حكاية المركب 

كبِرت وأنا بشوف المركب دي قدامي، أصل أنا من مدينة ساحلية، أهلها عايشين على الصيد، يعني متعودين على المراكب والبحر، بس اتعودنا نشوف المراكب وهي رايحة جاية، إنما المركب اللي واقفة على طول دي، مش بتكون فال خير أبدًا.

المركب كانت قديمة ومهجورة، مرمية على شط البحر؛ وبحكم بيتنا اللي كان في وش المايَّه، كنت بشوف المركب دي صبح وليل، لكن عمري ما قربت منها، ولا شوفت حد بيقرب.

كل اللي نعرفه عنها؛ إن المركب دي كانت تبع واحد عنده كذا مركب، لكن غرقت من سنين طويلة وكان عليها ٦ أشخاص؛ غرقوا كلهم، والمركب اختفت تحت المايَّه، لكن بعد سنين طويلة، المركب بدأت تظهر تاني بالتدريج، التيار كان بيجرفها على الشط، وفي يوم منسوب البحر كان منخفض، الصيادين سحبوا المركب للشط، ومن يومها وهي في مكانها ده.

المركب مكانتش تصلح لإنها تتجدد، كومة خشب ملهاش لازمة، الكابينة متدغدغة وجسمها متكسر، مفيش حد هيصرف عليها، اللي هيتصرف عليها يجيب مركب جديدة، وده سببب إن محدش قرب منها.

وفي ليلة؛ كنا بنلعب كورة بعد المغرب قُرب المركب، والليل دخل علينا، لكن واحد معانا ربنا يكرمه بقى، شاط الكورة ودخلت في المركب، ومحدش من اللي بيلعبوا كان راضي يروح يجيبها، حتى اللي شاطها، ولأنها كورتي، قررت أروح أجيبها، روحت عند المركب ودخلتها لأول مرة، وبدأت أدوَّر على الكورة.

مكانش لها أثر، رغم إني شايفها بعيني وهي داخلة المركب، فضلت أدور لحد ما توازني اختل فجأة، لأن المركب كانت بتتحرك، في البداية افتكرت إن الموج بيهزها، لكن مع الوقت اتضح لي إن المركب ماشية في المايَّه!

قلبي وقع في رجلي، إزاي المركب بقت وسط البحر فجأة وماشية عادي، مكنتش مصدق اللي بيحصل، في وسط ده سمعت صوت من الكابينة، بصيت ناحيتها؛ ولمحت جواها خيالات، حاجات أشبه بالظلال، معرفش ليه كنت بتصرف عكس الخوف اللي جوايا، رجلي كانت وخداني ناحية شباك الكابينة، ولما قرَّبت، لقيت إن جواها ٦ أشخاص، واحد منهم ماسك دفِّة المركب وسايق، والباقي واقفين وراه، لساني اتلجم، وحسيت إني معدتش قادر أتحرك.

الموقف كان أكبر من إني أتحمله، صرخت بصوت عالي، وفي اللحظة دي أخدوا بالهم مني، بصوا لي فجأة، ولقيت إن أجسامهم غريبة، زي ما تكون متحنطة، أو على وشك إنها تبقى هيكل عظمي، عيونهم كانت بتنوَّر، كان النور اللي خارج منها مايل للأزرق، وفجأة صرخوا في وشي في نفس واحد.

وقعت في الأرض؛ وفي اللحظة دي حسيت بإيد على كتفي، جسمي اتلبِّش في بعضه، رفعت وشي وأنا عارف إني هلاقيهم محاوطينّي، لكن لقيته واحد من اللي بيلعب معانا، بلعت ريقي لما شوفته وقال لي:

_بتصرخ ليه؟

مقدرتش أجاوبه، كنت لسه تحت تأثير الصدمة، مجاش في بالي أصلًا إني أحكي له، واكتفيت بإني قولت له:

_مش لاقي الكورة.

شاور على الأرض جنبي وقال لي:

_ما الكورة جنبك أهي يابني، يلا عاوزين نكمل الماتش.

فعلا الكورة كانت جنبي في الأرض، معرفش إزاي مكنتش واخد بالي منها، مسكتها في إيدي وزميلي مسكني من إيدي التانية، وساعدني على شان أقوم، بمجرد ما وقفت بصيت بخوف في الكابينة، كانت فاضية وهادية زي ما اتعودت أشوفها من بعيد، ومكنش فيها أي حد.

نزلت من المركب وأنا بفتكر حاجة غريبة، إن كلنا عارفين إن اللي غرقوا مع المركب ٦ أشخاص، وهما دول اللي شوفتهم في الكابينةمن شوية، أو بمعنى أدق؛ شوفت أشباحهم، على شان كده روحت كملت لعب وأنا مرعوب، بس كنت مضطر على شان محدش من زمايلي يتريق عليا، لكن كنت غيرت فكرتي عن المركب، لأني الوحيد اللي عرف إن المركب مش قديمة بس، دي طلعت مسكونة كمان بأشباح اللي غرقوا معاها.

تمت...