الحلقه التاسعه.

شكر خاص للشاعر/
محمد الشافعى
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
ماليكا: مممم طب ده انا ،واسراء كانت شبهك ف ايه ؟
ده حتى انت غتت وهى مستتقلاك

يونس: أصلها حراميه ( غمزلها)

ماليكا: اه هتقولى سرقت قلبي والجو ده

يونس: لا هى حراميه بجد ...بتسرق حجات فلوس ومجوهرات
عندها عقدة

ماليكا بطلت اكل وفتحت بوقها ع مصراعيه!!

ماليكا: بتقول ايه ؟ حرامية !
ده بجد

يونس( بتلقائية) اه

ماليكا: وهى سرقتك يعنى عشان كده وقعت فطريقك ؟

يونس: لا ...برضو مفهمتيش
مش قولتلك مش بيقع ف وشى غير الى شبهى

ماليكا بعيون مستفهمه وخايفه

ماليكا: بمعنى ؟

يونس: هى حراميه ....يبقى انا كمان ايه ايه ؟

هزت راسها تساؤل مش فاهمة

يونس: حرامى !

ماليكا فضلت بصاله لدقيقه كامله مبرئة !!

ماليكا: انت بتتكلم جد ؟

يونس: حهزر يعنى ،اه انا كنت حرامى

ماليكا: كنت .... ودلوقتي ايه

يونس: توبت ...توبت الحمدلله توبة جت غصب عنى

ماليكا: مش فاهمة ،يعنى توبت عشان انفصلت عن اسراء
ولا توبت عشان اسراء
ولا توبت راحت. سابتك اسراء
مش فاهمة !!

يونس: تقدرى تقولى كل الحجات دى فبعض وفوقيهم كام حاجه كده

( بيبص حواليه ) يلا عشان ميعاد القطر

ماليكا: لا استنى ...

يونس: انتى خوفتى منى اكمنى قولتلك انى كنت حرامى

ماليكا ساكته ومتنحاله

يونس: تفتكرى حرامى بيقول لحد انه حرامى ، هيفكر يسرق منه حاجه

ماليكا: مش فكرة سرقه بس

يونس: فكرة ثقتك فيا صح ؟
ع فكرة انتى مفيش عندك اقدر اخونك بسببها
ولو ع اسرارك فانا لسه معرفتهاش
واعتقد مفيش عندك الى اسرقه
ولو حابه توقفى علاقتى بيكى لحد هنا ف انتى ....

ماليكا قاطعته وهو بيتكلم

ماليكا: مش قصدى يايونس والله ، بس انتى لخبطتنى جدا لما قولت كده
وحسيت ان تفكيرى اتشل

يونس: اعتبرى نفسك مسمعتيش حاجه ، لانى قولتلك انى بطلت

ماليكا هزت راسها بالموافقه ، فميكروفون المحطه اتذاع رقم القطر الى رايح القاهرة انه داخل عالرصيف خلاص

يونس: استعدى يلا

ماليكا: لا استنى ...هنعمل الخطوة الى قولت عليها عشان ميرڤت روحها ترتاح للاخر

يونس: الى هى ؟

ماليكا: تعالى بس ونلحق القطر الى وراه ...يلا

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

حصلت الخطوة الاخيرة فحكاية ميرفت ، تم البلاغ فقسم الشرطة عن الحادثه ووقتها
واسم الضحية واسماء الجناه كانت مجهولة لكن هى دلت ع اسم عائلتهم واشكالهم او اعمارهم بالتقريب زى م شافت فالصورة الى ورتهالها ميرفت ...

ووضحت ان المحافظ عمل صلح بين العيلتين لكن هما خلفوا الصلح وده جريمة تانيه ، اتأكدت انهم
بدأو يتحركوا فالموضوع فعلا وفيه قوة هتنزل القرية دى وتتولى اللازم
اتطمنت هى ويونس ...ومشيت مبسوطة اوى بانها قدرت تعمل حاجه .

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

" انا عايزة اروح لماما ودينى ليها ماليش دعوة"

الست: انتى مش مبسوطة معايا طيب ؟
هنا : ياطنط انتى وعدتينى ..انا عايزة اروح لماما

الست: ده انتى حتى مش بتلعبي بالعرايس الى جبتهالك ،بصى تعالى كده نلعب
بيهم سوا
انا جبت ايه كمان ( بتفتح علبه تانيه)
الله !
ادوات مطبخ اهو فناجين واطباق ومعالق وبراد وسكرية وبصى( بتفتح علبه تانيه)
بوتوجاز اهو يلا نلعب زى م ماما كانت بتلاعبك ونعملهم شاى

هنا باصة لها بزعل ومكلضمه

الست : انتى مش كنتى بتحبي ماما تلعب معاكى كده !

هنا: ايوة ماما ...ماما وبس ( كتفت دراعاتها فبعض وبصت بعيد عن الست)

الست : ( زعلت) طب اعملك ايه عشان تبتسمى ؟ تيجى نخرج نروح ملاهى؟!

هنا: طنط انتى لو مش ودتينى لماما ،انا هنزل زى م سيبت الحضانه واروح لماما لوحدى !

الست قلقت واتخضت من كلمة هنا !
دى مستعدة تهرب تانى وتنزل الشارع ....وممكن بعدها تضيع للابد ولا باباها لاقاها
ولا هى عندها !

طب والعمل
واضح انها لازم تتخلى عن انانيتها وخوفها الزايد انها تفثد امل من تانى ،وتتحرك خطوة قبل فوات الاوان ..

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

مبسوطة اوى ماليكا باللى عملته ، وهتنبسط اكتر لما يتاخد حق ميرفت بالكامل وتستريح فقبرها
راجعه مبتسمه طول الطريق فالقطر ...

ماليكا: هو انا هعرف ازاى ان ميرفت جه حقها ؟

يونس: هتبطل تظهرلك

ماليكا: كده وبس ؟

يونس: اكيد هيحصل علامة يعنى ، هو انا يعنى اعرف كل حاجه

ماليكا : اومال عارف وقااارى وحسستنى انك مكتبة ماشية معايا ليه

يونس: مانا بقولك اهو روحها هترتاح وتبطل تظهرلك واكيد فيه حاجه هتعرفى بيها
ماهو فى لينك بين ارواحكم انا مش عارفو بس اكيد فى حاجه هتعرفك

ماليكا: تمام ( بتتصل بدينا )
الو ايوة يا دندون

صوتى مبسوط !
هقولك
انا اصلا جاية القاهرة ، اه
واخدة ٣ ايام اجازة ...عدى منهم يوم ونص وفاضل انهاردة وبكرة
هجيلك ....
ايه ؟
هحكيلك كنت فين وليه خدت اجازة
المهم هجيلك ابات عندك انهاردة عشان فيه حكايات كتيييير عندى ليكى
وبكرة هروح
تمام ماشى حبيبتى هتصل بيكى لما اوصل
سلام

يونس سمع المكالمة للآخر ....وكلمها لما خلصت

يونس: انتى هتروحى عالقاهرة مش جاية معايا؟

ماليكا: لا ، دينا وحشانى وقولت استغل اليوم الى فاضل ده عندها

يونس: خلاص اوصلى وانا همشى اروح

ماليكا سكتت مينفعش تعزم عليه طبعا ،ابتسمت وسكتت ...

وصل القطر ونزلوا سوا
المحطة زحمة وهى بتدور بنظرها ع دينا ، يونس سلم عليها وبيودعها وهى بترن بالفون ع دينا

يونس: انا ماشى بقى ،عاوزة حاجه

ماليكا: لا خلاص ، توصل بالسلامه ...
سلموا ع بعض ومشى وسط الزحمة ،ثوانى واتلاقت مع دينا

حضنوا بعض جامد

ماليكا: عارفه كنت عاوزة اوريكى يونس لسه ماشى ،كنت حابة تتعرفوا ع بعض

دينا: الايام جاية كتير ،ان شاء الله هشوفه فمرة
تعالى هنا قوليلىكنتى فين وبتعملى ايه

ماليكا: هقولك بس يلا نروح انا واقعه من الجوع

دينا: متقلقيش طنطك عفاف عاملة كل ماهو لذ وطاب عشان عيونك

ماليكا: ايوة بقى

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
´ ´
"انت مسكتهالى بقى اكمنك شوفتنى !"

يونس( بصوت هادى ومش عادته) لا والله مش ماسكهالك ،انا بجد عاوز اتعرف عليكى

اسراء: ياسلام ! معرفه ايه الى تتعرفها وانت بتطلعلى فكل مكان زى عفريت العلبه
يونس: بصى فالاول شدتينى انك بتعملى كده بثقه وقاعدة ولاهامك ،وبعدين منكرش شغلتينى

اسراء: انت هيأتك يوم الديسكو شكلك ابن ناس ،عاوز منى ايه

يونس: ابن ناس!( بيضحك اوى) الله يحفظك
لا ده لزوم الشغل بس هدخل مكان زى ده ازاى يعنى

اسراء: مش فاهمة

يونس: انتى بتدخلى ازاى ؟

اسراء: يعنى مصاحبه بنت من المضيفات بتسهللى وكده

يونس: شرحه ! انا الامن يبقى شقى الروح بالروح
بيسهلى الدخول من غير م ادفع

اسراء: طب انا بدخل عشان الى انت شوفتنى بعمله ده ( بتقولها بكسوف)
وانت ؟

يونس: بصى هو مش تحقيق ،انت بتعملى كده ليه؟

اسراء سرحت وقالت بطريقه حزينه

اسراء: من صغرى بدور ع حجات وابص ع حجات ويبقى نفسي فيها ، ومقدرش اشتريها
بابا حالته ع ادها واخواتى كتير
وطلعت لاقيت دى بتجيب ودى بتعمل وبتسوى
وانا ماليش حق انى اعيش حتى ولا البس ولا اخرج

يونس: طب بس بس ايه برنامج حياتى الى اتفتح ده ( بيضحك) اضحكى انا بهزر وياكى
طمنينى الانسيال الى لهفتيه جاب كتير؟

اسراء ضحكت

يونس مسكت كف ايدهابايده وبص لعيونها بحب

يونس: طريقنا واحد يا اسراء ، انا كمان تعبت من الدنيا اوى
ونفسي اعيش
والظاهر انها مش بتيجى غير كده

اسراء بصت لماسكة ايدة وشالتها ببطء منه

يونس: انا معاكى مش عليكى ...متخافيش منى
ماشى

اسراء رفعت عيونها له وهزت راسها بالموافقه ...

_____

دينا: احلى كوباية شاى دى ولا اييه ( بصت لاقت ماليكا سرحانه) اييييه ياحجه ليكا
مالك

ماليكا: لابس كنت بفكر فموضوع غريب اوى اتحكالى

دينا: ايه هو

ماليكا: فكك ،جبتى الشاى

دينا: انا قولت بعد اكلة عفاف المتينه دى لازم نحبس وتحكى بروقان ( غمزتها فجنبها) احكى يا قمر
روحت فين انتى ويونس وجيتوا؟

ماليكا : هحكيلك الحكاية كلها من طقطق لسلام عليكم ،متعرفيش يابت يا دودو انا فرحانه ازاى
حاسة انى اخيرا عملت حاجه وساعدت حد
وسبحان الله الموضوع كله اتيسر فغمضه عين

دينا: قولى شوقتينى

ماليكا: طرطقى ودانك يا استاذة ....

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

فقسم البوليس كان موجود عصام بعد م اتصلوا بيه احد ضباط الشرطة لامر هام ..

الظابط: استاذ عصام ،احنا عايزينك تتماسك شوية
عشان تقدر توقف فموقف زى ده

عصام( بقلق) فيه ايه يا حضرة الظابط ،من وقت م كلمتنى وقولتلى احضر وانا قلقان
لاقيتو بنتى هنا ؟!

الظابط( بحزن) اوصاف بنتك هنا ولبسها الى ذكرته ،عثرنا عليه ف ...

