=قوم الحَق؛ مُش كلها بقت بتكلم عفاريت!
-إلهي تتهبلي أكتر ما أنتِ يا لئيمة وتمشي تكلمي نفسك ويحدفوكي بالطوب، في حد يصحِّي حد بالطريقة دي!
=أصل المواضيع اللي عايزة أحكيها مهمة ولازم تفوق.
-مواضيع إيه اللي مهمة عندك!
=ياما قُلت لك متعرَّفش حد إن في عفريتة عايشة معاك وبتكلمها وبتكلِّمك، والنتيجة أهي؛ كلها بقت بتكلم عفاريت، كل شوية أسمع عن حد فاكر إنه عايش مع عفريت أو عفريتة وبيتكلم معاه، ومُش فاهمين إن التواصل الطبيعي بين البَشر ومخلوقات العالم السفلي مش بيكون غير بالرموز والطلاسم، وميعرفوش إن مفيش عفاريت بتتكلم مع البَشر بشكل طبيعي غير أنا وأنت بس.
-ولمَّا الحكاية كِدَه قالبة دماغي ليه وبتقولي إن كلها بتكلم عفاريت.
=أصلها مش عفاريت زي ما هُمَّا فاكرين، دي أرانب سفلية.
-أرانب سفلية!
=طبعًا؛ والأرانب السفلية زيها زي أي كائن سفلي بيشتغلوا البشر اللي على نيَّاتهم وبيعملوا نفسهم عفاريت عشان بيفتكروا إنهم بيكلموا عفاريت بجد.
-طيِّب خلاص فُضّيها سيرة بقى، وكويس إنك عارفة إن الحكاية دي مش موجودة غير عندي أنا وأنتِ وبس، الباقي بقى يكلموا أرانب؛ يكلموا وطاويط، متقلبيش دماغي أنا أصلًا مش بيشغلني الكلام ده.
=ربنا يكمِّلك بعقلك، هو أنا طلعت لَك وعايشة معاك هنا وبنتكلم من فراغ، دَه عشان أنت عاقل.
-وأنا عشان عاقل ربنا ابتلاني بعفريتة هبلة.
=اللهم إني صائمة.

*

-واقفة قدام المراية بتعملي إيه يا زعفرانة! وبعدين ماسكة تليفوني وبتصوري نفسك سيلفي ليه! وإيه الجاكيت الجَمَلي اللي لبساه ومش مبطلة تتصوري بيه ده!
=دَه الجَملي هوَّ أملي.
-الله؛ أنتِ وصلتي للحكاية دي يا زعفرانة؟
=أصل الست لطفات...
-يادي النيلة، مالها الست لطفات!
=الدنيا كانت بتمطَّر وهي بتنشر الغسيل، وشُكري جوزها فضل يزعق ويقول هتنشري الغسيل في المطر إزاي.
-عنده حق، سؤال وجيه ومحتاج إجابة.
=المهم الست لطفات زعقت فيه وقالت له: إيه اللي فهِّمك في الغسيل حُط لسانك في بوقك.
-والله كويس إن شُكري جارنا لسَّه محتفظ بلسانه، أنا فاكر الست لطفات قطعته من زمان.
=لأ لسانه موجود، المهم كلمة من هنا وكلمة من هنا، والست لطفات قالت له إن الهدوم لسَّه مبلولة وهتغطِّيها بمشمَّع لحد ما المطر يخلص.
-كلام منطقي ونظرية برضه.
=المهم دخلت تجيب مشمَّع وطلعت البلكونة تاني؛ لقيتها لابسة الجاكيت الجَملي ده ولابسة الزعبوط بتاعه عشان المطر.
-الست لطفات دي عليها ألوان غريبة بصراحة، أنا أوِّل ما شُفتك لابسة جاكيت زيها افتكرت جَمَل داخل عليا، خصوصًا إن ديلك نفس اللون.
