**
في نفس اليوم...
المكان: الفيلا.
السّاعة 2 مساءً.
أوّل مرّة اسيب شُغلي واخرُج منه قبل ميعادي، بَس بعد اللي حصل معايا هناك كان لازم اعمل كِدَه، كمان اللي حَصَل في الطريق خلّاني اتوتّر أكتر وافقِد أعصابي.
رَكَنت عربيتي بعد ما سألت عم محروس عن أي جديد حَصل لكنّه قالّي مفيش غير إنّه لَمَح ميّادة الممرضة سايبة ابويا في أوضته وبتتمشّى في الجنينة ناحية باب الورشة، وانّه نَدَه عليها ولمّا سِمعِتُه بصّتلُه ودخلت تجري جوّه الفيلا.
بمجرّد ما سِمِعت كلامُه دَخلت الفيلا وانا بجري، أوّل حاجة عملتها انّي طلعت اوضة ابويا عشان اطمن عليه واشوف ميّادة، ولمّا فتحت الباب المرّة دي بدون ما اخبّط لقيت ميّادة قاعدة على الكرسي جنب ابويا وبتقرأ في كتاب كان في ايدها، أوّل ما شافِتني استغربت انّي رِجعت في الوقت ده وقالتلي...
-خير يا دكتور مهند.. راجع بدري عن ميعادك في حاجة حصلت؟
تجاهلت سؤالها وسألتها...
-انتي نزلتي الجنينة تَحت النهاردة يا ميّادة؟
-لا منزِلتِش.. هو في حاجة حصلت؟
سيبتها وخرجت، روحت أوضتي ووقفت قُدّام الشبّاك ابُص على الجنينة، والوقت خدني ومحسّيتش بنفسي غير وعم محروس ماسك خرطوم المَيّه وبيروي في الزرع، ساعتها عرفت اننا بقينا بعد العصر لأن دَه الميعاد اللي اتعوّد يروي فيه، وحاجة في بالي خلّتني اروح اطمّن على ابويا، روحت اوضته واتعمّدت تاني افتح الباب من غير ما اخبّط، دخلت ولقيت ميّادة رايحة في النوم على الكرسي، قرّبت منها وبصّيت للكتاب اللي كان مفتوح على رِجلها، كان عندي فضول اعرف هي بتقرأ إيه بعد اللي قاله عم محروس البواب وهي أنكرته، لكن الكتاب اللي كان مفتوح على رجلها كان رواية مترجمة.
قرّبت من ابويا اللي كان بيبُص للسّقف كالعادة، واتفاجأت انّه انتبهلي وبصّلي، حسّيت في عينيه انه عاوز يقول حاجة، لكن عجزه عن الكلام كان مانعه، بَس لمّا بصّلي شوية وبدأ يحرّك راسه عينه راحت ناحية الشبّاك، وساعتها حسّيت انه مركّز معاه أوي، وزي ما يكون عايز يتكلّم.
بدأت اهزّه من كِتفه واقولّه...
-اتكلم يا بابا.. حاول تتكلّم.. عاوز تقول إيه؟
ميّادة صحيت من النوم على صوتي، وساعِتها بعدت إيدي عن ابويا وهي بتقولّي...
-في إيه يا دكتور مهند؟!
قولتلها وانا لسّه بَبُص لابويا...
-حاسس انّه عاوز يتكلّم.. وحاسس كمان انّه يقدر يقولّي سبب اللي بيحصل دَه.
-هدّي أعصابك يا دكتور مهنّد.. البشمهندس في الحالة دي من سنين طويلة.. هيعرف منين بَس سبب اللي بيحصل؟!
وبعد ما قالتلي الكلام ده طلبت منّي اننا ننزل تَحت، مُش عارف إيه اللي خلاني اتجاوب معاها، نزلنا تحت وقعدنا في الصالة، كلمتني عن حالة ابويا كتير، واللي اتضح اني مكُنتش اعرف عنّه حاجة في الفترة الأخيرة، الأحداث اللي بدأت تزيد معايا في الفترة دي كانت واخداني من متابعة حالته، وفضلنا نتكلّم لحد ما الليل دخل، كُنت منتظر تتكلّم عن اللي قاله عم محروس البواب أول ما وصلت الفيلا النهاردة، لكنها مجابتش سيرة الموضوع، لكن انا كان بيدور في راسي سؤال كنت لازم اوصل لإجابته، هي ليه سابِت ابويا ونزلت عند باب الورشة وأنكرت دَه؟!
