الحلقه السابعه عشر
ضوء خفيف منور ، وهدوووء
نايمة اسراء على دراع يونس وباصين الاتنين للسقف ،هى ساكته
وهو سرحان
اسراء: بقولك ايه
يونس: مممم
اسراء: انا نفسي فعربية اوى ،انت محوش مش كده
بقالك فترة بتصرف العادى ومش بتشترى حاجه
يونس ساكت
اسراء: وانا معايا مبلغ برضو ،تعالى نشترى عربية ونكتبها باسمى
نفسي فعربية موت يايونس
يونس مردش وسرحان لسه
اسراء: هو انا بكلم نفسي ؟
قام يونس وقعد قصادها
يونس: انا هبطل
اسراء: هتبطل ايه ؟ انا بقولك عاوزة اشترى عربية
تعالى ندفع مقدم وتجيب عربية
احنا شغالين نسرق اد كده ومش بيبان علينا الا فاللبس
وانا جبت حتتين دهب وانت الموتوسيكل
يونس: انتى الفهم عندك ايه اخباره ؟ ولا الكلام متسمعش
انا هبطل
اسراء: هتبطل ايه ؟
يونس: هبطل سرقه ،وهبطل الى بنعمله ده
قام وجاب ورقه العرفى من درج ،مسكها
يونس: وآدى ورقه الاستعباط الى بنضحك على نفسنا بيها ( قطعها)
اسراء مذهولة !
اسراء: انت مالك فيه ايه انت مش طبيعى
يونس: عاوز ابطل. فيها حاجه دى
اسراء: تبطل ! هو بمزاجك
يونس: اه بمزاجى ،اعتقد انى مش اناالى خليتك حراميه
انا اتعرفت عليكى بتسرقى
اسراء: وبقينا سوا وخلاص بقى فيه ايه
ده مش قرارك لوحدك
يونس: لا قرارى مش عايز اكمل
اسراء: لو بتعمل كده عشان مثلا لما تتقدملى ...
يونس قاطع كلامها بضحكة سخريه
اسراء: بتضحك بسخرية ليه ! مش لايقه على سعادتك ياصاحب السمو
يونس: ياستى ولا صاحب سمو ولاصاحب محل
انا ازبل واحد فالدنيا ومطولش حضرتك
انا هبطل لنفسي
قرفت
حياه مقرفه
بنخطف ونجرى وغيرنا يتورط ،والله اعلم كام حد مات من ورا مصايبنا دى
وكام حد اتهم فيها
وبعدين انا مبقتش مرتاح
اسراء( بصة خبيثه) ده جديد الكلام ده
يونس: لا مش جديد انا بفكر من فترة
اسراء: والله! وايه السبب
يونس: ياستى من غير سبب ،نمت سُخن صحيت عامل كده
اسراء( بصة شر) وكنت بتقطع ورقه العرفى ليه ؟
يونس: عشان انا مش عيل اهبل ، انا اه كان نفسي فيكى
وكنت عاوز بالحلال
وانتى مرضيتيش
ومع ذلك انتى حللتى رغبتى فيا
بالورقه العبيطه دى
وبالشرط الى حطتيه انى مقربش لعذريتك
وانا ماشى وراكى زى الحمار
لا حاسس ولافاهم
اسراء: ياااااه ،للدرجة دى انت حاسس بالقرف فكل حاجه بتجمعنا ؟
يونس سكت مش عايز يضايقها مهما كان ،خد نفس واتكلم بهدوء عن الاول
يونس: اسراء...اسراء انا مقولتش كده
انا بس بقيت مخنوق من وضعى كده
عاوز اعيش
( فتح النور ) انا عاوز النور وكرهت الضلمه
كرهت الجرى وانى استخبي
كرهت الخوف
عاوز اعيش ك شخص طبيعى
اسراء: وانت دلوقت بتعرج مثلا!
يونس: دى فقرة الخفه ولا ايه
اسراء: قُصر الكلام يا يونس!
انا مش موافقه على كلامك نبطل شغل ، بالنسبة للعلاقه التانية فبراحتك
يونس: مش بكيفك ،انا الى عاوز ومش حابب
اسراء: لسه هنتكلم فيه تانى الموضوع ده
انا همشى لانى اتاخرت
وبينا معاد تانى ...
_____
ماليكا: كنت وضحت انك بجد حابب تبطل وخلاص
هى مش ماسكه لك ذله
يونس سامع ماليكا وسكت معندوش تعقيب
ماليكا: ورجعت الفلوس قبل م المدة الى مدينها لجنة تخلص ؟
يونس : طبعا
ماليكا: جبت من اسراء الى خدته؟
يونس: لاطبعا ، جزء كبيرمن الى شايله من فلوسى على الجزء الى سرقته
ماليكا: ورجعتهم ازاى ،قولتلهم انك الى سرقت؟
يونس: ( بيتريق) اه روحت قولت سلامو عليكو مع سعادتك الحرامى شخصيا
خدوا فلوسكم
ماليكا: م تتكلم جد بقى
يونس: م انتى لو تصبرى ...
فلااااش باااااك
يونس: ازيك يا بوعبدالرحمن انهاردة ؟
ابو جنة: اهلا يابنى ازيك ،انت معرفتنيش عليك
يونس: اسمى يونس ياحج
ابوجنة: عاشت الاسامى يابنى،عامل ايه
يونس: انت الى عامل ايه ،انا عندى ليك خبر حلو اوى
ابو جنة : ايه يابنى خير
يونس: فى جمعيات كبيرة ،الى بيمولوها رجال اعمال وناس ليهم فى اعمال الخير
انا اعرف الجمعيات دى وحكيت مشكلتك
وهما ماشاء الله استجابوا
وجمعوا المبلغ
وهيدهولى عشان اجيبه لكم وتدفعوه ،وبكده بنتك مش هتتسجن بإذن الله
ابو جنة مش مصدق من الفرحه
ابو جنة: يابنى بتتكلم جد!
يونس: اه والله ، ان شاء الله فخلال يومين
ابو جنة: بس انت عرفت المبلغ منين يابنى ؟
يونس( اتلخبط) حضرتك قولته وانت بتحكى
الراجل بيراجع انه مقالش ومحددش المبلغ اد ايه
يونس: انا قولت اجى ابشرك
ابو جنة: يبشرك ربنا بالخير يارب ،الهى يسعدك ويصلح لك حالك يارب
يونس: ايوووه ادعيلى بصلاح الحال دى دايما
جه عيل صغير فسن اعدادى ينادى على ابو جنه وقف على باب المسجد
عبدالرحمن: بابا !
ابو جنة: ايوة ياعبده
عبدالرحمن: ماما بتقولك تعالى التلاجه فصلت والسلك دخن وكان هيولع فالبيت
يونس وابو جنة اتخضوا
ابو جنة ( قايم بسرعه) فصلتوا الكهربا
عبدالرحمن: اه وبتقولك هات كهربائى
يونس: متقلقش ياعم ابو عبدالرحمن انا بفهم فالكهربا
طلعوا سوا ،الشقه مفصوله كهربتها ، فتح كشاف موبايله يونس
ابو عبدالرحمن: اتفضل يابنى ،سكة ياللى جوه
دخلت جنة جرى ع اوضتها ولبست خمارها ،وطلعت الام بطرحتها
ام جنة : يا اهلا يابنى
يونس: اهلا ياحجه ( مميل فالارض بيرفع بعينه لمح جنة واقفه بعيد)
ابو عبدالرحمن: الاستاذ يونس يعرف فالكهربا ياام عبدالرحمن جه يشوف فيه ايه
لو معرفش نجيب كهربائى بقى
يونس: لا ان شاء الله مش هتحتاجوا
حط الموبايل فبوقه وبدأ يبص عالسلك وعالتلاجه ، والراجل وابنه واقفين وراه
عرف فيه ايه ،كتب حجات لعبدالرحمن يشتريها وجابها وبدأ يصلح
والحمدلله اتصلحت فايده
ووصل الكهربا خلاص فالشقه
ابو جنة : تسلم ايدك
ام جنة : ربنا يصلح حالك يابنى والله
ابو جنة : يلا شاى ياجنة للاستاذ
دخلت جنة تعمل شاى وبتجمع مين هو شافته قبل كده
جابت الشاى وجت ووقفت بعيد وهو قاعد مع ابوها واخوها بيتكلم ،جه فالحوار ان ابو جنة فرحان بالخبر الى قالوا يونس وان الفلوس هتترد!
فرحت ام جنة اوووى وسجدت فالارض ،وهنا جنة افتكرته!!!
بس فضلت ساكته ومرضيتش تفضحه قدام ابوها وامها ...
اخد واجبه ونزل ، جنة عملت نفسها انه نسى ولاعته
فنزلت وراه تديهاله لان عبدالرحمن كان عالسطوح وقتها ...
جنة : يا استاذ يونس !
يونس( لف لقاها جنه وقلبه اتنفض من مكانه) انسه جنة
جنة: انا قولت انك نسيت حاجه هديهالك ، انا عرفت انت مين وعملت كده ليه
انت الحرامى الى سرقت المحل
انا افتكرتك
______
يونس: وكان نفسي الارض تنشق وتبلعنى وقتها
ماليكا: لاااااا شكل حكايتك مطوله وانا عندى شغل
وللحديث بقية يا عم يونس
يونس: مااااشى ،بس بصى
ماليكا: نعم
يونس: بكرة اول م تيجى من شغلك تطلعى هنا
بفتقدك جدا !
ماليكا ابتسمت وقالتله تصبح على خير ودخلت جوه ..
#بقلم_نورإسماعيل
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
"مش عارف اقولك ايه يادينا هنتعبك معانا"
دينا: على ايه ياعصام ،هنا دى حبيبتى
هخلص شغلى وجاية اخدها
عصام: انا والله مكنتش هحب انى اتقل عليكى بس هى طلبت بالاسم عاوزة
طنط دينا تفسحنى وانا معنديش وقت زى م انتى عارفه
دينا: تمام الله يكون فعونك
واخبار العروسة ايه
عصام: أنهى عروسة
دينا: عروستك مش كنت هتتجوز !
عصام: لا ماهو مفيش نصيب
دينا: معلش ربنا يقدرلك الخير ،،
عصام : طيب مش هعطلك اكتر من كده ،اسيبك لشغلك وانا مستنيكى عشان تاخدى هنا
دينا: بعد اذنك ياعصام بس ممكن اخدها من برة ،يعنى استنانى
فحتة برة البيت بس قريبه يعنى
عصام: ليه
دينا: عشان طنط مامتك مش بتحب وجودى وانا مش حابة تحصل مشكله
عصام: مفيش مشكله يا دينا
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
موبايل منة بيرن،بس هى عاملاه سايلنت
عيانه وعندها دور برد جامد خلاها متروحش المكتب انهاردة ،من الصداع قافله الصوت
ونايمه فسريرها مستسلمه ل شرب السوايل ..
عالناحية التانية كان عمر بينزل الفون من على ودنه وجايه عليه ايمان ..
ايمان: خالو خالو خالو خالو
عمر: ايه ايه ايه ٣٠ خالو خالو
ايمان: بص الحته دى مش فاهماها اشرحهالى كده
عمر مسك منها المرجع وبيبص فيه ، مادة التاريخ
عمر: مممم ايه الصعب فيها مش فاهم
ايمان: كلها صعبه ،هى مادة رخمه اوى
عمر: طيب ياستى اشرحهالك واحدة واحدة
وبدأ يشرح عمر وايمان منتبهه ، وبيفهمها الجزء الى عاوزاه
كانت الناحية التانيه منة مسكت الفون تبص فيه لاقت ٣ ميسد من عمر
اتنفضت من مكانها وكان هيجيلها شلل من الفرحه
منة: يلاهوى يرن ٣مرات وانا كنت فين فتعداد الاموات
ارن طيب ولا ايه
لا هيقول كنت مستنيه
لا هقوله عاملاه صامت عشان مصدعه
طب ماهو هيسمع كلمة مصدعه مش هيتكلم ياغبيه
لا هقوله كنت بعيد عنه
يووه هرن والى يتقال يتقال
عند عمر وايمان
عمر: تمام كده
ايمان: خالو انت بتفهمنى اكتر من المستر ،انا بفكر اخلى اصحابي
يسيبو المستر وياخدوا عندك حصه والله تلم اد كده
عمر( بيديها بالقلم ع قفاها) ايه تفكير الشياطين ده،احنا نخليكى تسيبي الدراسة
وتلمى فلوس
نشغلك رقاصه ايه رأيك( بيضربها وهى بتضحك فونه رن)
عمر بص فيه لاقاها منة
عمر ( باصص للفون) طب يلا يا ايمو روحى كملى مذاكرتك
ايمان: مين الى بيتصل ياخالو
عمر: هو انتى كنتى مراتى ،يلا على اوضتك
ايمان: خالو انت بتخبي على اموز حبيبتك
عمر : طب هتقومى ولا اقومك بطريقتى
ايمان: خلاص قايمه ،خلص فونك ورجعالك لكرسى الاعتراف ياخالو
( غمزتله بعينها)
عمر: امشى !