=ما أنا لسَّه هقول لَك، الست لطفات طلعت البلكونة بالجاكيت من هِنا، وشُكري جوزها طلع من شباك البلكونة من هنا وفضل يقول لها: أيوه يا جَمَل. الجَمَلي هوَّ أملي.
-عشان كده حفظتي الكلام زي ما بتحفظي الخناقات وجاية تصدَّعيني، إن شاء الله تقعي في إيد اللي في بالي بالجاكيت ده ويفتكرك جَمَل ويطبخك قبل عيد الأضحى، ويعمل منك سندوتشات ويقول للي بياكلوكي حُطوا كالونيا.
=وأنا مالي، يروح يطبخ الست لطفات ما الجاكيت بتاعها.
-ما اللي يلبس جاكيت جَمَلي زي دَه مينفعش يتقال له غير لطفات فعلًا.
=عندك حق.
-لحظة يا زعفرانة، من إمتى وأنتِ بتلبسي جواكيت أصلًا، أنتِ عفريتة ومش بتبردي.
=ما أنا كُنت لسَّه هقول لك، أصل أوِّل ما شُكري جارنا قال للست لطفات الجَمَلي هوَّ أملي اتخانقت معاه، وقالت له هو أنت فاكرني ناقة ولا إيه!
-عنده حق، أنتِ نفسك في الجاكيت دَه شبه الناقة، ما بالك بقى الست لطفات.
=الله يسامحك مش هرُد عليك، المهم العاركة بدأت بينهم، أصلها افتكرت إنه بيتنمَّر عليها ومتعرفش إنه بيحاول يعاكسها بَس لسانه دَبش.
-بصراحة لا شُكري جارنا بتاع معاكسة ولا الست لطفات وِش حد يتعاكس، دَه لو برنامج خلف الأسوار لسَّه موجود كان عمل معاهم شغل عالي أوي.
=عارفة البرنامج دَه؛ كان كويس.
-تعرفيه منين يا زعفرانة؟
=دَه سؤال برضه، ما هو كل واحد بيعمل مصيبة بيكون وراها وسوسة شيطان، والشياطين تبع العالم بتاعنا، وكلها علبة كبريت ومفيش أخبار بتستخبى، كل ما شيطان يوسوس لواحد ويعمل جريمة بينزل في العالم بتاعنا ويفتخر بنفسه، والأخبار جابت بعضها وعرفنا إن الجرايم دي كان بيتعمل عنها البرنامج اللي بتقول عليه.
-يا ساتر على الرغي، خلاص فهمت.
=المهم لما الخناقة قامت بينهم؛ شُكري جارنا نفخ صدره وقال للست لطفات: عدِّي يومك إحنا في رمضان ومش عايز أفطر عليكي.
-جاله قلب يقول لها كده؟
=زي ما بقول لَك، وهي قالت له ما أنت كده أو كده فاطر.
-والأخ شكري طلع فاطر ليه، إيه عذره إن شاء الله!
=ما هو مطلعش فاطر بجد، أنا فهمت إنها بتقول له كده عشان هو اتنمَّر عليها واعتبرت إنه بِكِدَه خِسر صيامه.
-والله أنا اللي هخسر صيامي بسبب الجيرة الهباب دي وبسببك.
=بس الكلام فضل رايح جاي بينهم لحد ما اتصافوا قبل الفطار بشوية.
-الحمد لله، أول خناقة تحصل ومتطوِّلش.
=بَس الست لطفات انشغلت في الخناقة بقى ومطبختش.
-أومال هيفطروا إيه؟
=شُكري جارنا طلع جنتل مان، قال للست لطفات حطي الجاكيت ده في البلكونة ينشف من المطر؛ وتعالي نفطر برَّه، وأخدها ونزلوا قبل المغرب.
-زمانه هيفطَّرها عند الجَملي هوَّ أملي، والخناقة هتقوم بينهم هناك تاني.
=مالناش دعوة إحنا بقى، طالما بعيد عن شبّاكنا ميخصّناش.
