فؤاد المهندس عملاق المسرح - بالنسبة لي ع الأقل - لما بقارنه ب محمد صبحي علي اعتبار ان كتير شايفين انه استاذ المسرح حاليا ... بلاقي فرق رهيب

فؤاد المهندس عمره ما طلع على المسرح كنجم أوحد ... حواليه ديما نجوم كبار او حتى صغيرين بس واخدين مساحتهم في الأداء و كل واحد له طابع مميز بيطلع بيه و بينجح فيه ...

محمد صبحي هو الملك في المسرحية ... كل اللي حواليه مساعدين و بيخدموا على اداءه ... هو صاحب الدور الأول و الثاني ... صاحب النكتة... صاحب المسرحية كلها

فؤاد المهندس ... بيطلع من مسرحه نجوم كبار و بيلمعوا و نجمهم بيظهر 

على عكس محمد صبحي ... بيطفي اي حد معاه ... محدش بيقدر يخرج عن مدرسته لتحكمه الشديد في الأداء ... الوحيدة الوحيدة اللي مقدرش يفرض عليها دا كانت الفنانة التلقائية الموهوبة الجميلة سعاد نصر و بس ... هناء الشوربجي ... شعبان حسين ... عزة لبيب كان ممكن يكونوا نجوم لكن ارتباطهم ب محمد صبحي طفاهم تماما ... على عكس فؤاد المهندس اللي لمع معاه كل اللي اشتركوا معاه و فضلوا بهويتهم شويكار ... سناء يونس ... احمد راتب ... ابو الحسن و غيرهم 

اداء فؤاد المهندس علي المسرح صوته طريقة إلقاؤه كل حاجة بتنسي انك بتتفرج على مسرحية دا كادر سينما بس بتشوفه على المسرح مفيش خروج ع النص... مش بيخرحك من العالم اللي انت دخلته ... محترم المسافة بين اللي على الخشبة و اللي قدامها 

اداء محمد صبحي يكاد يكون كاريكاتيري مش حتى مسرحي لا دا بيعلي على الأداء المسرحي كمان ????... مفتعل جدا جدا ... لازم في كل مسرحية ينزل من على المسرح لوسط الجمهور بشكل ممل و ملوش معنى غير انه زيي ما بيزاحم زمايله على المسرح كمان بيزاحم الجمهور ???? دا غير دروس الوعظ و التربية اللي لازم يتحفنا بيها كأن اللي داخل المسرحية داخل يتلقى دروس في التربية و التوجيه بشكل مباشر فج حقيقي ... 

حقيقي من بعد فؤاد المهندس مفيش مسرح محترم ...