بيتصل ب منةوردت
منة: اسفه انا كنت نايمه ( سكتت) كنت قافله الصوت عشان مصدعه( اتلخبطت)
كنت بعيد وو
عمر( قاطعها) سلامتك يامنة
عمر بطبعه صوته هادى وحنين ، الكلمة عادية بس هزت كيانها عشان بتحبه
مسكت الفون وقطعته بوس ورجعت تكلمه تانى
منة: الله يسلمك ياعمر
عمر: عامله ايه دلوقتى ،روحتى دكتور
منة: مش مستاهله ،خدت ادوية وبشرب سوايل سخنه
عمر: متجيش غير لما تتأكدى انك بخير
ماشى
منة( مبتسمه) حاضر
عمر: ولو ان عدم وجودك مخلى المكتب مضلم
منة راحت فالكلمه وحطت ع وشها المخدة قال يعنى ماتت
عمر: منة ...انتى معايا؟
منة: اه ...اه معاك
عمر: هكلمك تانى اتطمن عليكى
منة وهو بيكلمها كحت كحة صعبه
عمر: ايه ده كحتك صعبه اوى،لا لازم تروحى دكتور
ومتعرضيش نفسك لهوا
منة( فرحانه اوى) حاضر ...حاضر يسلم سؤالك
يارب
عمر: ربنا يطمنا عليكى بالخير اللهم امين
تصبحى على خير
منة : وانت من اهل الخير
قفلت واشتغلت بوس فالشاشه بطريقه تضحك ،وهو الناحية التانيه قفل وسرح
جت ايمان جرى عليه
ايمان : بسرعة مين منة وامتى وعشان ايه وكل الحجات اعترف !
عمر ( قام وقف مسكها) انتى واقفه بتتصنتى ياجزمة ( جريت بيجرى وراها لاوضتها)
مش هسيبك خدى هنا
#بقلم_نورإسماعيل
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
هنا قضت يوم حلو مع دينا ،راحو الملاهى وجابت لها غزل بنات وشيكولاته
وهما مروحين ،هنا طلبت تشوف جدتها وخالها
وودتها
قعدت كتير ولعبت معاهم وكانت مبسوطة اوى ومش عاوزة تمشى
دينا حزنت لخبر ان عصام متوفقش فجوازته ومعنى ذلك ان هنا هتفضل وياه
ومش هتروحلهم
وواضح ان هنا بتحب الاجواء عند بيت اهل مامتها اكتر ، المهم قبل م الوقت يتأخر عليهم
روحتها دينا لحد المكان الى مستنيها فيه عصام
هنا: كان يوم حلو يابابا لعبنا الاعيب كتير
عصام: تعبتك يادينا معلش
دينا: م خلاص بقى مفيش بينا الكلام ده ،هنا دى بنوتتى
عصام : تحبي اودى هنا البيت واوصلك ،انا شايف ان الوقت اتاخر عليكى
دينا( استغربت) لاعادى ...مفيش مشكله
انا همشى بقى
عصام اخد هنا بعد م سلم ع دينا ودخل وهو بيحكى معاها عملت ايه وراحت فين وبيضحك
وبيهزر معاها
ومامته لاويه وشها واول م شافتهم دورت وشها الناحية التانيه
عصام: فيه حاجه ياامى؟
الام: ابدا شيفاكم مبسوطين اوى
عصام: هنا كانت بتحكيلى عملت ايه مع دينا
الام: وهو احنا نقلنا العطا من رشا ام عرقوب لدينا العقربة!
وهو مفيش غير اصحابها يامنيل على عينك
عصام: نقلنا العطا ايه ،انا مفكرتش فاللى بتقوليه ده
وبعدين انا بطمن على هنا معاها مش اكتر
الام: اه ياخوفى
عصام( بضيق من امه) امى انا هدخل اوضتى
الام: اه ماهو كلامى مبقاش يعجب دلوقت ...خدى يابت تعالى هنا
روحتى مع طنط زفته دى فين وفين
هنا: متقوليش عليها زفته دى بتلاعبنى وبتحبنى زى ماما
الام: قطعه تقطع ماما قولى يارب
هنا: يا تيتة انا غضبانه منك جدا ( كشرت وسابتها)
الام: تعالى هنا يابت متسيبنيش وتمشى ، بت ياهنا
قاطعه تقطع امك على دينا على رشا ام عرقوب!
#بقلم_نورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
ماليكا فالحمام بتغسل سنانها ، وواقفه قدام الحوض
بترفع عيونها فالمرايه لاقت حماها واقف بشكل وحش اوى ،اتخضت واتدورت ملاقتهوش!
ماليكا: هو انت هتتعبنى ليه ( حاطه ايدها ع دماغها) حتى روحك خنيقه زيك
وخنقانى
م تقول عايز ايه وتخلصنى
او موتنى وارتاح بقى من الى انا فيه
وقفت شوية فالحمام مستنياه يظهر ملاقتهوش ،طلعت وقفلت النور وراها
دقيقه والنور اتقطع خالص عن الشقه
وفالدقيقه دى ظهر حماها بيحاول يحضنها وهى حست وصرخت ،قال فودنها بطريقه تشبه
فحيح التعابين
حقى لسه مجاش ...
والنور جه ورجعت كل حاجه لطبيعتها ! بس بعد م كانت اتشيبت من الخوف ودموع عنيها
بتنزل ورا بعض
اكتر روح عاملالها ايذاء نفسي ودربكة فكل حاجه ،والى مش فاهماه ان حماها مالوش حق
هى اتسجنت خلاص
وكمان ازاى عايزها هى تاخد حقه وهى السبب ،جه فبالها سؤال
معقول الى قاله يونس؟!
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
"انتى مش طبيعية على فكرة !"
اسراء: انا !
جوزها: بتسىحى وتكلمى نفسك كتير وبلاحظ واسكت،زائد ان من يوم جوازنا
بتهلوسى وانت نايمه
اسراء( بصتله باهتمام) بهلوس ازاى ؟ وبقول ايه
جوزها: كلام مش مفهوم كانك بتهربي او خايفه
المهم ده مش هاممنى اد فيه ايه
انا عايش مع واحدة عقلها فيه حاجه
اسراء: فيه ايه انت هتطلعنى مجنونة
جوزها: انتى مجنونة فعلا كل م المسك تترعشى وتزوقينى
بتوقفى تكلمى حد
بتقعدى تبصى حواليكى كان حد باصص عليكى او متراقبه
ايه ده
تعالى نروح دكتور
اسراء: انت هتشككنى فنفسي،اناكوبسة جدا
انت بس عشان الموضوع اياه مطلعنى مجنونة ومش بعقلى
اى حاجه تنكد عليا بيها
وخلاص
جوزها: لا م هى دى مش عيشه
اسراء: شوف انت عاوز ايه وريحنى
حتى لو طلاق هيكون اريح يايونس
جوزها: يونس ! يونس مين ؟
اسراء: انا قولت يونس؟
جوزها: شوفتى انك مش طبيعيه ،ايوة قولتى يونس
اسراء:( بتهرب) انا حاسة انى حرانه ،هدخل اخد دش
جوزها نفذ صبره ،ومش هيعدى غلطة الاسم بالساهل..
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
يونس: زعلاااااان
استناكى امبارح كله ومتطلعيش
ماليكا:اسفه والله بس امبارح لما سهرت معاك روحت متاخرة وؤجعت مش شايفه قدامى وعاوزة انام
ده غير قرفى بسبب روح حمايا الله يحرقه
يونس: ماهو اتقلب خلاص ههههه هيحرقه ايه تانى
سكتوا ...وفتح يونس كلام
يونس: ماليكا يلا كملى حكايتك عشان نعرف نطلع من حوار حماكى ده
ماليكا: مممم وقفت فين
يونس: ان عصام مسامحك حتى برغم شربك والسهر
ماليكا: ايوة
يونس: للدرجة دى فراق عمر واختك كان قوى
ماليكا: قطمة ضهر ومفيش بعدها قومه يايونس حرفيا
يونس: طب استنى استنى
م تقوليلى حصل ايه
انهى الى جه الاول
ماليكا: فالحدثين ؟ موت خديجة الله يرحمها وينور قبرها
يونس: ماتت ازاى ؟
ماايكا داست على قلبها كانه وجعها مرة واحدة
يونس لاحظ ولاحظ نظرة الحزن المخلوطة بدمعه فعيونها
يونس: اسف لو بفكرك
ماليكا: عمرى م نسيت يايونس
يونس: كنتى موجودة ؟
ماليكا هزت راسها
يونس: انتى بس
ماليكا: لا ، انا وعمر وهى طبعا
ومحمد ومعاوية اخويا
يونس: مين محمد ؟
ماليكا: محمد ده الدكتور المتابع حالتها ،خديجة كان عندها مشاكل فصمامات القلب
هو قريبنا من بعيييد بس نعرفه يعنى
وجه تعب خديجة قربه لينا اكتر
وحبوا بعض اوى
وقبل الحادثه بكام يوم طلبها ووفقوا ،وكانوا هيلبسوا دبل
بس حصل الى حصل ( دمعت )
يونس: طيب خلاص متعيطيش ..
ماليكا: خديجة ماتت وبقت لها قصة تتحكى
يونس: مماتش موتة طبيعيه شكلها ،عشان بتقولى حادث
ماليكا بصت له وعيونها كلها دموع
ماليكا : راحت لربنا بتضحك ...!
يونس: ازاى ؟
الحلقه الثامنه عشر
.¸.•'´¯'*•.¸¸.¸.•'´
ماليكا: خديجة ماتت وبقت لها قصة تتحكى
يونس: مماتش موتة طبيعيه شكلها ،عشان بتقولى حادث
ماليكا بصت له وعيونها كلها دموع
ماليكا : راحت لربنا بتضحك ...!
يونس: ازاى ؟
فلاااااش باااك
شقة العروسين بتتجهز ، هيصة وعفش وكراتين هنا وهنا
كل الى جاية تجامل ماليكا فى اصحابها واصحاب خديجة
جت
والقريبات
اما الشباب كان لهم دور ، معاوية وكام حد من اصحابه
محمد دكتور خديجه
وعمر العريس ????
هما مكانوش محتاجين يشغلو اغانى ، الجمع الغفير عاملين هيصة لوحدهم
دوشة وكلام وزغاريد ،والى بتغنى لوحدها ويردوا عليها
يوم هدة اتاخد من اوله لاخره ،بس محدش انكر انه كان يوم رائع !
محمد ( بيساعد ) عقبالنا ( بيوشوش خديجه وهى معدية)
خديجه: ياعم روح نفض هدومك الاول من البهدله دى يمكن اقتنع بيك عريس
محمد: بقى كده ! ماشى يا ديجا
عمر : ايزيس ...حبيبي
ماليكا : ايوة يا عمر ،جايالك
عمر واقف فى الليفنج ،عاوز ياخد رأيها فحاجه
عمر: معاوية بيقول لو الكنبه كده والشاشه فوقها احلى !
ايه رأيك
ماليكا: اممم ،طيب هاتوها فالوش ونقرر انهى احلى
صاحب معاوية: شيل ياحبيبي عالناحية التانيه
صاحب٢: هتغدونا ايه طيب اتهد حيلنا
خديجة جاية من جوه مع شوية بنات
خديجه: ايوة صحيح اقل من كباب وكفته مش هناكل
محمد : سامع كلام مش عاجبنى انا( بيبص لخديجه) انا قولت الاكلات دى لا
صديقه: هههههه استلمى ياحرم الدكتور
صديقه٢: بالعكس على قلبها هيكون زى العسل
خديجه( بتبص للسما) بقى يارب اقع واندب على وشى فالدكتور بتاعى
عشان يعمل عليا دكتور فحياتى
محمد جه جنبها وبيبص ليها بصة تضحك
محمد: فيه اعتراض ولا ايه؟
خديجه: لا ازاى ده هما الى بيتكلموا مش انا
محمد: ومين الى عاوز كباب وكفته ؟
خديجة: هاه ! دول اصحاب معاوية
انا هطلب خس
جريت من قدامه وهو بيضحك ، كملوا فرش
وكل حاجه اتظبطت
وكانوا هما اصلا خَلصوا وخِلصوا ههههههه
انطلب الاكل وكانت وليمه كبييييرة ، السفرة مرضيوش يبوظوها للعرسان
فرشوا وقعدوا عالارض
وده يخطف وده ياخد وده يبدل اطباق من قدام التانى وجو كله ضحك ومسخرة ،غطا على تعب
اليوم وهلكته
اكلوا ، ومرضيوش يمشوا غير لما يحبسوا
واضح انهم عاوزين يبهدلوا الشقه الى تعبوا فيها طول اليوم ،صندوق بيبسي من الازاز ده
بتاع زمان ابو طعم حلو مكفاش!
عمر: لا انتو كده خربتو بيتى ،كل اتنين يشربوا سوا
محمد: خدى بوق واكمل وراكى يا دودو
خديجه: طب انا هاخد بق بس وانت بقية الازازة ياظالم ؟!
محمد: ( ميل على ودنها وقال بالراحه ) لا م انتى هتشربي بعدى عشان نجرى ورا بعض
خديجه( بدلع) بقرف يامحمد
محمد( بخضه تضحك) ياجزمة ! بتقرفى ؟
طاااااايب
خديجه: بهزر معاك هههههه هات كده ( اخدت الازازة شربتها كلها مسابتش بق ) يلا كمل
محمد : اكل الازاز بقى !
كلهم: ههههههههههههه
صاحب معاوية: يلا ياجماعة ...نزق العجل
مبروك ياعراااايس
صديقه لماليكا: احنا ناخد شهر نوم على هدة انهاردة دى ،يلا يابنات
المولد انفض ، ومفضلش غير معاوية وعمر ومحمد وماليكا وخديجه
ماليكا: يلا يا ديجا ايدك فايدى ننضف بعد الاكل والازايز دى ،الشقه اتبهدلت تانى
خديجة: ولاد اللذين حالفين م يمشوا غير لما يسيبو بصمه ( بتضحك)
قاموا ونضفوا ورجعوا الشقه عروسة زى م كانت !!
