الفصل السابع 

                 «باب الورد »

_يابنات! ..حد ييجى يساعدنى بسرعة 

كان صوت اميرة عالياً حينما سقطت نشوان امامها وفقدت الوعى ، نادت مرة واثنين حتى خرجوا جميعاً إليها ليروا فتاة مجهولة مطروحه أرضاً واميرة لاتستطيع جذبها للداخل..

_يلا كلنا مع بعض عشان هدومها متتقطعش اتنين يشيلوا من فوق واتنين من تحت 

كانت هذه كلمات نورهان للبقية ف استجابوا لما قالت وحملوها إلى غرفه فارغه ومغلقه واراحوها الى الفراش ، حملت روان بعض العطر الخاص بها واخذت تقطر منه امام انف نشوان وهدير تطرقها على جبهتها قائله

_مين دى يا اميرة ،وايه الشوال الل لابساه دا 

نورهان نظرت بازدراء الى هدير وقالت لها 

_دا اسمه ادناء بيلبسوه الملتزمات مش شوال 

نظرت هدير ناحية نورهان وقالت ممتعضه

_ومالك بتدافعى اوى عنها كانت بنت عمتك ؟! 

_يابنات فيه ايه ؟ هو احنا صغيرين ...عاوزين نفوقها ونشوف حكايتها ايه ؟ 

اردفت روان رداً على اميرة وهى تنظر ناحية نشوان بشفقه 

_ايوة فعلا ،شكلها مجهد اوى 

بدأت نشوان تستعيد نفسها ووعيها شيئاً ف شيئاً حتى فاقت فنهضت معتدلة تردف

_انتو ...انتو صحاب السكن ! 

اخذت نشوان تنظر إلى نفسها وملابسها وشعرها بعدها قاموا بفك وشاحها من على رأسها حتى تتنفس وقالت وهى تحاول ان تختبئ داخل وشاحها مرة اخرى 

_انا اسفه على الازعاج ...انا 

قاطعتها اميرة وقالت بهدوئها المعتاد 

_اهدى خالص ،مفيش ازعاج ولا حاجه اشربي ميه وارتاحى وبعدها نعرف حكايتك ايه 

نظرت نشوان ناحية اميرة ب امتنان ، من تلك العطوف فى دنيا مليئه بالقسوة من كل جانب ! بل انها اغدقت عليها ببعض الكلمات التى بمثابه هدهدة بسيطه الى قلبها قامت ب اراحتها قليلاً ، خرج الباقون الى غرفهم تتحدث هدير الى روان خِلسه 

_اميرة دى عبيطة اوى ،وتيجى عندى وتقول انا بنقى الل بيدخل بيتى 

_بتتكلمى على ايه ؟

_على البنت الغريبة دى مش يمكن حرامية ! اميرة صدقتها وقالت لها اهدى وبتاع بينضحك عليها والله

عضت روان على شفتها السفلى وقالت

_تفتكرى؟! 

_ايوة طبعا،دلوقت فيه ميت حيله وحيله عشان حد يدخل بيت حد ويآمنه ويسرقه 

_معتقدش ياهدير ، شكل البنت طيب ولبسها كويس وملتزم زى م قالت نورهان 

التوت شفتى هدير وقالت بسخرية

_ممم اه دا انتو شكلكم بينضحك عليكم باين ! 

تركت هدير روان وولجت الى غرفتها واغلقت الباب ومن ثم ولجت الاخرى الى غرفتها واغلقت الباب وانتهى امر هذه الليلة .

_____

_انا شايف ان الل اخترع الحضن دا كان اخرس وكان عاوز يقول كل حاجه مرة واحدة !

