لية أبص إني ضحيت بنفسي وعملت مجهود

أنا كارهه أو صعب عليا عشان خاطر (أصحابي -أهلي-جوزي-مراتي-ولادي-الشركة اللي بشتغل فيها)

فيولد جوايا غضب ناحية الأشخاص أو المكان وخاصة لو ملقتش التقدير المناسب ناحية التضحية العظيمة اللي أنا شايف إني تعبت فيها جداً

التغيير دايماً بيبدأ من جوانا يعني ممكن جدا إحنا الإتنين نعمل نفس الحاجات بس أنا أشوفها قراري وأنت تشوفها تضحية منك

يعني مثلاً الأب اللي بيضطر يشتغل في كذا وظيفة عشان يدخل ولاده مدرسة أنترناشيونال مصاريفها غالية عنده أختيارين لأما يوافق على المدرسة دي ويحاول يشتغل عشان عارف ان في الأخر مستوى أولاده الدراسي هيخليه مبسوط

لأما يختار يدخلهم مدرسة أقل تكلفة ويكتفي بوظيفة واحدة وده من حقه عشان عارف إنه بيحتاج يقضي وقت كافي مع ولاده وده هو اللي بيخليه مرتاح ومكتفي نفسياً أكتر

مثلاً الست اللي بتقرر تبطل تتواصل مع زوجها عشان كل مابيتكلموا يتخانقوا وبتعيش هي وأولادها في حياة اسرية صامتة وغير صحية نفسياً

قصادها أختيارين لأما تختار تنفصل وتبعد عن الضغط النفسي وتقول أنا مش قادرة على المناهدة أكتر من كدة وده حقها

لأما إنها تشتغل على نفسها وتتعلم مهارات تواصل جديدة وطرق مختلفة في الحوار والتفكير وتستغل نقاط قوتها صح وتتعامل مع نقاط ضعفها بشكل موضوعي

الموظف اللي بيفني عمره وجهده في نفس الشركة سنين كتير ومش بياخد المقابل المادي والمعنوي اللي يستحقه هو اللي أختار إنه ميدورش على بديل عشان خايف من التغير وهكذا ....

وبالتالي

لازم أفهم أن عندي مسئولية وأكون مدرك تمامًا النتائج و إني لو خدت قرار بأني هتحمل المسئولية دي فجزء من راحتي هيقل وهستغنى عن جزء من رفاهياتي ،

فأنا كدة قصادي أختيارات لأما هوافق واراقب نتائج أختياري وأغير طريقتي كل فترة على حسب الأولوية أو أختار إني اغير هدفي تمامًا

بس المهم إني لو أخترت البذل والإستغناء مجيش بعد شوية تعب أو إحباط أجري ألعب بسرعة دور الضحية

ودة للأسف بيحصل بتلقائية لأن مجتمعنا بيتعاطف أوي مع الدور ده وأوقات كمان بيعمل منه بطل

طالما أخترت تكمل في الأختيار الأصعب ليك مترجعش تقول أنا ضحيت عشان البيت أو الولاد أو الشركة أو أي شخص ، مينفعش حد يحاسب على فاتورة قراراتك غيرك

ملخص كلامي إن القرارات اللي باخدها في حياتي أقدر أبص لها من زاويتين وأحاول أشوف كل ناحية فيهم هتأثر عليا نفسياً إزاي؟

لأما اشوف نفسي إني بضحي وبأجي على نفسي ويفضل يتولد جوايا طاقة غضب وخنقة

أو أشوف نفسي أنا اللي أخترت وأحس إنها مسئوليتي كاملة لوحدي ولو مش عاجبني وضع أشتغل عليه وعلى نفسي وأغيرة

"خليك مرن وقلل أي ضغط بيحصل في حياتك لأن مفيش حد بيقدر يساعد نفسه أو إللي بيحبهم وهو مسيطر عليه مشاعر التعاسة والإرهاق"