معاوية : يلا بينا
خديجة: لا والله م امشى غير لما اخد دوش ،هروح ازاة كده
ماليكا: م كلنا هناخد دوش فالبيت يا ديجا
خديجة: اه ياختى قولى انك خايفه على حمامك ، لاياماما
متعبش انا كل ده وامشى كده فالشارع
محمد: يا خديجة كويسة والله
عمر: هو يدوب تاكس محدش هيشوفك مبهدلة متخافيش ياموناليزا ( عملها فوشها)
ماليكا: مانا اهو العروسة ذات نفسها وهمشى كده
خديجة: ماليش فيه ،م تحضرنا يامحمد ( بتسبل لمحمد بهزار)
معاوية: اتلمى طيب
محمد: طيب خلاص ياجماعة خلوها سريع سريع كده حتى تفوق
ماليكا: يالاهوى على دلعك يا خديجه
دخلت ماليكا الحمام وفتحت الغاز بتاع السخان ،وبتولع الاشعال الذاتى
ومعلق
بتحاول مش عارفه كذا مرة
ماليكا: ياعمر تعالى شوف كده
عمر جه لماليكا
عمر: ايه ياقلب عمر
ماليكا( مبتسمه ) شوف البتاع ده
عمر: بتاع ايه بس ...انتى قمر كده ازاى
ماليكا( بتزوقه لورا) بس ياعمر قمر ايه ده انا مبهدله
عمر : لا والله ،من احلى المرات الى شوفتك فيها
ماليكا: انت بتحب البهدلة بقى
عمر( بيميل عليها) اه
ماليكا: يابنى اسكت كلهم برة
برة عندهم
خديجة : كل ده بيفتحوا السخان ( بتوشوش محمد معاوية كان بيتكلم ففونه وقام)
مش قادرين يصبروا ( بتضحك اوى)
محمد( غمزها تسكت عشان معاوية) يلا طيب خدى دوشك عشان نروح
عقبال دوشنا
خديجة( بدلع ) بطل قلة ادب يا محمد
محمد: قلة ادب اه انا قليل الادب ،اصلا كلها شهر ونحصلهم
ونجهز ( مسك ايدها)
ونفرش
ونظبط الدنيا بقى
ونتجوز بقى
نتجوووز
خديجة: بس ياض انت هنادى على معاوية ( بتضحك)
جوة عند عمر وماليكا
ماليكا:على فكرة لو حد دخل هيبقى منظر مش حلو ووو
عمر : والنبي انت الى حلو ( بيبوسها فخدها)
خديجة: كل ده بتفتحى السخان ؟
عمر اتظبط فوقفته لما جت خديجه ،خديجه شافتهم وضحكت
وعدت لطرقه الحمام ثم الحمام
ماليكا ( من برة) هو انا حاولت وكنت بنادى على عمر عشان كده
خديجة بتحاول تشغله وكل ده ناسيين ان الغاز مفتوح ،واضح انهم مش متطمنين عالامان بتاع السخان بما انه جديد
خديجة : اه بتنادى على عمر عشان يشغله ولا عشان يشغلك يا قليلة الادب
هقول لاخوكى
بتضحك بصوت عالى كانت مشهورة بضحكتها العاليه
،كان الاشعال لقط
والغاز المتسرب
خلى السخان ينفجر فخديجة وهى فالحمام وحدها !!
الى برة سمعوا صوت الانفجار اتخضوا لان صوته كان صعب جدا ، جريوا وفتحوا الباب
كانت خديجة عالارض واقعه والنار حواليها
جرى عمر قفل كل الكهربا والغاز ،ومعاوية شالها
وماليكا شايفاها كده سايحه فدمها ومحروقه وقعت من طولها
بدأ يسندها عمر ويقومها مش عارفه توقف اعصابها رايحه خالص
محمد بيجرى زى المجنون يشغل عربيته
وبيفتحها ليهم
بيركب معاوية شايل خديجه ، وعمر بيزق ماليكا الى بتمشى تقع وعيونها بدموع
ومافيش على لسانها غير خديجه...خديجة
عالمستشفى
ثم طوارئ
كشف وكلهم مستنين برة
الدكتور : للاسف الحالة مقدرناش نساعدها
البقاء لله !
محمد ومعاوية : ايه!!!
دخلو لها جوة
وماليكا وقعت من طولها فاقدة الوعى ..
_____
مد ايده من السور الفاصل ومسح دموعها وهما نازلين وهى بتحكى ...
ماليكا: وماتت خديجة ...مبقتش موجودة للابد
يونس واقف متأثر لكلامها
ماليكا: تفتكر بكده ...انا السبب
انا قتلتها؟
يونس: لأ ! هى ماتت
عشان ده قدرها ...مكتوب من قبل م تتولد
هتموت ازاى...وامتى وفين
ماليكا: ( بتمسح دموعها) راحت بروحى وسابتنى اعيش كده
فلااااااااش باااك
صالة البيت كلها ستات لابسين اسود ، والصوان تحت البيت للعزا مفروش
معاوية واقف بياخد العزا ، ومحمد جنبه !
البيت ده كان بعد ايام هيبقى فيه فرح ...والناس تهيص وتزغرد
بقى فيه سواد وعزا وحزن ودموع
والعرسان ..
عمر وماليكا ،فرحتهم راحت ...ده اذا كانت العروسة اصلا حاسة بحاجه
فاقدة الوعى من وقتها ،او نايمه ورافضة الواقع زى م قالوا الدكاترة
وقاعد جمبها عمر ونجوى اخته
الام برة متماسكه ،فاتحه مصحفها بتقرا
واحدة راحت ...وواحدة بين الحياه والموت
عمر جمبها وبيقرأ قرآن وحاطط ايده على دماغها ، لما بتفوق
مبتحسش باللى حواليها
بتجرى ناحيه الباب عشان ترمى نفسها
عشان تموت وتروحلها
الناس بيلحقوها وبيحاول عمر بأقصى م عنده من قوة يمنعها ،، لما بيقدروا
بيبقى الحل ييجى دكتور يشوف مالها
بييجى يدى مهدئات فمهدئات فمهدئات ،ودى كانت بداية رحلة المهدئات
الى كانت مكتوبة وقتيه بس للمرحلة الى هى فيها
انما الى مرت بيه ماليكا بعد كده ،كان اكبر من انها تستحمله بوعى كامل واعصاب ...،
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
عصام: الو...ازيك يا دينا
دينا: الحمدلله ياعصام ،عامله ايه هنا
عصام: ماهو انا بتصل بخصوص ...
دينا( قاطعته) معلش ياعصام بس مضطرة اقفل عندى عملا
عصام: طيب انا شوية وهتصل بيكى ...مفيش مشاكل
رشا كانت جايله شغله ولاقته بيتكلم فون مع دينا ولعت نار غيره
رشا: والله ! دينا
عصام: رشا !! تعالى اتفضلى
رشا: هو ايه خلاص بابا رفضك ...طظ بقى الى بعده
عصام: فيه ايه ؟ وبعدين وطى صوتك انا فشغل
رشا: ياسلام ،انا يعنى هفضحك يااستاذ عصام؟
عصام: هو انا قولت كده؟
رشا: ممكن اعرف بتكلم دينا ليه؟ ومجتش تانى تجدد طلبك ليا وتتقدم لبابا
عصام: اتقدملك تانى ؟ م اترفض اولانى
اجى تانى ازاى
رشا: ايه ده ! هو انت مش هتعافر عشانى وتطلبنى كذا مرة زى م بيحصل
عصام: ليه بنحب بعض فجنينة الاسماك ؟
وبعدين باباكى كان بيتعامل بتقليل منى اوى وانا عندكم
رشا: ياسلام العيب بقى فبابا دلوقتى ...ومامتك ماشاء الله عالرصاص الى كان بيطلع منها
عصام: عليكى نور القاعدة مكانتش حلوة على قلب اى حد فالموجودين
رشا: وانت ان شاء الله ؟
عصام: يارشا ده مكان شغل مش معقول كده
رشا: خلاص انا كده فهمت الحكاية ،عالعموم شكرا خالص يااستاذ عصام
مشيت وهى بتبرطم ومتعصبه ومخنوقه ومش طايقه حد!
#بقلمى_نورإسماعيل
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
" بابا بيقولى على اخبار حلوة كده "
عمر ( مبتسم) اخبار ايه يانوجا
نجوى اخته: يعنى فى بنوتة زميلتك عاوز تخطبها
عمر: يعنى يامسهل
نجوى: طب ومستنى ايه،م خير البر عاجله تعالى نروح نتقدم ونشوف طلباتهم ايه
ايمان جايه جرى من عالسفرا كانت بتاكل
ايمان: اصله لسه بيدرس مشاعره
عمر ( بيقرص ايمان من خدودها) بنتك ابو الخدود دى فمرة هقطع لك لسانها ونشرب عليه شوربه
نجوى: وانا مالى ياخويا انت وهى اصطفلوا حبيبتك ومربيها على ايدك
ايمان: بقى عاوز تقطع لسانى !! ماشى
ياخالو ياظالم
ده انا صندوقك الاسود حبيبتك
عمر: م انتى بتسيحى اهو
ايمان: لا والله عيب عليك،على وضعك لسه
بس قولى
بدأت تحدد مشاعرك ولا ايييه ؟
عمر : ممم هو انا بفرح بوجودها
ايمان: تمام
عمر: طيبه وروحها حلوة عالقلب كده
ايمان: جميل
عمر: بحب نقعد ندردش مش بمل ،بحس عقلها كبير
ايمان: ممم حلو كل ده
عمر: وبس عاوزة ايه تانى
ايمان: والقلب ! الحجات الى بتدق دى ياخالو الى بتعرفنا اننا عايشين
الحجات الى بتخلينا مننامش
فين ؟
عمر سرح لكلامها لان بدأ يحس فعلا الى بتقوله ده لمنه وبعدين رجع افتكر ان ايمان
الصغننه هى الى بتقول كده!
عمر( بيقرصها من ودانها) وانتى ايه عرفك يامفعوصه بالكلام ده ؟
ايمان: هاه!
عمر: هاه ايه ...ده انتى نهارك مش معدى
ايمان: لا ماهو بص ،انا بص
عمر: مين يبص فالاخر انا ولا انتى
ايمان: مشاعير واحساسيس عادية ياخالو متفهمنيش غلط
جريت على اوضتها وقفلت الباب
عمر: لينا قاعدة يا اموووز حبيبة خالو
يابتاعت القلب ودقاته
فتحت ايمان الباب
ايمان: يالاهوى ياخالو فضحتنى ( قفلت الباب تانى)
عمر: هههههههههههه
#بقلمى_نورإسماعيل
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
بتغسل الاطباق على الحوض ، وواقفه فالمطبخ وحدها
دخل يتهمس ابو عصام ويبص حواليه يمين وشمال اذا كان حد شايفه
بيحسس على دراعاتها ،اتنفضت وسابت الى فايدها مفزوعه
بتدور له وهو بيحاول يكتم بوقها ،بتمسك نشابه العجين
وبتضربه فوق دماغه ضربتين
بيقع عالارض سايح فدمه !
بتقوم من نومها مفزوعه ومخضوضه وعرقانه!
صدرها بيعلىوينزل مع الانفاس وكأن صوت نبضاتها مسموعه
من الخوف
ولما افتكرت اليوم ده
والحادثه البشعه الى بوظت حياتها للنهاية ....
قامت ماليكا من سريرها ،ودخلت الحمام تاخد دوش عشان تهدى شوية من التوتر الى بقت عايشاه ليل نهار ده
خلصت دوشها وجايه خارجه من الحمام
النور اتقطع
وزى م تكون فيه ايد خنقاها مش عارفه تتخلص منها ،بتحاول تتخلص مش عارفه
هتطلع روحها خلاص
انفاسها بتخلص
سمعت نفس الصوت بنفس طريقة الفحيح
وقال فودنها
" ساعدينى عشان اسيبك فحالك !"
وبعدها الايد سابتها والخنقه ؤاحت والنور رجع تانى!!
ماليكا طلعت جرى وهى خايفه وتعبانه ، من التوتر خلاص
حاسة ان الموت يكونلها اريح من كل الى هى عايشاه
حست انها محتاجه يونس دلوقتى
مش محتاجاه ككلام
او ك ونيس
او ك حد موجود بيسمعها
محتاجاه امان وبس
لبست حاجه على شعرها،وراحت تخبط ع باب شقته
مرة واتنين وتلاته
محدش فتح
زعلت ورجعت شقتها ،دخلت الفراندا تتنفس شوية
وتبص للسما
يمكن تونسها صورة خديجه الى بتحس انها بتبصلها من فوق النجوم
ومتحسش بعدم الامان الى هى فيه ده !
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
" انا اسفه انشغلت ومعرفتش ارجع اتصل بيك امبارح تانى"
عصام: ولايهمك يادينا
انا بس كنت عاوز اشكرك ع اهتمامك ب هنا
دينا( استغربت تانى) على ايه يا عصام ،وبعدين مش ملاحظ انك شكرتنى كتير عالخروجة
دى وانا قولتلك ان هنا بنتى ومفيش بينا كده
عصام: هو انا مضايقك بمكالمتى ولا ايه
دينا: لا عادى ،انا كنت فاكرة انك بتكلمنى لامر مهم يعنى ..
عصام( اتكسف) لا هو عشان هنا ،اصلها كانت راجعه مبسوطه من برة
وانتى السبب
دينا ساكته ومخنوقه منه
عصام: طيب عشان مطولش عليكى،تصلحى على خير
دينا: وانت من اهله
عصام بص للسماعه انها م صدقت تقفل ،استغرب وحط الفون جمبه وسكت ..
