الأم السوبر . من المؤكد أن أغلب بيوتنا قائمة على أكتاف الأمهات وبعض الآباء.

فالحياة وكما نعرف جميعا أساسها المشاركة، والأدوار بينهم متوازنة. البيئة فيها خصبة لنثر بذور تربية سوية للحفاظ على الابناء .

الأم السوبر مفهوم حديث علينا ،دخل من باب المثالية والبحث عن الكمال في كل دور بتقوم بيه الأم تجاه الأبناء اللي اختارت تجيبهم لأعتاب الحياة. صوت زنان جواها يقول: لازم احاوطهم من كل جانب ،لازم أفكر عنهم وأحس مكانهم وكمان أقرر في كل حاجة تقابلهم فيما بعد ..

ومن هنا يا عزيزتي السوبر تبدأ معاناتك اليومية التي تستمر على مدار رحلة حياة ابنك ومراحل تربيته المختلفة. بتتاخدى من نفسك بحجة اللازم و المفروض الواقع عليكِ من تبني لقب سوبر ماما !! 

لازم تكوني الأم الكاملة اللي مخليه ولادها مرتاحين بدون معاناه، ولو اخفقتي في دور !! تدخلي في دوامة جلد ذاتك واتهامها بالتقصير. 

خليني أوضح إن ده الفخ الأكبر اللي كتير من الأمهات انسحقوا بسببه و تشوه من خلاله مفهوم الأمومة الحقيقي عندهم، اللي الأصل فيه إنه كوكتيل للكثير من النجاحات الممزوجة ببعض الاخفاقات. الأم السوبر هي اللي بتمهد لابنها الطريق وتسيبه هو يمشي بقدرته، هي اللي بتخليه يعمل الفوضى بألعابه وتعلمه ازاي يرتبها لوحده، اللي عارفه إنها تتعامل مع كيان منفصل، محتاجه تعرف عنه وعن اختلافه عنها. الأم السوبر هي اللي بتحرر طفلها منها وتتابعه بكل حب وحكمة و صبر على التعلم والاكتشاف. 

وقتها تكبر الثمرة قادرة تعتمد على نفسها بقدر من التوازن بدون إعتماد مُفرط ينتج عن لقب (سوبر ماما) المزيف .

خليني افكرك بكام حاجة في الرحلة دي، قبل ما تخوضيها لو أنتِ أم حديثة ولو أنتِ قائمة بدور الأم من زمان، اطمني لسه في وقت تاخدى بيهم، يوفرولك قسط كافِ من الراحة مع التقدير والامتنان 

• وضع اسس واضحة بينك وبين الأب في تنظيم الأدوار بما يتناسب مع كل مرحلة لطفلك .

• المحافظة على سلامة عقلك من هجوم الأصوات اللي تقولك إنك مش عاملة اللي عليكِ 

• الالتزام بقسط كافِ من الاسترخاء نهاية كل يوم تجتازيه بقدر من النجاح 

• الصراخ والتوتر والقلق دي مشاعر بسبب احتياجك لقسط من الرحمة مع نفسك مش بسبب طفلك

• أكدي على نفسك كل يوم إنك اتصرفتِ بحنان وطيبة الأم مش كمال ومثالية اللقب، وده معنى الامومة الحقيقية 

وهكون أمينة معاكى، طريق التربية طويل ولا يخلو من الاحباطات والمخاوف والشك والتخبط لكن؛ جميعها مشاعر حضرت بداخلك للوقوف من جديد والاستناد على التحرر والبحث عن الطرق المناسبة التي تضعك وأطفالك علي طريق الاتزان السليم، وساعتها الكل هيقول من قلبه شابو ليكي .