شفت كام حلقة من مسلسل "راجعين يا هوي" ... للكاتب أسامة أنور عكاشة و مع الكاتب لنا هنا وقفة ....

أسامة أنور عكاشة لا تخرج كتاباته عن الصراع الطبقي الساذج بين أسرتين سواء من نفس العائلة و هو الأغلب او من عائلتين مختلفتين .... و دائما الطرف الفقير هو صاحب المثل و المبادئ و القيم و لازم يكون ساكن في احد أحياء القاهرة القديمة .... و الطرف الغني يمثل دائما العكس ... و دائما له طرقه الغير شرعية اللي وصلته للثراء السريع ...

و هناك دائما البطل الواحد صاحب المثل و مالك الحكمة و اللي بيعدل الحال المايل...

و هناك أيضا دائما قصة الحب المستحيلة بين الشاب الفقير مع بنت الباشا او العكس ... مفيش حاجة خرجت في كتاباته عن الحدوته المهروسة الساذجة دي ....

الابطال كلهم ليس لهم أي بعد نفسي او اي مشكله غير هذا الصراع ....

ليالي الحلمية ... سليم البدري و نازك السلحدار سكان الزمالك في مقابل سكان الحلمية أنيسة و توفيق البدري و قصة الحب بين علي و زهرة

الشهد و الدموع ... نفس القصة الصراع ما بين زينب و دولت ... الغريب انهم جايبين زينب اكتر واحدة تعبت و شقيت عشان تربى أولادها ... رغم أنها كانت بتسقيهم الكره و الحقد و الغل و كل شوية تذلهم بتتضحياتها و تعبها عشانهم و دي حاجة غير سوية نفسيا ابدا .... و كالعادة قصص الحب بين شباب العائلتين المتصارعيتين 

ابو العلا البشري ... الراجل اللي عايش في قمم و طلع منه عشان يربي الناس على مزاجه و ينحشر في حياتهم و كأنه رسول هادي للعائلة

و راجعين تاني يا هوي مخرجش عن نفس سيناريو أسامة أنور عكاشة كالمعتاد .... 

معرفش هي دماغه مش بتجيبه غير لنفس القصة الهلكانه دي ليه ... و ليه ديما شخصيات ابطاله ملهومش غير لونين ابيض و اسود بس ... ليه ديما اللي فوق ... فوق اوي اوي و ديما غلط و اللي تحت تحت اووي و ديما صح

من الاخر كده أسامة أنور عكاشة احادي القصة... حدي المزاج .... ذو ميول طبقية غلاوية ????