الساعة كانت داخلة على 7، ساعتها استأذنت منّي عشان تطلع تعطي ابويا الدوا اللي فاضل على ميعاده دقايق، سابتني ومشيت وانا روحت وقفت ناحية الشباك اللي ع الجنينة، وساعتها شوفتها ماشية عند باب الورشة بنفس الهدوم اللي كانت قاعدة معايا بيها من شوية، بصّيتلها وانا مذهول، والذهول زاد لمّا شوفت طفلة جاية تجري عليها وبتمسك في إيدها!
طيب ازّاي وانا شايفها طالعة قدامي على السلم ورايحة اوضة ابويا!
وساعتها افتكرت ان في سلّم بينزل من فوق على الباب الخلفي للفيلا، منتظرتش وطلعت اجري على فوق، دخلت اوضة ابويا فجأة، لكن لقيتها بتعطيه الدوا في هدوء ومفيش أي توتر باين عليها، دخلت وقفلت الباب ورايا، ووقفت مَطَلَبِتش منّي اساعدها في حاجة، حاولت اشغل نفسي بأي حاجة لحد ما تعطي الدوا لابويا، وقفت في الشباك وبصّيت في الجنينة، وساعتها حسّيت ان جسمي اتحوّل للوح تلج، لما لقيت ميادة اللي معايا في اوضة ابويا دلوقت موجودة تحت في الجنينة!
خبطت بإيدي على الشباك، ولمّا ميادة لاحظت ده سألتني وهي متوتّرة...
-مالك يادكتور في حاجة مضيقاك؟
محبّتش احكيلها عن حاجة واكتفيت بإنّي قولتلها...
-مفيش حاجة!
ساعتها كان ابويا خد دواه، طلبت منّي تاني ننزل نقعد تحت عشان مينفعش انّ ابويا يحس بيا وانا في الحالة دي، وقالتلي انّي دكتور واعرف تأثير الحالة اللي انا فيها على ابويا كويس، سيبنا ابويا يرتاح وخرجنا من الأوضة، وأول ما بدأنا نتحرك في الطرقة عشان ننزل تَحت سِمعت صوت دقة عقرب الساعة، ساعتها الصرخات بدأت ترن في الجنينة، والشَّجر بدأ يتهزّ بشكل مخيف، ولقيت ميّادة بتمسك دراعي من الخوف، وخصوصًا لمّا سمعنا صوت حشرجة خارجة من اوضة ابويا!
بِعدت إيد ميادة وجريت على اوضة ابويا وفتحت الباب، وساعتها لقيت نفس المنظر بيحصل قدام عيني للمرة التانية في حياتي، ابويا غرقان في دَمه، بيتنفض وبيطلّع في الروح، وطالع منه صوت حشرجة مُخيف!
صَرَخت وميادة صرخت ووقعت في الأرض، ساعتها لقيت عم محروس جاي بيجري عشان يشوف إيه اللي بيحصل، ولمّا شاف اللي حصل لابويا وقع في الأرض وبدأ يعيّط..
نفس إحساس الألم بيتكرر تاني، إيه اللي بيحصل في حياتي بالظبط، ليه نهاية ابويا وامّي كانت واحدة وبالطريقة الفظيعة دي!
طلبت من عم محروس اللي كان قاعد في الأوض انه يفوّق ميادة، لأول مرة احس اني متحكم في أعصابي كِدَه، برغم انّ اللي حصل لابويا لسّه قُدّام عيني، لكن رغبتي انّي اعرف إيه اللي بيحصل كانت أقوى من أي احساس تاني المرة دي، عشان كِدَه قرَّرت اني اشرَّح جثة ابويا بنفسي عشان اعرف سبب وفاته إيه.
طلبت الإسعاف، ونفس اللي حصل يوم ما ماتت أمّي اتكرَّر لمّا ابويا مات.
...
تاني يوم...
