.... ___________ المرأة ساعات بتكون الخير و ساعات تفكير على حبّة مَكر .. و ساعات الحُضن اللى يطمّن و بتقلِب لما بتزعَل .. بَحر .. المرأة ساعات وردة جميلة ضُلّيلة شجرة و نسمة صيف و ساعات المطرة أمّا بتبكى لو تِقسَى عليها قلوب من صخر .. مجروحة بتعشق و بتضحك لكن بتخاف أوى على جرحَك أصلها قلب ومعجون بالصبر .. المرأة بلاد و دروب و وطن و سنين السّكة اللى تقرَّب و ساعات التوهة اللى تغرَّب و ساعات الأسْر .. المرأة ساعات بتكون الخوف و ساعات تلاقيها حَدّ السيف تقطع وتسيَّح دَمّ العِرق فى سبيل النصر .. و ساعات تبقى الرِّيق العطشان و ساعات النهر .. النظرة اللى بتهدِى التَّايه و ساعات بيتوه فيها العاشِق .. بَنُّورِة سِحر .. المرأة كلام الأغنية و اللحن المكتوب فى النّوتة رنّة خُلخال البنّوتة .. و ضفاير تِبْر .. المرأة الضحكة اللى تجَلجِل فى ليالى العيد أما تهَلّل .. كحكة بسُكّر .. المرأة عيون الصُّبحيّة لما يشقشق بالنور الفجر .. فنجان القهوة المَلَكيّة نعناع الشاى فى العصرية و البوسَة اللى تعطّر خدَّك بشفايف شِعر .. المرأة عيون حُبَّك ليها دى سفينة و بترسّيك على بَر .. و ساعات الرِّمش اللى بيفتِن على إيـــــــــــــــــــــه السِّرّ ...