#بقلمى_لنورإسماعيل
•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
ماليكا: انت كنت فين ؟
يونس: انا اهو
ماليكا: خبطت كتير عليك ومردتش عليا
يونس،: دلوقت ؟
ماليكا : اه
يونس: يمكن مسمعتش
ماليكا: ماشى
يونس،: زعلانه ؟
ماليكا: مبقتش عارفه ابه الفرق ،ازعل ولا افرح
مبقتش احس بحاجه
يونس: انا اسف
ماليكا: عادىيا يونس، انا بس كنت خايفه ومحتاجه انك تطمنى
يونس( مبتسم) هو انتى بقيتى تطمنى بوجودى ؟
ماليكا بصت له بعيون صعبان عليها ومحرومه امان
ماليكا: جداً
يونس: طيب يلا كمليلى ،امبارح سيبتينى ومقولتيش
بعد وفاة خديجة الله يرحمها
حصل ايه بينك وبين عمر
ماليكا : هو انت عاوز كله يدق على دماغى مع بعضه كده ، طيب خلينى اخد نفسي
يونس: عندك حق ...طب تعالى انا اقولك على حاجه حلوة
ماليكا مكانش ليها رد فعل
يونس: ايه ده مش عاوزة تكملى قصتى ( غمزلها)
ماليكا ابتسمت ،وهو ابتسم وابتدا يكمل الى انتهى عنده
فلاش بااااااك
يونس: انا ....
جنة: يعنى هتدافع عن نفسك وتقول ان مش انت لا هو انت
انا فاكرة وشك
يونس: طيب اسمعينى ،ايوة انا بس انااهو والله
برجع الفلوس
جنة: وعملت كده من الاول ليه
يونس: انسة جنه ،ممكن فيوم اشوفك واشرحلك كل حاجه وو
جنة( قاطعته) نعم! لا طبعا
انا لابقابل حد
ولابعمل حاجه تخون ثقه اهلى فيا
يونس: ف اى حته ،مكان عام قصاد الناس والله
عاوز اشرحلك حاجه مهمة عنى
جنة: حضرتك متخصنيش يا استاذ ،ولو على انك هترجع الفلوس
فانت سرقتها
ودى غلطتك انت
انت مش عامل فيا جميله
سايباه وماشيه
يونس: انا عاوز ابقى نضيف
عاوز تسامحينى ع الى حطيتك فيه
جنة: اطلب من ربنا ،مش منى
مشيت وكملت طريقها ،رجع يونس بيفكر فالموضوع كله
موضوع جنة وقلبه الى اتعلق بيها
وموضوع التوبة الى نواها بجد من قلبه
هيعمل ايه وهيبتدى ازا ى
جاب كل هدومة الى استراها بالفلوس الحرام ،وجمعهم فشنط
والفلوس بتاعته
وخدهم ومشى ،ساب الشقه وسلمها
ودى الهدوم لجمعيه ومفضلش معاه غير الى لابسه بس
والفلوس وزعها على دور ايتام ومساجد وكذا مكان للخير
اما موتوسيكله فهو باعه وخد فلوسه حطها فجمعيه لغارمات والغارمين
ورجع ابيض نضيف معهوش جنيه يونس
حتى الاكل مكلش ،قرر يبتدى على نضيف
فضل يتمشى فالشوارع مش عارف هيعمل ايه
كان فى عقيقه فشارع من الشوارع لناس ميعرفهمش،دخل وخلاص واكل ومشى وهو ميعرفش حد
بس بالحلال
وكمل مسيرته يحاول يلاقى اى حاجه يكسب منها قوت يومه
لقى واحد عاوز شيال بيطلع عفش لدور عالى
جرى وراح وقدم نفسه ،اتهلك طلوع ونزول وتعب وشيل وقطعةنفس
وفالاخر ربنا راضاه ولاول مرة يمسك مبلغ بالحلال من سنين!
هدومه اتقطعت من الشيل وباظت ،اشترى قميص وبنطلون على ادهم كده
من الفلوس
من حتة رخيصه
ورمى الهدوم دى فكيس
وفضل معاه باقى المبلغ الى خده جزاء شغله شيال بالاجرة ،طلع على شارع جنة
ابيض من الصبنى بعد غسيله
ممعهوش ولا حاجه حرام
حتى الموبايل باعه وتصدق بفلوسه،ممعهوش غير بس المبلغ الى هيرجعه للمحل
عشان جنة
دخل الجامع ،لقى بابا جنه قاعد كالعادة
يونس: ياحج انا جبت الفلوس
تقدروا بكرة تروحوا تودوهم ويقطعوا الوصل الى ع جنة
ابو جنة اخد الشنطه وهو فرحان وحضن يونس وباسه
يونس: انا بس كنت عاوز اطلب منك طلب
ابو جنة: اؤمر يابنى
يونس: انا سيبت شغلى الى كنت فيه ،ومكان سكنى وكل حاجه
فلو تشوفلى حته ابات فيها
انهاردة وبعدين نشوف حتة اوضةان شالله فوق السطوح ليا
ايجارها عالاد
ابو جنة: ياخبر يابنى ! ازاى تقول كده يااهلا بيك فبيتى يابنى
يونس: ياحج بلاش البيت ،انا عاوز اى حته ان شاءالله الجامع هنا
ابو جنة: الجامع بيتقفل يابنى محدش بيبات فيه
يونس: خلاص ياعم ابو جنة مفيش مشكله تدبر
اليوم خلص ودبر النومة يونس ،كانت ع باب الجامع
اتدارى من ابو جنة عشان ميمسكش فيه للبيات فوق فبيته
وبعد كده اخده ابوجنة لما لاقاه فالجامع وماشاء الله بدأ يواظب عالصلاه
واتكلم مع صاحب البيت الى هو فيه يأجر الاوضة الى فالسطوح وفيها حمام وجزء صغنن كده مطبخ
وايجارها معقول ويجيبه اخر الشهر يكون ربنا فرجها عليه بشغل
بدأ يقلب رزقه فاى حته مش لاقى ،وممكن تساهيل يلاقى حاجه تخاطيف كده
اهو حاجه تمشى يومه ومصاريفه.
بعد اما الفلوس رجعت واتقطعت الوصولات الى ع جنة وصاحبتها ، جنة حست ان جواه بذرة خير
وخصوصا من الى بتسمع عنه من باباها
وفيوم كانت نازلة ع شغلها،مشغل خياطة كبير بيودى انتاجه ع مصنع معروف للملابس الجاهزة
اتصادفوا عالسلم
يونس: صباح الخير يا انسة جنة
جنة: صباح الخير يا استاذ يونس( مميلة فالارض)
يونس: نازلة لشغلك؟
جنة: اه فالمشغل
يونس: باباكى قالى ،ربنا يساعدك
جنة: وانت لسه ملاقتش شغل
يونس( مبتسم) اهو بتقضى من هنا ومن هنا
جنة: ربنا يرزقك
مشيت خطوتين ورجعت تانى له
يونس: هو ينفع اسالك سؤال
جنة: مينفعش نوقف نتكلم مع بعض اصلا
يونس: هو سؤال بس واحد ،انا عارف انك قرفانه منى وقرفانه تبصيلى
انتى نضبفه وعفيفه اوى
وانا زباله وكلى اخطاء
جنة: ربنا الى بيحاسب يا استاذ يونس ... مش انا
يونس: والله توبت ،وندمت
وبقيت ادوق الحلال وطعمه حتى لو قليل
جنة: كان قدامك الحلال زى كل الناس ،بس انت استسهلت الحرام الكتير
يونس: وربنا عالم نيتى فالتوبة ،حتى الصلاة مبقتش اسيبها
جنة : ربنا يقويك عاوز منى حاجه
( هتمشى)
يونس: انا عملت كل ده بسببك ! وانتى السبب الى رجعنى لربنا
جنة الكلمة حركتها بس حبت تكمل انها تمشى ومتستسلمش له ولا لكلامه لانه حرام ...
#بقلمى_نورإسماعيل
.¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'*•.¸¸.¸.•'´
وبتتعاد الصورة تانى ...
جايبهالها المرة دى عبدالصبور ...
بتغسل الاطباق على الحوض ، وواقفه فالمطبخ وحدها
دخل يتهمس ابو عصام ويبص حواليه يمين وشمال اذا كان حد شايفه
بيحسس على دراعاتها ،اتنفضت وسابت الى فايدها مفزوعه
بتدور له وهو بيحاول يكتم بوقها ،بتمسك نشابه العجين
وبتضربه فوق دماغه ضربتين
بيقع عالارض سايح فدمه !
بتهرب ماليكا وبتجرى على برة ،لكن هو ماماتش وكان لسه فيه الروح وبيترعش وفتح عنيه !!
بصت ماليكا لعبدالصبور بذهول ...هى مقتلتوش كان لسه فيه الروح لقبل م تطلع تجرى
وبترجع تانى تبص للصورة الى بتكمل و
الحلقه التاسعه عشر.
.¸.•''¯'*•.¸¸.¸.•''
وبتتعاد الصورة تانى ...
جايبهالها المرة دى عبدالصبور ...
بتغسل الاطباق على الحوض ، وواقفه فالمطبخ وحدها
دخل يتهمس ابو عصام ويبص حواليه يمين وشمال اذا كان حد شايفه
بيحسس على دراعاتها ،اتنفضت وسابت الى فايدها مفزوعه
بتدور له وهو بيحاول يكتم بوقها ،بتمسك نشابه العجين
وبتضربه فوق دماغه ضربتين
بيقع عالارض سايح فدمه !
بتهرب ماليكا وبتجرى على برة ،لكن هو ماماتش وكان لسه فيه الروح وبيترعش وفتح عنيه !!
بصت ماليكا لعبدالصبور بذهول ...هى مقتلتوش كان لسه فيه الروح لقبل م تطلع تجرى
وبترجع تانى تبص للصورة الى بتكمل و بتشوف الى ماشافته قبل كده ولاعرفته
وكانت المفجأة !!
•''¯'•.¸¸.¸.• .¸.•''¯'•.¸¸.¸.•'' .•''¯'•.¸¸.¸.• .¸.•''¯'•.¸¸.¸.•''
رد فعل دينا لما سمعت من ماليكا الى اتقال ،كان صدمه
عيونها مبرئة
ضامة كفوف ايدها على بعض بتحفز!!
دينا: مش مصدقه ولا مستوعبه
ماليكا: زى م بقولك مزدوتش حرف ،انا مجاليش نوم من امبارح
قولت لازم اجيلك
دينا قامت تمشى فمكتبها ،حاطه كفوف ايدها ع دماغها
دينا: ازاى كده ! ازااااااى
يعنى كنتى هتروحى فشربة ميه
كنتى هتروحى فشربة ميه لولا الثغرة الى فتشنا عليها انا وعمر
ماليكا( باستغراب) عمر !
دينا: ايوة ، هو عمر الى قالى مش هنسيبك لحكم الاعدام
ويشهد المكتب ده وبعترة الورق
وفتحه الجهاز طول الليل بنجيبلك حل
لحد م لاقينا حوار المهدئات
ماليكا: تخيلى انى كان زمانى اتنفذ فيا الحكم ، وموتت
دينا قامت حضنتها اوى
دينا: بعد الشر ! الحمدلله محصلش كده
الحمدلله مضعتيش مننا
ماليكا: يعنى هى كانت شايفانى بترمى فالسجن ،٣ سنين
كانت شيفانى ببعد عن بنتى وبتهان وبنطرد
كانت شايفه سيرتىاتجابت على كل لسان ،المجنونة الى قتلت حماها
المجنونة الى بتتعاطى برشام
وسكتت
وهى الى عملت كده
دينا: مش هسيبها ! وحياة الى حصلك والبهدلة الى بهدلتيها دى
مش هسيبها وهييجى حقك
روح عبدالصبور بتقولك انه حقه هو
ده حقك انتى قبله
الست دى انا هخليها تقول الله حق
ماليكا: ( بخيبة امل) ازاى! القضية اتقفلت ..
واتحكم فيها وخلاص اتنفذ فيا الحكم
وحتى لو اتفتحت ...هنقول ايه دلايلنا
انها هى الى قتلته مش انا
هنقول ايه ...روح وجت وقالتلنا؟!
دينا بتفكر : سيبيها لربنا وهلاقيها ان شاء الله وهييجى حقك
( قامت بصت فعيون ماليكا) واثقه فيا ؟
ماليكا: طبعا ،انتى انقذتينى من الموت
دينا: والمرة دى هنقذ سيرتك الى لوثتها الست الحيوانه دى
ربنا هيوقف معايا ان شاء الله ..
#بقلمى_نورإسماعيل
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
راجعه فطريقها لطنطا ،ساندة دماغها على شباك الميكروباص
بتفكر الفترة دى كلها الى اتشحططت فيها وتعبت بسببها
حتى اهلها اتخلوا عنها....لو كانت بجد قتلت فكانت بتدافع عن نفسها
ولما مطلعش هى الى قتلت
برضو لسه منبوذة منهم ومن الناس ومتدارية فبلد متعرفهاش ، قلبها كان موجوع اوى
كانت عاوزة تترمى فحضن حد وتعيط
تقوله ست مفيش فقلبها رحمه ، تبقى ام زيها
حرمتها من بيتها ومن بنتها
وهى شايفه كل ده وساكته بجبروت
بتعرف تنام
وبتعرف تعيش
على حساب موتها بالبطئ !
افتكرت يونس واتنهدت ،عاوزة اول م توصل تجرى عليه وتقوله انه كان صح
انه فعلا بيقرا روحها
وانه مش بيكدب فى اى كلمة بيقولها ليها ....روحها فعلا بتحكيله وبيعرف يقراها صح
اكتر من الناس العايشين معاها ...
وسط شرودها وسكوتها موبايلها رن ،رقم غريب
ماليكا: الو ...
رشا: الو يا ماليكا انا رشا
ماليكا: ازيك يارشا عاملة ايه ،لسه فاكرة تكلمينى
رشا: معلش بقى مشاغل ،انا بس بتصل بيكى عاوزة اقولك على حاجه
ماليكا: ايه؟
رشا: اناعارفه انك انتى وعصام انفصلتوا وانه مبقاش يهمك فحاجه
غير انه بابا هنا وبس
لكن الى عاوزاكى تعرفيه ،ان صاحبتك اظن تهمك
ولو جتلك منها طعنه هتبقى شكلها مش ولابد
ماليكا اتعدلت فقاعدتها وانتبهت.