المكان: المشرحة.
الحاجة الوحيدة اللي كانت مختلفة هي انّي المرة دي الدكتور اللي شرَّح الجثة، معرفش انا جِبت قوة القلب دي منين انّي اشرَّح جثة ابويا، واللي التقرير الطبي كان فيه نفس أسباب الوفاة اللي في تقرير وفاة أمي، خَنق وضربة بآلة حادة على الراس أدت لكسر في الجمجمة والنزيف والوفاة.
مكنش شاغلني غير ازاي ده بيحصل ومين اللي بيعمله، الموضوع اتكرر مع ابويا وامي وماتوا بنفس السبب بدون ما حد يتعرّضلهم، عشان كده لمّا الشركة حققت في الموضوع موصولوش لحاجة، لأن كالعادة أداة الجريمة مش موجودة، دا غير انّ مفيش حد فعلا شوفناه بيرتكب اللي المفروض تُسمى جريمة!
...
بعد أسبوع...
المكان: الفيلا.
الوقت: الساعة 6 ونص مساءً.
الفيلا بقت فاضية، ابويا بعد ما مات ميادة شغلها انتهى، مفيش غيري هنا، وعم محروس على البوابة.
في الأيام الأخيرة بقيت ملازم أوضتي، من ساعة ما برجع من شغلي وانا مبخرجش منها لتاني يوم الصبح، بصّيت في ساعة إيدي ولقيتها 6 ونص، الدنيا بقت ليل وعم محروس قاعد جنب البوابة بيشرب شاي، وانا واقف في شباك أوضتي منتظر أي حاجة غريبة من اللي بتحصل من وقت للتاني.
الوقت عدّى واللي كنت مستنيه حصل، سمعت دقّة عقرب الساعة، وساعتها سمعت صرخة الست وعياط الطفلة، بس المرة دي مش في الجنينة، دول موجودين في الفيلا جوه.
وكالعادة الهوا زاد والشَّجر بدأ يتحرَّك، محبّتش ابعد عن الشباك برغم الخوف اللي كُنت فيه، كُنت عايز اشوف عم محروس بيعمل إيه لما ده بيحصل، ولقيته قام من على الكنبة بتاعته ودخل أوضته وقفل عليه!
سيبت الشباك وخرجت من أوضتي، الصوت المرة دي مخيف أكتر من أي مرة فاتت، لما حاولت اركّز الصوت جاي منين لقيته طالع من أوضة ابويا! مشيت ناحيتها وأوّل ما وصلت للباب وقفت، الصوت فعلًا جوّه، فتحت الباب بالرّاحة وبصّيت في الأوضة، ولقيت منظر بَشِع، نَفس السِّت والطفلة اللي شوفتهم في المشرحة موجودين في الأوضة، وابويا ممدّد على السرير غرقان في دَمّه، وكانوا بياكلوا من جثّته!
مكانوش حاسّين بيا، كان شكلهم زي اللي بينتقم من ابويا! وفجأة لقيت ابويا فتح عينيه وبص ناحيتي وانا واقف ببُص على اللي بيحصل من الباب المتوارب ومذهول، ولقيته بيشاور بإيده ناحية شباك أوضته، وبعدها عينه غمّضت.
بعد ما عين ابويا غمّضت اختفى من على السرير، والست والطفلة اختفوا معاه، لكن صوت الشَّجر برّه كان بيقول انّ الأحداث لسّه مخلصتش، وفي وسط كُل ده فكّرت ليه ابويا ظَهر وشاورلي على الشّباك، وإيه علاقته بالست والطفلة اللي ظهرولي في المستشفى؟!
