قومت من النوم وانا تايه كنت مرهق جدا وتعبان واكيد ده من مشوار امبارح، الصداع كان هيفرتك دماغي قمت من مكاني رحت على المطبخ عايز اشرب شويه ميه وارجع انام تاني لما وصلت المطبخ لقيت حاجه مش لاقيلها تفسير.. في حد واقف في المطبخ راجل مديني ضهره وماسك في ايده حاجه وقبل ما اتكلم بصلى ده نسخه مني كاني واقف قدام مرايه لكن السكينه اللي في ايده كانت غرقانه دم كنت مشلول مكاني بصيت ناحيه اوضه الولاد ورجعت بصيت تاني ملقيتهوش رحت ناحيه اوضه الولاد وفتحتها عيالي مدبوحين رجعت لورا وانا بقول لا اله الا الله لا اله الا الله لكن في اللحظه دي باب شقتي اتفتح وكانت الصدمه

....

وكما رات هيئه المحكمه انا المتهم لا يعاني من اي امراض نفسيه او عصبيه لذا فانني اطالب بتطبيق اكبر عقوبه على المتهم وهي الاعدام شنقا ليكون عبره لكل شخص تسول له نفسه ارتكاب مثل تلك الجرائم الشنيعه

..

ده كلام النيابه قبل ما يصدر ضدي حكم بالاعدام في قتل اربعه اربعه وهم ابويا ومراتي واولادي، وخرج القاضي وقال كلمته

حكمت المحكمه وباجماع الاراء على المتهم عزيز سيد التهامي بإحالة اوراقه الى فضيله المفتي

دى مش النهايه ده جزء منها وليه بدايه وانا هحكيلكم كل حاجه حصلت من البدايه، انا اسمي عزيز سيد التهامي سنى دلوقتي 30 سنه متجوز من بنت عمي ولاء وعندي منها ثلاث اولاد عمر واشرف وكمال.. انا بشتغل صحفي في جريده كبيره جدا مهمتي هي التحقيقات الكبيره الخاصه بالجرايم والحوادث والظواهر الغريبه شغلي مستقر لحد كبير والحمد لله مبسوطين جدا

قصتي بتبدأ من يوم كنت في الجريده وحصلت حادثه في قريه قريبه مننا... سمعة القريه دي من زمان مش كويسه يعني بيتقال عنها انها مكان للسحرة والدجالين والجهل في كل حاجه

عرفنا من الاخبار اللي جتلنا انهم لقيوا قبر مفتوح يحتوي على عدد كبير من جثث الاطفال.. وده كان خبر مفزع خصوصا ان حوادث خطف الاطفال وقتها كان مسمع في القريه وحرفيا كنا كل يومين بنسمع عن شخص جاي يبلغ ان ابنه اتخطف

البلد كانت مقلوبه وقتها خرجوا من القبر اكتر من 40 جثه طفل في منهم اللي كان وصل لمرحله التحلل وفي منهم اللي كان لسه مدبوح من ساعات.. طريقه قتل الاطفال لوحدها ترعب اللي بيعمل كده مش بيستكفي بقتلهم بس لا ده كمان بياخد اجزاء من اعضائهم

وقتها استدعاني مديري المباشر وطلب مني تحقيق سريع عن الجرايم اللي بتحصل هناك وعن قصه القبر ده.. والكلام اللي داير وسط الناس... رجعت مكتبي وكان لازم افكر هروح القريه بصفه ايه عشان لو رحت بصفتي صحفي ممكن محدش يديني معلومات وكمان ممكن تحصلي مشاكل، وعشان كده اتفقت مع صديقي ممدوح وده معايا في نفس المجال اننا هنروح القريه على اننا رايحين هناك عشان انا بعاني من مس من الجن وعاوز اتعالج

رغم اعتراض ممدوح على كلامي وان انا كده بعرض نفسي للخطر الا اني كنت مصمم... وتاني يوم الصبح اتحركت على القريه ومعايا ممدوح اخدنا عربيه اجره وبعد 3 ساعات كنا هناك.. القريه من بره شكلها كئيب جدا البيوت مش متقاربه كل بيت بيبعد عن التاني قرابة ال 10 متر

