط
بس كل م ماليكا تتعب يونس يشجعها تكمل ومتيأسش

لحد م وصلوا لطرف الخيط ..

راجل كبير: ميرفت الجارحى بت الجارحيه ؟

ماليكا بتبص ليونس ومش عارفه هى ولا لا

ماليكا: هى دى اتقتلت من كام سنة ؟ وازاى

الراجل: من سنة ، بس لو بتسالى عن ميرفت الجارحى
دىالىعاوزة تعرفى قصتها
شايفه البيت الى هناك ده

ماليكا: انهى واحد

الراجل: الى قدامه كولدير ميه

ماليكا: اه شايفاه ..

الراجل: ده بيت جدتها

ماليكا ابتسمت ليونس وشكرت الراجل ...ومشيت راحت للست

خبطت خبطة والتانيه والست فتحت

ماليكا: اقدر ادخل ياحجه ،احنا ضيوف وجايين من طنطا
وكنا قاصدينك فحاجه وماشيين ع طول

الست العجوزة : اتفضلى يابتى ...يا اهلا وسهلا( بلكنة صعيدى)

دخلت ماليكا ويونس ، يتفحصوا البيت بعيونهم
بيت بالطوب الاحمر ،مدهون دهان قديم وشكل البيت عمره كتييير

بس فيه راحه وبراح غير عادى

الاثاثات المشهور بيها وجه قبلى ، زى الكنب الخشب وعليه مساند متنجدة
زى الحصير فالارض مفروش

صورة لراجل عجوز عالحيط ويدل ع ان ده صاحب البيت ...حجات بسيطة بتدى
البيت طابع خاص

الست العجوزة: يا اهلا يابنيتى ...نورتى

يونس ( فودن ماليكا) اساليها ع طول

ماليكا: مش هطول عليكى ياحجه انا عارفه انك مش عارفانا ،احنا صحفيين
وعرفنا بموضوع حفيدتك ميرفت وعاوزينه بالتفصيل عشان نكتبه

الست العجوزة سمعت اسم ميرفت وسكتت وسهمت

الست العجوزة: وهو موضوعها ايه ميرفت غير ان ربنا كتب
كديتى يابنيتى ،انتو بتطلعوا فالتلفزيون يعنى؟

يونس هزلها راسه فهى وافقت الفكرة

ماليكا: اه ...وهنطلع حكايتها عالتليفزيون ،عاوزة اعرف حصل ايه
واتقتلت ليه

الست العجوزة: ميرفت راحت فدا التار يابتى !

ماليكا: تار !!! ( اتخضت) تار من بنت ؟
ازاى

اليت العجوزة: هو ده الى حصل يابتى ،ومحدش جه فباله انهم هياخدوا حقهم
من بت فالعيله
سفرنا كل ولاد العيله خايفين من التار ، وفالاخر ياخدوه من بت غلبانه وهى طالعه
عالمدرسة تتعلم ( عيطت الست)

ماليكا: طيب اهدى ياست بالله عليكى ( قامت حضنتها وطبطبت عليها)

طيب ممكن تحكيلى القصة من الاول ؟ لو مش هتتعبك

الست ابتدت تحكى

الست العجوزة : طيب اجيبلك واجب الاول ( قايمه)

ماليكا: والله م تتعبي نفسك ،انا بس هعرف الحكاية وامشى عشان الحق القطر

الست: يابنيتى ، كانت عركة بين الجارحيه وبين بيت طحان ،ع سقية مية
الزرع

كل ارض ليها دور تسقى
وهما ارضهم كانت جمب بعض ، اتعركوا فيوم دول يقولوا احنا الاول نسقى
ودول يقولوا احنا الاول
اتعركوا العيال مع بعضهم سوا ،جاى واحد من بيت الجارحيه يفض
العركة ومعاه سلاح
كان م عيضرب فالهوا لجل م يخوفهم ،ضرب طلقتين
جت فمرة من بيت طحان كانت واقفه فالبلكونة ..ومن غير قصد صابها وماتت
ع طول

ماليكا اتخضت وبان ع ملامحها

الست العجوزة: وبعد كديتى حاولوا يصلحوا وبيت طحان ناسينش تارهم ان امهم
ماتت
ماهى كانت ام العيال الى كانوا م عيتعركوا

كانوا ناويين عالتار ، جه المحافظ وعرف وعمل صلح م بينهم يابتى
والامور هديت وسكتوا وقولنا خلاص اتصالحوا
اتاريهم بردك عاوزين التار

وفيوم طلقوا النار ع الواد جاد اخو ميرفت الكبير جت الطلقه فرجله

راحو خافوا بيت الجارحيه ع ولادهم ...سفروهم
قالوا بيت طحان مش هيسيبوهم ابدا حتى بعد م جه المحافظ

وعدت سنة يابتى وقولنا خلاص يابوى ...كان الخوف كله عالرجاله الكبيرة

ومحدش كان عارف انهم ياخدوا مرة قصاد مرة!