دَخَلت الأوضة ووقفت ابُص ع الجنينة، كُنت بفكّر وانا بسأل نفسي ابويا كان بيقصُد إيه وهو بيشاور بإيده ناحية الشّباك، وبدأت ابُص في كُل مكان في الجنينة، ساعتها كان الشَّجر بطّل يتحرّك، وبدأ تفكيري ياخُدني ناحية الورشة، ليه ميّادة شافِت السّت وبنتها هناك؟ وليه عم محروس لمّا قال انّه شاف ميّادة في الجنينة شافها هناك؟
حاجة جوّايا خلّتني اسيب الأوضة وانزل، لكن وانا نازل على السلم سمعت صرخة الست وعياط الطفلة جاي من تحت، لمّا نزلت لقيت الصوت طالع من الساعة، وقفت قُدّامها، كانت عقاربها بتلف ورا بعضها بدون توقّف، خوفت اقرّب منها، رجعت بضهري لورا وانا مُرتبك ومرعوب، لحد ما وقعت على ضهري وراسي خبطت في الأرض، بس الخبطة كانت بسيطة، وساعتها بدأت اسمع صرخات الست وعياط الطفلة جاي من كل مكان حواليّا.
قُمت مفزوع من الأرض، جريت عشان اخرج من الفيلا، خطوتي كانت مهزوزة لكن كُنت بحاول مَفقِدش توازني، لحد ما خرجت الجنينة، ولقيتني رايح ناحية أوضة عم محروس، فِضِلت اخبَّط على الباب لحد ما فَتَحلي، كان مُندهش من انّي بخبّط عليه وباين عليّا الخوف، فتح الباب وقالّي...
-ادخُل يا دكتور مهند.
قولت وانا حاسس انّ نَفَسي مقطوع...
-عم محروس.. أنا عاوز ادخُل الورشة.. ساعدني نشيل الكراكيب من قُدّام الباب ونِفتَحه.
حسّيت انّ عم محروس ارتبك لمّا طلبت دَه منّه، ولقيته بيقولّي...
-يا دكتور الورشة مقفولة من سنين طويلة.. من ساعة ما البشمهندس الله يرحمه تِعِب.. كُنت انت لسّه صغير.. يومها وقع في الورشة وأُغمى عليه وبعد ما فاق لقيناه في الحالة اللي هو عاش ومات عليها.. دا غير ان التعب اللي فيه كان بيزيد عليه كل فترة عن اللي قبلها.
-ساعدني نفتح الورشة يا عم محروس.
-البشمهندس في أول أيام تعبه طلب منّي اقفلها ومفتحهاش لأي سبب.
-ابويا مات ياعم محروس.. وانا لازم اعرف سبب كل اللي بيحصل.. وحاسس ان الورشة ممكن توصّلني لحاجة.. لو مساعدتنيش هروح افتحها لوحدي.
عم محروس حَسّ انه مغلوب على أمره، سابني واقِف على باب الأوضة ودخَل، وبعد ثواني لقيته خارج ومعاه مفتاح كان باين على شكلُه انّه قديم، قَفَل باب أوضته وراه وقالّي...
-تعالَ معايا يا دكتور.
مَشينا في الجنينة لحد ما وصلنا لباب الورشة، كان لازم قبل ما نفتح الباب نشيل الكراكيب اللي قُدّامها، وساعتها سألت عم محروس...
-انت ليه سايب الكراكيب دي كِدَه؟!
واتفاجأت بإجابته على سؤالي وهو بيقولّي...
-البشمهندس الله يرحمه طلب منّي اعمل كَدَه أوّل أيام تَعَبُه.
مسألتوش ليه طَلَب منّه كِدَه، أنا عارف ابويا هيطلب منُّه دَه بس مش هيقول سبب الطلب، كمان هو يادوب بوّاب مالوش يسأله ليه.
نَقَلنا الكراكيب من قُدّام الباب لمكان جنب سور الجنينة، وساعتها عم محروس حطّ إيده في جيبه وطلّع كشّاف، وسألته...
-ليه بتطلّع الكشّاف لمّا ممكن نفتح النور بعد ما ندخل؟
وساعتها رد عليّا وقالّي...
-البشمهندس الله يرحمه فاصل الكهربا عن الورشة!
...
الوقت: نَفس الليلة.
المكان: الورشة.
صوت الباب وهوّ بيتفتح كان مُرعِب، حسّيت انّه بيُصرخ، ولمّا شوفت الضلمة اللي جوّه الخوف اللي جوايا زاد، برغم كده خدت الكشّاف من عم محروس، بدأت اوجّه النور جوَّه الورشة، مكَنش ظاهر غير خيطوط العنكبوت اللي نازلة من السقف، دا غير ريحة المكان اللي كانت تُخنُق، دَخَلت وحسّيت بخطوات عم محروس ورايا، انا فاكر انّ آخر مرة دَخلت المكان هنا كُنت طفل، لسّه فاكر ابويا الله يرحمه وهو بيشتغل على أفكاره ومشاريعه اللي كان بيتمنّى يحوّلها لواقع، لكن الواقع اللي حصل كان حاجة مُش على البال ولا الخاطر.