دخلنا القريه لابسين لبس على قد الحال وحاولت اني ابين على قد ما اقدر اني تعبان لحد ما وصلنا وبقينا جوه القريه، الحال جوه صعب الناس ماشيه وعلى وشها حزن سنين كل واحد سرحان في حاله ومحدش حتى فكر يسال انتوا مين؟

لكني رحت ناحيه راجل كبير قاعد قدام بيته وقولتله

_ السلام عليكم يا حاج.. ممكن استفسار عن حاجه؟

= عليكم السلام اتفضل يا ابني خير؟

_ في الحقيقه يا حاج انا حاسس ان انا مش كويس في حاجه معايا طول الوقت ده غير اني بسد وداني لو سمعت قرآن او اذان

وكل الناس بتقول عليا اني ممسوس فانا كنت عاوز شيخ يكون كويس هنا في القريه عندكم يشوفلي حل في الموضوع ده

= واشمعنا القريه بتاعتنا يعني؟

_ في ناس دلتني عليكم وقالوا على القريه دي انها مليانه ومعالجين ويقدروا يعالجوا الناس

= طيب يا ابني انا هنصحك نصيحه لوجه الله خد صاحبك وامشوا من هنا واللي قالك على القريه دي شخص مش بيحبك

_ طب ليه يا حاج مش عايز تساعدني.. انا واقع في عرضك ارجوك انا مش قادر استحمل العذاب اللي انا فيه قولى على حد يكون كويس وبس مش عايز حاجه تاني

= طلبك مش عندي يا ابني خد صاحبك واتكل على الله

....

مكنتش فاهم الراجل ده... يعني هل ده مثلا الفاهم اللي فيهم هل القريه دي فيها ناس متعلمه وكل اللي وصلنا مجرد كلام

اخدت ممدوح وقبل ما اتحرك سمعت صوت واحد بينده عليا وبيقولى

_ تعالى معايا يا باشا انا هاخدك للشيخ مبروك ده راجل يعرف ربنا وهيعالجك متقلقش

بصيت ورايا لقيت واحد كده قصير بعين واحده والعين التانية محطوط عليها جلده زي ايام زمان، يعني الراجل اعور اخدني انا وممدوح ورحنا على بيت قديم وفتح الباب بسرعه ودخلنا على طرقه طويله لحد ما وصلنا لأوضة وقال استنوني دقيقه

ودخل الاوضه وفضل يتكلم مع واحد جوه وبعدها قال

تقدروا تتفضلوا

ودخلنا فعلا المنظر المعتاد عن اي دجال، البخور اللي ريحته وحشه جدا والراجل اللي لابس جلابيه وليه لحيه بس كان وشه يخوف، التجاعيد اللي ماليه وشه تقول ان الراجل ده قديم في الشغلانة وعتيق، قعدت قدامه انا وممدوح وبدات احكيله عن المعاناه اللي بمر بيها

لكنه فاجئني وقالي

_ وهتستفيد اي يا عزيز عاوز تعرف اللي بيحصل في البلد كان ممكن تيجي دغري ونحكيلك بدل تمثيلك الخايب ده

...

انا اتجمدت مكاني مكنتش عارف اتكلم، اما ممدوح اتكلم وقال

_ انا ماليش دعوه هو اللي جابني معاه قلتله بلاش... بس هو صمم على ده

...

رد عليه الشيخ مبروك ده وقال

_ خلاص يا ممدوح مافيش وقت للندم... انتم جايين عشان عزيز يتعالج وانا هعالج عزيز

...

الدنيا ضلمت وقتها وحسيت بايد بتتحط على دماغي وفي كلام غريب بيتقال حسيت دماغي بتفور وهتنفجر وكنت سامع ممدوح بيصرخوا جنبي وكل اللي قدرت اشوفه اني ماشي في طرقه وعلى يميني وشمالي مناظر صعبه الشكل كلهم بيصرخوا بطريقه هستيريه ورجعت فتحت عينيا من تاني لقيت نفسي على الارض وقدامي ممدوح كان بيعيط وبيقولى

يلا نمشي من هنا يا عزيز

...