عصام( بخوف) ف ايه؟

الظابط: جثة طفله ملقاه فالنيل بقالها كام يوم ،متاخد منها كل متعلقاتها الى انت ذكرتها
وملامح وشها مش واضحه بسبب المية وده يدل ان بقالها كام يوم مرميه

عصام قام منفوض ودموعه سبقت كلامه

عصام: ايه!!! بنتى
انت بتقول ايه

الظابط: انت ذكرت انها كانت لابسة حلق وغويشة محفور عليها اسمها
وملاقينهاش
واضح انها اتخطفت بغرض السرقه واتخلصوا منها بالطريقه البشعه دى

عصام قعد عالكرسى بيبكى بانهيار

الظابط: احنا مقدرين موقف حضرتك ، ممكن تتفضل ويانا للمستشفى
عشان تتعرف عليها لاخر مرة قبل م تستلمهامن المشرحه

الكلام كان صعب اوى ع مسامع عصام ،ازاى يتحمل الى بيتقال ده
بنته هنا خلاص ماتت
راحت منه للابد !!
خلاص مش هيشوفها تانى ، يعنى كان اخر مرة يشوفها قبل م تختفى بكام ساعة !
لو كان يعرف مكانش سابها من حضنه ابدا

مضطر يقوم برجلين اتقل من رجول فيل يروح يشوفها لاخر مرة فالمشرحه ....!!

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

دينا: لا ده انتى مجنونة رسمى ! خططتى ونفذتى انتى وسى يونس ده من غير م اعرف؟

ماليكا: يابنتى هى جت كده ،وبصراحه يونس كان عنده حق
انا كان لازم اخلص منه الموضوع ده
لازم هى ترتاح وانا ارتاح بقى

دينا: بس بصراحه ،كنتى جريئة فكل الى عملتيه
بغض النظر انك روحتى بلد اول مرة تروحيها مع راجل غريب
بس المضمون خلانى احس انك بجد شجاعه ،يارب بس يكونوا اتحركوا
عشان البنت الغلبانه دى
وعشان فكرة التار المهببه دى متاخدش فرجليها حد تانى

ماليكا: يارب يا دودو...بقولك ايه
انا هبات معاكى انهاردة وبكرة هروح اسلم ع ماما عشان وحشتنى
وازور خديجة
وحشتنى اوى اوى

دينا اتلخبطت لما عرفت ان ماليكا هتروح لامها وممكن تعرف ان هنا بنتها تايهه والدنيا تتعقد اكتر ماهى متعقدة

دينا : ممم ربنا يعمل الى فيه الخير

ماليكا: بت يا دودو معندكيش بيجاما اكبر من دى او عباية بيتى
زنقه وصغننه يابت

دينا: ههههههه اه مانا نسيت انى اقصر وارفع منك ،استنى ادورلك

ماليكا: طب يلا من غير طولة لسان لحسن مكتومة من بدرى ومش عايزة اقولك

قامت دينا تفتح دولابها وتدور ل ماليكا ع لبس مناسب تقعد بيه
شغاله تشيل وتحط وتطلع
ووقع عالارض كيس صور ،دينا مخدتش بالها منه كانت مشغولة تجيب لماليكا لبس

لكن ماليكا انتبهت لما ظهرت جزء من صورة ليها هى وعمر ، راحت جابت الكيس وقعدت عالسرير

دينا شافتها ولسه بتدور

دينا: اه كيس الذكريات الجميله

ماليكا بتفنحه وبدات تبص فيهم ب حنين وهيام فظيييع
وجت عيونها ع صورة وقفت قدامها دقايق وكأنها غرقت جواها ...

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

قلب عصام بيدق وكانها صواريخ بتضرب بصوت عالى
رايح للمشرحه وبيتنفس بصعوبه
كان روحه هتطلع ، محسش نص الاحساس ده وقت باباه

دخل المشرحه ....صوت عقرب الدقايق ساعته فودنه
وصوت دقات قلبه فالودن التانيه ..

عامل المشرحه دخل وياهم ،جه دكتور وامر بفتح التلاجه

اتفتحت وطلعوا الجثة

فالاول عصام دور وشه بعيد ،وبعدها تمالك نفسه وبص

دقة القلب هديت
ونفسه ارتاح ...وعيونه ابتسمت

عصام( بفرحه) مش بنتى ....مش بنتى ياحضرة الظابط
ي م انت كريم يارب...هى تشبه هنا
بس مش هنا

الظابط: طيب كويس يا استاذ عصام ،الحمدلله
انت دققت فملامحها وشعرها واوصافها كويس

عصام : دى بنتى ياحضرة الظابط ، مش هى الحمدلله

نزل سجد عالارض فالمشرحه ودموعه نزلت ع الارض ،بيحمد ربنا ان مطلعتش هى
وان لسه فيه امل انها تكون بخير ...

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

قاعدين كل الشلة فالكافيتيريا ....عمر وماليكا ودينا واشرف وبسمه واروى
وبياكلوا وبيتكلموا
بس ممكن ناخد بالنا ان عمر وماليكا واخدين ركن لوحدهم شوية ...

عمر : لا انا مش مولود باعاقه رجلى دى ...دى حادثه حصلتلى السنة الى فاتت
وبسببها عيدت السنة

ماليكا: انا اسفه لو كان سؤالى ضايقك

عمر( مبتسم) لابالعكس انا حابب اقولك

ماليكا ابتسمت وسكتت

عمر: تعرفى انى بحب الشعر ...

ماليكا: بجد ،بتحب مين بقى

عمر: بحب اى حد بيكتب شعر بيلمس قلبي واحساسى

ماليكا: زى مين ؟

عمر: ممم فاروق جويدة ...عبدالرحمن الابنودى
هشام الجخ بعشقه

ماليكا: اه سمعتله حجات

عمر : وانا بجتهد ع فكرة وبكتب اوقات مش ع طول

ماليكا: بجد ! طب قول حاجه من الى كتبتهم

عمر: هو انا مش عارف بقالى فترة مش بكتب ، بس اليومين دول
زى م تقولى الالهام نزل ع نافوخى ورا بعضه

ماليكا: هههههههه

عمر: استنى اسمعك حاجه

اشرف سامعهم هو والباقى وجه قاطعهم

اشرف: وانا كمان كاتب كلمتين كده فالبت بسمة ع طرف المعلقه
هيعجبوكم انا متاكد

عمر: قول يا استاذنا

ماليكا: قول ي اشف

اشرف: اشف!! ماشى اتريقى ياختى هقولك
اسمعوا
واسمعى يابت عشان هما فيكى انتى مكتوبين

احم احم ( بيعدل ياقته)
اغار عليكى من قط مر امام بيتكـ ونظرلعيونك وقالك نياااااوو وانتى بسبستيله

كلهم راحو فالضحك بصوت عالى وكانهم بقالهم سنين مضحكوش

بسمة: ايه ده الله يكسفك

اشرف: ايه معجبتكيش ولا ايه ؟

بسمة: ده عبط

دينا: بص يا اشرف ،انت توقف قدام السينما تقولهم لاى اتنين حبيبه
وتاخد منهم الى فيه النصيب وكده فل اوى

ماليكا: لالالا هو يوقف يقولهم فالاشارة ويتسول بيهم هههههههه

اشرف باصص لعمر بطريقة تضحك

اشرف: وانت مش عاوز تزود حاجه عاللطافه دى يا متر؟

عمر: ههههههه لا كفاية عليك الى قالوه ،اسرح من هنا يلا

اشرف: يلا ناخد جمب زيهم يالى كسفانى ،طب ايه رأيك هسمعك الباقى
غصب عنك

بسمة: قول يا حبعمرى قول تعالى

سابوهم تانى وقعدوا جنبهم بس مش مركزين معاهم

ماليكا: سيبك من اشرف،قول اى حاجه من الى بتكتبه

عمر( فرحان انها مهتمه) بجد حابه تسمعى

ماليكا: جدا

عمر : حاضر ....( طلع كشكول محاضراته وقلب فيه
وجاب من النص وبدأ يقول من الى كاتبه)
باعتذرلك ..
أنى ديما كنت اقصر ف الكلام
واني بسرح لما اشوفك
ف ابتسملك والسلام
وانى ناقص ف المعامله
والمجامله والاهتمام
وانى عاجز انى افسر
صوت مشاعرى وانى خام
وان قلبي بيبكى جدا
لو يحسك هتسبيه
وان حضنى ساعات مكنشِ
يسمح انك تبقى فيه
واني عادي ومش مثالي
واني سهل ومش حويط
وان بير اسرارى خالي
وانى بنى آدم بسيط
وانى ناقص كام بحبك كام عشقتك كام بغير
وانى بسمح للعياط .. انه يتحكم كتير
وانى سبتك مره تبكى
وانتى مش قد العياط
وانى مره نسيت اشاركك
ف الزعل والانبساط
وان كل وعودى خابت
وان شعرة حزني شابت
وان انا مليان خدوش
وانى وحدانى انطوائى
وانى بأذيكى بحيائى
وان حبى و اشتياقى
الكلام مبيوصفوش
بشكرك جدا لانك
بتشلينى جوه منك
قابله بطباعى وكأنك
راضيه كل النقص فيا
وعد مني.. هبقي ليكي
وابقى قد المسؤليه

لما خلص الى بيقوله ،وهو فكل كام كلمة يبص ع رد فعل عيونها معاه ويرجع يهرب
منهم للورقه ويقرا
هى كانت هيمانه فملكوت تانى خالص

ماليكا : حلوة اوى اوى اوى ياعمر
اوى بجد
ممكن طلب؟

عمر( مبسوط) اتفضلى

ماليكا: اخد الورقه دى واحتفظ بيها

عمر باصص لعيونها ...

عمر: كنت هطلب منك كده،اتفضليها

قطعها واداهالها...

ماليكا طبقتها وحطتها فسوسته الشنطة ، يوم الجامعه خلص
وعمر اتلكك انه رايح لصاحبه تانى الى فشارع ماليكا
عشان يقضى معاها اطول وقت ممكن
حاسس ان جواه حاجه عاوزة تتقال ومش عاوز اليوم يخلص من غير م يقولها ..

حتى هى كانها حاسه بيه ،طول المحاضرات بتبص ناحيته وتبتسم وترجع تركز مع الشرح

عمل حجته صاحبه ووصلها

وجه عند بيتها

ماليكا: تصبح ع خير ياعمر

عمر: وانتى من اهله ،هبقى ...هبقى اكلمك لو سهرانه

ماليكا( ابتسمت ) طبعا

عمر: ماليكا!

ماليكا: نعم

عمر:هتقرى القصيدة تانى ؟

ماليكا: اه طبعا

عمر: ابقى ركزى فكل كلمة فيها ...ماشى

ماليكا حاسة بنبضها عالى وجواها لهفه فظيعه ناحيته

عمر: وبالذات ف اخر كلمتين فيها
تصبحى ع خير

جاى ماشى وقفته ماليكا

ماليكا: مش ناوى انك تيجى تتفضل عندنا شوية

رجع عمر وبصلها

ماليكا: يعنى ،تانى مرة تيجى ومتطلعش
دى عيبة عندنا
احنا مش بخلاء( ضحكت)

عمر جه عليهابلهفه ومسك كف ايدها واول مرة يعملها

عمر: هاجى قريب ياماليكا ،قريب اوى
ماليكا انا بحبك ع فكرة !!

ماليكا : ( مبرئه)قلبي وقف ياعمر يخرب عقلك
( وقعت من طولها وبيسندها عليه)

الحلقه العاشره

.¸.•'´¯'*•.¸¸.¸.•'´
ماليكا: مش ناوى انك تيجى تتفضل عندنا شوية

رجع عمر وبصلها

ماليكا: يعنى ،تانى مرة تيجى ومتطلعش
دى عيبة عندنا
احنا مش بخلاء( ضحكت)

عمر جه عليهابلهفه ومسك كف ايدها واول مرة يعملها

عمر: هاجى قريب ياماليكا ،قريب اوى
ماليكا انا بحبك ع فكرة !!

ماليكا : ( مبرئه)قلبي وقف ياعمر يخرب عقلك
( وقعت من طولها وبيسندها عليه)

____

ماليكا بتفتكر وبتضحك ضحكة حلوة وهى باصة للصورة ، بتقلب ومسكت صورة غيرها
ودى كمان جابت لها موقف احلى من الى فات ..

