الجملة دي شتيمة في المجتمع المصري ولما بتتقال لراجل معناه انه مفتقد الرجولة وبيتعامل زي الستات.
أولًا كل الناس تربية واحدة ست لأن الأم هي اللي بتربي، وتتحمل مشقة الطفل من ولادته لحد ما يكبر، حتى لو الأب موجود فدوره مُكمل لدور الأم في تربية الطفل لكن يفضل دور الأم هو الأساسي في غرس القيم والأخلاق في نفس الطفل، عشان كده الأم تقدر تربي لوحدها الأطفال لكن الأب صعب يربيهم لوحده لأنهم محتاجين تفرغ وصبر وبال طويل.
ثانيًا: نبي الله عيسى عليه السلام لما ربنا أراد تكريمه هو وأمه قال عيسى ابن مريم، نبي نشأ من غير أب، وهو فعليًا تربية واحدة ست، وكان نبي التسامح والرحمة، وذو خلق كريم وبارك بولدته، يعني تربية الست مش حاجه وحشة.
ثالثًا: معظم عظماء العالم ربتهم واحدة ست لوحدها إما لموت الأب أو لأنه تركه لوالدته ومش أد تحمل المسؤولية فرمى الحمل عليها وهرب، وهي شالت الحمل لوحدها أحسن من أي راجل من غير شكوى ووصلت بأولادها لبر الأمان.
اللي بيقول تربية واحدة ست ده واحد بيشتم في أمه قبل ما يشتم الناس، وواضح ان أمه ماربتهوش كويس وما علمتهوش يحترم الستات ويفهم إنهم مش أقل منه لكن شركاء ودورهم في الحياة مختلف.
كفاية عنصرية ضد المرأة وكأن الرجولة تميز، لا الرجولة اخلاق وسلوك واحترام وجدعنة ودول بتزرعهم فيك واحدة ست وبيرويهم أب محترم بيكون قدوة.
افتخر بأنك تربية واحدة ست بس المهم إن تربيتها تكون زرعت فيك صفات إيجابية.
2
-2