سندني وخرجنا من بيت الدجال ده الجو كان ليل ومفيش حد خالص في القريه كنت قادر اقف على رجلي بس كنت حاسس بصداع رهيب وآلم بيجتاح كل جسمي لكن واحنا ماشيين لمحت شخص شايل على كتفه شوال وبيتلفت حوالين نفسه طلبت من ممدوح اننا نمشي وراه بالراحه

ممدوح كان معترض وبيقولي مش كفايه اللي حصلنا لكن كنت مصمم وفضلنا ماشيين وراه لحد ما وصل لقبر سمعت عنه قبل ما اجي هنا وكان المفروض ان هو التحقيق بتاعي الراجل ده نزل القبر.. وفي اللحظه دي سمعنا صوت صراخ طفل جاي من جوه القبر مقدرتش استنى ونزلت وراه القبر وكانت الصدمه.. يتبع الجزء الثاني

....

يا ريت الناس تتفاعل شويه عشان اكمل بسرعه

...

#محمودالأمين#قريه_الدجالين

#الجزءالثاني +الجزء الثالث

ممدوح كان بينده عليا ان انا منزلش القبر لكن لما نزلت شفت الراجل ده بيحاول يدبح الطفل، والطفل كان بيصرخ وبيحاول يستنجد بأي حد وهو كان عمال بيحاول يكتم نفسه عشان ميصرخش وبمجرد دخولي الراجل ده اتلفت وبصلى كان حاطط على وشه وشاح او بمعنى اصح شال عشان يداري بيه ملامحه قربت منه وانا بقوله انت مين وبتعمل كده ليه؟

حاول انه يزقني ويهرب رغم اني كنت تعبان ومش قادر اتحرك

الا اني قدرت اشيل من على وشه الشال... عشان يظهر شخص نص وشه مشوه صرخ في وشي وضربني ضربه جامده في وشي ممدوح كان واقف زي خيال المأتة والراجل عدى من جنبه ومقدرش يعمله حاجه

ولقيته نزلي القبر وبيقولي انت كويس؟... رديت عليه وانا متعصب وقلتله

_ ممسكتهوش ليه؟... ليه يا ممدوح؟

= بصراحه يا صاحبي خفت انا مش بتاع مشاكل انا كنت جاي هنا على اساس ان احنا هنكتب تقرير عن اللي بيحصل وهنرجع تاني بس انا عايز امشي انا مش حمل اللي بيحصل ده

_ طيب يا ممدوح هات الطفل ده عشان نرجعه لاهله اكيد قلبين عليه الدنيا دلوقتي

= حاضر يا صاحبي

...

قرب ممدوح من الولد وشاله وكان بيتنفض من الخوف، انا مشفق عليه وعلى كل طفل شاف الرعب ده بس كويس اننا لحقناه قبل ما يتقتل هو كمان

اخدناه وطلعنا بيه بره القبر... وسالت الطفل رغم انه كان في حاله صعبه جداً وقلتله

_ تعرف مكان بيتكم يا حبيبي؟

= اه اه اعرفه

_ طيب احنا هندخل بيك البلد، وانت شاور على البيت عشان اوديك لاهلك

= حاضر

...

اخدته من ايده واتحركت بيه على البلد وفضلنا ماشيين لحد ما وصلنا لبيت شاور عليه الطفل وقال هو ده البيت

خبطت على البيت مره واثنين وفتحلى راجل كبير في السن وبمجرد ما شافني ماسك الولد... مسكني من ايدي ودخلني لجوه وقالى

_ انت لقيته فين؟

= انت ابوه ولا جده؟

_ انا جده رد عليا يا ابني لقيته فين؟

= حفيدك كان في القبر يا حاج كان هيدبح زي باقي الاطفال بس ربنا ستر ولحقناه

_ الحمد لله انا مش عارف اقولكم ايه؟... انتوا مش من هنا صح؟

= لا يا حاج احنا من القاهره وكنا عند الراجل ده اللي اسمه مبروك

...

