يعني أحنا بقى كده من هنا و رايح

مش هنكلم جيراننا 

ولا هنشرب معاهم قهوة الصباح كما تعودنا

و لا هنخرج سوا نتفسح

و لا هنسافر مع بعض

و لا هنتابع عند الدكتور فلان أصله مش زينا

و لا هنروح الكافيه إياه لإن صاحبه مش من ملتنا

و لا هنشتري طلباتنا من المحل الأمين ….أصله مش قريبنا

و لا أقولكم

مش هنعيش أصلااااااااا

و لما حد يسألنا ليه كل ده😳😳😳

هنقوله اصل فيه طفل إتهتك عرضه من متهم لسه لم تثبت إدانته من محكمتي الإستئناف و النقض🤔

لازم علشان طفل إتظلم من عدة أطفال إتظلموا من مسلمين زينا، لازم المجتمع كله يتفسخ

ب جد

انتم مصدقين نفسكم ؟!!!!!!!!!!!!!!

هي الجريمه ان المتهم مسيحي ولا الجريمه ان الجاني هتك عِرض و ظلم

يعني هتك العِرِض من مسلم …..كيوت

لكن من مسيحي ……ظلم 😳

هتك العِرِض في حد ذاته جريمه كبرى ب غض النظر عن الفاعل حتى لو كان من المحارم مش بس مسلم

المفروض لو احنا مجتمع بيفكر كنا عرفنا نصنف الجريمه بدون حزازيات دينيه

كل ما تحصل جريمه، نلبسها عباءة الدين

و الدين مننا براء

رسول الله صلى الله عليه و سلم في حادثة سرقه تم إتهام فيها ليهًودي، نزل القرآن الكريم و برأه

اللي يعرف اسلامه كويس ؛ يدرك ان المجرم لازم يتعاقب مهما كانت ديانته

ديننا نزل علشان يتمم مكارم الأخلاق و ليس ينقص مكارم الأخلاق

"إِنَّا أَنزَلْنَا إِلَيْكَ الْكِتَابَ بِالْحَقِّ 

لِتَحْكُمَ بَيْنَ النَّاسِ بِمَا أَرَاكَ اللَّهُ 

وَلاَ تَكُن لِّلْخَائِنِينَ خَصِيمًا،" سورة النساء

و ابحثوا في جوجل عن قصة اليهودي الذي برأه القرآن الكريم

اللي يكبر الموضوع

و يلبسه أثواب فوق ثوبه ليس متدين و طبعا ليس مصري

هو احنا لسه هنحكي في المحكي

لسه هنقول و نعيد عن المتربصين بنا

عدونا اللي من جوانا

مش سايبنا حتى في هذه الظروف الصعبه التي نعاصرها

مش مكفينا وقفتنا قصاد اكبر القوى في العالم

ناقصين نعمل ثغره في جبهتنا الداخليه !!!!!!!!!

النار لما بتولع، بتحرق الكل

مش هتسيب حد

احنا لسه مش شايفين من يصب الجاز القذر على النار

شكلهم و هم واقفين حول المحكمه ما فكرناش بحاجه ؟

مافكرناش بوقفات خالدسعيد ما فكرناش بالأطفال المكفنين في رابعه

هو احنا خلاص اتعمينا

عنينا مش جايبه الا الانفعال الأهوج

انا لا أستقل بجريمة هتك العرض لطفل

و لكن كل يوم و التاني هذه الجريمه الشنعاء النكراء بتحصل

بشمعنى هذه المره إتاجر بها بهذه الكثافه🤔

ما حدش نظره إلتفت لهذه التوليعه🤔

هي مصر ناقصه ولعه يا ناس يا هوووووووووه

و لما القنوات القذره التابعه للإخوان تستغل هذه الحادثه أسوأ إستغلال

برضه ما فقناش

و لا إنتبهنا 😳

هو احنا ناسيين ان القنابل التي ضربت بيوت العراقيين لم تفرق بين مسلم و مسيحي

ولا ناسيين الفدائيين الذين احتموا ببيت لحم و حاصرهم الكيان فإقتسموا مع بعضهم اوراق الشجر لسد جوعهم

كل ده خلاص نسيناه

و عيننا مش جايبه غير شو اعلامي قذر أُستغِل أسوأ إستغلال

انا بصراحه مش مصدقه ما اراه و أقرأه من المسلمين

اما المسيحيين فبأذكرهم بالقول الحكيم للبابا تواضروس

وطن بلا كنائس

خير من كنائس بلا وطن

فعلا رجل يستحق الكرسي الذي تقلده

رجل واعي و فاهم ما يدور حوله

أصل جيلنا عاصر فتنه طائفيه بسبب غسيل نقط على غسيل الجار اللي تحت في حادثه اسمها الزاويه الحمراء

ابحثوا عنها برضه في جوجل و انتم تعرفوا

بصراحه انا مش مصدقه ان العقلاء ممكن يتأثروا بتوليعة أهل الشر

انتم اعقل من كده

احنا كما نحن …..مهما فعل اهل الشر

احنا جيران و أصحاب و أهم من كده احنا مصريون على قلب رجل واحد ……وراكبين مركب واحد👍

يا ننقذها…..يا نغرق كلنا 👎👎

ولن نُفَرِح فينا الأعادي

و لن نوصل أهل الشر لهدفهم مهما عملوا

احنا كتله واحده

كلنا كتله واحده لا تتفكك

كلنا بنيان مرصوص يشد بعضه بعضا

كلنا بنكمل بعض

كلنا نسيج مصر الواحد 💪💪💪