تعجب زين من كلمات عيسي بعدما دلف الى المنزل بعد يوم عمل طويل ، ف اردف إليه

_ليه بقا؟

اقترب عيسي ناحية زين وهو يقول بنبرة مرحه

_عشان انا دلوقت عاوز احضنك جدا وفرحان اوى اوى

قام زين بخلع ساعته الثمينه ووضعها على المنضدة ورابطه عنقه وقام بتعليقها بالخزانه والجاكيت واردف مبتسماً

_ايه الانبساط دا كله ، استنى اخمن فيه شغل جديد 

رقص عيسي فى مكانه وصنع بعض الحركات هكذا بفرح مداعبا زين وقال

_ايوووة ومش اى شغل ، مجموعة شركات اضخم من شركات عمك كلمونى اعمل لهم اعلان بعد م شافوا الاعلان بتاعكم ...انا مش مصدق نفسي ياليمبي 

مش مصدق نفسي يا ليمبي 

اقبل زين ناحية عيسي وهو على ابتسامته وقال له 

_الف مبروك ياعيسوى ،انت مجتهد وشاطر جدا وتستاهل وعلى فكرة بقا انا كمان اترقيت ف الشركة المتواضعه الل انا بشتغل فيها 

لكز عيسي بيده صدر زين وهو يضحك وقام ب احتضانه قائلا

_مبروووك يابوالزنازييين ، واضح ان وشنا حلو على بعض انا وانت ولهذا الامريافتى لابد وان نحتفل 

اجابه زين بجدية واردف

_هنحتفل ازاى ؟ اوعا تقول هتجيبلى بيتزا وتقول دا احتفال اصل انا عارفك 

ضحك عيسي بشدة واردف الى زين

_ياخى ميبقاش قلبك اسود كدا ، بص احنا دلوقت نتغدى ونريح ساعه وبليل حسهرك سهرة عالبيكو ...اشطا

_اشطا ...عليا انا الغدا انهاردة مش كدا 

التوت شفتى عيسي واردف بسخرية مضحكه

_اه انت الل عليك تحرق الاكل مش تعمل الاكل 

ابتسم زين وقال 

_ايه ياعيسوى متبقاش قفوش مانا بحاول اهو ،عاوز اقولك انا مكنتش عمرى بعمل حاجه غير انى اشتغل 

_ايه يا زنازين الحلاوة دى بقينا نهزر اهو الله يرحم سد الحنك تلت ايام اكلمك ترد بحرف

_من عاشر القوم 

_ودول مش40يوم بس

تنهد زين ودلف الى المطبخ وهو يقوم بتحضير الاشياء لصنع الطعام وقال

_بس عارف ياعيسي ، فيه ناس بتعرف تطلع الحلو الل فيك ..وناس بتجبرك تفضل عايش كدا زى م انت لحد م تموت 

_مش ملاحظ حاجه يا زين ؟

_ايه 

_ان لحد دلوقت انا معرفتش ، انت كنت ايه قبل م تيجى هنا غير انك كنت ماسك شركات عمك وسيبتهم ليه اصلا 

اختلجت عضلة فك زين وتشنجت نبرته وهو يلتفت ناحية عيسى محاولا ان يكون مبتسماً 

_تاكل ناجتس ولا بانية ؟

زمت عيسي شفتيه ردا على زين الذى يراوغه واردف ساخرا

_العب باليه يا زين ..العب باليييه 

#نور_إسماعيل

_____

_نشوان عبدالقادر، ودى بطاقتى ...انا من المنصورة وعايشه مع عمتى وجوزها وبنتى بعد م جوزى اتوفى

احنا من الاول كنا اصلا عايشين وياهم ، وهما الل ربونى بعد م والدى ووالدتى اتوفوا ورا بعض ..امى ماتت بالمرض الوحش وابويا مات بعدها حزن عليها 

عندى ماريا هى كل دنيتى وهى الل فضلالى من مجدى الله يرحمه ،نزلت هنا ادور على شغل وفعلا قدمت وروحت اتابع لاقيت اسمى من المقبولين جيت عشان اعرف هستلم امتى طلع ان فيه سوء تفاهم بينى وبين واحدة تانيه وانى متقبلتش ..مشيت فالشارع كانت ضاقت فعينى اوى مفيش شغل لاقياه فبلدنا ولما نزلت مصر لاقيته صعب برضو ويوم م لاقيت طلع سوء تفاهم ،كنت ماشية اكلم نفسى خبطنى واحد معرفش طلعلى منين .