الراجل ملامحه اتقلبت لما سمع اسم الدجال ده وقال

_ اعوذ بالله من الشيطان الرجيم، كنتوا بتعملوا ايه عند الدجال النصاب ده؟

= احنا المفروض صحفيين يا حاج وكنا جايين نعرف ايه اللي بيحصل في القريه وايه قصه القبر ده؟

بس عشان محدش ياخد باله مننا.. عملنا نفسنا اننا جايين للعلاج الروحاني عند واحد من الدجالين اللي هنا، لحد ما قابلنا راجل اعور وهو اللي دلنا على الدجال اللي اسمه مبروك ده

_ طيب انا هكسب فيكم ثواب واعتبروه رد الواجب اللي انتوا عملتوه وانكم انقذتوا حفيدي من الموت وهحكيلكم ايه اللي بيحصل في القريه دي وايه موضوع القبر واللي هتستغربوه ان في ناس في القريه عارفه كل حاجه وخايفه تبلغ عشان ممكن تتأذي... اتفضلوا ادخلوا هعملكم شاي عشان نقدر نتكلم على رواقه

....

دخلنا انا وممدوح لصاله البيت وقعدنا والراجل دخل نيم الطفل في سريره، وبعدها خرج وعمل الشاي وقعد قدامنا وقال

_يمكن الكلام اللي انا هقوله ده يبان غريب شويه، بس صدقوني هي دي الحقيقه القريه دي كان زيها زي اي قريه كل واحد مشغول في اكل عيشه عشان يكفي بيته وعياله والعيشه كانت مستقره الى حد كبير، لحد ما من خمس سنين جالنا اربع رجاله مش من البلد وطلب انهم يشتروا بيوت في البلد او اراضي عشان يبنوا عليها ويعيشوا في البلد وده عادي طالما الناس دي معاها فلوس وهتدفع خلاص

وفعلا في منهم اللي اشترى ارض وفي منهم اللي اتعرض عليه بيت وافق في اقل من سنه كان الاربع رجاله ساكنين في القريه وبقيوا من اهلها

الاربعه دول هما مبروك وصادق ومسعد وعرفان، وقالوا انهم جايين من الصحرا وانهم اصلا من البدو بس عشان المعيشه هناك صعبه قرروا يدوروا على مكان يعيشوا فيه

لحد كده والامور كانت طبيعيه وعاديه جدا... لكن بعد فتره مش كبيره طلع علينا اللي اسمه مبروك وقال

معظم البيوت هنا تحتها اثار وانا راجل بفهم في الكلام ده ومستعد اني افتح المقابر اللي تحت البيوت دي وهاخد نسبه صغيره وهسيب الباقي لصاحب البيت اللي اتلاقى عنده الاثار

بعض الناس طمعت ووافقت على كلام مبروك وبعض الناس ومنهم انا رفضت كلام مبروك وده كان لاسباب كتير واهمها ان الراجل ده هيتعامل مع الجن ممكن الاذيه دي تطول اي حد من ناس البيت ومش كده وبس ده الاربع رجاله بدأوا ينشروا في البلد انهم بيعالجوا من السحر والمس وانهم ممكن يساعدوهم في اي حاجه يحتاجوها

وعشان معظم الناس جاهلين هنا في القريه كان لو حد تعب تعب عادي كان يقول على نفسه مسحور ويروح لواحد منهم عشان يساعده، تسألني الناس دي كانت بتتعالج هقولك لا طبعا

الناس دي كانت بتتعب وبعدها بتتجنن وبعدها بتموت ومش اي موته ده انتحار

ولكن الناس برضو كانت بتبرر ده وبتقول الاعمار بيد الله اكيد يعني مش هما السبب في موتهم... وفي ظرف سنه كان معظم اهل البلد تحت سيطره الاربع على رجاله دول يقولولهم يمين يمين شمال شمال وهما يقولوا حاضر سمعا وطاعه

