لغة الجسم

كلنا بيلاقي صعوبة بالغة في تعلم لغة تانية غير اللى بيمارسها طول الوقت لسنين كتير ،عشان كده في الطريق واحنا بنتعرف على ذاتنا ومشاعرنا مهم نعرف الأول اللغة اللى عقلنا وجسمنا بيتواصلوا بيها مع بعض ومعانا ،وأي فيهم بنمارسها اكتر من التانية .

لغة العقل الأساسية هى الأفكار 

لغة الجسم الأساسية هى المشاعر

و احنا أطفال لغة الجسم هى السائدة والأساس فينا لكن مع طريقة التربية المتوارثة لأجيال مارسنا أكتر لغة العقل .. 

ببساطة نقدر نفهم الفخ اللى وقعنا فيه .

احنا ادينا الجهد الأكبر للعقل ولغته ،بالتالي مساحة استخدامه كبرت مع الوقت ونتج عنها أفكار لا تهدأ ،و ما انتبهناش للغة الجسم اللى هى طاقة المشاعر ،و ده عمل انعدام توازن بشكل ملحوظ .

من هنا البداية ..

محتاجين نتعلم لغة جسمنا ونتذكرها من جديد ونمارسها بشكل تدريجى و نركن شوية لغة عقلنا ..

وانت بتبتدى خطواتك لتعلم لغتك الجديدة خلى قدامك معلومة مهمة بتقول :

 الإنسان "مخلوق عاطفي يفكر"

"مش مخلوق عقلاني يشعر"

كل موقف بيمر علينا جاى برسالة محتاجين ناخد بالنا منها ونحسن استقبالها و ننوى الانفتاح على مشاعرنا من خلاله ..

احكى لنفسك نتيجة متكررة معاك في معظم المواقف اللى بتمر بيها ،ومسببالك ضيق أو ضجر واسأل نفسك إيه ممكن أعمله عشان أغير النتيجة لخدمة سلامي النفسي ؟

وكمان عشان افهم حكمة تكرارها..

الكام شعور دول وانت بتجاوب هيساعدوك تعرف جزء من ذاتك 

الغضب بيقول : ان في شعور بالعجز تجاه الشيء اللى أغضبك .

الخوف بيقول : اعترف بأكتر شيء انت مهتم بيه .

القلق بيقول : في انعدام توازن بالتفكير الزايد في بكرة

وخلينا ناخد بالنا ان التراكمات الداخلية بتأثر على سلوكياتنا الخارجية بشكل كبير ..