هو انا ليه اوقات بينتابنى مشاعر غضب من نفسي ؟!
من وقت للتانى فجأه تتقلب الدنيا جوه دماغى بدون سابق انذار ولا مؤشرات.
عادى بستقبلها و اسيبها تعدى وقت ما تحب ، بس طبعا خلال الفترة المرهقة دى مش ببطل فرك واسئلة وكتابه عشان اوصل ليه بيحصل جوايا كده ؟!
رجعت بالذاكرة شوية ايام ما كنت
كيوت(بالنسبة لغيرى)ومستسلمة لاى شيء يسند ليا !!
وكنت عارفه انى هلاقى اللى يساعدنى ع الاجابة
وفعلا عرفت انا ليه بغضب من نفسي وليه بينتابنى مشاعر الاستياء والاحباط المفاجأة دى؟!
اظن بسبب قبولي لتمثيل ادوار اسندت ليا بشكل الزامى واجب التنفيذ ، بدون اى اختيار او حتى فهم اولى ابنى عليه قبولي للدور ده!!
وعشان انا من الناس اللى بتسعى للمثالية والكمال وده شيء انا عارفه انه من عيوب شخصيتى و مُرهق جدا ومش صحى في بعض الاوقات.
فبعمل الادوار (اللى مش بتاعتى ) على اكمل وجه
ومع اى تقصير او اداء مش بيرفكت بجلد نفسي بسوط من نار ينزل عليا يكويني،و يعذبني على حاجه في الاصل لا بتاعتى ولا حقيقتى كمان.
طبعا مش من السهل حاليا التخلى عن بعض الادوار دى .
لكن ؛
▪️لقيت من السهل اتخلى شوية عن التمثيل الجيد اللى بقوم بيه، و اشيل عن دماغى فكرة ان حد مسلط الضوء عليا او اللى قدامى مستنى يشوفني دايما بيرفكت في اداء الدور،
اساسا اللى قدامى مشغول في حياته و لا فارق معاه المجهود الأوڤر ده ولا التمثيل الجيد.
▪️انتبه لنفسي واكون رحيمه معاها واعزز عندها فكرة التخيير.
ان فى اى وقت ممكن اختار اكمل الدور اللى اتحطيت فيه او اوقفه خالص طالما ينفع.
مع الوقت انا واثقة انى هكون اهدى و اوقف جلد فيا
وهبدأ بالراحة اختار بدون ضغوط .
بلاش تغضب انت كمان من نفسك ونزل عن كتافك ادوار مش بتاعتك✋
2
-2