لحد ما الاربع رجاله جابوا عمال كتير وابتدى الحفر في بيوت الناس اللي وافقت على فتح المقابر الاثريه على حد قولهم يعني

لكن المصيبه ان بعد الحفر مبروك اتكلم وقال كل مقبره من دول عليها راصد والراصد ليه طلبات، وطلباته بسيطه هو عايز على كل مقبره هتتفتح جثه طفل

لكن في اللحظه دي اتفاجئت من رد فعل بعض الناس اللي قالت موافقين وكأن الناس دي مسحوره فعلا وبتوافق على اي حاجه يقولوها حتى لو كانت قتل واللي كان بيعترض كنا بنلاقي جثته تانى يوم وعليها اشد انواع الفزع والرعب، الناس كلها كانت خايفه محدش كان يقدر يقول لهم لا

لحد ما واحد قلبه جامد قرر انه يبلغ وقال ميهمنيش وفعلا بلغ وجات الحكومه وبعد التفتيش لقيت المقبره اللي فيها 40 طفل مقتولين بس، بس انا عايز اقولكم حاجه الناس كانت بتروح تبلغ عن اختفاء عيالها وهي قبضت ثمن موتهم

شفتوا جحود اكتر من كده

....

_خلص الراجل كلامه وسالته هو حضرتك اسمك ايه؟

= انا عمكم لطفي انا عايش في البلد دي من 10 سنين وعارف كل حاجه بتحصل فيها بس انا خايف على نفسي وعلى عيالي واحفادي عشان كده انا ساكت

...

مش انا وممدوح من عند الراجل ده واحنا مش فاهمين ايه القوه اللي تخلي اربع رجاله يسيطروا على قريه بحالها ويخلوا الناس تبيع عيالها مقابل شويه اثار ومن غير اي اعتراض

ما اعرفش ليه محكيتش للراجل ده عن اللي حصل معايا في بيت الدجال مبروك بس كل اللي اقدر اقوله اني كنت تعبان ورجعت على البيت ونمت

قومت من النوم وانا تايه كنت مرهق جدا وتعبان واكيد ده من مشوار امبارح، الصداع كان هيفرتك دماغي قمت من مكاني رحت على المطبخ عايز اشرب شويه ميه وارجع انام تاني لما وصلت المطبخ لقيت حاجه مش لاقيلها تفسير.. في حد واقف في المطبخ راجل مديني ضهره وماسك في ايده حاجه وقبل ما اتكلم بصلى ده نسخه مني كاني واقف قدام مرايه لكن السكينه اللي في ايده كانت غرقانه دم كنت مشلول مكاني بصيت ناحيه اوضه الولاد ورجعت بصيت تاني ملقيتهوش رحت ناحيه اوضه الولاد وفتحتها عيالي مدبوحين رجعت لورا وانا بقول لا اله الا الله لا اله الا الله لكن في اللحظه دي باب شقتي اتفتح وكانت الصدمه

....

لقيت في وشى الشرطه ومعاهم اخو مراتي، اللي اول ما دخل الشقه جري زي المجنون كان بيدور على اخته في كل مكان لحد ما وصل لحد الحمام وصرخ اتحرك الظابط بسرعه نهايه الحمام هو كمان وكان على ملامحه اشد انواع الرعب والفزع وكانه شايف الشيطان قدام عينيه، اتحركت انا ناحيه الحمام عاوز اشوفهم شايفين ايه بالظبط وياريتني ما اتحركت... اللي شفته خلاني اتجمدت مكاني شفت مراتي مدبوحه ودماغها مفصوله عن جسمها في ارضيه الحمام حطيت ايدي على بقى من الصدمه او عشان امنع الصرخه... لقيت العسكري بينده على الظابط وبيشاورله على الاوضه اللي فيها عيالي.. والظابط خد خطوتين لورا