-يعني مش هتروحي وراهم هناك؟
=عاوزني أروح هناك بالجاكيت الجَمَلي دَه؟ عشان يفتكرني جَمَل ويعملني سندوتشات للزباين ويحُط عليا كالونيا.
-صحيح يا زعفرانة، بتقولي إن الست لطفات سابت الجاكيت بتاعها في البلكونة؛ مُش كده؟
=أيون؛ عملت زي ما شُكري جوزها طلب.
-أوعي يكون الجاكيت اللي عليكي دَه يبقى اللي في بالي.
=لو أخدت بالك من كلامي اللي فات كنت عرفت إنه هوَّ الجاكيت، أنا قُلت أجرَّبه أصل أوِّل مرَّة أشوف حد يلبس جاكيت باللون دَه، بيني وبينك، من وقت ما لبسته وأنا حاسَّه إني طالع لي سنامين في ضهري.
-لأ وأنتِ الصادقة عندك سنامين في مُخِّك، من إمتى يا لئيمة بناخد حاجة الناس!
=أصل الجو برَّه رطوبة ومكانش هينشف، قُلت أجيبه أنشِّفه على ما الست لطفات ترجع، وبالمرَّة جرَّبته.
_روحي يا هبابة رجَّعي حاجة الناس مكانها.
=خلاص متزعَّقش، أنا أصلًا كنت هرجَّعه من نفسي لأن زمانهم فطروا وعلى وصول.
_بتقولي زمانهم فطروا؟
=أيون.
_ليه؟ هو إحنا إمتى يا زعفرانة؟
=المغرب أذن من ساعتها والعِشا قرَّبت.
_وحياة أبوكي حبَّهان، مش أنا قايل لِك تصحِّيني قبل المغرب بنُص ساعة.
=ما أنا انشغلت في الخناقة بتاعتهم، ومأخدتش بالي غير وباب الشقة عندنا عمَّال يخبَّط.
_مين اللي كان بيخبَّط؟
=الدليفري.
_تاني يا زعفرانة!
=ما أنا اتصرَّفت بعقل المرَّة دي.
_عملتي إيه يا هبابة؟
=قلِّدت صوتك وزعقت فيه وقُلت له: سيب الأكل قدام الباب وروح أنت.
_بالذمة ده ينفع برضه!
=ما أنا لقيته بيقول: يعني بعد ما تلطعني نص ساعة على الباب واتأخرت على باقي الأوردرات والمغرب أذّن تقول لي سيب الأكل وروح أنت. وبعدها سمعت صوت حاجة اترزعت.
_طبعًا رزع الأوردر، أقل واجب وعنده حق.
=لأ وعلَّى صوته كمان، بس مُش أحسن ما أفتح الباب وميشوفنيش ويفتكر الباب اتفتح لوحده ويقول علينا شقة مجانين.
_لأ اطمني يا زعفرانة، هي كلها شهر واحد وهشيل اسمي من على الباب وهكتب مكانه السرايا الصفرا.
=لأ خليها الحمرا عشان العفاريت مش بتحب اللون الأصفر.
_دي ودانك اللي حمرا يا زعفرانة، وطبعًا سايبة الأكل مرمي قدام الباب برَّه.
=لأ طبعًا، حد برضه يسيب نعمة ربنا في الأرض.
_أيون يعني فين الأكل؟
=ما أنا جيبته بعد ما الدليفري مشي، عندك برَّه على الترابيزة.
_اسمها عندك برَّه! حسابي معاكي بعدين.
=أنت مبتزهقش من الحساب ده، ربنا يستر.
_إيه ده يا لئيمة؟
=إيه؛ الأكل مش موجود!
_الشوربة مقلوبة يا زفتة.
=أكيد عشان الدليفري الغبي رزع الأكل قدام الباب، أنا مش هسيبه وهلبسه وهعفرت المطعم ده.
_زعفرانة؛ شيلي إيدك وديلك من الحكاية دي، معادش فاضل غير المطعم ده، الباقيين كلهم طفشوا بسببك.