ميرفت بس الى كانت فاضلة ع تتعلم وتخرج من البيت لسه

استنوها يابتى فيوم وخدوها من وسط صحباتها ، وكسروا راسها بالعصيان
منهم لله
لحد م ماتت ( انهارت فعياط متواصل من غير صوت)

ماليكا باست دماغها وعيطت عشانها ولانها شافت بعينها اخر حاجه حكتها الست
يونس اتأثر وبص فالارض

ماليكا استأذنت ومشيت برغم تصميم الست ع انها تفضل عشان تاخد واجبها
لكن ماليكا عرفت تقنعها ان لازم تمشى قبل الليل م يدخل عن كده ويدوب تروح .

خرجت تسال عالمحطة ع اقرب قطر رايح القاهرة لاقته متاخر اوى ، قعدت مخنوقه
عايزة تمشى من بلد متعرفهاش
وخايفه منها بعد الى سمعته من الست جدة ميرفت..

جه راجل عالمحطة عرف من هيئتها انها غريبة ، قالتله انها هى ويونس جايين من طنطا
وعاوزة تنزل القاهرة
وكانت جاية تبحث عن موضوع ،وهو كمان فهم انها من التليفزيون ????

اقترح انها تطلع عالمحافظة ذات نفسها وتبات فلوكاندة لحد الصبح والصبح
تاخد قطر من بدرى ...

ركبت هى ويونس عربية تودى اسيوط ع طول مشكور الراجل الى ساعدهم،
سالت ع اقرب لوكاندة صغيرة ولاقت

استغربت انها هى الى بتعمل كل حاجه ويونس ساكت ماشى وراها بس
ومش مسترجل كده

جت فحجز الاوضتين ...
قالت اكيد هيتحرك ويحجز هو ويسال ويدفع ...وبرضو معملش كده!

دمها اتحرق جدا ..حست انه بارد ومش راجل
طلعت للاوضة مع العامل وهو جمبها ماشى

العامل وراها الاوضتين وبص بصة غريبة ليها كده ومشى ، وقفت عند اوضتها

يونس: انتى زعلانه منى فحاجه ؟

ماليكا: لا بس مرهقه من اليوم مش اكتر

يونس: تمام فكرتك زعلانه منى

دخل كل واحد اوضته ...واتقفلت الابواب ..

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

فكافيتريا المحطة راجعين كانوا بيفطروا ، ونسيت ماليكا فصل يونس البايخ
بليل وبتتكلم عادى وياه الصبح

ماليكا: قصة ميرفت وجعتنى اوى ،هى ايه ذنبها فكل الهرى الى حصل ده

يونس: عندك حق ...غلطات ناس يتدفعها ناس تانيين

ماليكا: هنعمل ايه الخطوة الجايه

يونس: طبعا لازم تبلغى عن الى اتقال وان بعد م اتصالحوا نفوا العهد وقتلوا البنت
وهما ساكتين عشان يرجعوا ياخدوا بتارها
كده خط دم مالوش اخر

ماليكا: تفتكر كده هيرجع حقها وترتاح روحها؟

يونس: اكيد لما يتسجن ويتعدم الى قتلها

ماليكا سرحت وهى باصة للمحطه ورجعت كلمته

ماليكا: مش عارفه انا ايه الدنيا دى ،ميرفت تقع فطريقى عشان اجيبلها حقها
وانا اقع فطريقك تشاركنى الى بيحصل وتبقى زميل مباحث( ضحكت)

يونس: ع فكرة انا دايما كده،بيقع معايا الى شبههى

ماليكا: قصدك انى شبهك ؟ ف ايه بقى

يونس: مع الوقت هتعرفى اننا فينا شبه كبير من بعض

ماليكا: مممم طب ده انا ،واسراء كانت شبهك ف ايه ؟
ده حتى انت غتت وهى مستتقلاك

يونس: أصلها حراميه ( غمزلها)

ماليكا: اه هتقولى سرقت قلبي والجو ده

يونس: لا هى حراميه بجد ...بتسرق حجات فلوس ومجوهرات
عندها عقدة

ماليكا بطلت اكل وفتحت بوقها ع مصراعيه!!

ماليكا: بتقول ايه ؟ حرامية !
ده بجد

يونس( بتلقائية) اه

ماليكا: وهى سرقتك يعنى عشان كده وقعت فطريقك ؟

يونس: لا ...برضو مفهمتيش
مش قولتلك مش بيقع ف وشى غير الى شبهى

ماليكا بعيون مستفهمه وخايفه

ماليكا: بمعنى ؟

يونس: هى حراميه ....يبقى انا كمان ايه ايه ؟

هزت راسها تساؤل مش فاهمة

يونس: حرامى !