شهادة مميكنه

حدث بالفعل .. النهاره يوم ما اعتقدش انى ممكن انساه .. عملت نفسى شاطره و رحت اطلع مستخرج رسمى .. لازم انا اللى اطلعه بنفسى .. خط السير الخاص بهذا المستخرج .. و هو شهادة مطلوب انى اجيب اصلها و احولها لشهادة مميكنه .. الموضوع لو مشى زى ما الدولة منظماه .. كان اخد نصف ساعة .. لكن هو مشى تبع اللى بعض الموظفين قرروه .. كنت مستغربه من الناس وهى خارجه من عندهم و عمالين يقولوا حسبى الله و نعم الوكيل .. كنت زعلانه .. ليه بيحسبوا فيهم .. حرام ???? و الحقيقه و انا خارجه من عند اول موظفه لقيت نفسى باقول لا حول ولا قوه الا بالله .. و بعد الموظفه الثانيه كنت باقول حسبى الله و نعم الوكيل .. و الله عذرت الناس .. يا ترى الموظفين دول عيشتهم شكلها ايه و كل البشر دول بيحسبوا فيهم !!!! و رقة واحدة علشان اطلعها من سجلات العباسيه .. بعتونى محكمه زنانيرى و منها اخذت المستخرج الاصلى .. و عدت لسجلات العباسيه .. لتنظر الموظفه للورقه و تقول .. "روحى اعملى اعادة قيد فى السجلات اللى انتى تابعه لها" قلت لها .. "ده انا لسه جيباها حالا من زنانيرى" ردت بأسلوب لا اجد له مسمى "اعادة قيد" فقلت .. "طيب ارجع زنانيرى اصلح الشهادة" ردت بنفس الاسلوب : " اعادة قيد " مع نظرة مرعبه بصراحه .. قلت الطيب احسن قلت لها انا تبع قسم النزهه .. قالت روحى قسم النزهه انا : "حاضر" و ذهبت لسجلات قسم النزهه و بعد وصولى للموظف المختص نظر للورقه و قال : "مكتوب مصر الجديدة .. مش هنا .. روحى سجلات مصر الجديدة فى ميدان الجامع " انا : "بس انا طول عمرى تبع قسم النزهه" قال و هو يشير بأصبعه لكلمه مكتوبه باللغه السنسكريتية "مكتوب مصر الجديدة" نظرت للكلمه و قلت : "طيب" و ما حبتش اظهر جهلى اللغوى بالسنسكريتية .. و ذهبت لسجلات مصر الجديدة و بمنتهى الاحترام نظرت الموظفه الجليلة للورقه و قالت : "اذهبى لمدام (....) بسجلات الأميرية و قوليلها تعملك اعادة قيد" نظرت لها و عندى رغبه فى البكاء و بدأت اسرد لها تاريخ حياتى منذ الصباح و حتى هذه اللحظه .. و سبحان الله لقيت نفس رد و نظرات موظفه سجلات العباسيه " اعادة قيد " " اعادة قيد " " اعادة قيد " نزلت السلالم و انا أجر خلفى اثقال العباسية و زنانيرى و النزهه و مصر الجديدة لأذهب بهم لسجلات الأميرية لمدام (....) و قبل ان اخرج ذهبت لاحد رجال الامن اساله عن مدير المكان فقال لى "خير فى ايه" فحكيت له تاريخ يومى من اوله و طبعا و انا بأحكى كان نفسى اعمل زى الاطفال و أقعد اعيط و انهنه من البكاء .. لكن صمدت و يا جبل ما يهزك ريح .. و يا انا يا الورقه دى .. و عملت راسى براس الورقه اللى عايزه استخرجها المهم ربنا يباركله قالى: "اطلعى للاستاذة (؛؛؛؛) و قوليلها اللى حصل و هى هاتحللك المشكله دى" و كان منشرح و واثق مما يقول و اعاد لى الأمل .. و طلعت السلم و انا منشرحه لاذهب لمدام (؛؛؛؛) .. وفوجئت ان هى اللى بعتانى لسجلات الاميرية ???? لم انطق واخدت الشله كلها (عباسية و زنانيرى و النزهه و مصر الجديدة) وطلعنا على سجلات الاميريه و سألت يمين و شمال و فى الاعلى وجدت مدام (....) الحمد لله ست بشوشه ودودة و عملتلى اعادة القيد فى دقائق .. و عدت لسجلات مصر الجديدة للاستاذة (؛؛؛؛) .. طلبت شويه طلبات الحمد لله كلها معايا .. قالت لى تعالى بعد يومين خدى الشهادة و ارجعى بها لسجلات العباسيه لطباعتها .. يا ترى هاييجى اليوم اللى اشوف فيه الشهادة دى و هى مميكنه .. ربنا يدينى و يديكم طول العمر 

بنت الشهيد 

نهلة أحمد