فلاااااش بااااااك

صوابعه بيحاول يشبكها فصوابعها ،وبيبصلها بصة هادية مع ابتسامه ...
وماليكا بصاله فعنيه وتتكسف وتنزل وشها عالارض

عمر: احساس الى بحسه دلوقتى ...عمرى م حسيته فحياتى
وعمرى م حسيت بفرحه قلبي كده

ماليكا ( مركزة فعيونه) حاسس ايه؟

عمر: عاوز اعيط بدموع فرحانه ، وعاوز اضحك
وعاوز اتنطط واعمل جنان معملتوش
وعاوز افضل قدامك كده كتير ومفيش حاجه تقومنى

ماليكا: هو انا لو حاسة انى بطير ...ده يبقى طبيعى؟

عمر: خدى هنا متطيريش لوحدك ،خدينى وياكى

ماليكا : مع انى مش البنت الواو يعنى فجمالها بس ...( بصت للارض )

عمر: الجمال بيروح كل م نكبر فالسن، الروح هى الى بتفضل بحلاوتها
وروحك احلى مافيكى ياماليكا
احلى من احلى حاجه انا شوفتها

ماليكا اتكسفت وانبسطت من كلامه وبصت بعيد عن وشه تدارى فرحة عيونها ،اتماسكت وقالت تكمل كلام معاه عادى

ماليكا: كان ينفع الى عملته يومها؟
عمر: عشان قولتلك بحبك قدام باب بيتك !! صدقيني انا منطقتش
ده هو ده ( شاور ع قلبه)

ماليكا حست انها تلجت من بس طريقته لتانى مرة

ماليكا: انت بطريقتك دى عاوزنى اقع عالارض تانى

عمر: متعرفيش وقعتك عالارض يومها دى خلتنى احبك اكتر ازاى

ماليكا حبت تتغلب ع نفضة نبضات قلبها الى مش عارفه تتحكم فيها
وقامت من عالسور الى كانوا قاعدين عليه ..

ماليكا( بتنفض هدومها) انا همشى عشان اتاخرت ...

عمر: طيب هوقفلك تاكسى ،وكلمينى لما توصلى

ماليكا: ماشى

وقفلها تاكسى وركبت ،دفع حسابه ولسه بيمشى التاكسى عحلة
خبطلها ع الازاز من ورا وقال بصوت هادى وهو بيشاور

عمر: خدى بالك من نفسك ،بحبك انا ع فكرة!

ماليكا ابتسمت واتدورت لقدام وحضنت شنطتها وروحها طايرة من الفرح .

____

دينا: خدى دى شوفيها عليكى كده

ماليكا( باصه لصورة تانيه) يابنت اللذين دى صورتيها ازاى وامتى

دينا : انهى دى ورينى
( افتكرت) ااااه
دى يومها صورتكم فون ،وطلعتها ورقى
اى صورة بصورها عالفون بطلعها وقتى عشان متضعش منى

ماليكا مسكت الصورة ودفا جمالها دخل جواها هى شخصيا ....

فلاااااش باااااك

خديجة : يلااااا ادخلوا انتو بتتعازموا

ماليكا: برتعش كلى كده ع بعضى ومش ماسكة نفسي ياناس
ادخلى انتى يا دينا

دينا : هو انا كنت العروسة ولا ايه

خديجة: يلا يا لوكا بطلى دلع بيسألو عنك جوه ،انا مش راضيه ادخل لحد دلوقت
بس معاوية خرج يستعجلك وقالى انا

ماليكا: طيب انا حلوة كده ولا ايه ،الطرحة والميكاب مظبوطين

دينا : اه و الله زى القمر

خديجة : يلا بقى نفسي اشوف عمر ده ف وشى كده ، انا دايما اشوفه صور

دينا : ايه ده هو عمره م شافك ولا شوفتيه ؟

ماليكا:اه ....انا ورتهم لبعض صور

دينا: طب انا طقت فدماغى فكرة جهنميه ...

بخطوات هادية ماسكة صينية المشروبات وداخله وداخليه وراها دينا...،،حطتها وقعدت ف وش عمر
وعملت فيها المكسوفه
كانت خديجة مش ماليكا !!

وماليكا استنت برة تسمع ودخلت دينا على اساس ان خديجة العروسة وماسكين نفسهم من الضحك

مامت ماليكا طبعا ومعاويه عارفينهم بصوا لبعض باستغراب وبصوا لخديجة وماليكا مع بعض
اخت عمر بتبص ل خديجة ع انها العروسة وابتسمت وبصت لمامتها
قامت ايمان بنت اخت عمر الى كانن صغننه لسه ،معاها شيكولاتايه وادتها لخديجه

ايمان: اتفضلى ياطنط العروسة ،خالو عمر جبهالى فالطريق وانا مرضتش اكلها وقولت اديها لطنط العروسه
من غير م حد يعرف

ضحكت خديجة وخدتها بكسوف وكملت التمثيليه على انها العروسة ومميله فالارض..

عمر كل ده باصصلها ومستغرب وساكت ..

مامت عمر: الله اكبر ع اختيارك يا عمر ،بسم الله ماشاء الله عليها

اخت عمر: عسولة ماشاء الله ،اتتريه استنى التخرج وجرى عاوز يخطب ههههه

عمر ( مبتسم وباصص لخديجه) بس دى مش ماليكا !
الكل سكت ومعاوية ابتسم انه عرف لوحده وماليكا

دينا: ازاى يعنى مش ماليكا هنكون بدلناها ؟!

عمر: لا والله مش ماليكا

خديجة: لا انا مالبكا بس حطيت لينسز يعنى تغيير ( ابتسمت بتصنع)

عمر: لا مش فكرة لينسز ،انتى خديجه مش ماليكا

مامت عمر واخته بيبصوا لبعض ومستغربين

عمر( بص لاهله) اه هى ليها اخت توأم هو انا ماشوفتهاش فعلا بس دى مش ماليكا

خديجة غمزت لدينا ان الخطة نجحت

خديجة: كفك يانسيبى انا خديجة فعلا ( قامت جابت ماليكا من برة ) وعروستك اهيه ياسيدى
عمر قام وقف وهو مبسوط وسلم ع ماليكا

عمر: مش بقولكم

معاوية: لا انت مش سهل طلعت هههههه

عمر( بيبص لماليكا وبيرد بصوت واطى تسمعه هى بس) معقول اتوه عن قلبي

جت ايمان خطفت الشيكولاته من خديجة

ايمان: ياطنط مش انتى العروسة هديها لطنط العروسة

ادتها لماليكا فعلا وكلهم راحو فالضحك بصوت عالى ....

___

ماليكا: احلى ذكرى فحياتى ،تسلمى يا دينا انك خليتى قلبي فرح قبل م انام
( قامت باستها فخدها)

راحت تغير وتلبس اللبس الى جابتهولها دينا ودينا بصالها ومبتسمه ان يمكن من غير قصد
عرفت تسعدها ولو بحاجه بسيطه ...

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
" السلام عليكم ،انا جاية ابلغ ع انى لاقيت طفلة "

الظابط: اتفضلى يامدام استريحى

فتح المحضر

الظابط : اسمك وسنك وعنوانك

قالتله كل بياناتها ، وحكتله لاقت هنا امتى ومن كام يوم
وفين بالظبط

راحت لاقرب قسم جمب الحضانه بتاعتها لعل وعسى يكونوا مبلغين هناك عن غيابها
ويلاقوها بسرعه

اكيد هى طفلة ومبعدتش كتير يومها عن الحضانه

اخدوا كل المعلومات وطلبوا انها خلاص تسيبها تحت مسؤليتهم وهيعملوا اشارة لكل الاقسام الى حواليهم انهم لاقوا طفله يمكن اهلها يكونوا مبلغين

الست: لااسيبها! مقدرش
ممكن اخدها معايا تانى ...واول م حد من اهلها ييجى هجيبها بنفسي
انا سيبتلكم عنوانى ورقم تليفونى

الظابط: ده غير قانونى يامدام

الست: وانا قلبي مش هيجبنى تبات فقسم الطفلة مع مجرمين

الظابط: لاطبعا هى مش هتبات فالقسم،بس قانونا بعد م بلغتى مينفعش
تاخديها تانى

الست: هو انا لو عاوزة اخطفها كنت جيت بلغت ليه ، انا بس هحس انى متطمنه
وهى فبيتى و ف اى وقت تلاقوا اهلها تعالو وانا موجودة

هنا باصه للظابط وبتبص شوية للست الى لاقتها

الظابط: طيب انا هعمل اتصال وارجع ارد عليكى

الظابط قام يعمل اتصالاته ،وضمت الست لحضنها هنا اوى
كأنها بتودعها عشان هتسيبها
دلوقت او بعدين ....مش هتفرق!!

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
يونس: كنت اول مرة اتعاير من زمايلى ،ان جزمتى مقطوعه وصباعى بالشراب باين منها
كنت فثانوى
اتحججت ان مفيش وقت انى اشترى غيرها وانى مخلى وقتى كله للمذاكرة
والدروس
رد واحد منهم عليا باستهبال وكانه بيزود سخافه عليا قدامهم
لاياشيخ ...معندكش وقت تشترى
ليه بابى فالعزبة بيلم الايراد ،ولا مامى فالنادى بتلعب تنس رياضتها المفضله!

يومها دموعى منزلتش من عيونى عشان مبانش ضعيف ، هو بس انا داريت احساسي والم
جوايا وقولتلهم انى عمرى مقولت انى ابن وزير او امى سفيرة نوايا حسنه

والفقر عمره م كان عيب
كبرت وانا بردد الجملة دى بغباء ،الفقر مش عيب زى م كان ابويا بيقولها
لكن طلع الفقر اكبر عيب
انت بتتولد راضى بحالك ،والناس بتعمل منك معيبه وحاجه يشمئزوا منها لمجرد انك مش اد المقام!
اتخلق جوايا شعور كراهيه والكراهيه جابت حقد
الحقد ولد غل وبقيت بكره اى حد عايش وانا مش عارف اعيش

كانت اول مرة امد ايدى لما كنت تعبان وبتقطع من الم جنبي وممعيش حق الدوا
وابويا الغلبان كان بيحوش فلوس شغله عشان ناكل بيها
مش هيبقى اكل ودوا

روحت الصيدلية وممعيش ولا مليم ،قولت اشكك تمن الحقنه تخفف الالم
دخل الدكتور يجيبلى الحقنه ، ولاقيت درج الفلوس مفتوح

لاقيت حاجه بتقولى خد
خد الى انت عاوزه
محدش موجود
انت محتاج ومش لاقى

اخدت وايدى بتترعش ،حاسس ان ده غلط
واول مرة سحبت اول ورقه ...لاقيت ايدى بتاخد الى وراها والى وراها كانها فسباق

وخبتهم فجيبي بسرعه
خرج الدكتور وحطلى الحقنه فكيس دفعت حسابها
وانا ماشى مبسوط ان اول مرة جيبي يبقى فيه فلوس

وبليل عملت عملية الزايدة ...وكأنهم اتصرفوا ع عيا ومرض عشان حرام

( ضحك بسخريه)
بس محرمتش وحياتك ، والدكتور بيقيس ضغطىبعد العملية وبيبص عليها
سرقت موبايله من جيب البالطو ولاحس
وطبعا دور وقلب الدنيا
ومشكش فالمريض بتاعه!!

وبعدها بقت ايدى اخف من انك ترمشى بعينك ، وبقيت البس ومعايا موبايلات واخرج واكل واشرب
ف اماكن نضيفه
ومحاسبش اسرق
وبعد م كنت وحدى ...بقت ونيسة وشريكة العمل والنصب والسرقه
اسراء !!
مفيش مكان الا ونروحه سوا ونقلبه ونخرج ناكل ونشرب ونقلب بطريقتنا
ونلبس ونشترى ونهلب من غير م كاميرا تلمحنا
ولا جهازانذار حتى يرن !!

وفيوم قلبنا شنطه ست متريشة كانت طالعه من محل مجوهرات شنطتها ماليانه فلوس
ومجوهرات شارياها
اسراء كانت متابعاها من اول م دخلت

وانا لابس بدلتى وميتشكش فيا اطلاقا
معدى ...يافندم عجله عربية حضرتك نايمه
ع بال م هى اتخضت وهعمل ايه وانا عملت فيها الجنتل مان وهبدل العجله

كانت اسراء فلبت الشنطة من شباك العربية وجريت، بنت اللذين الست لمحتها
وهى بتجرى
وصوتت حرامييه
حراميه

انا من خضتى ع اسراء عشان فى امين شرطة كان معدى بالموتوسيكل بتاعه
طلع وراها وهى بتجرى ببطء
عنه طبعا

كتمت بق الوليه وسيبتها وخدتها جرى ولا اسرع رهوان

نتشت البت اسراء ع كتفى والشنطه فكتفى
ودخلت فحوارى وشوارع جانبيه
لحد شارع مودى عالنيل

وهووووووب
نطيت وانا شايل اسراء والشنطه فايدى مقفوله لستر ربنا عشان الفلوس مش تبوش

وقعنا فالنيل وخدناها عووم لحد اقرب بر

وطلعنا مبلولين وحالتنا حالة ،اتطمنا عالحاجه فالشنطة تمام

بصتلى قالتلى كنت هتقفش يالاهوى
قولتلها بت يااسراء لما خوفت عليكى دلوقت اكتر من الحاجه ، عرفت انى بحبك!
قالتلى ايه وفتحتلى بوقها زى السمكه الى حد مصطادها
قولتلها بحبك ايه اطرشيتى من الميه
بحبك هو كده وش
قالتلى وعرفت ده امتى يا يونس بيه
قولتلها دلوقت ..اشكرى امين الشرطة بقى
قالتلى اشكرى ياانشراح
كانت مؤدبة اووى بنت الايه ...

