في فيلم النظارة السوداء قصة إحسان عبد القدوس ... البطلة كانت ف الفيلم لابسة النظارة السوداء ... حياتها كانت حياة مستهترة بلا حياء او اخلاق او أهداف... عايشة كورقة ف مهب الريح ... لحد ما جه البطل "احمد مظهر " و حاول إنه يغير من حياتها و يعرف ليه هي عايشة كده ...
البطلة في حياتها محدش علمها الصح من الغلط ... حياة عشوائية معشتش غيرها و لا شافت غيرها و لا تعرف غيرها ... هي كانت فاهمه ان هي دي الحياة و مفيش حاجة تعيشها غير كده ... و دا معنى النظارة السوداء ... الغشاوة... الجهل... انك متعرفش غير اللي انت عايش فيه ...
لحد ما قدر البطل انه يخليها تشوف و تفهم و تعيش لأسباب تانية و من وقتها و هي شالت النظارة السوداء اللي كانت على عينيها ... النظارة اللي كانت حجاب ثقيل مش مخليها عارفة تشوف و تميز الألوان الحقيقة اللي هي المقصود بيها الصح و الغلط ...
البطل لما بعد عن البطلة رجعت لحياتها القديمة بس من غير ما تلبس النظارة ... رجعت باختيار حر من بعد ماميزت الألوان عن بعضها ... المرة دي هي المسؤولة عن اختيارها و عن اسلوب حياتها ...
احنا بقى في ال 10years challenge...
كام حقيقة انكشفت بعد ما كانت غايبة عنك و بعد ما عرفتها فضلت لابس النظارة السوداء ... ؟؟؟
هو انت دلوقتي لسه فاهم نفس اللي كنت فاهمه من عشر سنين ...!!!
طب احنا عايشين باختيارات من ورا النظارة و لا بعنيين واعية و مدركة ...!!!
طب احنا لو عارفين ان في حاجات مصرين نلبس لها النظارة السوداء ... امتى هانقرر نشيلها و نشوفها على حقيقتها ...؟
كل واحد فينا اكيد حاطط نظارة سوداء على مواضيع في حياته ... يا إما هو فعلا جاهلها ... يا إما خايف يشوفها على حقيقتها ...
بس الأكيد انه ف الحالة الآولي بتجيلنا إشارات كتيرة و رسايل من ربنا من خلال ناس حوالينا بيحاولوا يرفعوا عن عينينا النظارة السوداء ... بس احنا برضو اللي بنعمل مش واخدين بالنا او مش فاهمين الإشارة ...
دا بالنسبة لي هو ال 10years challenge
في كام نظارة سوداء شيلتها و كام واحدة مصر انها تفضل موجودة ؟؟؟
نهله حكم
2
-2
