لما بشترى حاجة واكتشف بعدها بساعات انى ما كنتش محتاجاها بدرجة مُلحة زى اللى كانت موجوده جوايا قبل شراها 

بقفش نفسي وانا لسه هشتمها وارجع افتكر

ان حالة الالحاح اللى اتوجدت دى كانت هى المحرك الرئيسي ليا عشان الرزق المكتوب يروح لصاحبه 

 ودى المرحله الاولى (المُسكن) 

اللى بلحق بيها نفسي قبل ما اجلدها واعذبها وممكن اخليها تقطع شرايينها من شعور الذنب

ف أهدا واراجع نفسي من تانى وادور جوايا 

واحاول اعرف سبب السلوك اللى حصل 

ومنين جاية حالة الاندفاعية لشرا الشيء ده بالصوره المُلحة دى وانا مش بحاجه له ؟! 

 وبتكون دى المرحلة التانيه (الملاحظة الرحيمة)

اللى بطبطب بيها على نفسي واسمع لها من غير ظنون 

و بين المرحلة الاولى والتانية

ممكن أفضل كتيير مابشغلش نفسي اوى بالمده 

بس بشغل نفسي بمراقبة الحالة المُلحة لما بتييجى من تانى وأملى ورجائى اتعلم

ف اللهم لك الحمد