__

واقفه بتعدل طرحتها ماليكا وهى بتفتكر كلام يونس ليها فالقطر وحكاياته فااسرقه
جت ازاى وبقى دويتو هو واسراء ازاى
ضحكت بصوت لما افتكرت اخر كلمتين فالحكاية

دينا: انتى بتسرحى كتير وبتضحكى كده مع نفسك ...بقيتى تاخدى الدوا تانى يابت ؟

ماليكا: لا ياختى، بقى فى حاجه تعمللى دماغ اكتر من الدوا
همشى بقى بقى عشان الحق اسلم ع ماما وازور خديجة واروح

باست دينا ومشيت بعد م سلمت ع كل الى فالبيت ..

#نوراسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

تخبيط ع باب الست الى لاقت هنا ،جت بسرعة وهنا معاها مستغربة مين؟

الظابط: انا يا مدام ،الرائد ....

الست عرفت انهم لاقوا اهل هنا واكيد جايين ياخدوها

لبست طرحتها وفتحت لهم ،وفعلا فوجئت بعصام بيجرى يحضن هنا اوى

عصام: هنا !! وحشتينى ياحبيبتى
وحشتينى اوى

هنا بتحضنه برضو

الظابط مبتسم ،اذنت له الست بالدخول

قعدوا مع هنا وكان عصام طايرمن الفرحة طول م هى قدامه وفحضنه
اخدوا واجبهم وخلاص ماشيين

الست ( لعصام) ممكن اطلب طلب من حضرتك

عصام: اتفضلى
الست: متبقاش تزعق لها ع الى عملته،هى طفله ومش فاهمة حاجه
بلاش تعاقبها او تزعلها

عصام بص للظابط وسكت

الست: هنا عايزة مامتها وفالاساس سابت الحضانه عشان تروحلها
ممكن تخلو خلافاتكم بعيد عن مصلحه البنت
عشان متحصلش تانى نفس الى حصل وساعتها ممكن هنا تضيع للابد

عصام كشر وبص لهنا

هنا: ايوة يابابا انا روحت ادور ع طنط دينا عشان تودينى لماما ،انت مش بتخلينى اشوفها
ولاهى بتيجى تعيش معانا زى زمان

عصام سرح وسكت وضمها له تانى

الست: انا مبتدخلش فحياتكم ،بس الوقت الى قعدته معايا هنا
عرفنى اخاف عليها واحس انها زى بنتى

عصام: كتر خيرك ،مع انك من بداية لما لاقيتيها مبلغتيش

الست سكتت وبصت فالارض

عصام : مفيش مشكله المهم انها رجعت ( قام وقف وشال هنا) يلا ياهنونه حبيبة بابا

هنا: ( بفرحة ) هتودينى لماما ؟

عصام: هوديكى اى حتة تعوزيها ياقمر ...يلابينا

خارجين الست ندهت عليهم وجايبه لعب محطوطين فشنطه كبيرة

الست( بحزن) خدى ياهنا لعبك ،دول بتوعك خديهم معاكى

هنا نزلت من ع دراع باباها وباست الست فخدها بوسة بريئة

وقالت بطفولة جميله

هنا: خليهم عندك ياطنط ،انا هجيلك تانى انا وماما ونلعب بيهم كلنا

فالوقت ده حضنتها الست بعفوية وحب وشدة يجمعهم حنان ،يعرف الظابط وعصام
ان الست دى اتعلقت ب هنا اد ايه
وعشان كده مبلغتش فاول م لاقتها ...،

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

ماليكا : ماما مالك حاسة انك فيه حاجه

الام: لاياحبيبتى بس وحشتينى ،عاملة ايه فطنطا

ماليكا: كويسة ...وبعدين وحشتك فكرتى تجيني تسالى عليا
انتى حتى بتتصلى بيا مرة كل اسبوع

الام: معلش يابنتى ...سامحينى لو قصرت

ماليكا : انتى مش بتقصرى ياماما بمزاجك ،انتى بتسمعى كلام معاوية
بتيجى عليا بسببه

الام: م خلاص يا ماليكا مش هنعيد كلام من تانى خلاص اتقفل عليه

ماليكا: ماشى ياماما هسكت ومش هتكلم

الام: انا هقوم احضرلك حاجه تاكليها

ماليكا: لا انا هاكل اى سندوتش فالطريق ،عاوزة ازور خديجة بس عشان الحق اروح

ملاحظة ان امها مسهمه واكيد فيها حاجه

ماليكا: ماما ورحمة بابا فيه ايه؟

الام: يابنتى مفيش ( تليفونها رن)

بتجيب الام الفون لاقته معاوية ،ردت عليه

الام: ايوة يا معاوية
معاوية: ياامى لاقو هنا ،الحمدلله
عصام لسه قافل معايا

الام: بجد ! الحمدلله الف حمد والف شكر ليك يارب

يعنى هى كويسة ومش فيها حاجه البت؟

معاوية: اه كويسة وقصتها طويلة لما اجى احكيهالك ،انا قولت اطمن قلبك ياحبيبتى

الام: ربنا يبشرك بالخير يابنى دايما

قفلت

ماليكا: ( بتوتر) مين ياماما؟ هنا بنتى مش كده
هنا كان مالها

الام مش عارفه تدارى

الام: مفيش ليه بتقولى انه ع هنا ده بيقولى حاجه عنده فالشغل

ماليكا: ماما قوليلى بنتى كان فيها ايه ي اما هتصل انا بمعاوية واعرف منه كل حاجه !
مالها هنا؟!

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

" ايوة ياللى بتخبط مالك مسروع كده هى الدنيا هتطير"

فتحت ام عصام لاقت ماليكا فوشها !!
داخله زى المدفع

ام عصام: انتى ايه الى جابك هنا يا بومه ياقتاله القتله ياسفاحه
رجلك متخطيش العتبه
اطلعى بررة !

ماليكا: اوعى ياست انتى من وشى ،ياعصااااام فين بنتى ياعصااام

ام عصام: مالكيش دعوة ببنتك يا رد السجون ،انسى بنتك دى خالص
( بتشدها من هدومها)

طلع عصام وهنا من جوه ،اول مشافت مامتها جريت عليها
حضنتها ماليكا ودموعها غرقت هدوم هنا

هنا: بابا انا بحبك اوى انت جبتلى ماما

ماليكا( بتبوسها فكل حته) انا مش هسيبك تانى ابدا

عصام واقف بيبص عليهم

ام عصام: انت واقف تبص ياخويا ،ايه عاجبك المنظر اوى
روح خد البت منها واطردها الحيوانه الى قتلت ابوك!

عصام: عاوزة ايه يا ماليكا؟

ماليكا قامت من الارض وحاضنه هنا

ماليكا: هنا بنتنا ضاعت وانا مكنتش اعرف عنها حاجه يا عصام
حرام عليك بتعمل معايا كده ليه
انا عاوزاها فحضنى

عصام: مينفعش تكون معاكى يا ماليكا الموضوع خلص،ووجودك اصلا فالبيت ده
مش مرحب بيه

ماليكا: انا همشى منه البيت بس عاوزة هنا
الحمدلله المرة دى لاقتوها
انا عاوزاها فحضنى لوحصل لها حاجه بعد كده ممكن اموت فيها

عصام: قانونا مش من حقك ،ومعاكى مفيش امان ليها يا ماليكا
انتى ناسية انتى بتعملى ايه
بتاخدى برشام بيخليكى تنسى الدنيا وتهلوسى

ماليكا بدموع يصعب عالكافر جريت عليه تتوسله

ماليكا: بطلته والله ،وحياة هنا بطلته
بقيت بشتغل وفحالى
متخافش عليها حرام عليك ياعصام
ماما قالتلى ان الايام الى اختفت فيها هنا انت كنت هتتجنن ،حسيت انا عامله ازاى
من غيرها !
حسيت بيا وهى بعيد عن حضنى!!

عصام: ماليكا انا اكتر واحد عارفك ، انتى مجنونة ومندفعه والى بيطق فدماغك بتعمليه
وده مينفعش يبقى جو تعيش فيه بنت صغيرة زى هنا

لو سمحتى امشى

ام عصام: انت بتستسمحها ياروح امك،لا راجل اوى
اطلعى برة يا بت انتى ومشوفش خلقتك تانى عشان مبلغش البوليس

ماليكا( بتعيط) ابوس ايدك يا عصام!

عصام: معايا البنت ف امان اكتر من معاكى

ماليكا: معاك ضاعت

عصام: اتاكدى ان ده مش هيحصل تانى ...يلا يا ماليكا
لا البيت ده مسموحلك تدخليه تانى
ولا انتى بقيتى شخص مرغوب فيه عندنا!!

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

بقلب مكسور ودعت ماليكا هنا من تانى ،بعد م صوابع هنا الصغيرة شبكت فطرحتها
كانت هتقطعها
وهى بتعيط بحرقه
وعصام بيحاول يشدها عنها ،،اليوم كان صعب اوى ع ماليكا
رغم انها شافت بنتها ...بس ودعتها من تانى ومش عارفه ازاى ترجعها تانى لحضنها

ماليكا متعرفش اساس الحكاية ان هنا هربت عشانها
ولو عرفت كان زمان فى حاجه فصالحها دلوقت عشان تاخدها

رجليها خدتها لاخر مشوارها ...المقابر
قبر خديجة اختها !!

بليل والدنيا ضلمه ويدوب انوار بسيطة منورة فالمقابر ،كانت قاعدة قدام قبر اختها
بتعيط
مش خايفه ولاحاسة بحاجه
بتحكى وياها كأنها قدامها ، ،

ماليكا: انتى فين ؟
عارفه لولا انك روحتى وسيبتينى ...
انا مكنتش تعبت كده
انتى مشيتى ياخديجة من غير م تقوليلى انك ماشية
طب ازاى روح واحدة وخدتى روحك وسيبتى روحى لوحدها!!
كل حاجه راحت من بعدك
كل الحجات ياخديجة
كل الحجات الحلوة الى فحياتى والى كان اولهم انتى...

انتى ...وعمر ..وبنتى هنا
بقيت لوحدى خالص
بقيت تايهه وتعبانه ومش عاوزة اعيش
انت يا تجيلى بقى يانا اروحلك عشان مش هينفع كده!

بتبص فساعتها لاقت الوقت اتاخر ويدوب تمشى ع طنطا ، بتمسح دموعها
وقايمه

ماليكا: انا همشى يا ديچا ،، اسبقينى ع هناك عشان انام فحضنك وارتاح
بحبك اوى

باست شاهدالقبر بحب ومشيت خطوتين لاقت ولد صغير واقف عند قبر بعيد
عنها بكام متر

دققت النظر
وراحت له
لاقته واقف عريان خالص وجسمه مفتوح من جنابه وصدره فالنص مشقوق
والدم نازل منه من كل حته ...!

الحلقه الحاديه عشر

لايك ورأيكم يهمنى ❤
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

بتبص فساعتها لاقت الوقت اتاخر ويدوب تمشى ع طنطا ، بتمسح دموعها
وقايمه

ماليكا: انا همشى يا ديچا ،، اسبقينى ع هناك عشان انام فحضنك وارتاح
بحبك اوى

باست شاهدالقبر بحب ومشيت خطوتين لاقت ولد صغير واقف عند قبر بعيد
عنها بكام متر

دققت النظر
وراحت له
لاقته واقف عريان خالص وجسمه مفتوح من جنابه وصدره فالنص مشقوق
والدم نازل منه من كل حته ...!

