عزيزي فلان

بعد التحية

صديقك فلان الفلاني طفش، آه والله طفش، بس مش منك لا من الدنيا بحالها، كره الكدب والخداع والنفاق والعنف والفساد، ولأنه زي ما انت عارف راجل مستقيم ومش قابل يدخل على أهله مليم حرام ودخله مش مكفيهم حتى عيش حاف، وعمل كل ما في وسعه عشان يزود دخله من غير ما يفرط في كرامته ولا يخالف ضميره وفشل، وكمان زوجته شايفاه فاشل لأنه مش معيشها زي بنت خالتها ولا مركبها عربيه زي جارتها، ولا ملبسها دهب زي صاحبتها وبالتالي ما بقاش مالي عينيها ولا عينين أولاده اللي طلباتهم مالهاش أخر ومش مقدرين الصراع النفسي اللي بيدمره كل يوم، عشان كده طفش، لأنه احتمل فوق طاقة كل البشر ومابقاش قادر يتحمل أكتر من كده، فطفش لمكان تاني وسط ناس تانية يمكن يلاقي نفسه وجايز ينجح.

وسايب لك رسالة بيقولك سامحني يا صاحبي بس انت عارف ما بحبش لحظات الوداع وخفت أضعف، لكن انت في قلبي ومحتاج لدعواتك.

هتسألني عرفت منين كل الحدوتة دي هأقولك أنا السواق اللي وصلته وحملني الأمانة، وقالي أشرح لك ليه هو طفش من غير ما يودعك عشان ماتوعلش منه وتفضل تدعي له. ياريت تفتكرني في دعواتك وهي المحبة إيه غير دعوة حلوة من قلب مخلص؟!

صاحب صاحبك اللي محتاج دعواتك