واتحرك ناحيه الاوضه عشان يشوف منظر عيالي وهما مقتولين هما كمان... منظر صعب جداً

كنت واقف مش فاهم اي حاجه مين عمل فيهم كده وليه؟

لقيت اخوها مسكني من رقبتي وبيخنق فيا وبيقولى قتلتهم ليه فهمني مراتك وعيالك وابوك ليه؟

انا كنت بسمع كلامه وانا في عالم تانى... قتلت مين ابويا ومراتي وعيالي قتلتهم ازاي؟

فضلت اعيط بهستريا واحلف اني مقتلتهمش، العساكر مسكتني ونزلوا بيا على البوكس ومعاهم الظابط وعلي اخو مراتي في الوقت ده لقيت اسعاف قدام البيت ونزلوا رجال الاسعاف وطلعوا العماره ونزلوا منها باربع جثث... كنت حاسس اني في دنيا تانيه

واتحركوا بيا على القسم، وهناك عرفت اني متهم بقتل ابويا ومراتي واولادي واني دبحتهم كلهم

مكانش عندي حل غير اني اكلم المحامي، المحامي بتاعي اسمه سيف شرف الدين.. وفعلا بعد نص ساعه لقيته قدامي مسك المحضر وبص فيه وكان مبرق مش مصدق ان انا عملت كده وبصلي وقال

_ ايه اللي مكتوب هنا ده... ها رد عليا رد عليا يا عزيز ايه اللي مكتوب هنا ده... انت قتلت مراتك وعيالك وابوك؟

= لا... والله ما قتلتهم قسما بالله ما قتلتهم كل ده كدب انا رجعت من اخر تحقيق صحفي ونمت وصحيت على المنظر ده انا مقتلتهمش ومشفتش ابويا بقالي 3 ايام

_ طيب اقعد كده وعاوزك تحكيلي كل حاجه حصلت على رواقه من اول نزولك التحقيق ده لحد دلوقتي

= حاضر هحكيلك كل حاجه، بس عاوزك تتاكد اني مقتلتش حد والله ما قتلت حد

....

وبدات احكي كل حاجه حصلت معايا لسيف عشان يساعدني

وبعد ما خلصت كلامي... سيف بصلي وقال

_ في حاجه في كلامك مش منطقيه يا عزيز

= حاجه ايه اتكلم سيف؟

_ انت بتقول انك كنت في التحقيق ده يوم 20 في الشهر وانك رجعت نمت وصحيت لقيت المنظر ده قدامك مش كده؟!

= ايوه هو ده اللي حصل

_ طب ازاي؟... ازاي والنهارده 27 في الشهر يا عزيز؟

= 27..؟!.... 27 ازاي... انا متاكد ان الكلام ده كان امبارح ازاي عدى عليا اسبوع راح فين الاسبوع ده من حياتي وكنت بعمل ايه؟

_ انا عايزك تهدى وتتمالك اعصابك، اكيد انت بس متوتر دلوقتي حاول كده تهدى وتفتكر اللي حصل

= افتكر ايه، افتكر ايه يا سيف اسبوع مر عليا ازاي من غير ما احس انا والله العظيم ما فاكر اي حاجه!

_ انت كده مش بتساعدني ولا بتساعد نفسك كده هتودي نفسك في داهيه افهم

= ما انا لو عندي حاجه هقولهالك، هخبي عليك ليه يعني؟

_ مش عارف اقولك ايه يا عزيز؟!

= طيب هقولك حاجه... ممكن تسالوا ممدوح يمكن يكون هو حصله حاجه كمان.. ممدوح كان معايا في التحقيق ده وشاف كل حاجه حصلت

_ طيب وساكت ليه من الصبح عنوانه بسرعه؟

....