كنت ماسكة 200جنيه كل الل كانوا معايا طارو منى لما خبطنى والهوا طيرهم بعيد ، اعتذرلى ومشى وقعدت فالشارع من الصبح لحد بليل معرفش هعمل ايه واروح فين ومكنتش حطيت لقمه فبوقى ولا شربت شوية ميه ...شافنى سواق تاكس قاللى ع مكانك ،يدوب ركبت معاه مفيش شارعين وجابنى هنا واول م شوفتك وشوفت البيت قلبى اتطمن وكأن عقلى كان ماسك نفسه بره لاقع واتفضح برة وسط الخلق فوقعت فبيتك !

نظرت اميرة نحو نشوان بشفقه وهمت تمسح دمعه مترقرقه من احدى مقلتيها واردفت 

_متقلقيش يا نشوان ، ربنا مش هيسيبك ..انا لولا ان المحل الورد بتاعى مش محتاج حد غيرى كنت شغلتك فيه

ابتسمت نشوان وقالت

_ربنا يزيدك ،هو المحل الل اول الشارع صح

_اه اسمه باب الورد ...

_اسمه جميل زى حضرتك بالظبط

_ربنا يخليكِ ، بصى بقا انا عاوزة تبقى واثقه فربنا انه مش هيخذلك طالما بتدورى على الحلال ليكِ ولبنتك

_ونعم بالله يا مدام اميرة ، انا هسيبلك بطاقتى هنا ولو عاوزة تمضينى على اى حاجه همضى عشان تمضنى انى راجعه بس قوليلى كام حسابك على بيات الليلة دى وكمان انا ...

_انتِ ايه

_انا عاوزة اى مبلغ اروح بيه وان شاء الله هرجعلك واديكِ فلوسك كلها ،دى امانه ودين عندى لحد م اردهملك 

ابتسمت اميرة بحنو وربتت على يد نشوان وقالت 

_انا مش هاخد بطاقتك ،ومش هكتبك وصل ولا اى حاجة ...واتفضلى

همت اميرة ب احضار مبلغ مالى من حقيبتها واعطته الى نشوان واكملت لها 

_عشان تروحى لبنتك وتطمني اهلك عليكِ ،وانا اصلا مش عاوزة فلوس بياتك هنا ولا المبلغ دا 

اختنقت نشوان ،احست ان اميرة تعطيها صدقه بطريقه مخفيه وشيك فقامت بمد المبلغ الى اميرة وقالت

_معلش يا مدام اميرة ، انا مباخدش صدقات ..انا ممكن اطلع اشوف شوغلانه ف اى محل امسح ولا اكنس لمدة كام يوم وادفعلك حسابك واروح ،انا بس مش عاوزة اتاخر على بنتى اكتر من كدا

تعجبت أميرة منها وعقدت حاجبيها وقالت 

_ليه يابنتى حسبتيها كدا ،انا مش بتصدق عليكِ 

_يبقى تقوليلى كام حسابك عشان اجبهملك وهمضى على ورقه تضمنلك حقك يا كدا يابعد اذنك ،انا هعرف من الانسات الل عايشين هنا وهمشى سايبالك برضو بطاقتى ومش هاخد المبلغ دا وهتصرف برة 

عقدت اميرة ذراعيها امام صدرها وقالت

_واضح ان دماغك ناشفه يا نشوان

_جدا يا مدام اميرة ،والحق حق ..عاوزة الورقه الل همضى عليها 

______

فشلت هى ان تقطن وطناً غيره ،ان ترحل عنه ..بل وضللت كُل السبل الا طريقها إليه.

ولكن لحظة! هى الآن أمام فارسها فى مكان لطيف بمفردهما بين جمع لابأس به من الثنائيات،ف عليها ان تنسى هذا الماضى وتنتبه لمَ هى عليه الآن.