=خلاص مش هعمل حاجة، وبعدين زعلان على الشوربة أوي، في حد برضه يشرب الحاجات دي!
_مالها الشوربة يعني مش فاهم.
=هكلمك بلغتكم عشان تستوعب مالها الشوربة، الفراخ بتبقى مستحمية فيها.
_مستحمية!
=طبعًا، بتبقى نايمة في الحلة كأنها نايمة في البانيو.
_إيه اللي بتقوليه ده يا هبابة أنتِ، عفريتة خرفانة صحيح.
=يعني اللي بقوله غلط؟
_غلط وعَك وهبل، عشان هي اسمها شوربة، مفيش فراخ بتستحمى ولا حاجة، وبعدين أنا أصلًا مش بشرب غير شوربة خضار.
=الخضار كمان بيستحمى؟
_أنا اللي شكلي هقوم أغرَّقك في البانيو، يعني خليتي الدليفري يرمي الأكل والشوربة تندلق، وفي نفس الوقت سدِّيتي نفسي.
=متزعلش نفسك، شويه ونفسك هتتفتح واتسحر، أصلًا السحور كلها ساعتين.
_لأن سيادتك سيباني نايم وصحَّتيني متأخر عشان شاغلة دماغك بلطفات وجوزها والحكايات الفاضية بتاعتك، أمري لله هاكل اللي باقي ومش ضروري شوربة النهاردة.
=ما تجرَّب تشم بخور، خفيف على المعدة وينعش الرئة ومش بيعمل تُخمة.
_إلهي تدخلي إنعاش عفاريتي ويفضلوا ينعشوا في الرئة عندك ويفشلوا وأرتاح منك.
=دعوتك جَت على فاشوش العفاريت مالهاش رئة، إحنا مناخيرنا بتوزع الأوكسجين على الخلايا مرة واحدة.
_ يعني أنتِ كده من غير عقل ورئة يا زعفرانة، شكرًا على المعلومة.

*

"يالهوووووي"

*

_مين اللي بيصرخ ده يا هبابة؟
=دي الست لطفات، أصلها رجعت من برّه لقت شُكري جوزها قاعد في الصالة.
_وهي الواحدة لما ترجع تلاقي جوزها قاعد في الصالة تصرخ كده!
=لأ ما أنت مش واخد بالك، ما هو كان في نفس الوقت راجع معاها وواقف جنبها.
_ده اللي هو إزاي يعني، شُكري قايم بدورين ولا إيه؟
=شُكري إيه بس اللي دورين هو بيت، ناقص تقول لي الست لطفات هتروح تطلع له رُخصة من الحي.
_أنتِ بتهزري يا زفتة!
=لأ مش بهزر، بس أنت مش واخد بالك من اللي حصل.
_طيِّب نوَّريني.
=أصل الست لطفات أول ما دخلت الشقة شافت شُكري قاعد، بحلقت فيه وقالت له أنت إزاي قاعد هنا يا راجل وفي نفس الوقت كنت معايا برَّه وواقف جنبي دلوقت، ولسّه بتلتفت جنبها عشان تشوف شُكري اللي راجع معاها لقت نفسها واقفة لوحدها.
_إزاي ده؟ وإزاي أصلًا شُكري طالع بدورين.
=لأ ما اللي خرج معاها مكانش شُكري.
_أومال كان مين؟
=يا دي النيلة، خلاص هقول لَك الحقيقة وأمري لله، اللي خرج معاها كان أرنب سُفلي، ما أنا قُلت بقى بما إن كلها بقت بتكلم عفاريت اشمعنى الست لطفات، بعت طلبت أرنب سُفلي من القبيلة عندنا كان قاعد من غير شُغل، ووصِّيته يعمل معاها الواجب.
_ده اللي هوّ إزاي يا زعفرانة!
=بسيطة، الأرنب دخل شقتهم متخفِّي، واستغل إن شُكري راح في النوم على نفسه هو قاعد كالعادة، قام اتجسِّد في هيئته ودخل ورا الست لطفات البلكونة لمَّا لبست الجاكيت الجَمَلي وبدأ يقول لها كلام حلو.
