سام 6 بتاع بابا

سام6 بتاع بابا و EDEX 2025

واضح إنها جملة غريبة على أُذن من لا يعرفني .. لانها جملة عادية بالنسبةِ لي ولمن حولي.

الحكاية إني أنبهرت بمعرض السلاح السنوي EDEX، وشعرت بإطمئنان كبير على حبيبتي مصر بإذن الله، وحسيت إن جند مصر بخير بفضل الله وبوعي قيادة حكيمة جداً الحمد لله.

وفي أخر يوم بالمعرض كان مازال بداخلي مخاوف من موضوع المسيرات (Drones)، وفي جناح سلاح الدفاع الجوي سألت، وكانت هناك الإجابة التي أثلجت صدري وأزالت مخاوفي ولله الحمد، وعرفت إن سماء مصر محفوظة بإذن الله برجال أشداء وسلاح متقدم.

وطبعاً في نهاية جولتي كان لازم أسأل عن سلاح والدي، صاروخ سام 6 (الكوادرات)، واحد من أعظم أعمدة نصر أكتوبر، وبتلقائية وأنا بأتكلم قلت الجملة التي أرددها دائماً "سام 6 بتاع بابا" فكرر الجملة ورائى أحد رجال السلاح، فأبتسمت وتعجبت من الجملة رغم ان أنا منْ قالتها!!!

ولما عدت للمنزل فكرت ليه دائماً أقول هذه الجملة "سام 6 بتاع بابا"؟؟؟

ووجدت الإجابة بداخل قلبي ..

فقبل حادثة إستشهاد بابا، طلب قائد اللواء العميد جميل طه من بابا (بحكم أنه قائد الكتيبة)، أن يتحرك بالكتيبة ويترك محطة رادار "سام6" التي كانت واقعة في حفرة، وقال لبابا:

"سيبها يا أحمد أنت أغلى منها"

بابا قاله الجملة اللى عمري ماهنساها أبداً 

 "دى واحد من عيالى ولايمكن أسيبها".

ساعتها فهمت ليه دائماً بأقول "سام 6 بتاع بابا".

لان "سام6" كان ابن لأبويا مثلي أنا وأخي، يمكن كمان أغلى، سابنى أنا وأخويا لكن مقدرش يسيب "سام 6"، لأن مصر كانت محتاجه "الابن ده" أكتر مننا.

لإنه كان واحد من الأيادي التي شاركت في إستعادة كرامة مصر ..

كرامتي وكرامة بلدي وأهلي ..

وعشان كده ..

بحب بابا

وبحب سام6

وبحب مصر.