في جناح دلال وجسار
كانت دلال تجلس تسامر عزيز وبدور وفارس
ضحك عزيز قائلًا:
- شفتي يا أما دلال، الابله شيماء دي شكلها إكده أبله شاطره، آني شفت شاهين بيحل معاها كيه الطلجه، مع ان اللي أعرفه ان شاهين ما بيفهمش.
- عيب يا عزيز ما تقولش كده على خوك.
وعقبت بدور:
- شفتي يا ماما أهو على طول كده يشتمه.
فاحتضنها دلال
- يا حبيبة قلب ماما انتي، أهو إنتي اللي نصفاني مع جوز الخناشير دول اللي ما بيتكلموش غير صعيدي.
فقال الباسل:
- باه يا أماي، الحديت المصاروي ده للمتجلعين بس إحنا رجاله.
فقالت ضاحكة:
- طيب يا رجاله قوموا ناموا بقى.
فقال عزيز:
- لاه عنستنوا هبابه معاكي، جايز أبوي يجي.
ردت بحزن:
- ريح نفسك أبوك مكلمني من شويه وقال مش جاي إلا كمان يومين.
فقال بغضب:
- باه وما حددتنيش ليه مش راجل أنا إياك؟!
فقالت فرحة به:
- يا نهاري مش راجل إزاي؟ ده إنت راجل وسيد الرجاله، بس هو لما اتكلم إنتو كنتوا تحت، فينك يا قمر الله يرحمك الولاد كبروا.
ونظرت لهم
- كانت هتفرح بيكم قوي يا ولاد.
واحتضنتهم
- ربنا يخليكم ليا ويحنن قلوبكم على بعض.
لتجد باب الجناح يفتح وجسار أمامها قائلًا:
- باه وآني ماليش في الحضن الجماعي ده وإلا إيه؟ هو الغايب حداكم ما لوش نايب.
فصرخ الجميع
-هييييييه.
والتفوا حوله يحتضنوه
- وحشتوني جوي يا عيال.
وقالها وهو ينظر لدلال
فضحك عزيز
- إحنا برضه اللي وحشناك يا بو عزيز.
فضربه جسار على مؤخرة رأسه
- إتلم يا ولد.
فاقتربت دلال منه واحتضنته حضنًا سريعًا وقبلته من وجنته
- حمد لله علي السلامه يا بو العيال.
فقال ضاحكًا
- إيه رأيكم؟ حلوه المفاجأه دي؟
قال الكل
- طبعًا حلوه.
- خدي يا ست الستات الوكل ده، آني جوعان، دي بيتزا يا ولاد خابركم بتحبوها ونادموا على شاهين وفارس الصغير بسرعه، وانتي يا دودو نادمي على رجيه ورضوان أنا جايب للكل ونسهروا سوا، آني طليت على جاعه أبوي دياب ولجيت النور مجفول وأكيد برضك أبوي وأمي ناموا هم وعمي وهدان وأماي صفيه، بس آني عامل حسابهم يفطروا بيها بجى.
واجتمع الكل في جناح جسار وتناولوا البيتزا وسط الضحكات والسرور، ثم انصرفوا ودخل الأولاد إلى غرفهم
وشرعت دلال في جمع الأطباق ليمسك جسار يدها
ويقبلها فضحكت وسألته:
- بس إنت إتأخرت ليه المره دي؟
- الشغل يا جمري المره الجايه عاشيع أبوي.
وحملها لغرفتهما فما زال حب جسار ودلال متقدًا كما كان لم تؤثر به السنوات.
........
عند لطفي ومليحة كانا يتجادلان
- والله لو جلت إكده تاني يا لطفي ما هاسامحك ابدًا، وآني ليا مين غيرك، عاوز تطلجني ليه؟
قال بنفاذ صبر:
- يا مليحه لمصلحتك، عاوزك تخلفي وتبجي أم، أنا عارف إنك هتموتي على الخلفه، كنت بأشوفها في عينيك وانتي بتلاعبي العيال وهم صغيرين.
قالت واضعه يديها على صدره:
- يا نظري خلاص كان زمان، وآني ما عنديش اعيال إياك!
فنظر لها متعجبًا
فأمسكت وجههه بين يديها وقالت:
- إنت ولدي يا لطفي طب إياك أنا أجدر عليك!
