عبارة حافظينها من صغرنا إن الأم لازم تضحي عشان جوزها وأولادها.جميل إنك تضحي، لكن حنفية التضحية السايبة عمال على بطال بتخلي التضحية تفقد معناها ومحدش يقدرها، وبتتحول التضحية لعادة وبعدين لحق مكتسب، محدش فكر إن التضحية دي على حساب صحتك وشبابك وأعصابك؟ محدش فكر إن الكبر اللي باين على وشك سببه إنك بتيجي على نفسك عشانهم؟ وإنك في يوم ما فكرتيش في نفسك أو حقوقك؟ طبعا لأ والنتيجه زوج اتكالي معتمد عليك في كل حاجة ورامي عليك كل المسئوليات، وأبناء أنانيين ما بيفكروش غير في حقوقهم وما يفهموش واجباتهم، ومايعرفوش يشيلوا مسئولية نفسهم ولا غيرهم.
النقيض تمامًا لما نلاقي الأم كائن أناني بيهتم بنفسه بس، بشكلها وجمالها ورأي الناس فيها، أما جوزها وأولادها وبيتها فدول مش محل اهتمامها أصلًا لأنهم مجرد تكملة لديكورها قدام المجتمع،لازم تكون زوجة وأم عشان ماتبقاش أنوثتها ناقصة،لكن فين دورها في تربية الأولاد؟مافيش. فين اهتمامها بجوزها؟هيدوشها ليه مش يحمد ربنا انها رضيت تتجوزه، كل اهتمامها بنفسها واحتياجاتها. حقوقها، وده نموذج فاسد ونادر.
الطرفين غلط لامضحية بسبب ومن غير سبب ولا أنانية مفصرة في حق اللي حواليها، خليكي معتدلة في كل حاجة في تضحيتك وفي تحملك المسئولية وفي اهتمامك بنفسك وببيتك وأولادك، التضحية تكون بحدود وحب نفسك بحدود، الإعتدال في كل شئ مهم لعلاقة سوية.
2
-2