_تشربي ايه ؟

كانت جملة فارس الى نورهان ودوده وتحمل الكثير من معانى الذوق بعدما فتح لها المقعد وجلست امامه ف اجابته هى

_ممكن عصير ليمون بالنعناع 

_تمام ..اتنين ليمون بالنعاع من فضلك 

بعدما طلب فارس المشروب لهما ، تنحنح واردف بعدما عقد اصابعه امامه على المنضدة 

_مش عاوز اطول عليكِ زمانك بتقولى ايه الموضوع طبعا 

ابتسمت نورهان وارجعت خصلة شعرها المنسابة الى خلف أذنها وقالت 

_لا مفيش مشكلة يادكتور 

_اخبار الرسالة ايه 

_اهو كنت سيبتها فترة ،بس اليومين دول رجعت اشتغل فيها تانى 

_وبتسيبيها ليه ،عاوزين تناقشيها بسرعه بقا عشان تاخدى اللقب وتقعدى جمبنا 

ضحكت مجاملة له كمجراه للوقت والوضع ف اردف هو 

_اخبار النجمة بتاعتكم ايه 

_انت تعرف اخبارها عنى ،مش انت متابعها 

_طبعا مش بفوت لها اى فيديو 

ابتسمت نورهان ابتسامه جانبية ف اردف فارس لها وهى يحملق بشفتيها 

_تعرفى انكم مش شبه بعض اوى رغم انكم توأم

لاحظت نورهان انه ينظر الى شفتيها فتلعثمت وبللتهم وقالت 

_ازاى احنا شبه بعض جدا ،بس غيرت لون شعرها وبشرتها والحجات الل حطاها دى والميكاب

اخذ فارس يمشط وجه نورهان بنظراته ويتحدث بصوت هادئ

_بالعكس انا بشوف كل واحدة منكم ليها اختلاف وليها طعم شبهها لوحدها ومش شبه التانية فملامحها 

شعرت نورهان بالخجل من طريقة تفحصه وجهها وهو يمشط عيناها ووجنتيها وشفتيها واهدابها فقالت مقاطعة له

_هو ايه الموضوع الل كنت عاوزنى فيه يا دكتور؟

تذكر فارس ف عاد ال صوابه واراح ظهره إلى المقعد واردف 

_ايوة فعلا شكلى كنت برغى كتير

_لاء مقصدش ، بس كنت عاوزة اعرف الموضوع لأنه شاغلنى من وقتها 

تنحنح فارس واردف قائلا

_الموضوع ياستى ان فيه عريس متقدملك وعاوز يعرف رأيك فيه قبل م ييجى البيت ويقابل والدتك 

دق قلب نورهان فرحاً ،هل يتحدث عن نفسه ؟هل هذه مقدمه حتى يفاتحها فى امر زواجهما وانه هو العريس المنتظر! 

قطع شرودها هو بقوله

_مردتيش عليا

_مش لما اعرف مين العريس 

_طيب ياستى عشان مطولش عليكِ ،العريس الل عاوز يتقدملك وحابب جدا يعرف رأيك فيه 

قبل م يعمل خطوة رسمى...هو انا يانور !

فى هذه اللحظة خرجت من رحم قلبها الابتسامة فشقت على وجها الابتسامه العفوية عن دون قصد او تحكم بها ،وحاولت تمالك نفسها ف امال فارس بجذعه إلى الامام واردف 

_ايه يانورهان ؟ 

امسكت نورهان بكوب الماء وشربت منه القليل وقالت 

_دكتور فارس ،سيبنى افكر واصلى استخارة وارد عليك 

_انا آسف انى اقتحمتك مرة واحدة كدا من غير سابق انذار ...بس الشئ الل خلانى اعمل كدا هو ان سمعت ان دكتور عمر كان فاتح حد من الزملاء أنه ييجى يتقدملك وبصراحه انا معجب بيكِ من زمان ومينفعش افضل ساكت اكتر من كدا

فقررت انى اسبق بطلبي عشان كدا جه مرة واحدة

لاحظ فارس صمت نورهان وفرح عينيها ،ف اكمل 

_هسيبك تفكرى بس تردى عليا ف اقرب وقت ..ولو جوابك بالايجاب يبقى ربنا اراد انى اكون اسعد راجل فالدنيا ..