وأخذت تضحك
فقال ببرود:
- بس لو كان عيب عدم الخلفه منيكي إنت آني كت اتجوزت يا مليحه.
فصمتت قليلًا ثم قالت:
- حجك يا ولد العزايزيه وساعتها ما كنتش أجدر أمنعك وكت هوافج، بس أنت عارف آني ماليش حد في الدنيا غيركم، باه يا لطفي تفتكر إني عاقدر أكون في حضن راجل غيرك كيه بس وإنت الحب اللي فتحت عيني عليه، وبسك عاد ما تفتحش السيره دي تاني واصل وإلا ما فيش بلاي ستيشن النهارده عجابًا ليك.
فضحك
- لا كله إلا البلاي ستيشن آني هاكون مؤدب وهاسمع الكلام.
.............
أما رضوان فدخل الغرفة ليرى وجه رقية تحول من الابتسام للوجوم
- خير يا بت عمي مالك شايله طاجن ستك ليه؟
قالت بتوعد
- يعني مش عارف يا ابن الحاج جابر.
- آه طالما جلتي ابن الحاج جابر يبجي مجموصه يا رجيه، وآني ما خابرش إني عملت حاجه تكدرك.
فقالت بغضب
- يا بوي ما خابرش وعملتش! ليه هابله آني اياك؟!
فقال بنفاذ صبر
- اللهم طولك يا روح تعالي يا غاليه إهنيه.
فجاءت بجواره فأجلسها على السرير وجلس بجوارها
- ممكن تروجي إكده وتعرفيني بالمصيبه اللي آني عملتها وما خابرهاش، وسايج عليكي حبيبك النبي بلاش جو لو كنت مهتم كنت عرفت لحالك، عشان آني هاموت وأنام.
- أيوه على رأي دلال بت عمي يعملوها ويخيلوا.
قال وهو يستشيط غضبًا:
- رجيه آني ماسك نفسي بالعافيه انطجي متكدره مني ليه؟
استدارت لتواجهه
- وإحنا بنتعشوا عند دلال كنت عم تناظر للبت اللي عترقص في الغنيه اللي اسمها صافينار دي وعينيك عتاكلها.
فابتسم
- يعني إنتي متكدره ومكدراني عشان خاطر صافينار.
- إيوه.
- يقطع صافينار عالتلفزيون في يوم واحد.
ودفعها علي السرير وأخذ يدغدغها
- آه يا بت ال .....
قالت بتوعد وهي تضحك
- هاه بت إيه هتغلط في عمك اياك؟!
- واني أجدر، آني ما عاشوفش غيرك يا رجيتي.
فقامت وجلست
- صوح يا رضوان يعني ما بتفكرش تتجوز عليّ.
ضرب كفاه ببعضهما
- يا دي الليله النكد هاتجوز عليكي ليه يا بنت الاجاويد؟!
- عشان تخلف!
فقال مستمدًا الصبر من الله
- يا مثبت العجل والدين يا رب، طب ما آني مخلف أمال الواد فارس ده يطلع ايه؟
هزت كتفيها
- لا تخلف تاني.
- وإذا كان ربنا ما أمرش لينا نخلف بعد فارس هاعترض انا ليه؟
وقال بكل رومانسيه
-رجيتي.
فردت بهيام
- عيون رجيه.
رد وهو يرسم العبوس على وجهه
- إطفي النور واتخمدي.
قالت وهي مغتاظة
- اتخمد! بعد الرومانسيه اللي فاتت دي انخمد!
فضحك واحتضنها قائلًا:
- ما إنتي كديه إكده عتتخمدي.
واطفأ النور ....
في غرفة جابر وراجية
قام من تمدده وجلس على السرير فهو يشعر بأرق، تلفت ليجد راجية تغط في نوم عميق فقرر إيقاظها
-راچيه، راچيه اصحي.
فردت بنعاس
-خبر إيه الصبح شجشج وإلا إيه؟
-لاه الصبح مشجشجش، آني اللي شجشجت، ما عارفش أنام جومي إجعدي معاي.
قالت بملل:
-باه يا جابر آني نعسانه جوم إطلع اتفرج عالتلفزيون.
فاقترب منها بحنان قائلًا:
-يا وليه باجولك ما جاينيش نوم، جومي.
