عارفين أنا فين

عارفين أنا فين

وبعمل إيه

بسلم ع السلم اللي جمعنا

يوم لما لمسنا بدرجاته وحضنا 

وحشوني أوي 

وحشوني اللي بين أحضانك حضنتهم جوة قلبي يا سلم 

وحشوني ووجعتني أوجاعي اللي ما لها ترجمة ولا معنى

قولي بالله عليك 

لمين غيرك راح أجري وأروح

ولمين هآمن من بعدك

وقعت ومن غيرك هيسندني 

مين راح يرفعني يدفيني 

يطبطب على ضهري .. يطمني

يا سلم بالغاليين جمعني

نسيمهم وحشني يا سلم

وضحكنا اللي من القلب

وهزارنا وفرحنا 

شهدت لمتنا وحكايتنا

ودمعتنا وقت الفراق

والغصة اللي ملت الروح

والقبضة اللي غزت القلب

والكسرة اللي ما بعدها صلاح

نسيت أمضي على الجدران

حروف أسامينا 

ونحفر في القلوب عهد من كلمة محبة وأمان 

نسيت املأ بعطورنا وقت اللقاء كل المكان

لو اختار ما بين عمري الجاي كله

ولحظة كنت فيها في حضنك هضحي بعمري كله

وأنا راضية ومغمضة 

عاوزة أغمض عيني وأنام 

وأرجع لورا سنة

لا مش سنة

سنين من عمري ما ليش ذنب فيهم 

وأرسمهم من جديد 

وقلبي مش هلمسه

عاجبني بحاله زي ما هو وباللي فيه

ومش هغيره

ولا هغيرك انت يا وطني

وهجمع حبايبي تاني وجاية لك 

وهقولك أنا قدرت وعملتها

أنا هنا

بين اللي بحبهم

سلم من كام درجة 

هسند ع اللي باقيين لي

وانت لك الله يا قلبي 

..........................................

مش عارفة كتبت إيه ولا هقراه تاني

كتبت وهسيبه للذكرى 

ذكرى حلم زيه زي أي حلم بحلمه وبعيشه 

وبيخلص بسرعة أوي