_الجَمَلي هو أملي كلام حلو؟
=أصل الأرنب أول ما دخل العالم بتاعكم لقى نفسه قدَّام المسمط إياه، وسمع الجملة وعلَّقت معاه، وبعدين بالنسبة للست لطفات حلو، مش أحسن من شُكري جوزها اللي زي خيبيتها ومبيعرفش يجمَّع كلمتين على بعض.
_وأنا اللي فاكر إن شُكري أخيرًا اتلحلح وقال كلمتين حلوين حتى لو عَك، وفي الآخر يطلع أرنب سُفلي من اللي بتقولي عليهم، لأ وإيه؛ في الآخر اتخانقت معاه برضه.
=أصلها سِت نِكديَّة، لا نافع معاها بَشر ولا أرانب سفلية، بس قُلت أعمل محاولة وخلاص، وقُلت اشمعنى هي اللي مش هتكلم أرانب سفلية عاملة نفسها عفاريت، ده أنا خليتها تكلمه وتخرج معاه كمان.
_وكانت إيه النتيجة يا زعفرانة، الست في الآخر جالها صرع.
=هي دي بيجرى لها حاجة، ده زمان الأرنب السفلي راح لدكتور بيطري عفاريتي بسببها.
_إن جيتي للحق، أنتِ اللي عايزة تروحي لدكتور بيطري.
=إحنا في رمضان ومش هرد عليك.
_كل الرغي ده ومش هتردي، أومال لو رديتي كان حصل إيه!
=لأ أنا مُش هرُد عليك عشان مركِّزة مع اللي بيحصل هناك دلوقت.
-هناك فين وإيه اللي بيحصل!
=أصل من وقت ما الست لطفات صرخت والعاركة دايرة، وشُكري جارنا عرق الرجولة نَقَح عليه، وزعق في الست لطفات وقال لها: أنتِ إزاي تخرجي من ورا ضهري يا وليَّة.
-قال لها يا وليَّة؟
=طبعًا، الحَمشَنة ظهرت عليه فجأة.
-وهي قالت له إيه؟
=قالت له: هو أنت فيك ضَهر يا راجل عشان أخرج من وراه، وبعدين ما أنت كنت معايا.
-بيني وبينك الست لطفات أدرى بحكاية الضَّهر دي محدِّش يقدر يحكم غيرها، ولو عرفت بحكاية الأرنب السفلي ده مش بعيد تلبِّسها لشُكري وتفتكر إنه عامل لها عمل وتبقى ليلته هباب.
=ما هي مش هتعرف، وبعدين هُمَّا تجاوزوا النقطة دي في الخناقة، لحد ما قال لها: أنا دخلت البلكونة لقيت الجاكيت الجَمَلي بتاعك متعلَّق على حديدة المنشر، قُلت إنك وقعتي من البلكونة رقبتك انكسرت والجاكيت اتعلَّق في الحديدة.
-بصراحة دي أمنية حياة شُكري جارنا، بَس في الحالات دي القَدَر دايمًا بيكون له رأي تاني.
=أنا مُش عارفة لو الست لطفات دي جرى لها حاجة هستحمل العيشة هنا إزاي.
-طبعًا عندك حق، ده أنتِ ناقص تجيبيهم يعيشوا عندي.
=تصدق فكرة برضه.
-هرزعك على وشك بضهر إيدي زي الخدامين يا زعفرانة.
=وعلى إيه بَس أنا بهزر، المهم الست لطفات قالت له: دَه بعينك يا شُكري قاعدة على قلبك.
-بالحق يا زعفرانة؛ إيه اللي علَّق الجاكيت على حديدة المنشر، مُش المفروض هي سيباه على الحَبل، ولما تروحي ترجَّعيه تحطيه في مكانه.
=أصل الجاكيت تقيل وحِبال الغسيل دايبة، قُلت يبقى في الأمان وأعلَّقه على حديدة المَنشر.