فتبرمت قائلة:
-وهي حبكت دلجيت، يا راجل عيب على شيبتك، ده إنت بجيت جد وأحفادك على وش جواز!
فقال غاضبًا:
-باه أما إنت مره ما عتفهمش صوح، أنا الغلطان، إنتي شكلك عجزتي خلاص، بس آني لسه بخيري.
ضحكت
-طيب يا أبو خيرك تصبح على خير.
وشدت الغطاء على رأسها ونامت بينما جابر خرج يشاهد التلفاز وهو يحدث نفسه
-آني لازمن أتجوز وأشوف لي صبيه زينه إكده تدلعني.
...........
بعد أن تناول الجميع الإفطار وأعلن تعانق الآبنوسية بالأرض إذن انصراف الجميع نادى وهدان على دياب
-يا كبير.
-خير يا وهدان؟
-أنا رايد الإذن عشان أسافر الحج مع صفيه.
-طبعًا يا خوي ودي فيها إذن؟!
-طيب حد منيكم جاي معانا؟
-لا النوبه دي خليكم انتم براحتكم.
-تمام يا خوي.
مرت أيام جهز وهدان أوراقه وأوراق صفية للسفر وودعا الجميع وسافرا لآداء الفريضة.
......
بعد عدة أيام رن هاتف دياب حاملًا خبر وفاة وهدان وصفية في تدافع للحجيج،
كانت وصية وهدان أن يدفن بالمملكة العربية السعودية، إذا وافته المنية هناك ولم يكن دياب ليخالف وصيته.
سافر جسار لينهي الإجراءات ويدفن عمه بالمدينة المنورة.
أما دياب فقد أقام السرادق لتلقي عزاء أخيه وزوجته وكأن الايام تأبى أن تفرح هذه العائلة فمن سرادق لسرادق ومن فقيد لفقيد.
خيم الحزن فترة من الزمن على القصر
إلى أن بدأ يتلاشى رويدًا رويدًا فالحزن هو الشيء الوحيد الذي يولد كبيرًا، ثم يصغر إنها رحمه المولي عز وجل بنا بني البشر.
عادت شيماء للقصر تعطي الدروس للأولاد، كانت دائمًا ما تبحث بعينيها عن عمار وما أن تراه حتى يدب الخجل إلى وجنتيها فتصطبغان باللون الوردي.
أما نوال فكانت تتحين الفرصة لترى رد فعل شيماء على مرأى عمار وتأكدت من أن شيماء عاشقة لعمار.
نجح الأولاد بتقديرات عالية في الترم الأول وأقيمت وليمة كبيرة احتفالًا بهم و لإدخال السرور على النجع وأهله.
توقفت شيماء بالطبع عن المجيء للقصر فترة إجازة للأولاد.
مرت عدة أيام لم يرها فيها عمار، لا يعلم لم يفتقد صوتها العذب وهي تشرح وتلك الضحكات الخجلى التي كانت تصدر منها على ردود أفعال الأولاد
أتراه يحبها "لا بالطبع ويحك يا عمار أتسمح لذلك العقل أن يفكر بأنثى غير زهرتك تبًا لك، وأنت أيها القلب خير لك أن تتوقف عن النبض عن أن تبض لمرأي أي أنثى، سأقتلعك بيدي إن تجرأت"
وأخذ يشغل نفسه بمتابعة الأرض بنفسه، بل إنه في بعض الأحيان كان يشمر عن ساعديه ليعمل بنفسه فيها، ففي ذات يوم كانت القناة مسدودة فخلع ملابسه لكي لا تتسخ فأصبح عاري الجذع وانهمك بتسليك القناة، كانت شيماء تشتري بضعة حاجيات للمنزل وفي طريقها للعودة مرت من أمام الارض ورأته يعمل بنفسه لتحدث نفسها
"يا الله ان ذلك العزايزي يعمل بنفسه في الأرض بلا تكبر أو تعجرف"
كانت طلته بجذعه العاري وسلسلته الجلدية وجسده الملطخ بالطين يمنة ويسرة تزيده جاذبية في عيناها وفور أن اقتربت قليلًا حتى خفضت رأسها وألقت السلام ولكنه لم ينتبه إلى أنها شيماء إلا بعد أن مرت من أمامه ولكنه رد السلام بالطبع.
.........