بدأت ادوَّر في الورشة، لكن لقيت عم محروس بيقولّي...
-انا هحاول اوصّل الكهربا من اللوحة يِمكن تشتغل.
مكَنش فارق معايا الكهربا توصل أو لا، كُنت ناوي حتى لو هفضل هنا ولمّا النهار يطلع والدنيا تنوّر هدوّر على أي حاجة ممكن الاقيها، بدأت افتّش في كُل حاجة، برغم انّي مكنتش عارف انا بدوّر على إيه! بس انا كُنت واصل لمرحلة انّي اتعلّق بأي أمل قُدّامي.
وشويّة ولقيت لمبات المعمل بتِسرِج، النور اشتغل، ولقيت بعدها عم محروس جاي بيقولّي...
-الفيوز كانت ضاربة والحمد لله عرفت اوصَّلها.
عطيته الكشّاف وبدأت ادوَّر لما الإضاءة ساعدتني على دَه، اوّل ما لمحت مكتب ابويا روحت عنده، فتّشت في الوَرَق اللي عليه، كان كله عبارة عن رسومات هندسية ومعادلات، فَتَحت ادراج المَكتب، كانت فاضية تقريبًا، مفيهاش غير شوية ورق ابويا كان كاتب فيه ملحوظات عن شغله، لكن آخر درج في المكتب كان مقفول بقفلين، حاولت افتحه معرفتش، عشان كِدَه طلبت من عم محروس يجيب شاكوش ويِفتح الدُرج، ولمّا فَتحه مكَنش في الدُّرج غير أجندة.
خدت الأجندة وفتحتها، أول صفحة فيها كان مكتوب فيها اسم ابويا وتاريخ ميلاده والمهنة، تاريخ جوازه من امّي، ولمّا قلبت الصفحة لقيت مكتوب تاريخ جوازه من واحدة تانية بعقد عُرفي!
الصَّدمة خلّتني اقعد على كُرسي المكتب عشان حسّيت ان رجليّا اتبخّرت، ليه ابويا اتجوّز عُرفي؟!
بدأت اقلّب في صفحات الأجندة، لغاية ما لقيت ورقة مطبَّقة، فتحتها لقيتها عقد جواز ابويا العُرفي من واحدة اسمها نسرين، كان شاهِد عليه عم محروس، اللي أوّل ما شاف العقد في ايدي قالّي...
-يا دكتور انا عبد المأمور.. مكُنتش اقدر اقول للبشمهندس لا ولا افتح بوقّي.
الحقيقة عم محروس كلامه صح، خايف على أكل عيشه اللي ممكن يتقطع لو معملش اللي ابويا قالّه عليه، بدأت اقرأ الملاحظات اللي ابويا كاتبها في الأجندة، كانت كُل ملاحظة بقرأها بتصدمني، مش هتصدقوا لو قلتلكم كانت بتصدمني اكتر من الحاجات اللي بتحصل معايا!
ابويا كان كاتب انه اتفق على جوازه من نسرين بعقد عُرفي، لأنه حبّها ومقدرش يستغنى عنها، ولو كان طلّق امّي عشانها كان هيتحرم من ورثها اللي كان معتمد عليه عشان يقدر يحقق مشاريعه ويموّلها.
في ملاحظة تانية ابويا كان كاتب ان مشاعره الحقيقية كانت لنسرين، وانّه متحمّل يعيش مع امّي لأنها كانت حامل فيّا ومكنش عايز ابنه ييجي للدنيا ويعيش ظروف مُش مستقرة، دا غير الورث اللي كان باين من ملاحظاته انّه أهم عنده من كل حاجة.
