السلام .. السلام

بسم الله الرحمن الرحيم 

الكلام اللي هكتبه ده غير منقول ، دة من كل قلبي .

اليوم الأحد 23 فبراير ، والساعة دلوقتي 2.45 صباحاً .

حبيت أشارك معاكم أفكاري .. 

أنا عشت كتييييير مبعرفش اقول " لاء " !!!!

واللي بيتكسف يقول لاء ، الناس بيحولوا حياته لموافقات ضمنية على كل حاجة !!

اللي بيتحمل حاجات فوق طاقته ، الناس بتفضل تدوس عليه طوووول السنين !!

اللي ابتسامته محفورة على وشه وبقت خلاص من ضمن خلقته وملامحه ، الناس اتعمت عن دموعه !!

اللي مابيقولش إنه تَعبان ، الناس بقت فاكرة إنه إنسان آلي !!

مش عدل إن كل واحد يعمل كللللللل اللي هو عاوزه ، وفي المقابل يبقى مستني إن أنا كمان أعمل اللي هو عاوزه !!

مش عدل إن كل واحد يرتب أموره ، وفي المقابل مطلوب مني إن أنا كمان يبقى ليا دور في ترتيب أموره !!

مش عدل إن كل واحد يبقى مهم عند نفسه ، وفي المقابل مطلوب مني إنه يكون مهم عندي !!

مش عدل إن يكون مطلوب مني ، فوق إني أسامح ، إني كمان " أنسى " !!

مش عاوز حد يتعدى حدود مساحتك ؟

ماتتعداش حدود حد ..

مش عاوز تزعل ؟

ماتزعلش حد منك .. 

مش عاوز تشيل حاجة تقيلة ؟

ماتحملش حد شيلتك ..

عاوز تتفهم صح ؟

إفهم إنت كمان صح ..

مش هتقبل تعمل نفسك سجادة ؟

يبقى ماتدوسش على حد ..

طيب أنا ليه كتبت الكلام دة هنا ؟

لأن ناس كتير مش بتحب يتقال لها الحقيقة .. 

برغم إني سبق وقلت ، سبق وشرحت ، سبق وعبرت عن اللي جوايا .. 

مش كفاية إنك تسمع ، نفذ بأة !!

ماتخلينيش أعيد الكلام تاني ف تقوم تزعل !!

مش حاجة تزعل إن يكون عندك حدود ، أو إنك ترفض ، أو إنك تراعي نفسك ونفسيتك ، أو إن يكون عندك خطط لنفسك !!

كل شيء له حدود ..

الحب عشان يدوم ، لازم يكون له حدود صحية . وإلا هاييجي اليوم اللي هايتقلب لامبالاه .

الكرم عشان يدوم ، لازم يكون له حدود صحية ، وإلا هايتحول لاستغلال .

هاتفضل تقول " آه " بدل المرة عشرة ، هتتحول لعدو لو قلت " لاء " في المرة الحداشر .

في مرحلةٍ ما من النضج ، الإنسان مش مفروض يشرح نفسه لحد .

ولا مسموح لحد يوجه أي أسئلة ، ولا مطلوب من أي حد يفهم .. 

الإنسان مرتاح مع نفسه ، فاهم نفسه ، وطبعا مقدر نفسه .. قادر يحيط نفسه بالمسافة الآمنة ، لعدم المساس بهالته الطاقية والحفاظ عليها . 

فلا ينشغل باله بأي بتنجان .

اللي الكلام دة لمس جواه حاجة ، ياريت ، يعدل كراكيبه اللي جواه ، من غير مايحوّلني بينه وبين نفسه ل عدو .. لأني مش عدوة حد ، ولا ليا أعداء .. 

- حبة سلام مش أكتر -

و .... " المؤمن كيّسٌ فَطِن ".