طلب دياب عمار
-خير يا كبير طلبتني فيه حاجه؟
-تعال يا ولدي اجعد جاري اهنيه، إنت خابر زين عمك وحيد بجي راجل كبير واليمين دول صحته ما عاجبانيش واصل وبنته شيماء ما لهاش غيره.
ولم يكد دياب يكمل الجملة حتى وجد طرقًا شديدًا على الباب
-باه ادخل يا اللي عتدج!
كان الغفير شكري
-خبر إيه يا شكري عتدج إكده ليه؟
قال شكري بحزن:
-العفو والسماح يا كبير بس اللي عندي ما يستناش.
-انطج.
-وحيد المصراوي!
فز دياب من جلسته
-ماله وحيد؟ انطج.
-البقيه في حياتك.
تماسك دياب قائلًا:
-لا حول و لا قوة إلا بالله، جدامي جدامي يا شكري، نادم على الشيخ، وإنت يا عمار رايد عزا ما يجلش عن عزا أي نفر من العزايزه.
-حاضر يا كبير.
........
بعد انتهاء مراسم العزاء ذهب دياب لشيماء
-جهزي خلجاتك يا بتي.
تساءلت والحزن يغزو ملامحها:
-ليه يا حاج؟
رد بحزم:
-ما لكيش جعده هنيه لحالك البيت متطرف.
ردت بخجل:
-الدار أمان يا حاج دياب ما تخافش.
رد بغضب:
-لاه هي كلمه واحده ما عاتنيهاش.
قالت معترضة:
-بس يا حاج اقعد عندكم ازاي ما يصحش؟
قال بنفاذ صبر:
-الجصر يا بتي فيه كذا ملحج في الجنينه عتجعدي في ملحج منيهم ولحالك برضك ما حدش هيأثر على راحتك، بس عتبجي وسطينا وعنينا عليكي.
فرضخت لرغبته.
قال مربتًا عليها:
-من النهارده تجوليلي يا بوي.
واحتضنتها نوال قائلة:
-وتجوليلي يا ماما.
وذهبت معهما، رآها عمار وهي تدخل من باب القصر حزينة مكسورة
فتقدم قائلًا:
-البقاء لله يا أبله البجيه في حياتك.
ردت بخفوت:
-حياتك الباقيه.
ودخلت للملحق الذي ستقيم فيه، ولم يتركوها وحدها بالطبع ظلت دلال ورقيه وكذلك بدور معها، تصنعت النوم فنمن بدورهن وبقيت هي..
وحيدة يتيمة، لم تعرف شيماء طعمًا لحضن أمها فلقد ماتت وهي تلدها، رباها وحيد بعيدًا عن تأثير والدته وسلوكها الملتوي الذي لم يكن يعجبه أبدًا، الآن فقط علمت شيماء ما هو طعم اليتم، الآن فقط أحست بمعنى كسرة الظهر، ما أصعب أن ينهار جبلك الذي كنت تختبئ خلفه، وتجد نفسك في العراء تنتظر القادم المجهول، يا الله ماذا تحمل لي الأيام القادمة؟ يا الله فيك ثقتي ورجائي، يا الله كن بجواري، فلتنعم عليّ بعطفك إلهي، ظلت تدعو الله ودموعها تتساقط بدون وعي حتى غلبها النوم.
...........
شهران قد مرا على وفاة والدها
لم تر فيهما عمار إلا قليلًا فلقد كان يسافر في عدة مهمات لإنهاء أعمال عالقة خاصة بالأرض وبيع المحاصيل وتجهيز الأخرى للتصدير.
يوم أن عاد أقام دياب وليمه لأهل النجع، الكل كان متأكدًا أن ثمة خبرًا مهمًا يلوح في الأفق، فلا يوجد مناسبة للوليمة، فبالتأكيد ثمة إعلان هام للعزايزه، الكل كان يتساءل وخاصة العزايزه بأنفسهم من سكان القصر.