#نور_إسماعيل

_______

"بتعدى فحته انا قلبي بيتكسر ميت حته افضل فمكانى ان شاءالله لسته الصبح بفكر فيك "

اصوات متعالية من المكان الذى ترجلا إليه عيسي وزين يحتفلا فيه بما وصلا اليه من جديد فحياتهم ،ولجا وجلسا الى اقرب منضدة وطلبا مشروبهما ومن ثم انتظر عيسي اثنين من اصدقاءه فانضموا إليهما.

_تعرف ياعيسوى رغم ان كنت فمستوى اجتماعى كويس بس مشوفتش الاماكن دى ولا كنت بسهر ولا اى حاجه

_يا زيين يا زين ياحبيبى انت مولود وكل الاوبشنز بتاعتك بايظة م عدا زرار الشغل ،شكلك كنت هتتولد حاسب آلي وبعدين ربنا نفخ فصورتك 

ضحك الجميع ف اردف احد اصدقاء عيسي

_واد ياعيسوى ،بما انك هتعدى خط الفقر لازم تعزمنا كل يوم فالاماكن الكلاس دى ياض

وضع عيسي احد قطع _الكاجو_فى فمه واردف الى صديقه ب ازدراء

_اعزمكم كل يوم ليه شايفينى ابن نجيب ساويرس ،دى تفاريح كدا كل م استلم شغل جديد ياعرة منك ليه 

دنى الآخر من اذن عيسي واردف إليه هامساً

_بس صاحبك دا نضيف اوى ،من امتى الصحاب النضيفه دى تعرفها 

_من عند بتوع المنظفات ياخفيف وخليك فكوزك لما نعوزك بلاش تحشر مناخيرك فحياتى عشان مش عارف اعدى ..اتفرج عالرقص والاغانى اتفرج 

_المزز والبنات هنا ايييه ،سحالى لوووز 

طرق عيسي صديقه على خلف رقبته بخفه مضحكه وقال

_متبصش لحد عشان دول معاهم بودى جاردات ييجوا يسففونا تراب الجزم هنا 

*فقرة الكاريوكى*

_عيسي هقوم اغنى 

_قوم ياعندليب انت بتاخد اذنى ،هو انا امك يابنى 

_ايه بيعرف يغنى 

قالها زين ف اردف اليه عيسى

_يعنى على اده كلابي كدا 

نهض صديق عيسي وذهب ناحية المسرح وامسك مكبر الصوت_الميكرفون_وبدء بغناء احدى الاغنيات الشهيرة وبدء الجمع ينتبه معه ،منهم من ضحك على بشاعه صوته ومنهم من شاركه وردد معه حتى قام عيسي بمناداته من بعيد 

_ولاااا...ولاااا انزل فضحتنا ، دى معزة بتولد مش واحد بيغنى

ضحك الجميع بشدة ،حتى انتبه عليه من بعيد صالح الذى كان يجلس على مقربة من عيسي مع اصدقاءه ،نهض صالح وترجل ناحية عيسي ووقف امامه 

_عيسي العشماوى صح ؟

نظر عيسي ناحية صالح ونظر الى زين ثانيه وقال بطريقة مداعبة كعهده

_ايه دا بقيت مشهور من اعلانين عشان تعرفوا ،ايوة انا 

_مش فاكرنى 

حملق عيسي ب وجه صالح واردف

_مممم الطول دا مش غريب عليا ، ولا السمار والشنب يعنى بحاول اجمع 

_جمع كدا ، معهد السينما ...محاضرات المسرح كنت بحضرها معاكم والواد ايوب زميلك والشوش