وقفت ماليكا متنحه ....ده بجد
هى شايفاه قصادها ع طول ،جسمها اتلبش ومشيت ع طول
كانها مش شايفاه وهى بتحاول تبص بعيد وتبعد عيونها عنه ....

عدت عالطفل ده جمبه ....بس كانت حاسه انها بتمشى ببطء وكان رجلها بتغرز
مكانها
بتشيلهم وبتحطهم بطلوع روحها

وتلج كل عضو وكل وريد وشريان فيها وهىفالخطوة دى ماشيه جمب الولد ده !

الطفل: انا اسمى جمال !

ماليكا وقفت مرة واحدة لما سمعت صوته !! نفسها بيخرج ومبيرجعش

الطفل: انتى لو روحتى اى حته انا هجيلك ...انا عاوزك تساعدينى

ماليكا بزعيق لفت للطفل ده وهى مغمضه عنيها من الرعب

ماليكا: انا مبساعدش حد ...مبساعدش حد
حلو عنى بقى
ابعدوا عنى
هو انا اتوصفتلكم
سيبونى فحالى!!!

بتفتح عيونها لاقت انها كانت بتزعق للهوا ....مفيش حد قدامها
مفيش قدامها غير مشهد تقبض له كل نفس مقابر وبصيص نور ...ونور القمر فالسما!

بخطوات كأنها بتجرى طالعه من المقابر وهى خايفه وحاضنه شنطتها ..،

#لنورإسماعيل

.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
"هنا عايزة مامتها وفالاساس سابت الحضانه عشان تروحلها
ممكن تخلو خلافاتكم بعيد عن مصلحه البنت
عشان متحصلش تانى نفس الى حصل وساعتها ممكن هنا تضيع للابد"

رشا: عصام .....ياعصام
انت مش مركز معايا ليه ؟

عصام: معلش سرحت شوية

رشا: بقولك خلاص اتطمنا ع هنا ،مش هتيجى تقابل بابا بقى ؟
عشان تحددوا كل حاجه

عصام: ( اتنهد) حاضر يا رشا

رشا: ايه حاضر يا رشا دى وكأنى بجبرك تعمل كده

عصام: ايه يارشا عاوزة تتخانقى مثلا

رشا: انت قاعد معايا وسرحان وبكلمك بترد كل فين وفين
مالك؟
انت غيرت رأيك ومش عاوز تتجوزنى مش كده

عصام: يارشا فيه ايه انا بفكر فحاجه بعيدة عنك خالص

رشا: بعيد عنى ! عاوز تبعد عنى يعنى

عصام: هو الكلام بيتقال بيوصل مشقلب ؟ بقول بفكر فموضوع
بعيد عنك مش ابعد عنك

رشا: يعنى هو الموضوع ده الى مغيرك من ناحيتى ؟

عصام: ( بينتهد بفروغ صبر) يابنت الناس انا قولت كده

رشا: اومال مالك ؟

عصام: بفكر ف هنا بنتى

رشا: ف هنا برضو ؟ ولا ام هنا لما جت البيت وشوفتها
يمكن قلبك حن ولا حاجه

عصام( بصة سخيفه) ام هنا ايه ؟ ايه الى بتقوليه ده

رشا: لا واضح كده انك لما شوفتها هو ده الى خلاك قلبت عليا
انا فاهمة كده ومش راضية اتكلم

عصام: رشا ...لو سمحتى
متحولنيش انى اتخانق وياكى دلوقتى
احنا خارجين نتكلم ونحكى سوا
نغير جو
بلاش نكد

رشا: نكد ! قصدك انا نكد ياعصام
عشان كده مش عاوز تحكيلى مالك وسرحان ف ماليكا هانم!

عصام: يا الله!!

رشا سكتت وهى بتبرطم وعلى وشك انها تعيط

رشا: انا معرفش مالك مش طايقلى كلمة ليه
مع انى مبعملش غير الى يرضيك

عصام اتنهد بهدوء عشان تسكت وبصلها

عصام: رشا ...انا مقصدتش ولا حاجه من الى فهمتيها
ولو عالسرحان ف انا اسف ياستى
انا معاكى دلوقت

رشا( ابتسمت) طيب اضحك بقى لو مش زعلان

عصام ابتسم ابتسامه عادية

رشا: ايوة كده ....هاه مش هتقولى ايه الى مزعلك منى وقالبك
عليا ؟!

عصام بصلها بخيبه امل بعد م كان مبتسم

عصام: مفيش فايدة !

#لنورإسماعيل

.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´
بتتمشى بعربية بيبي بتزقها قدامها وطالعه من هايبر ماركت كبير واضح
انها كانت بتشترى حجات عشان حطاها فالعربية من تحت ..

عيونها جت ع محل مجوهرات من بعيد ، وسرحت جدا لدرجة انها نسيت الشارع
والناس والبيبي!

فلاااااااش بااااااك

فلوس بتتعد وبتتقسم وكام حته مجوهرات جمبهم ...

يونس: بت يا اسراء بقولك ايه

اسراء: نعم

يونس: نعم الله عليكى يا ام الذوق ، م تيجى بدل القسم كل مرة ده
نبتدى نحوش

اسراء: نحوش ليه ؟ هنطلع عمره !!

يونس: اهو دم امك الخفيف ده الى وقعنى فيكى ، لا ياختى مش عمره
تعالى نتجوز

اسراء: نت ..ايه؟( بتضحك بصوت عالى)

يونس باصصلها وهو بيعد

يونس: ايه قولت نكته؟

اسراء: لا بس الكلمة ضحكتنى ،نتجوز ايه يا يونس

يونس: زى م الناس بتتجوز ،تعالى نسالهم بيتجوزوا ازاى

اسراء: انا مبقولش ازاى ،انا بقول ليه؟
انا وانت مينفعش نتجوز

يونس: ليه هو انا طلعت مبخلفش

اسراء: انا مبهزرش يا يونس، انت وانا مينفعش نتجوز
انا وانت مينفعش يكون لنا بيت وعيال

يونس: ليه بقى ان شاء الله!

اسراء: احنا الاتنين حراميه !! فاهم يعنى ايه
يعنى بنخطف ونجرى
والى بيخطفوا ويجروا دول مينفعش يكونلهم بيت مستقر ولامكان
ولاعيال يطلعوا زيهم
ولو حد فينا نفسه هفته يعيش زى الناس
يبقى مش مع التانى
مع ناس متعرفناش ولاتعرف الى كان
عشان يتصدق اننا اتنين مثاليين وبيعيشوا زى اى اتنين

يونس( باصصلها وساب الفلوس) والله! ولما كل العريضة دى جواكى
بتحبينى ليه ؟

اسراء: عشان الحب مالوش سلطان ، محدش بيتحكم فقلبه يحب
مين وامتى
بس الجواز
هو اكبر حاجه بيتحكم فيها العقل ،والعقل وجوده ينفى علاقه زى
الى انا وانت فيها دى

يونس( ابتسم بسخرية) عندك حق ...اصل مش هعرف اسرقلك
بيت واقولك عيشى فيه
انتى تنفعى شريكة حرام
لكن الحلال ...مش سكتنا مع بعض...!!

____

جوزها: اسراء! ايه ياماما واقفه ليه

اسراء: لا حاضر انا وراك اهو

#لنورإسماعيل

.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´

بيتناول منها فنجان القهوة وواقفين سوا فالفراندا...

ماليكا: هو انا خلصت من حكاية ميرفت ،يطلعلى جمال
والله روحى كانت خلاص بتطلع

يونس( بيضحك) شكلك هنشغلك بوليس عفاريت ولا ايه

ماليكا: ممكن اسال حضرتك سؤال يعنى
انت مش بتستغرب انى بقولك بشوف روح وبتكلمنى ونيلة زرقا ع دماغى

يونس: هههههه ...والله يابنتى بستغرب بس شغف اعرف ايه الحكاية
بيبقى مغطى عن تساؤلاتى

ماليكا: اصل بقولك مستقبل الموضوع عادى كانى كل ساعة بقابل
عفريت وكانى عايشة اكل واشرب وياهم

يونس: طب كملى

ماليكا: اكمل ايه بيقولى هيجينى مكان م كنت ،هو انا ناقصه
اقسملك بالله ظهرلى من هنا وكل جسمى اتخشب
ده حتى شعر حواجبي وقف ياراجل !

يونس: هههههههه وادى قضيه جديدة ياست ماليكا
ميرفت ودتنا اسيوط
ده هيودينا فين

ماليكا: سؤال بس، ايشمعنا انا
وايشمعنا الايام دى
عمرى م كان بيحصللى كده

يونس: يعنى عمرك م شوفتى روح اموات ؟

ماليكا: ابدا ...هى ميرفت دى ( بتفتكر)
وخديجة من يوم م راحت وانا بشوفها معايا كانها لسه موجوده

يونس: لالالا روحك شكلها من زمان متصله بيهم بس انتى مش واخدة بالك

ماليكا سكتت وركزت ،بتفتكر هل فعلا كلام يونس حقيقي
هى فعلا كده من زمان !

يونس: ايه افتكرتى حاجه ؟

ماليكا: تصدق يا يونس انت طلعت بتفهم فالحجات دى فعلا
( بتفتكر) تيتة كانت اتوفت
بس اتوفت عيانه يعنى الله يرحمها مش مقتوله

وجت صحتنى وقالتلى انا ماشية يا ماليكا مش هتسلمى عليا
قومت وحضنتها
وقولتلها انتى جيتى عندنا امتى ياتيته وماشية ليه
مردتش ومشيت

رجعت لنومى تانى قولت عادى يعنى ،م هى ياما بتيجى عندنا
وبقعد معاها شوية وكده وبعدين بشوف هعمل ايه

شوية وقومت ع صويت ،ماما بتصوت ان اتصلوا بيها
ان تيتة ماتت ولازم تروح لبيتها عشان الغسل والدفنه

سالتها بعد العزا بكتير ،هى تيته ياماما مش اخر يوم كانت عندنا ومشيت؟
قالتلى جدتك مقامتش من سريرها اسبوع بحاله قبل موتها!
وساعتها افتكروا انى حلمت بيها
بس انا شوفتها قدامى وحضنتها كمان ومكانش حلم ...

يونس: ( بيفكر فكلامها) اتاكدتى من كلامى

ماليكا: بس انا عمرى م افتكرت الحوار ده غير لما قولت انت دلوقت

يونس: وع فكرة انتى روحك متصله بيهم من زمان ،بس فى حاجه
اقوى جدت عليكى
هى الى بتخليهم تبقى صلتهم قريبه كده

ماليكا ساكته ....

يونس: زمان ....فمرة من مرات السرقه بتاعتى وبلا فخر

ماليكا ضحكت

يونس: يلا اهى كلها كانت ايام سودة ،المهم ياستى
نشلت شنطة لواحد شكله برنس فنفسه كده كان طالع من بنك
كان جوه الشنطة غير الفلوس
كتاب
فاكر اسمه جدا لانى قعدت اقراه ليلة بحالها لحد م خلصته
اسمه
The Six Sence

ماليكا( بسخرية) ماشاء الله ،نشال مثقف

يونس: لا حاسبي ،انت كنت دودة قراية
بحب القراية اوى زمان
اى حاجه تقع فايدى اقراها

ماليكا: بس شكلك كنت شاطر ، مكتوب بالانجلش وقريته

يونس: ومن غير م استعين بقاموس

ماليكا: هههههه

يونس: المهم ،ان الكتاب ده كان بيقول
ان فى حاسة سادسة بتيجى ل٪١
من كل جماعة من البشر
بيبقوا متصلين بالعالم الاخر جدا
بيتكلموا معاهم كأنهم بنى ادمين بالظبط
بيحسوا بيهم
بيبقوا عايشين بين عالمين
الاحياء الاموات
ومش لازم كلهم يكونوا مقتولين ..

ماليكا اتنهدت لما سمعته

ماليكا: يعنى خلاص انا حياتى اتكرست لكده ! اشتغل مخبر ارواح
ده مين قتله وده مين حرقه

يونس: بلاش تسخرى منهم لانهم ممكن يأذوكى !!

ماليكا خافت لما سمعت الكلمتين دول من يونس ، وقررت تقفل عالموضوع
ده
عالاقل الليلادى !