قلّبت في الصفحات، لغاية ما وقفت عند ملاحظات ابويا كان بيقول فيها انه اتفاجأ إن نسرين حامل، وطبعًا دَه كان مخالف لشرط ابويا انّها متخلّفش، ولمّا أصر انها تسقّط نفسها سابِتُه وهربت، ومظهرتش تاني، لغاية ما ابويا نسي الموضوع، وبعدها ظهرت وكان معاها طفلة صغيرة، وجت عند الفيلا وسألت على ابويا وعم محروس قالّها انّه مُش موجود، ولمّا بلّغ ابويا باللي حصل بدأ ياخد حذره منها، قِدِر يتواصل معاها وقابلها واتفق انّها تاخد مبلغ وتختفي، لكن هي أصرت انه يعترف بالطفلة، واللي كانت حاجة مستحيل ابويا يعملها وإلا كُل ده هيضيع منه، لدرجة انها هدّدته لو معترفش بالطفلة هتروح لمراته وتقولّها كُل حاجة.
وزي ماهو مكتوب قُدّامي، ابويا كان مجهّز خطة بديلة، كان عارف انها هتيجي في يوم بالليل عند الفيلا وتعمل مشكلة وتحاول توصل لامّي، ساعتها ابويا قعد مع عم محروس يشرب شاي، واستغل ان عم محروس دخل اوضته يجيب الشيشة وحطله منوم في الكوباية بتاعته، ولما رجع وشربه راح في سابع نومه، وبعدها وصلت نسرين ومعاها الطفلة، وابويا طلب منها تدخل عشان يتفاهموا جوّه، خدها للورشة، وأول مادخلوا خنقها وضربها بألة حادة على راسها هي والطفلة وقتلهم، وتقريبًا ابويا كان مجهّز للي هيعمله من بدري، لأنه كاتب انه قبلها بيومين كان مجهّز حفرة في الورشة عشان الموضوع مياخدش منه وقت!
ابويا كتب تفاصيل جريمته بالتفصيل، حطّ نسرين والطفلة في الحفرة بعد ما قتلهم ورَدَم عليهم، وكان معتمد ان مفيش حد بيدخل الورشة غيره، دلوقت افتكرت ليه لمّا كنت باجي اقرّب من الورشة قبل ما ابويا يتعب كان بيرفض اني ادخل!
قلّبت تاني في الأجندة، ابويا كان كاتب انه كان نِسي الموضوع، لكنه بدأ يسمع أصوات غريبة في الورشة بعد فترة طويلة جدًا، وبدأ يلاقي الورق اللي على المكتب متقطع من نفسه، وبدأ يحسّ بحاجات غريبة بتحصل، وبدأ يلاحظ ان امّي خايفة من حاجة مُش عايزة تحكي عنها، وأغرب حاجة قرأتها انّ بعد فترة طويلة ابويا فَتَح الحُفرة على نسرين والطفلة، مكَنش باقي منهم غير الهيكل العظمي، وساعتها ابويا خد من هيكل كل واحدة فيهم ضلع!
معرفش إيه سبب انّه يعمل كِدَه، بس تفسيري للي مكتوب في الأجندة انّ ابويا من الوقت ده وتصرفاته بدأت تبقى غريبة ومش مفهومة من اللي بدأ يحصل معاه في الورشة، لحد ما وصلت لصفحة لقيت فيها حاجة أغرب من الخيال!
ابويا كان راسم ساعة، شبه الساعة اللي في الفيلا بالظبط، كان عقربها في الرسمة واقف عند الساعة 7، واللي عرفت من الأجندة انه الوقت اللي ابويا قتل فيه نسرين والطفلة، وقرَّر انّه يصنّع ساعة وينحت عقاربها من ضلوعهم!
الذهول كان باين عليّا، ايدي ارتعشت وانا بقرأ والأجندة كانت هتُقع منّي، مكُنتش مستغرب اللي ابويا عمله، تقريبًا ابويا كان فقد عقله لأن اللي انا بقرأه ده مفيش حد عاقل يعمله، ومفيش حد يكتب تفاصيل جريمة ارتكبها بالشكل ده!