عقد عيسي حاجبيه واردف

_اه اه افتكرت ،الواد الصايع بتاع هندسة الل كان متجوز وبييجى يعلق بنات عندنا 

_ايوووة 

صافحا الاثنين بعضهما البعض بحفاوة واردف عيسي

_اسمك

_صالح ياض ايه ذاكرة سمك ،دانا عرفتك من صوتك وانت بتكلم صاحبك

_لا وانت الصادق تلاقيك عرفتنى من الوحمه عشان دى الباركود بتاعى 

ضحكا الاثنين ف انضم صالح اليهم على المنضدة 

_اعرفكم ياجماعة ،البشمهندس صالح ..احسن واحد يعلق بنات ويحكى قصص وهو متجوز ومخلف وايامه طين وكان ييجى المعهد عندنا يشقط بناتنا ويمشى 

_يابنى فاضل مقاس جزمتى تقوله وعامل نفسك مش فاكرنى 

_لاء افتكرتك دانت كان عليك مزز تعقد وسايبنا ننش ، اعرفك فؤاد صاحبي من ايام المعهد معرف اتقابلتوا ولا لاء ..زين صديقى برضو جديد فالصداقه بس واد مجدع 

_اهلا وسهلا 

_هاه عامل ايه فحياتك وولادك اد ايه دلوقت ؟

امسك صالح كوب العصير الذى وضع امام عيسي حديثاً وشرب منه وقال 

_لا مفيش غير ولد واحد ومع امه ،انا طلقت من زمااان 

كان ينظر زين ناحيته بصمت كعادته ،بينما يتابع عيسي معه الحديث

_طلقت! كان باين عليك والله ابن طلاق ومش هتعمر ..ودا بمحكمه ولا خلعتك

ضحك صالح واردف

_لا ودى كدا بالحب قولتلها انا قرفت قالتلى ومين سمعك وخلاص 

عبس وجه زين فنظر عيسي ناحيته واردف

_عارف يا زين ، الاستاذ اتجوز وهو فالجامعه مكنش طايق نفسه 

_والله الجواز بدرى دا حاجه ممله اوى عامل زى الل بيتعشى بدرى ،بيبقى عاوز ياكل تانى وتالت وفالسهرة ف من هنا العك بيحصل بقا ،ولا انت رأيك ايه يا استاذ زين ؟

انتبه زين من شروده واردف

_اه مظبوط

_انت متجوز يا استاذ زين ؟

_انا !! لاء 

_اصل لما وافقتنى الرأى قولت اكيد عملت مصيبتى وحاسس بيا 

ابتسم زين واردف بنبرته الهادئة

_لاء مش الفكرة ،هو انا بس شايف ان طالما الشخص مش اد التجربة ميدخلهاش 

نظر عيسي وصالح الاثنين نظرات مبهمه ناحية زين ،ومن ثم دنى صالح من اذن عيسي واردف له

_مين العميق دا ،يادى النيلة انا جاى اسهر مش جاى مكتبه 

اردف عيسى ناحية اذن صالح وقال

_انا عايش مع العالم يفكر كدا طول الوقت ،دا كدا كويس سعات بينزل عليه او السكوت مبيتكلمش بالاربع شهور

_ولما بيعمل كدا انت بتعمل ايه 

_بقوله ابعد عن شنباتى وخد حياتى بيفك ع طول 

قهقه صالح عليا وطرق عيسي على كتفه مازحا وهو يقول

_والله زمان ياعيسوى !

____

زجاجه طلاء الاظافر ذات اللون الفسفورى ،تقوم روان بطلاء اظافر قدميها به وامامها هدير جالسه على فراش روان تحدثها بالطبع عن صالح ..

