كنت باتعجب من معنى الأية والحديث اللي بيتكلموا عن قيمة الكلمة الطيبة لحد ما عرفت وفهمت ان الكلمة الحلوة لها تأثير إيجابي على علاقات الناس وخاصة على العلاقة بين الزوجين.
لما الزوجة تعمل أكله وماتكونش هايلة لكن ممكن تجبر بخاطرها وتقولها تسلم ايدك هتلاقيها بتبذل جهدها كل يوم وتتفنن وتخترع أكله عشان تنول رضاك، لكن لو قلتلها إيه الزفت ده ناقصة ملح هتتعلمي إمتى؟هتلاقيها كل يوم بتعمل أكل أسوأ من اللي قبله او مش هتحاول تطور نفسها عشان مافيش تقدير حتى لتعبها ووقفتها عشانك.
نفس الحكاية للزوج لو اشترى لك حاجه وذوقها مش أوي وقلتيله الله جميله ما اتحرمش منك ياااه هتحسسيه انه عمل انجاز قومي ،لو قولتي ايه العك ده ياما جاب الغراب لأمه عمره ما هيفكر يجيبلك حاجه تاني ولا هيفكر يفرحك ولو حتى بكلمه لانك ماقدرتيهوش.
وماتنسوش إن الكدب مباح في العلاقة بين الزوجين يعني يقولها إيه ده انتي خسيتي أوي هتلاقي وشها نور وبقت تهتم بجسمها ونفسها عشان تنزل رضاك.وهي لما تقوله تصدق انت أجمل حد في عيني ومش باطمن غير معاك هتلاقيه بيعمل المستحيل عشان يطمنك.
الكلمة الحلوة لها مفعول السحر فعلا وممكن تخلي العلاقة بينكم ناجحة،والكلمة الوحشة تهد بيوت وتخرب علاقات حتى لو قايمة على الحب.
الكلمة الحلوة صدقة والبسمة صدقة للأغراب فما بالك لشريك عمرك؟
وافتكروا إن خيركم خيركم لأهله.
2
-2