حطّيت الأجندة من إيدي وبدأت ابُص في أرض المعمل، الأرضية كلها بلاط ماعدا حتّة في الركن كانت تُراب، قولت أكيد دي الحفرة اللي فيها الجثتين، طلبت من عم محروس يطلع يجيب الفاس من الجنينة، استغرب طلبي، وكان لازم احكيله لإنه هيشوف اللي هيحصل بعينه، كان مُندهش ومش متخيل انّ ابويا يعمل كده، وانا كُنت مقدَّر ذهوله لأن ابويا عطاه منوّم وساعتها معرفش باللي حَصَل!
بدأت احفُر، عم محروس كان بيساعدني، حسّيت انّه مُتعاطف معايا، كمّلت حفر لحد ما وصلت للجثتين، مكنش باقي منهم غير شوية عضم وهدومهم والآلة الحادة اللي اتقتلوا بيها، اللي حسّيت بكهربا في جسمي لمّا لقيت الهدوم فيها شبه كبير من هدوم الست والطفلة اللي ظهرولي في المشرحة!
عم محروس قالّي انّه هيتخلّص من الحاجات اللي في الحُفرة، كان عارف انّ مفيش عندي أعصاب اعمل حاجة، وساعِتها طلبت منّه اننا نتخلّص من الساعة اللي في الفيلا كمان!
وفعلًا عم محروس خَد الحاجة في كيس اسود وخد الساعة والأجندة والآلة الحادة واتخلّص منهم، وقالّي انه رماهم على شط الترعة في مكان الناس كانوا مولّعين فيه جنب صندوق زبالة!
ولقيت عم محروس بيوصّيني ان محدّش يعرف حاجة عن اللي حَصَل، الجريمة حَصَلت وابويا اللي المفروض ياخُد جزاؤه مات، ومالوش لازمة الشَّوشَرة!
...
المكان: الفيلا.
الوقت: تاني يوم الصُّبح.
قاعد قُدَّام شبّاك أوضتي، بحاول افسّر اللي حَصَل، مَنكِرش انّ ضميري ارتاح لمّا عرفت سبب اللي حَصَل، نسرين والطفلة انتقموا من ابويا في أمّي الأول، لمّا قتلوها بنفس الطريقة وبنفس الآلة الحادة، عشان كِدَه تقرير التشريح كان صحيح، بَس مُرتكب الجريمة كانت أرواح بتنتقم، وكان من الصعب اننا نثبت ده!
بعدها انتقموا من ابويا بعد ما خلّوه يعيش يعاني سنين طويلة، وبرضو بنفس الطريقة!
حسّيت ان الدُنيا بعد كِدَه هتبدأ تِظبُط، مُش عارف ليه كان جوايَا راحة نفسية غريبة، يمكن الموضوع لما اتكشف كان اعتراف بحق نسرين والطفلة اللي ابويا كان بيحاول يدفنه معاهم، يِمكن أرواحهم تكتفي بِكِدَه وتسيب الفيلا.
انتبهت لصوت ضِحك جاي من بعيد، بصّيت في الجنينة، كان عم محروس ممدد ونايم على الكنبة جنب البوابة، بَس لمحت نفس السّت والطفلة اللي كانوا عندي في المَشرحة، واقفين قُدَّام الفيلا من برَّه، كانت إيدهم في إيد بعضهم، بيبتسموا، بصُّوا ناحية الشبّاك اللي انا فيه كتير، وبعدين عطوا للفيلا ضهرهم ومشيوا، لحد ما اختفوا!
***
تمت...
د. زينب عبد السلام محمد أبو الفضل 
زين دومه عبد العاطي الابوز
عبير عبد الرحيم عبد الحميد السيد
مي رضا أحمد عثمان
منى أحمد محمد إبراهيم
د.خليل السيد خليل محمد
محمد عبد المنعم ابراهيم محمد
آمال محمد صالح احمد
غازي جابر البشير زايد
مي حمدي منصور عبد الرحيم
د. نهله عبد الحكم احمد عبد الباقي 
د. عبد الوهاب المتولي بدر 
زينب حمدي 
حنان صلاح الدين محمد أبو العنين 
د. محمد عبد الوهاب المتولي بدر 
ياسر محمود سلمي 
د. شيماء أحمد عمارة 
د. نهى فؤاد محمد رشاد 
م. اشرف عبد الصبور الكرم 
1
-1