وحدها نوال كانت تعلم، لكنها ما كانت أبدا لتخبر أحدًا عن ما نواه دياب
بعد تناول العشاء دقت الآبنوسية ثلاثًا فعم الصمت:
-بعد الصلاة على الرسول الكريم، وبعد الونس بالجمع الكريم، ليا حديت والكل يسمع زين، كنت طول عمري أجول لأبوي المرحوم فارس يا بوي الجواز والطلاق مينفعش فيه الأمر، بس دلجيت عرفت أن فيه أحوال ما يصحش نسيبوا فيها الأمر للصغار لمن يجيلهم مزاجهم، لأن الوجت عيكون فات، وعشان إكده آني باعلن قدام النجع كلاته إن جمعتنا دي مش من غير مناسبه، لاه ليها مناسبه كبيره جوي، يا سيدنا الشيخ حبيب جهز الورج عشان هنعجدوا الليله العجد لابننا عمار على بت حبيبنا المرحوم وحيد ست البنته شيماء.
شيماء ما إن سمعت اسمها مقترنًا مع عمار حتى كادت أن تسقط لكن دلال أمسكتها
-وعجد ابننا الدكتور سامي على ست الصبايا سمر بنت الشيخ نصراوي.
دقت الآبنوسية ثلاثًا معلنة الإذن بالزغاريد والهمس بين الحضور.
جلست شيماء وهي لا تدري أتحلم هي؟ أم حقًا تعيش الواقع، أما سمر فكانت تجلس متبرمة، ولكن ما كانت تستطيع الاعتراض، فلا اعتراض على حكم كبير العزايزه مهما كان إنه قانون لا مجال لمخالفته فكلمه كبير العزايزه لا ترد وفي ردها حد وحق عرب وأشياء لا قبل لها أو لوالدها النصراوي بها وهو أبدًا لن يخالف الكبير.
عمار وسامي لم يختلف حالهما عن سمر، فعمار لم يكن أبدًا ليرتبط بعد زهرة
(لماذا الآن يا عمي؟ لماذا بعد كل تلك السنوات؟) كان هذا تساؤله
وسامي كان يتساءل في نفسه عن تلك السمر التي سيقترن اسمه باسمها، تم العقد وأطلقت الزغاريد
دقت الآبنوسية ثلاثًا
-ألف مبروك لرجالتنا وبناتنا وبإذن المولى الجمعه بعد شهر عشان نتموا الفرح ويدخل الفرح بيوتنا والفرح هيكون سبوع ما تنجادش فيه نار في بيوت النجع.
اجتمع دياب بعمار
-ساكت ليه يا عمار؟
رد باستسلام:
-وهو فيه جول بعد جولك يا كبير؟!
قال جالسًا بجواره واضعًا يده على كتفه:
-اسمعني يا عمار، جعدت شيماء حدانا لحالها ما تصحوش، وآني ما أجدرش أعطيها لواحد ما أعرفوش، لازمن أعطيها لواحد ابن حلال يتجي فيها ربنا ويكسب فيها ثواب دي يتيمه وإلا إيه يا عمار؟
رد موافقًا:
-كلمتك سيف على رجابينا يا كبير.
قال دياب مبتسمًا:
-يبجي تخرج من إهنيه على الجاعه اللي هتدلك عليها نوال وتجعد تاكل لجمه مع عروستك.
وأمره أن يدخل سامي
-مالك جالب خلجتك إكده يا ولد؟
رد وهو يزفر:
-أهو قلبه الخلقه دي يا بوي هي اللي أقدر عليها ما أنا مش هاخرج عن طوعك!
-تفتكر يا سامي إني ممكن أعمل حاجه مش في مصلحتك؟
-لا يا بوي بس إنت خابر إني مش فاضي للجواز وعاوز أخلص الدكتوراه.
-بتنا سمر عتساعدك وما عتجفش في طريج الدكتوراه.
رد مستهترًا بها:
-وهي هتفهم إيه؟
-إنت فاهم إني جوزتك واحده مش متعلمه! طب إزاي يا ولد نوال ودي تعجل بردك، سمر خريجة ألسن قسم إيطالي، مش واحده إكده وخلاص، هتطلع من هنيه هتلاقي الحج نصراوي بره بعربيته هتطلع وراه بعربيتك تتعشي مع عروستك وتعاود، العجد إتجد هنيه عشان اللمه وهنيه بيت الكل، يالا يا ولد على عروستك.
......
دخل عمار للغرفة التي بها شيماء
مر بخاطره ليلة عقد قرانه على زهرة وأول عشاء له معها
ولكنه نفض هذا الخاطر من رأسه وجلس أمام شيماء قائلًا:
-مبروك يا شيماء جابلي الزاد.