رشا: الست المحامية الشاطرة ، دينا صاحبة عمرك
بتلف على جوزك
وشكل كده فيه حاجه بينهم
ماليكا: انتى بتقولى ايه!
رشا: والله انا بوعيمى على صاحبتك الى عاملة فيها صاحبتك( قفلت)
ماليكا كشرت ، هى مشوشة
مخضوضه
الكلام ده بجد
هى هتلاقيها منين ولا منين بس !
#بقلمى_نورإسماعيل
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
عمر : انا مش فاهم ولا حاجه !
دينا : هشرح تانى ياعمر وافتح دماغك معايا ، الى قتل بابا عصام
حما ماليكا
طنط مامت عصام مش ماليكا
ماليكا ضربته بنشابه العجين وده مثبوت فمحضر التحريات
وبناء علبه بصاماته كانت هى الاداه فجريمة القتل
لكن القتيل ميت بضربه ايد هون نحاسيه كذا مرة فجزء من دماغه
والطب الشرعى عداها ان الاتنين بنفس الضربه
والاتنين بنفس القوة
اكتفوا بان ماليكا اعترفت بان هى الجانى وخلاص شكرا كده
عمر سرحان فاللى بتقوله دينا ورجع بصلها
دينا: انا هطلب فتح القضية وانت لازم تكون معايا
حق ماليكا لازم يرجع من الحيوانه دى
عمر: ماشى ومعاكى جدا ،بس انتى عرفتى كل ده منين ؟
دينا اتلخبطت ،هتقول ايه ماليكا بتشوف ارواح بتعرفها الى متعرفوش!
عمر: سرحتى ف ايه ؟ بقولك عرفتى منين
دينا: ماليكا قالتلى
عمر: وماليكا عرفت منين وامتى ،وجاية بعد قرب ٤ سنين عدوا عالحادثه!
مقالتش كده ليه وهى رايحه عالاعدام
وبعدين فالمحاضر اثبت ان مفيش بصمات غير بصمات ماليكا
دينا: ده علشان الست ام عصام المتدينة اوى ،بتلبس جونتى فايدها وهى خارجه
وكانت لابساه لما مسكت ايد الهون وضربت جوزها
او كملت ضرب بعد م جريت ماليكا خايفه على اوضتها
انت عارف ماليكا من يوم حادثه خديجة ، بتشوف الدم تمسكها حالة مش طبيعيه
شافته مرمى سايح فدمه
جريت وخدت مهدئتها وطبعا ده دخلها فحالة اللامبالاه الى خلتها تعترف بمنتهى الهدوء انهاالجانى
عمر( بيكمل كلام دينا) استنى كده! حماتها ام عصام وقت وقوع الجريمة
كانت بتزور الجيران عشان عندهم سبوع وبتجامل
وعصام برة
وهنا نايمه
هنا جت ام عصام وقتلته ،واضح انها سمعته لما كان بيعاكسها
دينا : وواضح انها عارفه كده من زمان ،لانها من غير قلب كملت ضرب عليه
عمر: تمام ( هز راسه)
دينا: ( مدت ايدها وسلمت عليه) تمام...توكلنا عالله
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
عصام: تسلم ايدك ... البسبوسة حلوة اوى
ام عصام( بتاكل ) عادية ...يلا اهى بتتعلم
ماليكا : طيب ...انا هقوم اكمل لم الهدوم من عالحبل
قامت ماليكا ،دقايق وقام حماها وراها
بعد م كانوا قاعدين بيتفرجوا عالتليفزيون كلهم .
واففه تلم الغسيل فالبلكونة ،دخل وراها يتسحب وقفل بايده الستارة
ماليكا: عمى!!
ابو عصام: انتى ليه مش عايزة تسمعى الكلام
ماليكا:( خايفه وبترجع منه) كلام ايه بس
ابوعصام: اتطلقى من عصام وانا هكشح الوليه دى ،واخليكى برنسيسة البيت
وبرنسيستى انا ( بيبص بصات وحشة لجسمها)
ماليكا: حرام عليك بقى سيبنى فحالى ، انت بتعمل كده ليه
ده انا مرات ابنك
ابو عصام: ابنى ده عيل حمار ،ميستاهلكيش
انا هستتك وهريحك
ده ابن امه مالوش كلمه
ماليكا: انت مش مكسوف من نفسك ،انت فمقام ابويا
تحب اقول لعصام الى كل شوية تقوله ليا ده
ابوعصام: م تقوليله هو يعنى هخاف منه ، ده بكلمة منى
اطرده هو وامه من البيت
ماليكا: ارحمنى بقا ،انا عاوزة بيتى واربي بنتى
ابوعصام: مانا هعيشك عيشة ملوكى ، طاوعينى مش هتندمى
ماليكا: اطاوعك على ايه ( زقته) اوعى كده ايه القرف ده
سابته وخرجت ...لاقت حماتها فوشها
وقفت ثانيه وكملت تانى على جوه
ام عصام: ايه الى موقفك معاها وهى بتلم الغسيل ياحج
ابوعصام: دى بهيمه ،بتلم الهدوم وتوقع نصه فالشارع
وبعدين انتى واقفه تتصنتى
هو انا متجوز مخبر...اوعى اوعى
يعدى ويسيبها وتبصله بصه وحشة ....
_____
يونس: حيوان وحقير ،داهية تحرقه اكتر ماهو محروق
ماليكا ساكته وسرحانه ودموعها نازله على عيونها
يونس: انتى ازاى سكتتى ،ازاى فضلتى فالوضع ده
ماليكا: كنت عاوزنى اعمل ايه
يونس: كنتى روحتى للسبع الراجل الحليوة ،الى خدك كده من ايدك من بيت ابوكى ( مسك ايدها) وحط ايده فايد اخوكى
وقوليله ابوك المريض بيقولى كذا وكذا
وعاوزة حل يا اما نتطلق
لكن سكتتى ،والحلوف ابوه يتمادى
وزوجة العنكبوت امه طبعا شاكه فيه وفيكى
وعصام قاعد فميه بذر الشمام ولادارى
كان لازم يحصل كده ،وتدفعى انتى التمن
ماليكا سامعاه وابتدت تعيط
يونس لاحظ ،عاوز يخفف عنها
بس سكوتها كان غلط من البداية
يونس: بس عارفه،الراجل ده عنده حق
ان شالله يتشوى فنار جهنم شوى كده زى الدرة
ماليكا( بتمسح عيونها) عنده حق ف ايه بقى ؟
يونس: انه يبصلك ويخون الست دى ،دى متتعاشرش
انا لو مكانه
هى صفيحه جاز مليانه ب ٢٠ جنيه
واخدها دلق عليها وعلى الى جابوها
وحتة كبريته معفنه ،ونخلص من وجه البومة للابد !
ماليكا ضحكت وهى بتعيط ،وهو ابتسم لما ضحكت
يونس: ده كفاية ضحكتك ! كان لازم اى حد يشوفك يُغرم بيكى ♥
ماليكا بتبصله عالكلمة الى قالها
يونس( استكمل كلامه) كان لازم ده يحصل ،حتى لو كان اد ابوكى
ماليكا( اتنهدت) حتى صاحبة عمرى ، الى اول م عرفت جريت عليها
الى لما بتوجع بروحلها
بتتقرب من طليقى ...انا مش زعلانه عليه
انا زعلانه عشانها
هى احسن من عصام
هو ميستاهلش واحدة بنضافتها
بتمسح دموعها وباصة للسما
ماليكا: انتى مش هتيجى بقى تاخدينى عندك ولا ايه ؟
يونس بص للسما وياها ،هو عارف انها لما بتعمل كده بتكون بتكلم خديجة
يونس،: طيب مش يمكن صاحبتك الى قالتلك دى كدابه
او فهمت غلط
اصل من كلامك ،دينا دى شخص كويس جدا
هو مش فاضل غير عصام يعنى !
فيه حاجه غلط...حاجه مش مفهومة
ماليكا بصت ليونس بعيون تعبانه ومش متطمنة وكلها حزن وخوف
ماليكا: انا تعبانه ، وهشة
وخايفه
وقلقانه
ومش قادرة اقوم خلاص
الحمل زاد عليا ...والصبر قل
ومش لاقيه حل
يونس لما شافها كده قالها بلهفه
يونس: لفى بسرعه من الباب يا ماليكا
ماليكا: ليه
يونس: لفيلى بس
لفت ماليكا وفتحت الباب ،كان قدامها يونس وفاتح دراعاته ليها
وهى م صدقت حدفت نفسها فحضنه وراااااااااحت ،فضلوا عالحال ده دقيقة
ماليكا بدأت تاخد امانها من حضنه
منه
من الثقه الى محاوطها بيها وبايديه
من طريقته الى وصل لها بيها ان مهما حصلها ....هو موجود ومعاها وبيسمعها
وبيحتويها
بترفع عيونها له بعد م بعدت كام سنتى عن حضنه ، بتبصله
وهو باصص لها
ماليكا ( بصة امتنان مع ابتسامه) شكرا ...
يونس: انتى مش لوحدك ( مرر بصباعه يمسح دمعة نازله من عيونها) ابداً
مش وحدك ....
#بقلمى_نورإسماعيل
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
ترتيبات ،وورق
وحجات
وافكار
وكلام
بقى عمر كل يوم يختزل ساعتين من شغله يروح لدينا المكتب عشان حوار قضية ماليكا
لازم يتسندوا على دلايل قوية عشان يفتحوا القضية بقلب جامد
عمر ذكى جدا ،ودينا لمّاحه
الاتنين عاملين كابل هايل بيخدم القضية من كل جوانبها
دينا: مممم اننا نفتح تانى المقبرة ، ونستدعى الطب الشرعى للتشريح من تانى
حوار صعب.
عمر: حوار ابن لذينا ( بيهرش فدماغه) لا بس هنقدر ان شاء الله
دينا: انا حلفتلها هرجع حقها،دى اتذلت من الناس اد كده وبتمشى موطيه راسها
عمر : ان شاء الله هنجيب حقها وهنطلع عنيها الست الغلوية دى
دينا: طيب نقطة الشهود ، قولنا هنعمل فيها ايه
عمر: لابصى احنا عاوزين شاى تانى عشان فيها كلام كتير
دينا( بتضحك) هقوم انا اعمل الشاى ،على بال م ترتب دنيتك فالحتة دى
قامت دينا ودخلت المطبخ تحضر اتنين شاى ،رن جرس المكتب عصام
ولتانى مرة يصادف يروح لدينا وعمر هناك
عصام( ببرود) السلام عليكم ،الاستاذة دينا مش هنا ولا ايه
عمر باصصله وهو كارهه اكتر من زمان
عمر : جوة بتحضر حاجه
دينا جت بمجين شاى ،واتلاقت بعصام !
دينا: عصام ! اهلا وسهلا
عصام: انا جيتلك فوقت شغل برضو
دينا: والله ياعصام زى م انت شايف ، ماسكين قضية جامدة
اليومين دول وادعيلنا نطلع منها زى م احنا عاوزين
عصام( بيبص ليها ولعمر ) ان شاء الله
دينا: اؤمر يا عصام ،اى خدمة
عصام: ( اتلخبط) لا بس كنت ....
عمر ( بيشرب الشاى وباصص للورق ) بصى كده
دينا: ( اخدت الورقه) ايوة كده ...ايوة كده هو ده عمر
عليك انت الحوار ده بقى
عصام لاحظ ان دينا مش مرحبة بوجوده اوى
دينا: هقوم اعملك شاى ياعصام
عصام: لا خلاص انا ماشى
عمر : اومال كنت جاى ليه من الاول ؟
عصام: هو ده مكتبك انت ! اما عجيبة والله
خرج وخرجت وراه دينا
دينا: معلش ياعصام اصلى مشغولة
عصام: مفيش مشكلة يا دينا ،بس انا كنت عاوز اسالك
ان كان انتى وعمر فيه مشروع ....
دينا( مستفهمه) مشروع ايه ؟
عصام: يعنى ارتباط او
دينا: لا طبعا ،بس انت ليه بتسال
عصام ابتسم: لاعادى
دينا: هو مش غريب ياعصام ؟
عصام: غريب ايه
دينا : مستغرباك حبتين اليومين دول ،بس يلا مفيش مشكله
انت برضو هتفضل طليق اختى وصاحبتى ( ضغطت على كلمة طليق)
وابو اجمل بنوتة انا بعشقها
ف مكانتك محفوظة يعنى حتى لو صدرت منك تصرفات انا مش فاهماها
عصام حس انها بتوصل له رسالة بطريقتها والكام كلمة الى قالتهم فالاخر دول
منعا لاكتر من كده احراج ،اخد بعضه ومشى
وهى رجعت لعمر لاستكمال مشوارهم المحتوم ،،
#بقلمى_نورإسماعيل
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
جمال واقف ...لابس لبس مداريه كله
مش باين جسمه منه
زى م كانت بتشوفه
ومبتسم وبعدين صورته بتختفى .
بتفوق ماليكا بعد م دماغها بتنزل على صدرها تسقيط نوم !
يونس: ايه ده انتى بتنامى ؟ بتنامى
ياستى قومى
ماليكا : شوفت جمال دلوقت بيضحك
يونس: يبقى خير ،شوفة جمال فالحلم خير
جمال مين؟
ماليكا بتبص باستغراب ليونس ورافعه حواجبها
يونس( بيضحك)ياستى بهزر عشان تفوقى
قومى انا عملت كوبايتين شاى بنعناع باخر حبة عندى يلا ان شالله م حد حوش
اخدت منه النعناع وسندت نفسها عالسور كالعادة ...
ماليكا: لا ظابطه حلو ،تسلم ايدك
قولى صحيح
العلامه الى فجبهتك من قدام دى ...
يونس: دى علامة الصلاه ( بيمشى ايده عليها)
ماليكا: مممم ماشاء الله ،التوبة كانت نصوحه بقى
يونس: جدا ،اتغسلت حرفيا
ماليكا: طب كمل ، بحب اسمع حكايتك اكتر
بتنسينى همى
يونس: ماشى ياجنتى
ماليكا: جنتك !
