القانون بينفي وجود الجريمة الكاملة، مفيش جاني بيقدر يظبّط كل حاجة على الشعرة، لازم بتفلت منه تفصيلة... وبيتعرف في الآخر مَن الجاني؟
...
أنا المقدم أدهم سالم.. النهارده جالنا بلاغ من فيلا رجل الأعمال المعروف عزت نصار، اتحركنا على الفيلا، ولما وصلنا هناك كان الباب مفتوح.. وعلى الأرض كانت جثة عزت نصار، واللي كان ظاهر على وشه الفزع والرعب.. قربت من الجثة ونزلت جنبها، ولقيت آثار رغوة بيضا حوالين بُقّه.. ومافيش أي أثر تاني على جسمه.
وبعد شوية وصل فريق من المعمل الجنائي والطب الشرعي، وبدأوا يشوفوا شغلهم.. وفي الوقت ده قابلت مدام صفاء، وهي تبقى زوجة المجني عليه.. قربت منها وقلت لها:
_ البقاء لله يا مدام، شدي حيلك.
= سبحان من له الدوام.
_ هو المرحوم كان بيعاني من أي أمراض؟
= لا خالص، المرحوم كان مهتم بصحته.
_ أنا شايف على الترابيزة قطعة شيكولاتة.. واضح إنها تخص المرحوم؟
= آه فعلًا، دي شيكولاتة بتجيله من بره البلد، بتهدي الأعصاب وبتخلي الشخص في حالة استرخاء.
_ أنا آسف إني بكلمك في الأمور دي دلوقتي، بس إحنا عايزين نعرف إذا كان في شُبهة جنائية في الموضوع ولا لأ؟
= شُبهة جنائية إزاي يا فندم؟
_ يعني يكون الأستاذ عزت اتقتل، ما ماتش موتة طبيعية؟
= هو في احتمال إنه ممكن يكون اتقتل؟
_ والله كل شيء وارد، إحنا هنعمل التحريات وهنشوف.. بشكرك جدًا وبعتذر مرة تانية.
...
رجعت مكتبي وطلبت تحريات عن المجني عليه، وأكيد طبعًا المعلومات هتبقى كتير، خصوصًا إنه رجل أعمال، وأكيد ليه معارف وأعداء كتير.
وفعلًا بعد يوم كامل وصلت التحريات الخاصة برجل الأعمال عزت نصار، وفتحتها وبدأت أقرأ:
(عزت نصار، السن ٥٠ سنة، يملك شركة من أكبر شركات الاستيراد والتصدير.. بالنسبة للمعارف والصداقات، أقرب شخص ليه مدحت السيوفي صاحب شركة السيوفي جروب. أما بالنسبة للعداوات، فعزت معاه مشاكل مع تلاتة:
الأول هو ابنه رامي.. التحريات بتقول إن رامي كان بيتخانق مع أبوه كتير، وده بسبب إن رامي مدمن، وحاول أبوه يعالجه أكتر من مرة، لكنه فشل في ده.
...
التانية زوجته مدام صفاء.. وده بعد ما عرفت إنه متجوز عليها، وحصل وقتها مشكلة كبيرة وكانت هتوصل للطلاق، وعلى أثرها طلق الأستاذ عزت مراته الجديدة عشان ما يخسرش مدام صفاء. ورغم إنه عمل كده، إلا إن المشاكل استمرت ما بينهم.
...
التالت شوقي حامد، رجل أعمال منافس لعزت نصار، وكان حصل بينهم خلاف كبير بسبب إن عزت نصار خسر شوقي حامد صفقة مهمة جدًا، وده خلّى شوقي حامد يهدده بالقتل قدام ناس كتير.
...
وكالعادة كان لازم نستدعي التلاتة عشان يدلوا بأقوالهم. وفي نفس الوقت وصل تقرير الطب الشرعي والمعمل الجنائي، والبداية كانت مع تقرير الطب الشرعي، واللي كان بيقول:
: تم العثور في دم المتوفي على تركيز مرتفع من مادة الثاليوم Thallium، وهي مادة شديدة السمية، ببطء الامتصاص.
المادة دخلت الجسم عن طريق الفم، وتم تحديد إن مصدرها هو أحد قطع الشوكولاتة.
لم تُلاحظ علامات عنف جسدي أو أي خدوش أو كدمات خارجية، مما يدل على إن الوفاة لم تكن نتيجة هجوم مباشر.
زمن الوفاة: تُقدَّر الوفاة بأنها حدثت بين الساعة ٦:٣٠ مساءً و٨:٠٠ مساءً.
...
أما تقرير المعمل الجنائي فقال:
تم فحص:
عبوة الشوكولاتة بالكامل
بصمات الأصابع الموجودة على العبوة والغطاء الداخلي
النتائج:
تم العثور على بصمات المتوفي فقط على عبوة الشوكولاتة من الخارج والداخل.
التحليل كشف وجود مادة الثاليوم ممزوجة بزيت الكاكاو.
الاستنتاج النهائي:
سبب الوفاة: تسمم حاد بمادة الثاليوم نتيجة تناول شوكولاتة تم التلاعب بها.
