المجنون قصة قصيرة

المريض: من فضلك عاوز ادخل للدكتور بسرعة انا تعبان

السكرتير: ادفع ٥٠٠ جنيه عشان تدخل

المريض: انا تعبان نفسيا ومافيش معايا غير ٥٠ جنيه

السكرتير: تعليمات الدكتور تدفع تدخل ما تدفعش مع السلامه وماتوجعش قلبي

المريض: طب خد الخمسين جنيه وخليه يكتب لي شهادة إني مجنون

السكرتير: عشان يكتب لازم يكشف وعشان يكشف لازم تدفع فهمت؟

المريض: أنا فهمت بس انت اللي مش فاهم إني تعبان وحالتي خطر

السكرتير: ماتقرفوناش معاكم

المريض مسك الكرسي وبيجري ورا السكرتير اللي بيصرخ :

-الحقني يا دكتوووور مجنووووون

الدكتور يخرج ويرى المشهد ويتجه ناحية المريض: 

- اهدى يا أستاذ وقولي إيه اللي حصل؟

- عشان أهدى وأحكي لازم أكشف وعشان أكشف لازم أدفع وعشان أدفع لازم أسرق وعشان ما اتحبسش محتاج شهادة تقول إني مجنون 

-بتقول إيه مش فاهمك؟ واضح إنك متوتر إهدى ونزل الكرسي

-أنزل وهتسمع ولا تكتب الشهادة عشان أسرق وأرجع لك أكشف؟

-لأ هاسمع بس نزل الكرسي وسيب السكرتير 

فعلا سابه والدكتور همس للسكرتير :

- اطلب العباسية بسرعة

-تعالى معايا يا أستاذ أقعد هنا ولما ييجي دورك هتدخل ده وعد

المريض قعد وبعد نص ساعة جم ممرضين وأخدوه العباسية والدكتور بيقولهم

- خلوا بالكم منه ده مريض خطر وأنا هاكلم المدير واشرحله الحاله

المريض لنفسه: 

- الحمدلله خطتي نجحت وأخيرا هالاقي مكان أعيش فيه بعد ما اتطردت من البيت والشغل، هيقولوا مجنون وإيه يعني، ده على أساس إن كل الناس دي عاقلين؟!!

تمت