أنا لسا فاكر الوشوش

أنا هتكلم بصراحة ومحدش يضحك على كلامى

أنا لسه فاكر الوشوش بس بقيت بنسى الأسامي

بقيت بتلخبط مابين اللى بشوفه وأنا صاحي

ومابين اللى بشوفه فى أحلامي

التفكير قاتلني والحزن ماليني

حالة بتجيني مع كل أول شتا

ومش لاقيلها أي تفسير زى متقول كده

ملامحي باهتة وتحت عيني أسود

مبقتش حمل مناهدة روحى تملى

شاردة أعصابي باردة قلبى اللى عاش

وحيد بطوله فى ناس كتير ماسكينه

قلبى خلاص وقع وكترت سكاكينه

متفرق يجي على مية واحدة يقطعوا

فيه ويخلصوا منه واحدة واحدة

من وسط بستان قطفت بإيدي

شوكة كنت فاكرها وردة

بكتم الضحكة زى مبكتم الدمعة بالظبط

عايش فى دايرة كل اللى فيها مرضى

أو يمكن يكون العيب فيا

جميع الإحتمالات واردة

الدنيا على هزايمى شاهدة

تحية لكل حتة صامدة فيا ولسه بتقاوم

وتحية لكل جزء منى اكتفي بالمشاهدة

وشكرا لكل جرح ساب علامة

ولكل طبلة دقت على الراس

ولكل خبطة جامدة

لما تركز فى فى ملامحي هتشوف كل

حاجة أنت عاوز تشوفها

هتشوف كل حاجة حلوة

وكل حاجة بتحبها وكل حاجة

أنت بتكرها

أنا الطيب وأنا الشرير

أنا الغنى وأنا الفقير

بص فى عنيا هتشوف كل المباني والبيوت

والشوارع والحارات ركز هتلاقيني فى

الجوامع والبارات اعصر جسمي

هيطلع منه بنات شيل التراب

اللى على جبيني هتشوف كل الحكايات

ركز أكتر فى ملامحي فتش جوا منى

دقق كمان مرة هتلاقى كل الحاجات

أنا ابن إمبارح والنهارده

معرفش حل للى أنا فيه محتاج جروحي

تلتئم شوية أو على الأقل تهدا

أو حتى أعمل وياها معاهدة

أحسن أنا خلاص مبقتش حمل مناهدة