يا طول الباااااال 

يا طول الباااااال 

معندكش بالين بريال

وقيد ربع عالنوتة 

وهات لي الصبر

وهات لي معاه بربع كمان

حنين لسنين

سنين عواجيز في جسم عيال

طب اصبر حبة متنفخش

حجيب النوتة وندون متتعصبش

يا عيني العز ما بيدومش 

زمان أنا كنت م الأعيان 

وكنت انت عمنول

شاويش غلبان بجبة وشال

بتعمل مرة م الدراويش

وتعمل حبة م الأعيان

ولما الدنيا تكتم صوت

عليك صوت هااااا

بنجري منه نتخبى 

منين ما اتقال

يا عمو أنا بنت من حيك

جيرانك مينا ومحمد

وصاحبك حنا والمختار

مفيش فرق ف ألواننا ولا لغتنا

فروقنا حروف أسامينا 

يقولوا عبدنا قرش الجيب

يقولوا العيش بقى غالي

نلاقوا الست طنط تريز

تخبط خبطة على بابنا

وتدينا رغيف صابح

عطاها عطية منه اتنين

فقسمت قوتها بين قلبين

وقالت رزقي عالرزاق

وتضحك ضحكة مرسومة

ما تبعد لحظة يوم م البال

يا طول البال 

أنا الصابرة

أنا البكاية من جبروت سكاكينك 

أنا الشاكرة

لجرحك قبل طبطبتك

انا الحايرة

غريبة أصل تركيبتك وتكوينك

يمين وشمال

كبرت ولا القمر صبغ شعري بألوانه

راح أفضل بنت امبارح

وخليك انت يا ممقوت

في كونك كالشهاب سارح

راح أحضن قلب يحضني

وأودع قلب كارهني

وأوزع بسمة ع المحتاج

وأدوس ع الصعب والأشواك

وكلي يقين

وكلي أمل بإني ف وقت راح أوصل

ومين عارف

ما يمكن انت تتكرم

وتديني

شوية بال