-دايبة أه!
=أصل الست لطفات طلبت من شُكري أكتر من مرَّة إنه يجيب حِبال غسيل جديدة وهو بينسى، قُلت بقى لو حصل اللي في دماغي والحَبل وقع بالجاكيت هتفتكر وهتقوم عاركة بسبب الحكاية دي، قُلت أتصرَّف، أنا مش حِمل الخناقات بتاعتهم ولا عندي طول بال ليها.
-أومال لو عندك طول بال لخناقاتهم كنتي عملتي فيا إيه!
=بَس الحكاية دي قامت بسببها خناقة من كام يوم، ده حتى قالت له:...
-اسكتي يا زعفرانة بقى، يخرب بيت الرغي.
=دَه أنا هحكي لَك على السريع.
-بلا سريع بلا بطيء، أنا دماغي صدَّع.
=خلاص مش هحكي حاجة، حتى إحنا في رمضان والواحد مالوش طول بال يتكلم، وبعدين دي برضه أسرار بيوت.
-صح يا زعفرانة أسرار، ده مفيش حد عايش في أي مكان على الخريطة مبقاش يعرف شُكري ولطفات.
=ما أنت السبب عشان بتحكي خناقاتهم للمتابعين.
-أنا السبب برضه ولا أنتِ اللي بقيتي عايشة في الشبَّاك ديلك عندي وراسك عندهم.
=خلاص بقى أهو اللي حصل.
-أنتِ يا هبابة ادخلي من الشباك بقى.
=لحظة بَس بشوف إيه اللي بيحصل هناك.
-تاني يا زعفرانة؟ هيكون إيه بيحصل يعني غير خناقة جديدة، ما أنتِ مفيش حاجة بتشدِّك غير الخناقات.
=لأ اللي بيحصل غريب، دول بقوا زي السمنة على العسل.
-فعلًا حاجة غريبة، المفروض وسائل الإعلام تنزل خبر عاجل وتقول: الست لطفات وشُكري جوزها بقوا زي السمنة على العسل.
=وسائل إعلام ليه يعني أنت مقصَّر في حاجة، ما كل اللي بحكي عنه أنت بتطلع تنشره.
-عقبال ما أنشر الخبر اللي أقول فيه إني ارتحت منك.
=بعيد الشر عني، وبعدين خليني أركِّز بقى، دي الست لطفات لبست الجاكيت الجَمَلي وصوَّرت نفسها صورة سيلفي وبتقول لشُكري إنها هتحطها بروفايل واستوري على الفيس بوك، وهو قال إنه هيعمل لها ريآكت قلب.
-إن شاء الله الاستوري دي هتسمَّع والست لطفات هتتقفش بالجاكيت الجَمَلي ده، وكلها يومين ونشوف معمول عنها ريلز وبيتقال عنها الجَمَلي هوَّ أملي، وساعتها هتكون بتتعبَّى في سندوتشات وبيتحط فوقها كالونيا وطحينة.
=أو تستحمى في حلة ويتعمل عليها شوربة، وتبقى اسمها شوربة الست لطفات.
-طيِّب ادخلي يا زعفرانة واقفلي الشباك ده؛ بدل ما أزقِّك تتقلبي في الشارع.
=كده هنزل على راسي وأموت، أنا مش من الجِن الطيَّار.
-بلا طيَّار بلا بحَّار، ادخلي.
=من غير ما تشدِّني من ديلي بس.
-ماشي، هروح أنا أشرب شوية مَيَّه بعد الرغي ده لأن الفجر هيأذن.
=ربنا يستر.
-فين الكوبايات يا زفتة.
=أنت بتكلمني؟
-وهو في حد هنا غيرك، الكوبايات تطلع يا زعفرانة وإلا يومك مش هيعدِّي. عاجبك أهو الفَجر أذِّن من غير ما أشرب كمان.
=كويس، صوم خفيف وأهو كله فايدة للصحة.