اخد سيف العنوان ومشي، وانا اترميت في الحجز كنت مستني سيف يرجع عشان يقولي عمل ايه؟... فضلت مستنيه لحد الصبح معرفتش انام... ولما رجع قالي كلام غريب جدا

قال

_ عزيز انا عايزك تتمالك اعصابك في اللي جاي... صاحبك ممدوح قال كلام مش في مصلحتك خالص قال ان انت من يوم ما رجعت من التحقيق ده وانت مش طبيعي، عصبي جدا كنت بتضرب عيالك ضربه غبي لدرجه انه ممدوح جالك انت طردته من البيت وقلتله مش عاوز اشوفك تاني

غير ان مراتك قالت لممدوح انك بتسد ودانك في الاذان او لو سمعت قران وبتفضل تصرخ بهستريا... لحد ما في يوم مراتك اتصلت بممدوح وقالتله انك بتتكلم مع شخص مش موجود وان خلاص اتجننت... ده بالنسبه لكلام ممدوح

اما علي اخو مراتك فقال ان اخته اتصلت بيه يوم الجريمه.. وكانت بتصرخ وقالت انك عايز تموتهم هي والعيال وانك جاي من بره وهدومك غرقانه دم

وانا لحد دلوقتي مش فاهم ايه اللي حصلك ووصل الامور لكده يا عزيز

= انا نفسي مش فاهم بس كل اللي اقدر اقولهولك روح لقريه الدجالين واسال هناك عن واحد اسمه لطفي والناس هتدلك وقوله على اللي انا فيه وهو ممكن يكون عنده تفسير

....

مش سيف للمره الثانيه عشان يروح قريه الدجالين ويعرف في ايه

لكنه المره دي رجع وقالي

_ بص يا عزيز كلام الراجل ده اللي اسمه لطفي مش هتاخد بيه المحكمه... الراجل ده قال انه معمولك سحر بالخراب والموت لاقرب الناس ليك وان هو متاكد انك قتلت تحت سيطره السحر واكيد مكنتش في وعيك وعشان كده دلوقتي انت مش فاكر حاجه، بس هقولك حاجه.. الكلام ده مش هتاخد بيه المحكمه صدقني

بس اه نسيت اقولك حاجه... الراجل اللي انت حكيت عليه اللي اسمه مبروك هو و3 رجاله التانيين سابوا القريه امبارح بعد ما طلعوا ان هما اللي ورا قتل الاطفال ودفنهم في القبر وكانوا بيتاجروا في الاعضاء وبياخدوا نسبه كبيره من العمليات دي

= طيب وايه الحل.. ايه الحل دلوقتي عشان اطلع من التهمه دي انا معملتش حاجه

_ مفيش حل غير ان انت تقول نفس الكلام ده.. وتدخل مستشفى الامراض العقليه على الاقل بدل ما تتعدم.. صدقني مفيش غير الحل ده قدامك وبعدها يحلها حلال

...

فعلا مكانش قدامي غير الحل ده... ولما رحت قدام المحكمة ادعيت الجنون واني مسحور واني قتلتهم تحت تاثير السحر وفعلا ابعدد ما اتحكم عليا بالاعدام المحامى عمل استئناف واتعادت المحاكمة...والمحكمة امرت بتحويلى المستشفى لامراض النفسيه والعقليه للكشف على قوايا العقليه والتاكد انني لا اعاني من اي امراض نفسيه او عقليه

الحل ده بالنسبالى كان انسب حل.. عشان بدل ما تعدم اكون عايش زي المجنون لكني لسه بشوف نفس الشخص اللي شبهى بيظهرلي وفي ايده نفس السكينه اللي عليها دم وبيبتسم وبيقولي الدور عليك

....

مساء الخير انا الدكتور امجد عبد الحميد ودي مذكرات مريض نفسي متحول من النيابه عشان قتل ابوه ومراته وعياله وادعي الجنون وقال ان هو قتلهم تحت تاثير السحر والنهارده لقينا جثته في غرفه العزل... كان شانق نفسه وكاتب ورقه ان ما انتحرش وانه في حد ورا موته لكنه مش بشر.. وان اللي قتله ده من الجن وبيقسم انه مقتلش لامراته ولا عياله ولا ابوه وانه فعلا قتلهم تحت تاثير السحر

....

تمت