بابا كل يوم و طول اليوم مشغل الراديو على أغاني قديمة جداً و أحدث قليلاً ، عموماً هي كلها من القرن الماضي .. 

بيعلّي الصوت جداً .. في أوقات ممكن تكون الصبح بدري أوي باكون لسة نايمة ف باصحى عالصوت .. مرة أتضايق و مرة لاء .. مرّات كتير في وسط اليوم أو بالليل باسمع حاجات من الروائع وخصوصاً أغاني شادية وحليم و فريد و فايزة .....الخ و أقول ياااااااه الأغنية دي ؟! واتبسط إني سمعتها و استمتع ..

لكن في أوقات تانية باتضايق لأني باكون عاوزة أنام و مش باعرف من الصوت .. 

دلوقتى بعد ما بابا إتغدى لقيت عينه مغمضة و صوت الراديو جنبه عالي برضو ، على أغنية " قالت لي بكرة " لفريد الأطرش ، عينيا دمعت لأن الأغنية دي ليها ف قلبي ذكرى جميلة .. قربت بالراحة و خفضت الصوت .. ففتح عينه .. قلتله إنت صاحي ؟ باحسبك نمت ! باخفض الصوت .. 

قال لي دي أغنية جميلة .. قلت له ده أنا بحبها جداااا .. 

قاللي ده أنا معلي عشانك ياحمارة .... آه وربنا 😁

🌷 ساعات لو فهمنا اللي قدامنا .. هانحب نفس التصرف اللي كان بيضايقنا منهم .. هوة هوة ... 

🌷دلوقتى حليم بيغني ؛ ضحك ولعب وجد وحب 😉

🌷 فبعد التصريح ده من بابا ، بصراحة قررت من هنا ورايح مابقاش حمارة 😁