_أنا بقى هسلِّي صيامي عليكي لحد ما أعرف الكوبايات راحت فين.
=عشان تبطل تحبسني تحتها، أنا أخفيت كل الكوبايات.
-لأ ناصحة يا زعفرانة، بَس إلا الكوباية دي؟

*

=ارفع الكوباية، هو أنت مش بتسيبها في المطبقية مع الكوبايات؟
-فكراني ساذج يا بنت حبهان، هسيب لِك الكوباية اللي بحبسك تحتها برضه!
=ده أنت مُش سَهل وأنا كعفريتة معرفتش حاجة زي دي، وبعدين الكوبايات كلها شكل بعضها وكنت فرحانة إني خلصت منها.
-إنسي يا زعفرانة، بقى تضيَّعي عليا الفطار والشوربة تندلق، وتضيعي عليا السحور، ومصدعة دماغي طول الليل بحكايات فاضية، والناس اللي بتكلم أرانب سفلية وبتقول إنها بتكلم عفاريت، وفي الآخر بتشتغلي الست لطفات وتخليها تخرج تفطر مع أرنب سفلي عامل نفسه شُكري وتوقَّعيها في جوزها، وسارقة الجاكيت الجَمَلي بتاعها، والجَمَلي هوَّ أملي، وفي الآخر مخبِّية الكوبايات!
=ما أنا قُلت لك، الجَمَلي هوَّ أملي الأرنب السفلي طلع عارفها وقالها للست لطفات لمَّا عمل نفسه شُكري جوزها.
-وبيحُط كالونيا برضه؟
=لأ مُش بيحط، العفاريت مش بتحب الروايح دي وبنتخنق منها، إحنا مالناش غير في البخور وبس.
-حلو يا زعفرانة، وعشان دي معلومة أنا عارفها؛ فأحب أعطَّر لِك المكان تحت الكوباية.
=بطَّل ترُش من الإزازة دي تحت الكوباية، الكلونيا دي هتخنقني.
-ياريت، ولا أقول لِك، دَه أنتِ لو خلصتي في إيدي دلوقت روحك هتطلع تقف مكانك في الشباك، ولأن روحك أكيد هتبقى رغَّاية زيك وأكتر منك، فأنا هصدَّع أكتر لمَّا تنقل اللي بيحصل في شقة الست لطفات.
=شُفت بقى إنك مينفعش تموِّتني، البني آدم لما بيموت بيطلع له عفريت، تخيَّل بقى العفريت لما يموت بيطلع له إيه؟
-بيطلع له إيه يا زعفرانة؟
=تصدَّق دي لسَّه معرفهاش.
-يبقى خليني أعرَّفك، بيطلع له واحد زي حالاتي يحطُّه تحت الكوباية.
=طيِّب خلاص ارفعها بقى، أنا رجَّعت الكوبايات مكانها في المطبقية ومش هعمل حاجة تاني.
-كل مرَّة بتقولي كده، أنا عايز ضمان يا زعفرانة إنك مش هتعملي حاجة وتعدِّي الشَّهر دَه على خير، أنا لا بقيت عارف أفطر ولا أتسحر ولا أعمل حاجة منِّك.
=خلاص هدخل الدُّرج ومش هتشوفني غير آخر رمضان.
-ماشي يا زعفرانة، يلا على الدرج، وإن شاء الله تفطسي وأرتاح منِّك.
=هو ينفع أقول الجَمَلي هوَّ أملي وأنا في الدرج؟ أصل عجباني الجملة أوي وكل ما أفتكر الست لطفات وهي لابسة الجاكيت الجَملي ببقى عاوزة أقولها.
-طبعًا ينفع يا زعفرانة، وبالمرَّة هجيب لِك نوع البخور اللي بيطرد العفاريت وبيخنقها وأولَّعه جنبك وأنتِ محبوسة، عشان ريحته تُقف في زورك وأخلص منك، وبالمرَّة وأنتِ بتقولي "الجَمَلي هوَّ أملي"؛ تقولي: "بخوري وقف في زوري".