وبدأ في تناول الطعام
-الله يبارك فيك.
وحبست حسرتها في قلبها وحاولت أن تأكل لكنها كانت تبتلع الطعام بصعوبة وكأنه غصة في حلقها
فتساءل:
-ليه ما بتاكليش؟
-معلش مش جعانه.
-ولا أنا جعان، ألف مبروك مره تانيه.
قالت وهي تجاهد لتكون متماسكة
-الله يبارك فيك ممكن أمشي أنا مرهقه من الصبح.
قال وكأنها فتحت له باب الفرج:
-اتفضلي.
وغادرت الغرفة تحاول منع دموعها من الانفلات
دخلت الملحق حيث تقيم وأطلقت العنان لدموعها وهي تكلم نفسها بصوت عال
"عاوزه إيه يا ست شيماء؟ كنتي فاكراه هياخدك في حضنه وإلا حتى هيبوس رآسك؟! افهمي يا غبيه ده مغصوب عليكي وعمره ما هيحبك.
ليأتي صوت دلال من ورائها
-تبقي غلطانه يا شيماء لو فكرتي كده!
فارتمت شيماء في حضن دلال تبكي بحرقة
-انتي ما شفتهوش يا دلال قالي مبروك بالعافيه.
فقالت دلال وهي تربت على ظهرها:
-يا خايبه، انتي عارفه كل حاجه، بشطارتك تملي قلبه وتخليه يفكر فيكي انت وبس.
قالت والأمل يتسرب لنفسها:
-تفتكري يا دلال؟
أجابتها دلال بثقة:
-طبعًا صدقيني عمار طيب قوي وراجل، بس هو كان متعلق بزهره، وما سمحش لنفسه يفكر في غيرها، وبابا دياب لولا إنه خابر إنك تجدري تاخدي مكان زهره في قلبه ما كانش جوزه ليكي بعد المده دي كلها.
لتأتِ نوال قائلة:
-اسمعي يا شيماء انتي بتموتي فيه، عشجاه زي ما بيقولوا هنا، خليه يحبك.
واستغرقن في حضن جماعي لتأتي بدور
-وأنا ما ليش في الحضن ده و إلا إيه؟ يا غلبانه يا بدور يا اللي ما لكيش حد في سنك يحضنك يا بدور.
لتنال ضربة على رأسها من الجدة نوال
-بس يا مقصوفه الرقبه.
.......
استقل سامي سيارته وراء الشيخ النصراوي ووصل منزلهم، أوقف سامي السيارة وراء سيارة الشيخ النصرواي ونزل فجاءه الشيخ نصراوي:
-اتفضل يا ولدي إحنا هنعزموا عليك في بيتك وإلا إيه إنت خلاص بجيت صاحب دار إنت جوز الغاليه حبيبة أبوها سنيورتنا سموره.
ابتسم سامي ابتسامه اغتصبها اغتصابًا لترتسم على شفتيه ودخل مع الشيخ نصرواي، جاءت والدة سمر وسلمت عليه
-يا مرحب بولدنا الغالي الجيد ابن الاجاويد ربنا يباركلكم في بعض، يا ابني حط سموره في عنيك واصبر عليها هي كييه الفرسه عاوزه المسايسه وأنا عارفه إنك خيال.
قال مبتسمًا بلباقة:
-في عنيا يا حاجه إن شاء الله ما ليش بركه إلا هي.
فأشار النصراوي لغرفة
-ادخل الجاعه دي عشان تاكل لجمه مع عروستك.
د. سمر ابراهيم ابراهيم السيد
خالد عبد الرحيم خضير العامري
آمال محمد صالح احمد
دعاء محمد علي الشاهد
زين دومه عبد العاطي الابوز
كريمان محمد عبد السلام عفيفي
دينا سعيد عاصم
رانيا ثروت فرج المصيلحي 
د. عزة محمد بركة
منى أحمد محمد إبراهيم
د. نهله عبد الحكم احمد عبد الباقي 
زينب حمدي 
د. عبد الوهاب المتولي بدر 
د. محمد عبد الوهاب المتولي بدر 
ياسر محمود سلمي 
حنان صلاح الدين محمد أبو العنين 
د. شيماء أحمد عمارة 
د. نهى فؤاد محمد رشاد 
م. اشرف عبد الصبور الكرم 
1
-2