_مش بياخد باله منى خالص ،عارفه كأنى برواز خشب قديم حقير على حيطه دهانها واقع 

انتهت روان مما تفعل ونظرت ناحية اظافرها وهى تقول

_طبيعى مش هيشوفك ،طبيعى 

قامت هدير بتكوير قبضه يدها ولكمت بها روان فى ساقها

_ليه يعنى ؟ ليه ميشوفنيش دا انا قمر يا انسة عفريته هانم

_ماشى قمر ،بس موديل قديم ...موضه بطلت عليها تراب 

مش لافته نظره ليكِ ولا لجمالك ،اول حاجه هنعملها لتغييرك نغير شكلك كله 

_انفخ شنبي يعنى 

ضحكت روان واردفت

_اسمعى بس ، هييجى راكع بس امشى معايا خطوة خطوة 

امسكت هدير روان من تلابيب ثيابها وقالت بعنف مضحك

_عارفه يابت ياللى شبه العروسة اللعبة انتِ لو مجاش ليا بعد م اسمع كلامك هتاخدى منى 18شلوت على فجأة

_يابنتى اصبرررى ،دنا رونى ، اول حاجه هنقص ام شعرك الل عامل زى السجاد الايرانى دا 

نهضت هدير من مجلسها ووضعت يديها فى منتصف جسدها وقالت اعتراضاً

_نعم ياختى !! انا شعرى دا مش هقرب ناحيته دا ناعم وطويل زى بتاع الهنود 

_مختلفناش لكن موضه قديمه وشكلك اتحفظ بيه ، هنقصه ونصبغه لون مطرقع 

_طرقعوكِ ف بتاعه فشار يابعيدة ، يعنى انا لو عملت الهبل دا واضحى ب اعز م املك هيبصلى وياخد باله منى 

نهضت روان من مجلسها وقامت تدور بالغرفه وهى تضع اصبعها على شفتيها وتفكر بصوت عالِ

_دى خطوة ياماما ، اول خطوة ...بعدين هنغير ستايل لبسك وتجيبي بقا حاجه غاليه وعليها القيمه بطلى بُخل 

اقتربت هدير ناحية روان وامسكتها من ياقه ملابسها العلوية واخذت تهزها يميناً ويساراً

_بت انتِ ...بت انتِ ،دا مش بخل دا حرص من الزمن وغدره عاوزة اقولك نصيحه يابغبغان القبيله ب الوانك الكتيرة دى ، امان البنت فالدنيا فحاجتين ...قلب يحبها وفلوس تتسند عليها 

وطالما مفيش قلوب بقت تحب بعض ،يبقى الفلوس هى الاضمن والابقى

لوحت روان بيدها وقالت

_ايييه ياستى حصه الفلسفه الل بتديهالى دى ، اسمعى الكلام وفكِ كيسك البسي لبس عليه القيمه ويعملك شكل ومنظر بلاش القرف الل بتجيبيه وفاكراه لبس وشوزات وشنط انتِ مضيفه طيران ولازم تبقى قمرز وكمان الشياكه بتلفت نظر اى حمار ...فهمتِ ياحمارة !!

فكرت هدير فيما تقول تلك الطائشه الصغيرة ،يبدو ان حديثها صحيح وان الخطة هذه المرة من الممكن ان تفلح وتصيب هدفها أخيراً اذا غيرت قواعدها التى سارت عليها طويلاً ولم تفلح.

#نور_إسماعيل

____

وان كنت لا اجيد دور الضحية فلاتعاتبينى ...ف هنا حبك كان وكائن وسيكون!

_وبتحضرى نفسك يامرات اخويا انك تعيشي فالقاهرة على طول ، كأنك استنيتى اكون فالمستشفى عشان تلفى براحتك 

وقفت نشوان امام مهدى وسندت ذراعها على الباب ونظرت له بجدية وتحدِ

_مهدى ،اول وآخر مرة تقولى كلمه من كلامك الماسخ الزفت الل شبهك والا والله انت عارف انا بعمل ايه 

_تهديد يعنى يابنت خالى يا اصيلة ياللى كنتِ عاوزة تموتينى 

_اعتبره زى م تعتبره وانت مش وصى ع حياتى 

تركته ورحلت ومن ثم التفتت إليه وقالت

_ولايم ايامك معايا لا إلا انت عارف انت مخبي ايه ف اوضتك انا ممكن ابلغ عنك فيه ونخلص منك ومن شكلك للأبد وساعتها مش هبقا على حاجه لا على تربية ولا دم ولا حتى عضم التربة..'!

***