يونس: اصلك شبهها،والمصحف نسخه تبيكل
ماليكا: طب بطل استهبال وكمل
يونس: حاضر ( بيضحك)
وصلتلك ياستى ،انى سكنت فاوضة فوق سطوح العمارة الى هما فيها
وكنت بقضى يومى باى حاجه ترزق من هنا او من هنا
صعبت على عمك ابو جنة وجابلى مرتبة غلبانه كده وقالى نام عليها يابنى لحد
م ربنا يكرمك
بينى وبينك هما كانوا بيعاملونى اكتر من ابنهم ،وانا حبيتهم والله مش عشان هما
اهل جنة
هما ناس تتحب
ماليكا: ثوانى ثوانى ....واسراء خلاص نسيتك؟
يعنى اختفيت مدورتش عليك
يونس: ليه بس السيرة العفشه دى ! لاياختى دورت
ماهو العبدلله غبى برضو
طلعت على شريحتى القديمة ،وجبت موبابل معفن ك.ه
اهو يقول الو
بس بالحلال
واول م حطيت الشريحه ....اتصلت !
فلااااااااش بااااااااك
يونس: نعم
اسراء: ايه زعلان انى قولتلك نتقابل
يونس: لا بس مش فاهم عاوزة ايه
اسراء: عاوزة ايه ؟ انت تختفى مرة واحدة وتسيب الشقه
وموبايلك يتقفل
ولما الاقيك تقولى عاوزة ايه
يونس: اسراء انتى ليه عاوزانا نحكى فالمحكى ! انا وانتى يابنت الناس طريقنا
مش واحد
اسراء( بتحاول تحضنه وبيبعدها) بس انت وحشتنى
يونس: اسراااااء ( بيبعدها) انا توبت لله
ومش عاوز ارجع لاى معصية تانى
اسراء: انا معصية يايونس
يونس: انتى مش كنتى رفضانى حرامى ، انا خلاص بعدت عنك نهائى
واظن انا مأذتكيش فحاجه
وكنت واضح
مش عاوز اكمل
وطلقتك يابنت الناس وقطعت الورقه
اسراء( بدموع) بس انا مش عارفه اعيش من غيرك ، انا اتاكدت
انى كنت بحبك بجد
كنت فاكرة عشان انت موجود قدامى طول الوقت
ومعايا
اننا هنفضل كده
لما روحت منى ...حسيت بقيمتك
يونس: ترضى تبطلى سرقة واى حاجه حرام وتمشى زى م ربنا عاوز
بتبصله باستفهام
يونس: لو جيت لاهلك واتقدمت ،ترضى تعيشى معايا فوق السطوح
وناكلها بملح؟
اسراء: لا طبعا ايه الى يغصبنا على كده ؟!
يونس: الى يغصبنى ،حبي انى اكون نضيف
ولاول مرة انام مرتاح مش خايف
انا مش هرجع يا اسراء
وطريقنا مش واحد
انا همشى ومش هغير رقمى لانى مبهربش
بس متتصليش تانى
لاننا خلاص ...خلصت المسرحية الى بقالها سنين
ماشى وسايبها
اسراء: لا مخلصتش ،وانا الى اقول تخلص امتى
مش بعد م تعلقنى بيك
وتخلى كل حتة فيا تدمنك وتدمن لمستك
وادمن وجودك
تقولى مينفعش
مكمل يونس عادى
اسراء: استنى هنا !
فيه عملية يا استاذ يونس ،ياسيدنا الشيخ
يامولانا
وشك طلع فالكاميرات وكانوا بيدوروا عليك
لو ناسيها انا مش ناسياها
لو مطاوعتنيش هبلغ عنك بنفسي
لف لها يونس بثقه ومبتسم رغم ان الكلام هزه وقلقه شوية
يونس: ربنا سترنى وانا بعصيه ....فما بالك وانا بطيعه
مش هيسترنى ؟!
________
ماليكا: ايه يا واد ده !! ايه الرد الشيك ده
ايه ده افحمتها
لا انا اسقفلك( بتسقف)
يونس( بيعدل ياقته بهزار ) ميغسي ميغسي مبحبش اتكلم عن نفسي كتير
ماليكا: لافعلا ردك رائع
يونس: اصل مش هرجع لها ولا للى كنا فيه ،هو بالعافيه
ماليكا ( غمزتله) وجنة ؟!
يونس ( اتنهد وارتسمت ابتسامه حلوة على وشه) جنة وهى جنة لربنا على ارضه ...
جنة محاولتش اقولها انى عاوزها
هى الحجات كلها لصالحى تقولها ،ان قلبي عشقها من الاخر ...
فلااااااش باااااك
طالعة بعد يوم شغل من المشغل هى واصحابها ...
زميلة: انهاردة كان هدة يالهوى ضهرى مش عارفه اعدله
جنة: عشان كان يوم تسليم
زميله : يلا الحمدلله عدى ع خير ،اروح اصلى العشا وانام
جنة: انا بفضل الله صليتها
زميلة ٣: يلا طيب عشان نلحق المواصلات ،سلام
زميلة٤:يابختك ياجنة بيتكم شارعين كمان وتبقى فيه
جنة: تعالى طيب ارتاحى شوية وابقى انزل اوصلك
زميله٤: لاخلاص بقى ،انا عاوزة اروح جرى
باى باى
مشيت جنه فطريقها للبيت ،طلعلها يونس !
جنة: ايه ده!
يونس: تخيلى انى مستنى وبقعدتى دى بقالى ساعتين عشان الحقك وانتى مروحه
جنة: ايه يعنى قاطع طريق ،هو ينفع ده
يونس: طيب وهو ينفع تشحتفينى الشحتفه دى كلها عشان اقولك كلمتين
جنة: وتقولى ليه بينى وبينك ايه انا عشان تقولى واقولك
يونس: انا بس عاوزك تسمعى كلمتين
مش عاوز حاجه غير تسمعينى
جنة: انا مش فاهمة انت ليه مصمم اسمعك ،انا معرفكش اساسا
يونس: عارف ، بصى
اليوم الى انا سرقت المحل فيه وشوفتك بتصلى
حتى مقطعتيش صلاتك وطلبتى لنا امن او صوتى
كنتى مع ربنا جدا
انتى حركتى جوايا حتة كانت ماتت ، حتة كنت شاكك انها لسه موجودة
ضميرى
انا رجعت زى م كنت ، من غير ولامليم
بمسح هنا
واشيل هنا
واطلع هنا
عشان ربنا يرزق بكام جنيه اعيش اليوم بيومه
بعد م كان معايا الالافات
بس عندك حق الحلال احسن ،وكان قدامى
بس ظروفى خلتنى
جنة: ظروفك ايه! هو اى حد يتولد فعيشة صعبه او ظروف تعبانه
يسرق
لاطبعا
فيه ضمير
وفيه دين اتربينا عليه ،ان الحلال بيّن والحرام بيّن
ويااخى الشغل كتير وبالحلال ،واذا مكنتش تتعب وانت فشبابك عشان تشقى
هتشقى امتى
ده الى اعرفه واتربيت عليه
يونس: عندك حق ،وانتى صح فكل حاجه
انا لوبايدى ابوس ايدك
جنة بصتله بزعل
يونس: مش قصدى،يعنى اشكرك انك فوقتينى
ورحعتينى لله
انا والله تايب
ومش هرجع تانى لو بموتى
وعاوزك تساعدينى
جنة: اساعدك ف ايه
يونس: لو تعرفى اى مكان شغل ثابت زى شغلك كده
ان شالله عامل نضافه
انا راضى
مدام يرضىالله
بس يكون هنا فمنطقتكم
جنة: وايشمعنا منطقتنا؟!
يونس: عشان اكون قريب ( قالها بعيون كلها حب)
جنة ( رقّت شوية بس مش مبينه) بص هنا فالمشغل عاوزين سواق على العربية عشان يوصل
الملابس للمصانع
هما قالوا كذا مرة نشوف معارف
لو تايب وصادق
وعاوز تاكل بالحلال
تعالالهم بكرة واتفق
عن اذنك
اتدورت ومشيت ،لف جرى ووقف تانى قدامها
يونس: مصدقانى يا انسة جنة انى خلاص توبت
جنة: لو من قلبك التوبة ،ربنا هيغفرلك
ومدام ربنا غفرلك
الناس هتصدقك
يونس: محدش عارف حقيقتى هنا غيرك،وانا بسالك انتى
مصدقانى ؟
جنة اتكسفت وخدودها احمرت ،عمرها م كلمت شاب بالمدة والقرب دول
جنة: انا همشى
بسرعة هربت من قدامه ، هو حس من طريقتها انها مكسوفه لكن صدقته
جنة بتسد اى باب ييجى منه فتنه قلبها او عقلها
مش واخدة على كده
واخدة عالعفه
والعفيفه ...دايما طريقها صعب ..❤
#بقلمى_نورإسماعيل
.¸.•''¯'•.¸¸.¸.•'' .•''¯'•.¸¸.¸.• .¸.•''¯'*•.¸¸.¸.•''
خبط عالباب ورا بعض
ام عصام: ايه ياخويا الخبط ده !
عصام( بيلبس تى شيرت) ثوانى هفتح انا ،مين؟
الشرطة: افتح بوليس
ام عصام( دبت على صدرها) يامصيبتى ! بوليس ليه
عصام بيفتح بهدوء وخوف
عصام: فيه ايه ؟
دخلو ظابط وعساكر
الظابط: السيدة شفيقه عباللاه موجودة
ام عصام: انا خير ؟
الظابط: اتفضلى معانا
عصام: تتفضل معاكم ايه ؟ دى والدتى عاوزينها ليه
الظابط: مطلوب القبض عليها يااستاذ ،وادى الامر
اتفضلى ياست من غير شوشرة
ام عصام : يالاهوى ،قبض ليه
عملت ايه
عصام بيقرا وفعلا صحيح صادر امر بالقبض عليها
الظابط: اتفضلى غيرى هدومك ياست وبسرعة ،انا بعاملك بالراحه عشان انتى ست كبيرة
ام عصام( بخوف) فيه ايه ياعصام
عصام: غيرى ياامى وانا جاى معاكى ...اكيد فيه سوء تفاهم
ام عصام: يا ليلتك السودة ياشفيقه ...يالاااااهوى !!
الحلقه العشرون
.¸.•'´¯'*•.¸¸.¸.•'´
"انا عاوز افهم واخدين والدتى ليه ياحضرة الظابط"
الظابط قاعد ع مكتبه وبيبص قدامه فورق وبيرد على عصام بمنتهى التناكه
الظابط: والله ياسيد عصام ،الست الوالدة متهمة فجريمة قتل
عصام( بيبرء مش مصدق) قتل!
الظابط: وبكرة هتتعرض عالنيابه ،وهياخدوا اقولها
عصام: انا مش فاهم حاجه
الظابط: ابقى اعرف من النيابه بقى وعن اذنك عشان عندى شغل
عصام: طب انا اسف مش هعطلك هى بس هتتحجز مع البنات الحراميه وال ...
الظابط( بعصبيه) اومال يعنى هنحجزهالك فاوتيل ٥ نجوم !
دى واحدة متهمه يااستاذ
عصام: بس اكيد فيه سوء تفاهم ،امى مبتخرجش من البيت
هتقتل مين
اكيد انتو غلطتوا فالاسم او حاجه
الظابط: يوووه ، حضرتك سالت وانا جاوبتك
ممكن بقى تتفضل
وفالحجز
كانت قاعدة ام عصام
خايفه وبتبص عالاشكال الى منورة الحجز معاها ، الى حراميه والى
بنت ليل
والى نصابه !
قاعدة بتبص وماسكة نفسها محاوطه روحها ، وكان كل الجبروت
الى بتمارسه على اى حد
اتحول لحمل وديع فالحجز ..
ست محجوزة شكلها غريب كده ،بتشرب سيجارة
مدية على معلمه
جت وقعدت جمبها
الست: سالخير ياحبيتى ، جاية فايه ؟
ام عصام: جاية مع ابنى ،خدونى معرفش فيه ايه
الست: ايوة يعنى انتى عاملة ايه ولامؤاخذة
ام عصام: ياست انتى عاوزة ايه منى م تسيبينى فحالى
الست( بصوت عالى) جرى ايه ياوليه ! انتى تقعدى عووج وتتكلمى عدل
ده انا إنصاف ياتوكا !
عارفه مين انصاف ولا اعرفهالك
ام عصام: وانا اعرف اشكالكم منين ،انا حيالا اشوف الى زيكم فالتليفزيون
الست( ضحكت بسخريه) هيهئ ! وفالتليفزيون بتشوفينا شكلنا ازاى يا اوخا
ام عصام: يوووه م تحلى عنى بقى جاتك نيلة هو حد مسلطك عليا
الست: جاتنى نيلة ! انا جتنى نيله
طب تعااااالى
ومن شعر ام عصام اتجابت ووقعتها عالارض ،وكل بنات الحجز اشتركوا
فالمهمة دى
يجاملو الست انصاف ريسة الحجز !
وخدت علقه الست ام عصام زائد كبر سنها ،متتنسيش علاماتها
جسمانيا ولانفسيا طول عمرها !
وجه تانى يوم ،وهتتعرض ام عصام او شفيقه عالنيابه بعد م قضت
ليلة اسود من السواد فالحجز
لسه اثرها على وشها وجسمها ، عصام لما شافها كده اتخض
واصلا مش عارف فيه ايه لحد دلوقت .