#لنورإسماعيل

.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´
من يوم م مشيت ماليكا قدام عيون هنا بنتها شبه مطرودة ،وهما بيشدوهم
من حضن بعض
رغم صغر سن هنا
الا انها عارفه يعنى ايه تغضب او تأثر عليهم انهم يرجعوا امها ،،،عقلها اصغر
من انه يستوعب مشاكل وانفصال وحرام وحلال
هى مستوعبه ان امها ترجع ليها وهى تبقى معاها وبس ..

مخاصمه جدتها وباباها ...
اكل مش بتاكل
وطلوع من الاوضة مش بتطلع
باباها بيأكلها بالعافيه عشان متتعبش ، لكن جدتها شايفه ان ده دلع ماسخ
منها حتى لو كانت طفله ..

عصام: برضو مش راضية تاكل ولاتلعب ولا تعمل حاجه

ام عصام: اتعلمت اللئم من امها ، حتى الى مطلعتش من البيضه
بقت تتخابث وتعاقبنا

عصام: تتخابث ايه يا امى دى عيله متفهمش حاجه

ام عصام: اهو انا عندى تموت من الجوع ، ولاتروح لرد السجون دى

دلع ماسخ وعيال مش متربيه
ده انت المفروض تمسكها تطلع شعرها فايدك عالعمله الى عملتها فينادى
مش تحايلها وتداديها عشان تاكل وتلعب يا بيه!

عصام: بقى هنا ام ٤سنين ونص بتتلائم يا امى ؟ هى عايزة امها

ام عصام: يكش تولع امها والى جابوها فيوم واحد
عيلة شووم جم وجابوا الهم فرجليهم

عصام : انا خايف البت تعملها تانى وتهرب ،عشان تروح لامها
وساعتها هتضيع هنا وهخسرها بجد
يمكن ربنا وقعها فست غلبانه المرة دى
المرة الجايه ايه هيحصل

ام عصام: م تنشف يا واد ،رجاله ايه هى

عصام: بطلى بقى طريقتك دى معايا

ام عصام: لا تكون عاوز ترجعها لعصمتك يا موكوس
ترجع الى كلت عيشنا وملحنا وقتلت ابوك
الساهية الداهيه بتاعت البرشام

عصام: انا قولت كده! انا بقول لو اتجوزت رشا
انا سالت ان فالقانون تروح ...

ام عصام( قاطعته) والبت دى برضو انا مبحبهاش
كلهم بوم وشبه بعض

عصام: اومال عايزانى اتجوز مين،انا مش هعرف اعيش وحدى كده

ام عصام: استنى انقيلك انا ،نقاوة امك

عصام: اه وهتنقيلى مين بقى؟ نرمين الفقى

ام عصام: اتريق اتريق ...انا بقولك اهو عشان مترجعش تقول
كانى ولا مانى
رشا دى كمان انا مش مرتاحلها
اذا كانت بوز الغراب قتلت ابوك
فمش بعيد دى تقتلنى !!

عصام: يا امى عامله فيلم من مفيش...انا هقوم انام
تصبحى ع خير

ام عصام: وانت من اهله ياسبع الليل ،جاتك نيلة فخلفتك
خلفه تجيب ورا..

#لنورإسماعيل
.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´
"كتاب ايه ياعمر الى بتسال عليه ؟"

عمر : كتاب يا امى هنا كان مع كتبي مش لاقيه

ام عمر: دورت فكل كتبك الى فالمكتبه ؟

عمر: اومال انا بسأل ليه بس ، مش لاقيه عاوز اراجع حاجه كده

ام عمر: ربنا يعترك فيه يابنى مدام مهم لشغلك كده
استنى هسال اختك او ايمان

خرجت والدة عمر تسال الى فالبيت عن كتاب عمر ،دخل باباه له
الاوضة

الاب: انت مش شايل جزء لاففهم فوق دولاب اوضتك

عمر ( بيدور) اه يابابا بس اكيد مش فيهم ،الى فوق الدولاب دول
بتوع الكلية
ده اشتريته بعدين ....كنت حاطه ضمن دول

الاب: شوفه مش هتخسر حاجه، يمكن فيهم ملاقتهوش
ارجع بص فحته تانيه جايز تكون شايله فيها
او مثلا خدته معاك المكتب

ايمان داخله بلماضتها

ايمان: م تدور فوق الدولاب ياخالو انت شايل كتب كتير فوق
هو بس شقا وخلاص وماما تقولى روحى دورى مع خالك

عمر جاى من اخر الاوضة عن المكتبه ،ومسكها من ديل حصانها
فشعرها بيجرها بهزار

عمر: عارفه لو ملاقهتوش هسحلك انتى ولسانك ده ماشى

ايمان: سيب شعرى بس وهتلاقيه وعهد الله

عمر: وعهد الله!! ماشى يا جزمة

جاب كرسي وطلع اتناول لفه كبيرة كده جواها كتب ...
نزلها ونفض التراب من عليها

بيفتحها براحه

ايمان: ياسلام بتعامل الكتب ارقى م بتعاملنى ياخالو والله

عمر: عشان الكتب ذات قيمه وانتى لا( بيدور فيهم)

وهو بيشوف سقط من بينهم كيس قطيفه صغنن مربوط

مسكه وبص فيه
وفتحه

كان جواه دبله ...وورقه
فتحها ،واول م عينه جت عالى فيها
كان فدنيا غير الدنيا

فلااااااش بااااك

شباب كتييييير وبنااااات لابسين هندى !!

اه هندى ومن غير ضحك ،الشباب لابسين كارديجن رجالى والبتاعه
الى فوق الراس دى
والبنات ساريهات هندى

هى كان من ضمن شروط العروسين ان هتبقى حفلة غير العادة وغير اى
حفله اتشافت

يمكن كلية حقوق بدفعاتها كانت مشرفه واساتذتها
لكن الى لابسين الازياء الهندى هما المقربين بس ...

العروسة جاية والعريس مستنيها عند باب القاعه لابس بدلة عادية
لكن هى لابسه السارى ..

مكانتش جاية فدراع اخوها
ولا بعربيه

لا لا
روحوا بخيالكم لاقصى حد ....كانت فكرة اخت العروسة وتوأمتها
ان كل حاجه تكون طقه للاخر

ماليكا جاية ع حصان !!!

ع حصان ابيض وحدها وماشى ببطء ، والبنات حواليها بيسقفوا
وورق ملون كتير كتييير وصواريخ بتضرب حواليها وهى جايه.

خديجة ماشية محاذية الحصان وماسكة كف ايدها

ودينا واصحاب ماليكا بيرشو ورق الزينه والشباب بتهيص

كانت زفه الكل يتحاكى عنها

وصلت عند القاعه ، نزلها بالراحه معاوية اخوها وخدها فحضنه
وباسها وباس خديجه اخته

وخدها فدراعه لحد باب القاعه وسلمها لعمر

عمر ابتسم وضغط ع كف ايدها لما وصلتله ، لكن اصحابهم مرضيوش ابدا
يدخلوا سوكيتى عالاغانى وبس

حرفيا كان فيه شقلبه قدامهم
رقص ورمى زينه عليهم وهيصة شباب ع بنات ، وخديجة فالنص
مش مبطله رقص وضحكتها من هنا لهنا
وتمسك دينا واشرف وبسمه المقربين للعروسة ويرقصوا هندى

ووقف اشرف فالنص ويعمل رقصات الهنود والبنات تقلده وعملو دايرة حواليه
وهاتك ياضحك ورقص وفرفشه وكل ده وعمر وماليكا واقفين
مأنكشين بعض وفقمة انشكاحهم وفرحتهم ..

بخطوات هادية عشان اعاقة عمر كانوا ماشين ،والمجانين دول بيزفوهم

وصلوا للتربيزة طولية

قاعد عليها راجل بعباية وقوفطان وكام شاب ومامت ماليكا
ومامت عمر واخته وجوزها وابوه وايمان بنتهم ...
وصلوا العرسان

الهيصة وقفت ،العريس قعد عاليمين ومعاوية عالشمال

وفالمايك

بدأ المأذون يقول خطبته الى بتتقال فالاوقات دى والكل مستمع

وبعدين حطوا ايديهم فايدين بعض معاوية وعمر
وقاعدة ماليكا ورا معاوية وخديجة واقفه حاضنه كتافها بايدها

معاوية: زوجتك موكلتى البكر الرشيد ماليكا يعقوب موسي

عمر باصص بابتسامه جميله ولمعانه لماليكا وقلبه وقلبها بيدق فوقت واحد

عمر: قبلت زواج اختك وموكلتك الانسة ماليكا يعقوب موسي

ماليكابتردد بصوت واطى وبصاله بفرحه ،خلص عقد القران
وفى اخره

المأذون: وصلى وسلم ع سيدنا محمد ( شال المنديل وخطفه اشرف وضحكوا)

الزغاريد عليت من تانى ، وقام عمر يهنوه اصحابه ويبوسوه
ويبوس ايد باباه ودماغ امه ويحضن اخته

جم لحد عنده اساتذته فالكليه يهنوه ،وماليكا مكانتش باينه من دايرة
البنات حواليها من التهانى الى نازلة ترف عليها

خلصت التهانى ...وبقت مراته شرعا !

رجعت الهيصة والجنان ،عمر الى عنده اصابه فرجله تمنعه من الحركة
الجامدة
كانت الفرحة بترقصه غصب عنه
وكانت ماليكا اول مرة تشوفه برة اطاره هدوئه المعتاد
رقص مع زمايله وضحك لدرجه عرقه كان نازل ع وشه وبدلته

وماليكا ممكن تكون خست النص من الرقص يومها ،وتحضن ايمان
بنت اخته وترقص وياها
وتمسك خديجه ويتمايلوا سوا مع الاغانى
نطنطه وزقططه وفرحه كبيرة

وعمر جه خطفها من وسط البنات ورقصوا سوا مع بعض وهما حواليهم
فرحانين بيهم

جابولهم عصير وشربوا بعض
وجابو جاتوه ...عمر قطع قطعه وادهالها فبوقها

وبعدها هى قطعت قطعه وادتهاله

اشرف جرى قطع قطعه وادهالها

اشرف: خليها ع لسانك يا ماليكا متبلعيهاش ،يلا ياعريس خدها

عمر اتكسف وبص لاشرف

اشرف: ورحمة امى وابويا الفرح ماهو هيعدى غير لما تاخدها
منها يلااا

خديجة: ايوة عنده حق دى مراتك دلوقت

دينا: يخربيت جنانكم

عمر بيبص حواليه ع معاوية

اشرف: معاوية خرج جاله اتصال او راح الحمام او اى بتاع
دى مراتك ياجدع

عمر: لسه ياحمار

اشرف: معاك قسيمة بتقول كده ( بيبص للى واقفين) يلا ياعيال
بوسها بوسها بوسها

خديجة( بتسقف وبتضحك) بوسها بوسها

ماليكا واقفه مرهونه بحته الجاتوه فبوقها ومكسوفه ع اخرها

عمر بصلها مبتسم ،مسك كفوف ايدها بايده وهى واقفه محاذياهم
لجسمها
قرب عليها

وكلهم عينيهم عليها والكاميرات اشتغلت

عمر( مكسوف وبيضحك) اعمل ايه طيب ( بيقرب عليها)
مش عارف والله

اشرف( ضربه فضهرها) م تخلص هى عمليه لوز ،كده خدها موئة مرة واحدة

عمر: موئة ! انت منك لله

عمر قرب لماليكا ...كمان
بقى عند وشها
هياخد حته الجاتوه، غمضت هى عنيها

الكاميرات عليهم
عمر عرق من الكسوف بس للحظة حلوة نسى نفسه وباسها بجد !!
واتلقطت لقطة من اجمل لقطات كتب كتابهم ...

والكل فصوت واحد

هييييييييه هووو ده اوووووى بقى ????????????

.• .¸.•'´¯'*•.¸¸.¸.•'´ .•'´¯'

الحلقه الثانيه عشر

شكر خاص /
الكاتب:: احمد حسن
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´

ايمان : خالو ....ياخالو لاقيت الكتاب؟

عمر سرحان وباصص للقسيمة ...

ايمان: ياخالو

عمر: ايه يا ايمان ؟

ايمان: لاقيت الكتاب

عمر: لا ملاقتهوش ، ويلا اطلعى برة

خرجت ايمان مستغربة مرة واحدة اتقلب ليه كده ،قعد عالسرير وماسك القسيمة
وطلع القسيمة التانيه وقراها للمرة العشرين ...او الخمسين
بعيون حزينه وهو بيتنهد ...شكوى قلبه كانت لله دايما وعمره م صرح بيها لحد..

• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´

ماليكا واقفه قدام المرايا ..بتستعد انها تنزل على شغلها زى كل يوم
بتظبط طرحتها
وبتحط شوية حجات من مستحضرات التجميل
يعنى بتحدد عيونها بقلم الكحل ...شوية كونتور ع خفيف

ماسكة قلم الروج الهادى تحطه وقع منها عالارض ..

نزلت تجيبه بس هو اتدحرج وكأن فيه هوا بيدحرجه عالارض رغم انه بلاط عادى
ميساعدش على كده

اتدحرج قلم الروج لتحت سريها الى بتنام عليه .

بترفع ديل ملايه السرير تتناول القلم بتاع الروچ ،لاقت الولد ده الى طلعلها فالمقابر
"جمال" تحت السرير وبياخد نفسه بصعوبه وكأنه كان بيجرى من حد!!

ماليكا اتخضت ورجعت لورا وقعت ع ضهرها عالارض..

ماليكا قلبها هيتنفض من مكانه من الخوف ،وباصه له وهو باصصلها

جمال: متخافيش منى انا مش هأذيكى
ماليكا متخشبه وبوقها مقفول من الخوف كأنها اتكهربت

جمال: انا تعبان ...وانتى هتخلينى ارتاح

ماليكا : عر...عرفت منين انى انا...هساعدك؟

جمال: روحك شوفتها وكلمتنى انك هتعملى اى حاجه عشان تساعدينى

ماليكا مبرئاله هيغمى عليها وسنانها بتخبط فبعض

جمال: انتى ظلمتى روح زينا فيوم ولازم تكفرى عن ده بمساعدتك لينا

ماليكا حست ان الولد عاوز يوصلها رسالة وهى نقدر نقول فهمت هو عاوز يوصل ايه

ماليكا: مطلوب منى ايه انا تعبت

جمال : انتى كل م هتساعدينا،الروح الى ظلمتيها دى حتهدا
اوعى يتهيألك انها كويسة...!

ماليكا حاسة ان الى بيقوله جمال رد ع تساؤلات كتير جواها ، زائد ان لمحلها لحاجه
غريبة

ماليكا: وانت عارف منين ان الروح دى تعبانه ومش كويسة

جمال: راحت غصب عنها ( بكى دموع وعيونه قلبت احمر) زينا!

ماليكا ابتدت دموعها تنزل من عيونها

جمال شاور بصباعه على ماليكا

جمال: راحت بسببك

ماليكا( بعصبيه) لا مش بسببى ! لا
كان غصب عنى انا كمان
عمره م كان بسببى ...لو انا السبب انا اموت نفسي

جمال عيونه قلبت لعيون خبيثة وسنانه شكلها اختلف لمرعبه بعض الشئ
وبقت كلها سودة مافيش بياض

جمال: بتكدبي على نفسك ...

قال الكلمة دى واختفى من قدامها !!

ماليكا اتحطت قدامه مش قادرة تقوم ، فقدت كل احساس للقوة جواها

بتسال نفسها

ماليكا: معقول عشان راحت ...بسببى بيحصللى كده
معقول هى مش كويسة

بتمسح عيونها

ماليكا( باصة للسما وبعصبيه) يارب خدنى بقا عاوزة ارتاح ...

#لنورإسماعيل

• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´

" عصام !اهلا بيك اتفضل "

عصام: معلش يا دينا لو جيتلك من غير مواعيد كده

دينا: لا المكان مكانك ياعصام ، تشرب ايه

عصام: لا شكرا

دينا: لا ازاى انت اول مرة تشرف مكتبي

عصام: خلاص اى حاجه ساقعه

دينا : تمام ( قامت فتحت تلاجة مكتبها الى برة فالمطبخ الصغنون ،عملت
له كوب عصير وجت )

دينا: اتفضل
عصام: شكرا ،دينا انا مش هعطلك
كنت جاى عاوز اسالك فحجات فالقانون ،بخصوص هنا

دينا انبسطت من جواها ،حست ب امل انه ممكن يسيبها تعيش مع
اهل ماليكا

دينا: اتفضل اسالنى ف الى انت عاوزه

عصام: لو اتجوزت ...هنا مش هتبقى من حقى ولاحق امى مش كده

دينا: اه ...هتبقى حضانتها لجدتها ،والدة الام
ولو متوفيه بعد الشر
بتبقى والدة الاب

عصام: تمام ...

دينا: ايه خلاص نويت ؟ هتتجوز

عصام: انا ناوى من فترة ،بس لما جه موضوع هنا ده لخبط كل حاجه
وبالذات لما عرفت انها هربت
عشان تروحلك وتوديها لامها

بيقول الكلام وهو مستصعبه ع نفسه .

دينا( استغربت) ايه ده بجد ؟هنا هربت عشان ماليكا

عصام: ايوة ، وخايف تعملها تانى

دينا: يبقى لازم تروحلهم بسرعة ياعصام ،ده لمصلحة هنا
ومصلحتك انت كمان فعدم ضياع البنت
زائد ان انت لو امتنعت من ان هنا تعيش وياهم مع ان القانون فصفهم بعد جوازك
المحضر الى معمولك بضياع البنت دى حاجه تدينك بزيادة

عصام(اتنهد) من غير مشاكل ،انابس اخاف عالبنت من الجو هناك عندهم

دينا: ماله الجو ياعصام ؟ انت عارف ان ماليكا من بيت محترم
واهلها ناس كويسين جدا

عصام( بسخرية) الناس المحترمة دى تسيب بنتهم تسهر وتشرب فالكباريهات!
انتى ناسية انا اتعرفت عليها ازاى

دينا: وهو فى حد ضربك على ايدك ! وبعدين متنكرش انها ان كانت عملت كده
فعشان الصدمتين الى خدتهم ورا بعض
ميتحملهمش بشر

عصام: انت بتجيبلها اعذار من الهوا ،انا اهو ابويا اتقتل وبعدها طلعت هى ال. قتلته
وطلقتها وبيتنا اتخرب واتدمر بسببها
اروح اشرب واسكر بقى
ده مش مبرر

دينا: لا طبعا مش مبرر ،وانا كنت ضدها فيوم من الايام باللى عملته ده
بس انت عارف ان ماليكا معرفتش تتخطى الصدمتين اصلا
موت خديجة توأمتها وطلاقها من عمر

عصام( بسخرية) عمر ....عمر ال. فضلت تحبه وهى شايله اسمى
ومخلفه منى

دينا: ماليكا عمرها م خانتك ياعصام ،ولولا م انت عارف ان جواها نضيف
مكنتش اتجوزتها لان مفيش حاجه تجبرك على كده
ولو على عمر فهو خلاص صفحة وانطوت من حياتها للابد ومفيش رجوع
وانت عارف ان طول فترة جوازكم كانت كويسة معاك ومع مامتك وباباك

عصام: لحد م قتلت ابويا مش كده؟!

دينا: انت عارف وانا عارفه قتلته ليه !!

دينا قالت جملتها بثقه عصام عارفها ومينفعش يكدبها ،بس النهاية كانت موت ابوه

دينا: انت عارف ان لولا الى حصل من المرحوم والدك ليها مكانتش هى عملت كده

عصام: دى واحدة بتتعاطى براشيم هلوسه ،يعنى لايمكن حد يصدق منها كلمة

دينا: هسالك سؤال ياعصام
ماليكا اه كانت بتاخد مهدئات من وراك وده غلط وحقك تاخد موقف منها
بس سؤالى ...عشرتك لماليكا تقولك فيوم انها مجرمه
او قتاله قتله ؟
عصام برجله السؤال الى جواه اكيد الاجابة فصالح ماليكا ، وهما قاعدين
خبط ع باب المكتب عمر !
كان اصلا على ميعاد مع دينا لامر ما ...واتفاجئ بوجود عصام عند دينا..

عمر( ببصه جانبيه) السلام عليكم ...

دينا: تعالى يا عمر اتفضل

عصام حتى مردش السلام وباصصله برخامه وعمر باصص فالارض

عمر: طيب انا هستنى برة لو ...

دينا: لا انا معاك ،جهزتلك المواد الى طلبتها منى فالكتاب الى ضايع منك ده

عصام : طيب انا هقوم ،شكرا يا استاذة دينا ع وقتك
وهفكر فاللى قولتيه بخصوص هنا

دينا: تمام

عصام مشى خطوتين سمع عمر بيقول لدينا بصوت هامس

عمر: هيرجع هنا لماليكا !

رجع عصام تانى

عصام: اظن مش من حقك السؤال

عمر : سؤال ايه

عصام: سؤال هنا هترجع ولاهيحصل ايه ،شئ ميخصكش

عمر( بتناكه) لايخصنى ...وجدا كمان
وانت عارف ليه كويس
زائد انا مش هاخد منك اذن اعرف ايه الى يخصنى اتكلم فيه
وايه الى ميخصنيش
ضيف على ده كله انى كنت بسال الاستاذة دينا

عصام: بتسالها عن بنتى!

عمر: انا حر ،يهمنى مصلحة هنا
وبرضو انت عارف ده بس غاوى تدخل فحوارات

عصام: وطبعا حضرتك ع اتصال بالمدام ...مش كده

دينا: ياجماعة فيه ايه

عمر: على اتصال او. لا برضو ميخصش اى حد يعرف ده
وحتى وان كنت على اتصال
فهو من حقى

قرب لعصام من وشه

عمر: من تلات جهات ،وتلات زوايا
انا مينفعش صلتى بماليكا تتقطع
حتى وان كانت ...هى كانت اد مسؤلية بيتك وصاينه شرفك
وعمرها م كلمتنى ولا كلمتها طول م هى على ذمتك
فحاليا ....مش بامرك اوصلها او لا

عصام بصله من فوق لتحت بغيظ وهو دمه محروق منه جدا ..

دينا: ياعمر كلامك كان حاد

عمر: هو مالوش اسال ولا مسالش ...هو اكتر بنى ادم غبي فالدنيا
للحظة اتمنيت انى تكون مطرحه وكان ربنا بدل الادوار وكنت انا عصام

دينا: يعنى لو لاقدر الله كانت قتلت والدك كنت هتسامحها ياعمر( بخيبة امل)

عمر: ماليكا مكانتش هتعمل ده لو هى معايا يا دينا ، مكانش ولا دربكة من دربكات
حياتها دى حصلت من اساسه
( بحزن) بس هى مشيئة ربنا ولا اعتراض عليها

دينا ( بتجمع داتا وتنقلهم ع فلاشه من الجهاز وهى بتتكلم) بستغرب برغم كل
الى عملته ماليكا فحياتها
انت لسه بتشوفها هى ماليكا بتاعت زمان

عمر : زمان هى سالتنى ...انا مش حلوة اوى ومع ذلك حبتنى
قولتلها انا بحب روحك
وانا عارف ماليكا من روحها ،ارق واطيب من روح طفل صغير
هى بس الدنيا لما بتتلخبط معاها بتتجنن
ودى برضو براءة
لاعندها خبث ولا لئم تشيله لحد
زيك انتى ...حصل مهما حصل وانتى لسه صاحبتها ومسبتهاش زى الى سابوها
م تسألى نفسك ليه ؟

دينا: عندك حق ...

سكتوا شوية ،كانت جمعت له الى طالبه وفنشت

دينا: اتفضل ياسيدى ...اى خدمه

عمر: تعبتك يا دينا

دينا: بالعكس ياعمر انت تؤمر ، نسدشوية من الى علينا

عمر: بالعكس انا مش عامل معاكى حاجه

دينا: ازاى بقى ، مش كفاية الصيت الى خدته بعد
قضية ماليكا والقضايا نازلة ترف ع دماغى
وكل الفضل يرجع لربنا الى حطك فطريقى وساعدتينى

عمر: ربنا حطنى فطريق ماليكا يادينا ، مكانش ينفع يتحكم عليها بالعدام وتموت
واقف ساكت وانا اعرف اخترع اى دليل يبرئها

دينا: ( بتتكلم بضحك) لحد دلوقت هى ماسكالى طلعتينى مجنونة فالمحكمة
طلعتينى مجنونة هههه
وانت السبب منك لله

عمر: مش مهم مجنونة وبنحبها لكن تروح مننا لا

سرح وافتكر حاجه

عمر: اااه عشان كده استغربت لما روحت يومها المحكمة

دينا: لا انا مقولتش انك مساعدنى فتلات ارباع القضيه
هى فاكرة ان انا الى جبت كل حاجه طبعا

عمر : كويس كده احسن ...هسيبك انا
عطلتلك بما فيه الكفاية

دينا: ياعم ولايهمك ،ابقى طمنى عالقضية بعد م تخلص
ربنا معاك

عمر: ومعاكى ...سلام

دينا : مع السلامه

#لنورإسماعيل

• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´

طفلين ..لا تلاته
فشقه كده قاعدين ...بيلعبوا وبيضحكوا

وقاعد بعيد جمال ..لوحده ع جنب
بييجى باباه يطبطب على راسه ويقوله يلعب مع اخواته

جمال بيرفض
بيديله فلوس وبيقوله ينزل يلعب فالشارع ،بتيجى
عليهم ست بتطبطب ع جمال وبتبص لوالد جمال بابتسامه

وبيودعوه عند باب الشقه ، واول م بيتقفل الباب
الست دى بتقرص جمال وهو بيصرخ وبتحاول تاخد منه الفلوس
بالعافيه ..