نوع القتل: قتل عمد مع سبق الإصرار باستخدام وسيلة غير تقليدية.
...
يعني زي ما توقعت، الموضوع فيه شُبهة جنائية.. وعشان كده تم استدعاء التلاتة المشتبه بيهم للتحقيق معهم.
والبداية كانت مع رامي:
_ رامي، انت متهم بقتل والدك عزت نصار، ما هي أقوالك فيما هو منسوب إليك؟
= أقتل بابا إزاي؟!.. أنا مستحيل أعمل كده طبعًا.
_ بس التحريات بتثبت إنك كنت على خلاف دائم مع الوالد، وده بسبب شربك للممنوعات؟
= أنا فعلًا كنت بتخانق معاه كتير، وباعترف إني كنت بشرب الحاجات دي، بس أنا بطلت.. لكن مش عشان خلافات أقتل بابا! هو كان خايف عليا وعاوزني أبعد عن السكة دي.
_ وكنت فين أول امبارح من الساعة ٦ للساعة ٨ مساءً؟
= كنت في كافيه مع ناس صحابي، وتقدروا تتأكدوا من الكاميرات.. هو كافيه في المعادي.
_ تمام يا رامي، استنى بره.
...
وبدأنا التحقيق مع مدام صفاء:
_ مدام صفاء، حضرتك متهمة بقتل جوزك عزت نصار، ما هي أقوالك فيما هو منسوب إليكِ؟
= إيه الجنان ده؟!.. أقتله ليه؟
_ مدام صفاء، التحريات أثبتت إنك كنتِ على خلاف مع جوزك بسبب إنه اتجوز عليكي، وبعد ما طلقها، الخلافات دي ما وقفتش.. رأيك إيه في الكلام ده؟
= أكيد طبعًا هزعل لما جوزي يتجوز عليّا، وهتخانق معاه.. بس هو طلقها عشاني، وأنا كنت واخدة على خاطري بس منه.. لكن إني أقتله؟ لا مستحيل طبعًا.
_ كنتي فين وقت وقوع الجريمة، من الساعة ٦ للساعة ٨ مساءً؟
= كنت بره البيت مع واحدة صاحبتي اسمها شروق، ممكن حضراتكم تستدعوها وهتشهد بده.
_ تمام يا مدام صفاء، تقدري تستني بره.
...
وبدأنا التحقيق مع شوقي حامد:
_ أستاذ شوقي، انت متهم بقتل الأستاذ عزت نصار، ما هي أقوالك فيما هو منسوب إليك؟
= أقتل مين يا باشا؟!.. أنا شوقي حامد، رجل أعمال، وليا اسمي ومنصبي، هورط نفسي في جريمة قتل ليه؟
_ التحريات بتقول إنك كنت على خلاف مع الأستاذ عزت، وده بسبب الصفقة اللي خسرها لك، وكمان انت هددته قدام كل التجار والمستثمرين.. ردك إيه على الكلام ده؟
= كانوا كلمتين في ساعة ضيقة وعصبية، لكن موضوع إني أقتل؟ مستحيل.
_ طيب يا أستاذ شوقي، استنى بره شوية.
...
كلهم في دايرة الشك، خصوصًا إن القتل ما تمش بسلاح أبيض أو مسدس.. القتل كان بسبب التسمم من الشوكولاتة اللي أكل منها الأستاذ عزت قبل ما يتوفى، والمعمل الجنائي والطب الشرعي أثبتوا إن سبب الوفاة بسبب الشيكولاتة.
كنت قاعد حيران، وفي نفس الوقت كنت طالب تحريات مفصلة على التلاتة المشتبه بيهم، لكن لما وصلت التحريات زوّدت حيرتي أكتر، وخلّت التلاتة في دايرة الشك.
...
لما عملنا تحريات مفصلة، رصدنا زيارة رامي ابن المجني عليه لصيدلية دكتور، واكتشفنا إن الدكتور ده صاحب رامي، ورامي كان متعدد الزيارة عليه في الفترة الأخيرة، وممكن جدًا يكون الدكتور ده هو اللي إدّى سم لرامي.
...
أما مدام صفاء، فهي أصلًا دكتورة في معمل تحاليل، يعني سهل عليها جدًا تجيب مواد كيميائية سامة.. ده غير إن شهادة الجيران أكدت قوة المشاكل ما بينها وما بين جوزها عزت نصار.
...
أما شوقي حامد، فده حكايته حكاية.. التحريات المفصلة أثبتت إن شوقي بيمتلك أسهم في شركة الشوكولاتة اللي بره البلد، واللي عزت نصار بيجيب منها الشيكولاتة بتاعته، يعني وارد جدًا إن الشوكولاتة تكون جاية من بره البلد وهي مسمومة، ويكون ده كله من تخطيط شوقي حامد عشان محدش يشك فيه.
...
حد فيكم تخيّل السيناريو اللي حصل؟.. حد عرف منكم مين هو الجاني؟
طيب شاكين في مين؟
...
1
-2
