خليك عادي .

" الموضوع بسيط خليك عادي جدًا، يمكن أكتر مشكلة بتخلي البعض ياخد منحنى بعيد عن حقيقته هي محاولة لفت الأنظار أو بالأحرى طموحه أنه يكون مميز، لكن بيتخدع وبياخد مسار للأسف بيبعده تمامًا عن التميز اللي بيرجوه، كون انك تكون عادي هو ده التميز " تكون عايش بالعادي بتاعك انت " العادي في ظل كل محاولات لفت الأنظار بالزيف وإظهار أمور على غير حقيقتها، يصبح تميٍز في حد ذاته.

 العادي أن تعيش انت بكل تناقضاتك، الحلو والوحش اللي بتحاول ديمّا تركز مجهودك بتحسينه، احنا مش ملايكة، فمهما حاولت تتدعي المثالية فده مش هيكون له أي تأثير في الصورة اللي بتهرب منها و تهرب ليه منك؟ تفتكر أن لو هربت من عاديتك مش هتكون مميز، بالعكس بالفطرة كدة احنا اصلا مختلفين، بصمة كل إنسان فينا مختلفة، بصمتك البيولوجية، والإدراكية سواء ادراك مشاعرك وانفعالاتها مع الحياة أو ادراك تفكيرك وفهمك للحياة، فطبيعي أن سلوكك وطباعك هتكون مميزة، هتبقى انت ومفيش زيك، ومن الآخر متشغلش بالك بفكرة انك تكون مميز اصلا، شيلها من دماغك، انت بس ركز تمشي عادي وتتكلم عادي وتلبس عادي وتدرس اللي تحبه عادي وتحب عادي وتفكر عادي، وتحلم وتحقق حلمك العادي، اقصد العادي بتاعك، مش اللي الناس بتشاور عليه انه حلو، عشان الناس تشوفك بتعمل الحلو فيقولوا عليك حلو ياحلو، وقتها هتبقى مميز بشكل غير عادي، احنا بس نركز نعيش وحاول نقرب لاقرب نقطة تخلينا مرتاحين .. قلبنا مطمن ، وعقلنا هادي، و روحنا ونفسنا بسلام وآمان ومحبة.