وجمال بيصرخ اوى ، بيحاول يجرى منها ويفلت مش بيقدر
بتقلع شبشبها وبتضربه فكل حته فجسمه

وبتاخد الفلوس بالعافيه وبترميه عالارض مكانه ،وبتنادى
ع ولادها ياكلوا جوه وهى بتضحك
وبتسيبه عالارض بيعيط ....وبتختفى الصورة من قدام ماليكا .

بتبص جمبها وهى بتسال جمال الى جايبلها الصورة

ماليكا: طيب الى فهمته انها مرات باباك مش امك ، مالها بقا
يعنى مش واضح موتت ازاى

بتبص جمبها ملاقتش جمال !

قامت من مكانها مخنوقه ،الخوف مبقاش زى الاول من ساعة م واجهها
انها كل م هتساعد روح كل م الروح الى ظلمتها هترتاح ..

قامت من مكانها ودخلت الفراندا

ماليكا: ايه ده انت واقف! يا اهلا بشريك الوحدة الليليه
(بتقول بسخريه)

يونس: اليومية بقت مش الليلة وبس ...

وقفت مكشرة وسرحانه بتبص عالنجوم فالسما

يونس: مالك

ماليكا: حاسه ان خديجة بتبصلى من فوق فنجمة من دول
بس انا مش شايفاها

يونس ابتسم

ماليكا: الا قولى صحيح ...انت قاعد ليل نهار فالشقه
انت هربان صح ؟
قول قول شكل عليك احكام ودى مش بلدك
وانت كمان ايامك مزرقه بزرقان النيله

يونس( ضحك) اه تقدرى تقولى كده ...ماليكا !

ماليكا: نعم

يونس: م تحكيلى حكاية التاتو ده ( بيشاور عليه)

ماليكا بتبص للتاتو وابتسمت بسخرية من الى هى فيه

ماليكا: يعنى انا دلوقت صحيت من احلاها نومه
ع جزء من فيلم الاستاذ جمال ومش هتريق عشان ميأذونيش
وبقت جتتى متلبشة لاعارفه بتعامل مع مين حى ولا مين ميت
وانت جاى تقولى ايه بقا
احكيلى حكاية التاتو ( بتضحك)

يونس: اصلا كل الهرى الى هرتيه ده بقا عادى بالنسبة لى
لان الى انتى فيه انا دخلته معاكى بالاكراه

ماليكا ( بتضحك) اكراه

يونس: انا عاوز اعرفك اكتر ،مش بقولك كانى اعرفك من زمان
وفى حته فحياتك وقعت منى
احكيهالى بقى

ماليكا: عاوز ايه يانشال افندى دلوقت ،انا عامله دماغ مع جمال
زى الفل ومش مكمله نوم وحاجه اخر عنب

يونس: اصل غريبة ،ايشمعنا ايزيس
وايه الى جاب ايزيس ل ماليكا

ماليكا: اقولك ...ايزيس دى حكايتها
كالآتى

فلاااش بااااك

شقة عالمحارة لسه بتتشطب ، وعلب دهانات عالارض ورملة
واسمنت
جمبهم
وجرنال فيه سندوتشات كبده وحواوشى وازازة حاجه ساقعه جمبهم
وكام كيس شيبسي

عمر: يلا سمى بالله ( بيديها فبوقها)

ماليكا: مش عايزة اتاخر ،قولت لمعاوية هشوف الشقه وجايه

عمر: هو انا هخطفك ؟ ده انتى مراتى

ماليكا: مانا عارفه بس انت عارف معاويه ( بتديله شيبسي فبوقه)

عمر: خلاص هانت ....قريب اوى
هنبقى هنا
ولوحدنا
وده عالمنا
ومحدش يقولنا تلت التلاته كام

ماليكا( بتاكل) يارب بقا امتى ...حاسة انى بحلم من فرحتى

عمر مبتسم لها

ماليكا: اصلا انت سبب الضحكة الى بقت فوشى ليل ونهار دى
طب اقولك ع حاجه ومتضحكش عليا

عمر: قولى حبيبتى

ماليكا: انا كل يوم بصحى ابص فالدبله بتاعتى اشوف ده بجد
ولابحلم وابوسها وانام

عمر ضحك جامد

ماليكا: مش قولتلك هتضحك عليا

عمر: اصل انا كمان بعمل كده ،ببوس الدبله كل م عينى تيجى
عليها

ماليكا ضحكت ومالت ع كتفه

ماليكا : اخر بيتين الفتهم وبعتهملى فالجواب بتاع كل يوم
عجبونى موت
انت مش متخيل

عمر: بجد !

ماليكا: اه والله ،حتى طريقتك بتاعت كل يوم نبعت لبعض
ورقه فيها كلمتين
اى كلمتين
فظيعه
احلى بكتير من كلام شات او كده
بقيت كل يوم استنى بكرة هتكتبلى ايه

عمر: ( حضنها وباس دماغها وبص لعيونها) ربنا يديمك نعمتى يا ايزيس❤

ماليكا ( باستغراب) ايزيس !
ايزيس مين اعترف بتغلط ف اسمى

عمر: لا طبعا ...ايزيس دى تبقى انتى

ماليكا مستغربه

عمر: حفهمك ...هشام الجخ له قصيدة اسمها ايزيس
كل م اسمعها احس انه بيتكلم عنك
عن حبك وقلبك الكبيير الى سايعنى فيه
وحنيتك واهتمامك الى مالهمش حد حتى لو انا مش عارف اديكى اد
م باخد

ماليكا( مبتسمه) بتقول ايه بقى القصيدة دى

عمر ماسك كف ايد ماليكا ومركز فعيونها

عمر :: ايزيس
ازاى بتتحمّل؟
غمز البنات واوعر من غمزهم ردِّي
جاياني ملهوفة ما تلاقي غير صدِّي
أحزن في أحضانها وافرح هناك وحدي
يا ام القليب اتخلق معرفش غير يِدِّي

يا ام الفؤاد ولاّد
معرفش غير يعشق
الصبر عدّى وزاد
يا قلبها المتقاد
ما عرِفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تِدْمع رياحينها
ولا قلبي يوم يشفق
وازاى بتتحمل ..

ماليكا : كملها

عمر : هى طويله وجميله اوى ،بس دول اكتر ابيات
بحس انهم عليكى

باس ايديها

عمر: بحبك يا ايزيس ...عارفه كلمه روح قلبي
بتتقال ك كلمة حب من حبيب لحبيبه
بس انا بقيت احس معناها
عشان انتى بجد انتى الروح الى عايش بيها قلبي
ومن غيرك توقف دقاته...ويموت !

ماليكا( رايحه خالص فيه) وبتقول انك مبتديش اد م بتاخد منى
انت لو مبتقولش
كفاية احساسك وانت بتقولى اى كلمة ،بيدخل قلبي ع طول

عمر قرب لها بحب ويمكن انفاسهم بقت اقرب كتير لبعض

ماليكا: هيفضل قلبي ليك ،انت دخلت ورميت المفتاح خلاص

ابتسمت بخجل ،رفع دقنها له وقربها عليه
وقرب هو
وباسها بوووسة طويييلة اوى وبعدها حضنوا بعض بلهفه لذيذة

عمر: انتى اغلى حاجه عندى يا ايزيس

ماليكا: ربنا يخليك لقلبي ياعمر ،ياروح ايزيس ( باست كف ايده)

____

يونس: اوى بقى ،ازى بقى ويلا بقى وخمسه موااه وخمسه هوان يو

ماليكا: هههههههه

يونس: وعنها وروحتى عملتيلنا تاتو بقى

ماليكا: طبعاااااا ، ده اسم اتوشم على روحى خلاص
انت عارف عمر كان له تفاصيل حلوة خاصه بيا كده انا بحبها
يعنى طلب منى اديله الفستان الى كنت لابساه لما قرا فاتحتى
ومثلا اى حاجه اكون بستعملها وتخلص
زى قلم روج ،او علبة كريم
كده

كنت بديهاله وافرح اوى ،فى حد بيهتم بتفاصيلك اوى كده

يونس: بس بعيد عن التفاصيل ، البوس الى بيحصل ده
كان اخركم فالاكشن

ماليكا: هههههههههه اومال انت عاوز ايه يعنى
يونس: لا والله مش عاوز بسال بس

ماليكا: اصلا الموضوع ده انا مكنتش بحب يحصل قبل الجواز
وكده

يونس: م انتى طبيعى مراته يابنتى فيه ايه

ماليكا: بس برضو

يونس: والنبي انتى بنت ناس ياماليكا

ماليكا: تقصد ايه

فلااااش بااااك

اسراء واقفه شكلهم فمكان وحدهم ،وساندة ضهرها للحيط
ويونس بيبوسها ..

اسراء بتزقه وبتبص حواليها

اسراء : اوعى انت م صدقت
يونس: م انتى الى ميتشبعش منك اعمل ايه

اسراء: طب انا هروح بقى

بتحط شنطتها فكتفها وماشية

اسراء: واد يا يونس

يونس: عيون الواد

اسراء: بقت مقابلاتنا غراميه يعنى ومفيش شغل اليومين دول

يونس: شدى حيلك معايا طيب مش لازم كل مرة اخطط

اسراء: لا احنا اتفقنا انت تخطط والتنفيذ سوا

يونس: ياسلام ! وفالاخر بنقسم بالنص طب فين العدل
المفروض تلتين وتلت

اسراء( بمياصه بتضربه ع صدره) طب م انت بتاخد بقشيشك
يالى زى القطك تاكل وتنكر

يونس( غمزلها) لو على كده ماشى ...انا مش عايز اقسم
خدى الى يطلع كله ليكى من اى حاجه تقشطها

اسراء: كلام رجاله ؟

يونس( بيضحك) قصدك ايه

اسراء: قصدى يعنى لو فمرة خليت مكسب عمليه منهم ليا لوحدى
هديك حاجه حلوة عمرك م هتنساها ( باسته فخده)

يونس ابتسم ولمس البوسة

اسراء: خد منديل امسح الروچ ،مشافهمش وهما بيسرقوا ههههه

يونس( بيمسح خده وشفايفه) لا وانتى الصادقه
مشفهمش وهما بيبوسوا
يلا يابت من هنا

___

ماليكا: سرحان وساكت ليه يا عم يونس،م تتكلم كده
فيه ايه

يونس: معلش حكايتك فكرتنى بحاجه كده
قوليلى يا ايزيس

ماليكا: لا معلش ايزيس دى بتاعت عمر،قولى يا ماليكا عادى

يونس: طيب ياماليكا عادى، هو البنت لما بتعمل كده
زيك مع عمر مش بتكون بتحب

ماليكا: اه طبعا اومال هتعمل كده ليه تطعيم،انا لولا انى بحبه
ومرتبطين شرعا مكنتش عملت كده

يونس( اتنهد) ربنا يسامحها ...الواحد معرفش ان شخصيته متخربأة
نقط ضعف الا لما قابلها

ماليكا حست انه بيقصد اسراء،مرضيتش تسال
دموعه جاوبت خلاص !

#لنورإسماعيل

• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´

صوت ضحكات عاليه ،،فرحه غير عادية

شوية اتقلبت الضحكة لصويت
صرخه عاليه

صوت مخيف ...يليه انفجار يدوى فالمكان كله!!

تقوم مفزوعه ..

ام ماليكا : خديجة !!!

• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´