من أول ما بنتولد ... بنتوجع ... عشان نكبر
مبيكونش الوجع أذى ... بيكون درس نتعلمه
الطفل بيتعب و يبكي و سنانه بتشق طريقها وسط لثته بتألمه و بتوجعه عشان تقوله خلاص هاتعرف تاكل لوحدك و تدوق كل الأكل اللي مكونتش عارف طعمه من غيري... بس عشان أطلع لازم تتوجع ...و عشان تعرف تتدوق لازم تتألم
الطفل بيسخن و يتعب و يمرض ... عشان جسمه ياخد مناعه من أمراض كتير ... بس عشان يحمي نفسه منها بعدين و جسمه يعرف يقاومها و يعرف يدافع عنه ... لازم يدخل حرب مصغرة يشوف فيها العدو شكله ايه ... عشان جسمه يميزه و يعرف يقاومه و يقوي ... و يعرف انه في حياته هايقابل أعداء و ناس هاتتدخلها و تتسرب جواها ... هاتأذيها و تتضعفها فيتعلم يعرف ازاي يقاوم و يحارب و بعدين يتعلم يميز مين بيسمح له يدخل و مين يقاومه و يمنعه ...
الطفل عشان يتعلم المشي ... بيقع و يقوم و يقع و يقوم و يسند على دا شوية و ع كرسي شوية و على حيطة شوية لحد ما يعرف يظبط توازنه و يعتمد على نفسه ... مهو عشان يتعلم ازاي يمشي في طريقه و يحدده ... لازم يقع شوية و يقوم شوية لحد ما يمشي لوحده... مهو هايجي يوم لازم يكمل لوحده من غير ما يسند على حد او على حاجة ...
الطفل أول يوم مدرسة .... بيعيط و يخاف ازاي هايروح مكان من غير امه و ازاي هايكون لوحده ... بيرفض تاني يوم انه يروح و و يحزن ازاي يهون علي أمه تسيبه كده لوحده ... بس بعدها بيتعلم الانفصال و البعد عن الأهل ... بيعرف يشوف أصحاب و يلعب معاهم ... عشان يبدأ يدخل في دايرة وجع اكبر ... "الناس"
الناس ... الدرس الذي لا ينتهي .... سلسلة تجارب و اوجاع ... كل درس منهم بتتطلع منه بفهم أكبر لنفسك و ليهم ... بتعرف قدراتك و بتعرف حجمهم في حياتك .. بتعرف مين يستحق المواجهه .... و مين اللي تديلو ظهرك من غير ما تبص وراك ...
اكبر درس هاتعرفه ... هو قيمة نفسك و انك أول و آخر حد يقدر يقيمها ... و أول و آخر حد مسئول عن سعادتها .... و أول و آخر حد عارف هي تقدر على أيه و متقدرش على أيه ...
انتظر الكثير من نفسك ... لأنك تستحق و تستطيع
2
-2
