أحترت…..أبدأ منين 

قلت مافيش أحسن من …..إني أبدأ من الآخر 

اللي هيقولكم إنه أحسن واحد و أحسن من الكل….لازم يفكركم بمن قال 

" أنا خيرُ منه " سورة الأعراف

افتكروا كده مين اللي قالها  و انتم تعرفوه كويس

و تعرفوا تكبره….على غيره

بمعنى

مش علشان واحد قدامنا ولا واحده مظهرهم الطاعه يغرونا

يبقى نتفق كده ان المظهر ده أسهل حاجه سواء كان نقاب أو ذقن …… و أهي الموضه دلوقتي بقت الذقن

يبقى نسيبنا من حوار المظهر ده 

و خلينا في المفيد

الذي أهدف له من كلامي 

طبعا انا بأعشق التفكر و التفكير و التأمل و الإستنتاج و الإستنباط 

انما لازم ناخد بالنا من حاجه مهمه

العقل وسيله…..توصلنا لباب السلطان

لكن……لا تدخل معنا لمقابلته

بمعنى

اننا كل واحد مننا عنده عقل يوصله للإيمان بوجود ربنا

أو عدم الإيمان…..هو حر

انما

إذا آمن بالله سبحانه و تعالى و برسوله سيدنا محمد صلى الله عليه و سلم…….عندها انتهى دور عقله #الا فيما لم يأتِ حكمه في القرآن الكريم من شؤون دنيانا

القرآن مش زي الدستور نوافق بشوية مواد و نرفض شوية مبادئ

لا

القرآن الكريم المحفوظ بقدرة الله سبحانه و تعالى مادمت انا آمنت بالله و رسوله لا ثالث لهم

يبقى لا أناقش في أوامره و نواهيه

خلاص انا مضيت على عقد الإسلام

مافيش تفاوض في الشروط…..خلصانه بلغة الشباب الجديد

فيه بس

" ربنا لا تؤاخذنا

إن نسينا أو أخطأنا" سورة البقره

فيه يارب

انا أسف

مش قادر اعمل كده

مش قادر اسيب هذا الذنب

لإن نفسي الأماره بالسوء أقوى منيي

مش قادر عليها فلقد اتحدت هي و ابليس عليَ

و مش قادر أقاومها

اقوم بقى ايه …..ازود من الأستغفار

أكتر من الصدقات

مش هاقدر اسميها توبه

لإن التوبه لها شروطها

اولها الندم على فعل الذنب

و تانيها نبطل نعمل الذنب

و ثالث شرط اننا ننوي ما نعملش الذنب تاني

( لكن برضه نحاول نتوب يوميا ربما نموت يبقى توبنا قبلها 🥲)

لذلك بنجد الناس المؤمنين بالله بيكثروا من التبرعات آملين ان الحسنات يذهبن السيئات

آملين في عفو ربنا العفو الغفور الغفار 

انما بقى

ما ألاقيهمش بيعلنوا بالصوت العالي ان هذا الموضوع لم يحكم الله فيه

معلش بقى

لازم يعترف ان ربنا حكم في موضوع معين

انما هو مش قادر ينفذه

ان نفسه الأماره بالسوء أقوى منه

و هذا هو سبب منشوري هذا

معلش يعني

انا اتقبل ان كل بني آدم خطاء عادي جدا

انما ما تقوليش ان ده مش خطأ

ساعتها بس هأقولك stop

ما تفعله خطأ

و ربنا يسامحك و يعفو عنك و يقويك على نفسك

طبعا انا لن أذكر حد معين بإسمه

ف

من كان منا بلا خطيئه…..فليرمها بحجر

كما قال سيدنا المسيح عليه السلام

و كل بني آدم خطاء

و خير الخطائين التوابون 

كما قال سيدنا محمد عليه السلام

و ربنا عارف اننا كلنا بنخطئ

لذلك جعل لنا الإستغفار ليطهرنا من اخطائنا

ونهانا عن المجاهره بالخطأ حتى لا نشجع غيرنا عليها

و جعل توبتنا بيننا و بينه سرا و لم يفضحنا أمام البشر

فليس بيننا و بين الله حجاب

أرجو اني أكون وضحت ما اقصده

* العقل و التفكر فيما لم يأتِ حُكمه في القرآن الكريم

**العقل و التفكر فيما يتبلوا به على رسول الله صلى الله عليه و سلم من مرويات هو برئ منها لكن النقل من رواه ثقاة يوضحون لنا ما خفي علينا من القرآن الكريم فمرحبا ولا حرج 

***العقل و التفكر في تفسير الحقائق العلميه التي يزخر بها القرآن الكريم و كل يوم بيتكشف لنا حقائق علميه تثبت ذلك ……سبحانه و تعالى

انما حد يقولي فكري في حقيقة أمر أو نهي منزل بالقرآن الكريم

لا sorry انا اعرف عربي كويس جدا بفضل الله 

و اقدر افهم معظم الكتب الصفراء بفضل الله

و أقدر بمعلوماتي التاريخيه و بتفكري بفضل الله اميز المعنى كويس جدا

في النهايه ألخص لكم الموضوع

بفضل الله وحده 

انا أملك الحقيقه 

التي نشأت و ترعرعت عليها و ادعو الله ان يقبضني عليها 

و القرآن الكريم هو مصدر ثقافتي و ليست كتب التاريخ المكذوبه و بصحبة القرآن الكريم عندي الشجاعه اني أغلط أي واحد في التاريخ 

و لكني لن اقول اني احسن منه لإن ربنا هو الحاكم الحكيم و يعرف ملابسات كل موقف و أولوياته

و أشهد ألا إله إلا الله وحده لا شريك له لم يلد و لم يولد ولم يكن له كفواً احد

و أشهد ان محمدا رسول الله صلى الله عليه و سلم 

لا ثالث لهم 

أقول قولي هذا و أستغفر الله لي و لكم