ابتدى الاستجواب ،ودخلت شفيقه لوحدها
ودقيقه وكانت موجودة دينا وهتدخل المكتب على رئيس النيابة اثناء المحضر
شافها عصام ووقفها
عصام: دينا !! دينا في ايه
متعرفيش
انتى جاية عشان ماما
دينا( بثقه ) اه
عصام: عرفتى منين
دينا: ماهو انا الى مقدمه البلاغ
عصام: بلاغ ! بلاغ فيه ايه
انا من امبارح مش فاهم حاجه
دينا: هو انت متعرفش ان الى قتل السيد الوالد عبدالصبور السُنى
هى ماما ياعصام
عصام اتنفض من المفجأة
دينا : مش ماليكا !
بغرور وتناكه استأذنته تمشى وسابته فهول المفجأة الى مش عارفين هيفوق منها
امتى وازاى !
#نورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
ماليكا فشغلها موجودة بذهن شارد
دينا مقالتش ليها انهم جابو التايهه وان ام عصام اتقبض عليها
خلاص وحقها قرب ييجى ويخلص منهم ..
سايباها مفجاة ،وكمان مش هتقولها هى ليها
عاوزة بنتها هنا هى الى تقولهالها
لما تتحول تلقائيا للعيش معاها ،لعد م تخلص لها إجراءات
سقوط السابقه المثبوته عليها
بقضية رد شرف بعد م يتحكم على شفيقه حماتها
بكده الحضانه هتكون من حقها ...
دينا طول الوقت بتفكر فماليكا ،وفمصلحتها وازاى يرجع
حقها
لكن ماليكا بعد الوش الى عملته ليها رشا فدماغها
حاسة بخنقه من ناحية دينا
هى مش غيرانه
هى شايفه ان دينا كبيرة عليه
وكان نفسها دينا تيجى تقولها ،يمكن كانت فرحت ان ممكن هنا
تلاقى ام حنينه احسن من عيشتها مع حماتها
وعصام
سرحانه وساكته ،متعرفش ان القدر مخبيلها مفجآت لسه
احسن من الى بتفكر فيه وشايله همه
.•'´¯'•.¸¸.¸. .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
"
وكيل النيابه : اسمك وسنك وعنوانك
ام عصام: شفيقه عبداللاه ،٥٨ سنه وساكنة فى ....
وكيل النيابه: طيب ياست شفيقه ،جالنا بلاغ متقدم
من الانسة دينا سمير
بانك متهمة بقتل زوجك السيد عبدالصبور السُنى
فما اقوالك ؟
دينا بصالها بثقه
ام عصام ( صرخت بتمثيل) ايه ! قتلت جوزى ايه
الى قتلته ماليكا السفاحه قتاله القتله
بتاعت البرشام
( بتوجه كلامها لدينا) انتى ايه ياختى كنتى فاضية
قولتى اما نجيب شفيقه نضحك عليها شوية
وكيل النيابه: كلامك معايا هنا مالكيش دعوة بحد
قتلتيه ولا لا
واتهمت ظلم مرات ابنك السيدة ( بيقرا) ماليكا يعقوب
ام عصام: لا مقتلتش يا باشا ،والله م قتلته
هى الى قتلته
انا كنت عند الجيران فالسبوع
وجيت لاقيت الراجل واقع فالارص وغرقان فدمه
دينا: اه هى ضربته وانتى كملتى عليه لحد م قتلتيه
لانها سابته لسه عايش
ام عصام: لا محصلش ...محصلش
وكيل النيابه: الجيران شهدوا بانك مشيتى بعد ٥ دقايق
من دخولك عندهم
وروحتى بيتك
ودى الشهادات متقدمه منهم بواسطه الاستاذ عمر المحامى
يعنى اثناء جريمة القتل كنتى هناك ؟
ام عصام( مبرئة وخايفه) لا مكنتش هناك ،لا
انا جيت لاقيت كل حاجه
وفضلوا عالحال ده سين وجيم لحد م اغلق المحضر
واتحبست ٤ ايام على ذمة التحقيق
لان التحقيق مفتوح ،عمر ودينا عرفوا يجيبوا اذن بفتح
قبر عبدالصبور وتشريح الجثة من اول وجديد
لعثورهم على ادله جديده
وبالفعل كان فى ادله جديد تساعدهم جدا !
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
ماليكا : انا جبتلك تى شيرتين وبنطلون
بدل لبسك الى مش بيتغير من يوم م شوفتك ده
يونس بيبص على نفسه وبيضحك
ماليكا: انت مش بتستحمى يابنى ؟ ( بتضحك)
يونس( بياخد الحجات) ياستى كتر خيرك وتسلمى
اصلى اتحكم عليا مخرجش من هنا بقية عمرى
ماليكا: احنا فالخدمة
وجبت كمان اكل ،تعالى ناكل سوا
انا زهقت من وحدتى
يونس: ايه ده انا وانتى فشقتك ويبقى الشيطان تالتنا ( بيضحك
ويغيظها)
ماليكا: لا م انت تايب والشيطان بعد عنك ( بتضحك) يلا
لف وتعالى الاكل سخن
يونس: هوا
لف وجه وقعدوا عالارض ، وحطت الاكل فالاطباق
يونس: يعنى لبس وعزومة الاتنين !
ماليكا: عد الجمايل
يونس: انا بعدها والله ، عارفه موقف تعالى كل ده
فكرنى انى طول الوقت كنت لاقيط كده
ماليكا: هههههه لاقيط ! لاقيط ازاى
يونس: هقولك ،اهل جنة كانوا بيعملوا معايا كده برضو
ماليكا: يادى جنه ! دى لوستك يابنى خالص
يونس: هوسانى والله ( بيبصلها اوى)
ماليكا اخدت بالها من بصته وميلت فطبقها
ماليكا: قربت احس انى شبهها فعلا من كتر تشبيهك
يونس: روحك شبه روحها ، ووشك فيه منها
وسبحان الله هى جنة
وانتى جمع ملاك ...انا حابب اقولك انك ملايكة
احلى من ماليكا
لان فعلا انتى جمع الملايكة ♥
ماليكا اتاخدت واتوترت من تلمحياته
ماليكا: ممم قولى بقى الاكل بيشبه عندك ايه
يونس: هو الاكل بس ده كل حاجه
ماليكا: طب م تقول
فلاااااش باااااك
سواق على عربية المشغل ، واتثبت فيها يونس
بعد شغل شهر
واضح انه بجد ناوى توبة من قلبه
وعاوز حلال ورزق حلال وانه يفتح صفحه جديده مع ربنا
ويشقى ويتعب وياكل من شقاه
مش من شقا الناس والحرام !
بس ياخسارة ،هجم عليه مرة واحدة دور نازلة معوية شديد
نيمه فالسرير
يومين بحالهم
لابيطلع ولا يدخل
وياعينى محدش بيعمل له اكل ،ولاقادر يعمل لنفسه
ولا جاب دوا
ومحطوط مكانه محدش فباله ...
لكن لو جينا عالناحية التانيه ،هنلاقى ان جنة اخدت بالها من غيابه فالمشغل
وان بيسالو عليه وبيتصلوا بيه تليفونه مقفول
جنة ابتدت تحس انه بجد عاوز توبه ،وفيه حاجه غريبة كده جواها بتتحرك
له
بس هى بقى بايديها دافناها وكابتاها ودايسه عليها عشان متطلعش ولاتفكر فيها
اصلا!
وعلى تربيزة الاكل بياكلوا كلهم يوم اجازة جنة من الشغل ..
ابو جنة: يونس كويس فشغله على كده ياجنة
جنة: اه مبسوطين منه،مش بيسوق العربية بس
وبيساعد كمان ويشيل
لو عاوزين حاجه فالمشغل ناقصه يجرى يجيبها
ابو جنة: هو واد يستاهل بصراحه الله اكبر عليه ،شكله ابن حلال
جنة: هو بس بقاله يومين وانهاردة كمان ده اجازة ،بس شكله كمان منزلش
يعنى غايب وبيكلموه مش بيرد
حتى عرفوا اننا جيران وسالونى قولت معرفش
ام جنة: ايه ده! لايكون الجدع فيه حاجه يابو عبدالرحمن؟
ابو جنة: هطلع له بعد الاكل اشوفه ...
وطلع له ابو جنه ،لاقاه نايم تعبان جدا وحرارته عاليه
ومكالش حاجه من يومين
ساعده يلبس ونزل معاه لاقرب مستوصف فالمنطقه ، جنة شافتهم وهما نازلين
اتخضت بس خبت
قالت لمامتها ،لبست خمارها ووقفت فالبلكونة
تبص عليهم
ركبوا توكتوك ومشيوا ، ولما رجعوا كانوا قالوا هناك عالى عنده
اخد حقنه فوقته شويه
وكتبوه ع ادوية حلف ابو جنة يجيب وهو يحلف
لحد م حلفان يونس الى مشى
هو معاه فلوس
اخده واحدة واحدة وطلع
لما جم جنة اختفت من البلكونة ودخلت ،خبط الباب باباها
واتنحنح ودخل ودخل وراه يونس تعبان وهمدان
ابو جنة : ياام عبدالرحمن ! تعالى
جت مامت جنه من جوة
ابو جنة: بصى خلى جنة تحضر اكلة كويسة ليونس عشان يروم
بيها عضمه
تعبان وكان بيرجع اليومين الى فاتوا
يونس( بصوت تعبان وهو مميل فالارض) لا ياعم الحج والله م قادر
ابو جنة: اسكت انت متتكلمش
جنة تحضر اكل
وانتى اطلعى مع عبدالرحمن معلش اتعبي ،نضفى اوضته وهويها وخدى مفرش من عندك
افرشيه
وكده
ابو جنة: عينى حاضر
يونس: ليه بس يعنى التعب ده ياعم ابو عبدالرحمن ،هتتعبهم ليه( بصوت متهالك)
ابو جنة: م قولت اسكت انت
خد ياعبده ( اداله فلوس ووشوشه )
جاب عبدالرحمن حجات طبختها جنه،كانت مامتها ظبطت اوضته فوق عالاخر
طلع وطلعت جنه مع باباها شايلين الاكل ،نزلت جنه وفضل باباه معاه
ياكله
وبعدها فكره بالدوا
وسابه ونزل ،بس خلاه يسيب تليفونه مفتوح يتطمنوا عليه
من عند جنة
عشان هما مش حمل طلوع ونزول عالسلم !
يومين يعتنوا بيه،يطلعوا اكل ويشوفوا مواعيد الدوا
ويهوى الاوضة
كل ده وجنة خلف الستار ، بتجهز كل حاجه وبتديهم موبايلها يكلموه
لكن هى مش فالصورة !
انما قلبها كان بدا يتاخد ويدق ، اما عن يونس فهو دق وغرق وحب وطب خلاص
رقمها معاه لكن للامانه وعشان هما استأمنوه مكلمهاش ابدا!
دى ثقه باباها حطها فيه ولازم يكون قدها
ده غير انه اتصلح كتير عن الاول
المهم
اتحسن يونس ونزل من تانى شغله .. فرحوا بوجوده تانى
وقبلوا اعذار ظروفه فغيابه
بس كانوا حابين انه يقولهم ،يونس بسرعة شكل قاعدة عريضة فالمشغل
ان اى حد يتعامل معاه يحبه ويحترمه
متعاون وطيب،ضحكته مش بتفارقه
مش بيتطلب منه اى طلب ويقول لا
فغيابه اثر كتير ،زائد طبعا فمشغل البنات
كان محط انظار ،وكان حديث السنتهم معظم الوقت
وكانت بتسمع جنة وكأنها مش معاهم اصلا ..
زميلة جنة١: هو يونس ده متجوز ولا لا ،محدش عارف يابنات؟
زميلة ٢: لا شكله كده بيقول لا
زميلة٣: ياسلام فكيكة اوى ماهو مش لابس دبله يافالحه
زميلة ٤: اصلا هو جيران جنة ،لو متجوز كانت قالت
صح ياجنة؟
جنة عاملة نفسها مش سامعه ومركزة فشغلها
زميلة١: ماتردى يابت ياجنة ،متجوز ولا لا
جنة: هيفيد ايه يعنى ،ماتخليكم فشغلكم بقى
لحسن تعدى ست فوزية وتخصم منكم بسبب الرغى
زميلة٣: ياختى بنسلى روحنا مكفيين اليوم كله عالمكن اما ضهرنا اتقطم
زميلة١: م تخلصى وتقولى متجوز ولا لا
جنة: لا واسكتوا بقى
زميلة٢: هيييح عسل عسل شبه وائل جسار يابنات
زميلة: لا ولما بيشيل ويطلع عالعربيه معاهم
ويشمر كده يالاااهوى بيبقى جون سينا اوى فنفسه
زميلة ٣: وعليه ضحكة يخربيته ، شوفتى الصبح لما الست فوزيه
قالتله المشغل كان مضلم
لحد م جيت قالها ابقوا ادونى حق انى منور المكان بقى هههههه
مكان اللمباات
زميلة٤: يابختك يابت ياجنة بتشوفيه فالروحه والجايه
جنة: انا مش فاهمة انتو مالكم ،اتقوا الله وبطلوا بصبصة
زميله: يعنى هو احنا قولنا ايه ، ده حتى المشغل بقى حلو من ساعة م جه
الست فوزيه : هااااه بطلوا رغى
واخلصوا عشان نسلم الى اشتغلتوه انهاردة ،ورونى خلصتوا ايه
زميلة : ابلة فوزيه ! هو احنا هنسلم لمين
فوزيه( بتبص فشغلهم) ليونس طبعا
زميلة ٢: خلينى انا النبي الى اسلمه
زميلة ٣: ياسلام وايشمعنا انتى،انا مخلصة كل حاجه ياابلة فوزيه
زميلة: انا ياابله فوزية لهلوبه اسلمه الشغل هوا
فوزية: ياسلام ! مالكم مساريع تسلموا الشغل يعنى
م زمان لاياابله بنتأخر
خلى فلانه
خلى علانه
دلوقتى كلكم عاوزين تسلموا الشغل
لاحظت ان جنة ساكته وبتشتغل فسكوت
فوزية: طب ايه رأيكم جنه هى الى هتسلمه
صويت يضحك من وراها وهى بتضحك
زميلة: ليه بس النكد ده
فوزية: جنة هادية وبتشتغل وساكته،وكمان هى جيرانه
يبقى ياخدها فالسكة
مشيت وسابت جنة فريسة فايدهم يضربوها بحقد يضحك
وهى بتضحك وعاوزة تخلص منهم مش عارفه !
جه ميعاد التسليم ، مشيوا بنات المشغل
ومفضلش غير جنه
والعامل الى هيقفل المشغل
ويونس الى هياخد البضاعه يوصلها وبعدين يروح !
جنة بتسلمه وبتكتب وهو معاها مركز
اما هى فمؤكزة فشغلها اوى ،او بتهرب من نظراته على اد م تقدر
حب يلفتها له
يعمل ايه
عمل نفسه ان جاتله كرشة نفس ،قال يعنى انتكاس بعد التعب!
يونس( ماسك صدره ) اه ...ايه ده فيه ايه
العامل: مالك يايونس
يونس: مش عارف مالى مش عارف اخد نفسي
جنة اتخضت وسابت الورق
العامل : استنى اجبلك كوبايه ميه
جنة بصاله وهو بيمثل ببراعه ومستمر
جنة: مالك ! فيه ايه
يونس: مش عارف مش قادر اخد نفسي
جنة: طب ايه نشوفلك دوا ولا ايه
طب اقعد عالكرسى
جنة كانت متوترة وهو عامل تعبان ،وهو كان فرحان اوى
جه العامل جابله ميه،شرب يونس
العامل: لسه برضو؟ اشوفلك حاجه فالصيدليه ؟
يونس: اه مش قادر ااه
جنة: شوف اى حاجه طيب فالصيدليه قولهم لكرشة النفس
جرى العامل وفضلت واقفه جنة فحيرة مش عارفه تعمل ايه
انتهز يونس فرصه ان العامل مشى ،وعمل نفسه اغمى عليه عالكرسى
ودى اتخضت الخضة الكبيرة
جنة: ايه ده يالاهوى هو سكت ليه؟ يونس
يا يونس
( بتهزه على استحياء) يونس...يونس
يونس مسك ايدها وبصلها ،هى سحبت ايدها بسرعه
يونس: قلب يونس
وعقل يونس
وروح يونس
جنة: ايه ده انت بتستهبل! ( اتكسفت منه لما مسك أيدها زائد
كلامه )
يونس: اه بستهبل،عشان اقولك انى بحبك
وتعبت
مش عارف اجيلك بانهى طريقة
جنة( بلخبطه) ايه الى بتقوله ده،ايه ده
دى اسمها قلة ادب
يونس: وهو الحب قلة ادب ياجنة؟
جنة: بس ...بس كده مينفعش
هو الحب عندك مسكة ايد وكلام قليل ادب كده
يونس قام وقرب لها وهى تبعد وباصص لها بحب وعنيه
بتلمع
يونس: من ساعة م عرفتك ،لا
من ساعة م صادفتك وشوفتك
وانتى عاملالى كده اهو
( شقلب ايده)
مشقلبالى حالى ياجنة
تاعبانى ياجنة
قلبتى كيانى ياجنة
نسيت نفسى فدنيتك وبقيت عندك
لو الكل الرفض الى انتى رفضهولى ده عشان انا كنت حرامى
فاحب اعترفلك ان محدش احسن من حد
انتى كمان حراميه..
جنة( بذهول) انت بتتهمنى بانى حراميه!!
يونس: ايوة حراميه ..سرقتى روحى
وعلى فكرة انا كمان ردتهالك بعد م توبت
سرقت منك تفاصيلك ..وبقيت شبهك فكل حاجه !
جنة هتتوه مع كلامه وفوقت نفسها
جنة: انا اعرف الى كلامه بيبقى جد ، بيمشى فكل اموره جد
مش بيقعد يمثل ويغمى عليه ويقول كلام اسطوانات
يونس: تمام ! عاوزانا نمشى جد
جنة: والله مبحبش لعب العيال،ولا اى حاجه تغضب ربنا
انا مش من البنات دى
يونس: اوك انا سالتك سؤال
عاوزانا نمشى جد؟
جنة ساكته ومبحلقه
يونس: انا هموت وامشى جد،بس كنت خايف رد فعلك
بس خلاص انتى اديتينى سكه
رجع العامل ياعينى جايبله برشامه ياخدها ،طبطب ع كتفه يونس وهو
بيضحك وكمل استلام الحاجات منها
ومشيت وهو راح يوصل شغله ...
_______
ماليكا بصاله بسرحان ومعقبتش ب اى كلمة زى كل مرة
يونس: ساكتة يعنى!
ماليكا: مش عارفه ،بحس انى جوه حكايتك
وانى عايشاها
وانى بحس احساسيس جنة دى وكانها لاول مرة
يونس: يعنى صدقتينى
ماليكا: صدقتك ف ايه
يونس: ان روحك من روحى ..!
ماليكا معرفتش ترد،كفايه رعشه اوصالها لما بيقولها كلمة يعنيها
كده ويكون قاصدها
ماليكا: خلصت اكل ( بتشيل)
يونس: خلصت من زمااااان ، لو بس حبة شاى
ماليكا: لا ويلا على بيتك
يونس: ايه ده قبل م تحدث اى رزيله مابينا ؟
( بيضحك) ده عيبه فحقى حتى
ماليكا بتزوقه تخرجه بهزار
ماليكا: يا يا مولانا العاشق،انت مش تايب
يونس: ايوة تايب ( وقف قدام بابها) بس عمرى م توبت عن جنتى
ماليكا: بس انا ماليكا مش جنة
يونس: انتى ملايكة الجنة ♥
ركزت فعيونه الى قالتها قبل شفايفه ،قالتله بايدها سلام لانها
مكانتش عارفه تنطق
وقفلت الباب ،
#بقلمى_لنورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
منة : بتعمل ايه ؟
عمر ( فاتج الجهاز ومركز) بظبط شوية حجات كده عشان ماليكا
منة: مالها ماليكا تانى ( بقلق)
عمر: على فكرة مطلعتش هى الى قتلت حماها ،دى مراته
حماتها
منة ( مندهشه) لا بجد ! عرفتوا ازاى
عمر: من مليون حاجه هقولك ،خلاص جلسة حماتها اتحددت
وان شاء الله هيثبت ان هى الجانى
ونعمل قضية رد اعتبار لماليكا عشان تاخد بنتها
منة ( مبتسمه) طب ده خبر كويس
عمر ساب الجهاز وبص لمنة
عمر: بجد فرحتى؟
منة: طب والله فرحتلها ،حرام يعنى تتظلم ومتاخدش بنتها
حماتها الزباله دى لبستها كل حاجه وخلعت
عمر: انا مبسوط ان سيرتها مبقتش تضايقك
منة: بصراحه ؟
عمر: بصراحه
منة: بتضايق شوية ، لكن بدات احس انها مبقتش تانى زى
م كانت بالنسبة لك
وان الى بينكم مجرد الى اتفرض عليكم وبس
عمر: منة ...كنت عاوز اقولك من زمان
ان ماليكا
بحب كل حاجه كانت معاها ،ذكرياتنا وكلامنا وكل حاجه
عيشناها سوا
لكن بطلت افضل احبها
الاول كان غصب عنى لازم اعمل كده
دلوقتى فوقت على انى بطلت احبها ،انا بس بحب ذكرياتها
وايامها
منة ( مبتسمه) وان شاء الله قريب ،هيبقى عندك
ايام وذكريات مع حد تانى عمرك ماهتفترق عنه
عمر( مبتسم) يارب ،انا مُتفائل
#بقلمى_نورإسماعيل
.•'´¯'•.¸¸.¸.• .¸.•'´¯'•.¸¸.¸.•'´ .•'´¯'•.¸¸.¸.• .¸.•'´¯'•.¸¸.¸.•'´
بعد فترة ...
قاعة المحكمة مزحومه ، قضية الموسم
الى اتحكم فيها واتنفذ الحكم ،ورجعوا فتحوها تانى بدلايل جديدة
وجانى جديد خالص!!
دينا واقفه بروبها تجلجل فالمحكمة ،عمر حاضر ومعاه منة حبت تيجى
وتتعلم وتكون مع عمر مفيش مانع ????
وماليكا ،الى اتحايلت على يونس ييجى وهو طبعا مقدرش
وقالها عندى اسبابي انى مطلعش من الشقه.
وعصام وبنته للاسف ،ومش بس دول
مامت ماليكا ومعاوية
الى حبت دينا تثبتلهم انهم اخطأوا فحق بنتهم ،وجم بناء على دعوتها
واقفه شفيقه فالقفص مذلولة ،دلوقتى بدات تحس بالى عملته فماليكا
والظلم الى ظلمته ليها
دينا: سيدى القاضى ، قضيتنا قضية فريدة من نوعها
قضية اتقفلت واتحكم فيها وتتفتح بعد سنين لنجد الجانى الحقيقي
الست شفيقه !
الست شفيقه الى قتلت زوجها وتركت زوجة ابنها تدفع التمن لمجرد انها بتتعاطى
المهدئات!
قدام حضرتك يا ريس ، ادلة الطب الشرعى الى بيقول
ان فالتحاليل اثبت
ان الضرب فجمجمة عبدالصبور المجنى عليه ،كان على جزأين متفرقين
مقدمه الرأس والمؤخرة
وان صربة المقدمه مش زى الضربات المتواليه للمؤخرة
وموكلتى هنا قالت انها ضربته صربة بنشابة العجين !
وجريت
واثبت التحاليل ان الضربة التانبة كانت بشئ حديدى او نحاسى لقوته
ازاى تضربة فمنطقتين باداتين يعنى!
ايه بتتمتع بقوة خارقه مثلا ؟
وبعد الاطلاع على شهادة الشهود
الست ام اميرة الى بتيجى تنضف البيت كل شهر
شهدت بان المجنى عليه كان بصباص وعينه زايغه،وانها كانت بتخاف بناتها تيجى تساعدها
ولما جت مرة بنتها لان ام اميرة كانت تعبانه وكانوا بيت ام عصام محتاجينها ضرورى
حصل تحرش بالكلام من قبل المجنى عليه وان البنت اتفزعت
وحصلت مشادة وخناقه بينه وبين زوجته وانها هددته بالقتل لو مبطلش قلة ادب !
ولما جت ام اميرة بعد حدوث الحادثه للبيت عادى تنضف زى ماهى متعودة
ملاقتش ايد الهون النحااااسى ولا الهون ،ولما سالت ام عصام قالتلها انها متعرفش فينه
وانها جابت واحد خشبي جديد
مع العلم ان ام عصام بتقدس مقتنياتها جدا لانها قديمة وذات قيمه!
يبقى راح فين ايد الهوون بين يوم وليله !
اول امبارح ياريس تم تفتيش المنزل وماحوله ووجدنا ايد الهون مربوط بكيس ومدفون
فمدخل البيت !
عصام اتوتر وبيبص لامه بحسرة
دينا: ام عن الشاهدة ، تغريد جارتهم الى كان عندها سبوع ابنها يوم الحادث
قالت ان ام عصام قعدت ٣ دقايق على بعض ومشين
مع ان فالمحاضر القديمة الى اثبت فيها ان موكلتى الجانيه
قالت انها فضلت هناك لحد ساعة متاخرة ورجعت لاقته ميت!
رئيس المحكمة: مثبوت يااستاذة دينا ان مفيش بصمات عالاداه " ايد الهون"
دينا: حصل ياريس ، عشان الست ام عصام مشهورة بالتزامها
فاللبس بس
وبتلبس جونتى وهى خارجة طول الوقت
وده معروف عنها
يعنى رجعت من برة ،لاقت جوزها بيعاكس ماليكا كالعادة
وماليكا ضربته ووقع
وهربت ماليكا من الخوف ،وهى لان محدش شافها
دخلت وكملت ضرب بالى جه قدامها لان ده مخزون غضب منه
ومنها
فضربت عصفورين بحجر ...وخلصت من الاتنين على طبق من دهب!
ام عصام: انا مقتلتوش هو كان ميت ميت هو كان ميت ميت
رئيس المحكمة: اسكتى عشان مدخلكيش الحجز
دينا: اعتقد ياريس بعد شهادة الشهود ،والادله الى قدام حضرتك
والدوافع الى دفعت الجانى السيدة شفيقه للقتل والخلاص من جوزها
ارجو من المحكمة توقيع عليها اقصى عقوبة
رئيس المحكمة بص قدامه واتشاور مع الى المستشارين
عصام حاسس انه تعبان وانه مش هنا ومش قادر يصدق،وده الى خلاه
ميقومش ليها محامى عسان متاكد ان فى حاجه غلط وانها قضية فشنك
رئيس المحكمة هينطق بالحكم
القاضى: النطق بالحكم فجلسة ١٠ الشهر القادم ( ضرب بالمطرقه) رفعت الجلسة !
غازي جابر البشير زايد
د. نهى فؤاد محمد رشاد
احمد محمد عبد الوهاب كريدي
د. زينب عبد السلام محمد أبو الفضل 
زين دومه عبد العاطي الابوز
عبير عبد الرحيم عبد الحميد السيد
مي رضا أحمد عثمان
منى أحمد محمد إبراهيم
د.خليل السيد خليل محمد
محمد عبد المنعم ابراهيم محمد
د. نهله عبد الحكم احمد عبد الباقي 
د. عبد الوهاب المتولي بدر 
زينب حمدي 
حنان صلاح الدين محمد أبو العنين 
د. محمد عبد الوهاب المتولي بدر 
ياسر محمود سلمي 
د. شيماء أحمد عمارة 
م. اشرف عبد الصبور الكرم 
1
-1
