كل قاتل وليه حيلة بيقتل بيها عشان محدش يكشفه، فيه اللي بيلبس ماسك على وشه، وفيه اللي بيلبس كاب على راسه عشان يخبي وشه من احتمالية وجود كاميرات

وفي حالات الجرائم الغريبة والمستعصية بيكون القاتل محترف وعارف كل حاجه عن المكان قبل ما يدخله وينفذ جريمته لكن المرة دي الجريمة كان غريبة ومعدتش عليا قبل كده

المجرم أستعان بحاجة بعيدة كل البعد عن تفكيرنا.. استعان بالدخان الأبيض

...

كنت قاعد قدام التليفزيون بتفرج على البرامج المصريه اللي بقت بتستضيف اصحاب الترندات ناس متستحقش الشهره اللي هما فيها دلوقتي.. للاسف تفاهات بتوصل ناس متسواش للشهره والمجد

قطع سرحاني صوت مراتي ماجده وهي بتقولى

_ ادم انت مش هتروح شغلك.. الساعه بقت 10

= لا نازل يا حبيبتي.. مش عاوزه اي حاجه قبل ما امشي

_ لا يا حبيبي عاوزه سلامتك

...

انا المقدم ادم العزازي.. عندي 45 سنه، متجوز ماجده وعندي منها ولد وحيد.. الحياه مستقره والحمد لله وخلاص كلها ايام وهترقى وهبقى العقيد ادم العزازي

وصلت مكتبي وطلبت من عم حسين عامل البوفيه يعملي فنجان قهوه ويجيبه على المكتب

وبعدها دخلت المكتب وقعدت عشان اشوف الشغل اللي ورايا النهارده ومفيش 10 دقايق.. ولقيت تليفوني بيرن

والمتصل كان الرائد اشرف، رديت عليه

_ الو ايوه يا باشا.. في جريمه قتل هنا في المعادي انا بعت لحضرتك اللوكيشن على الواتساب.. يا ريت حضرتك تيجي بسرعه

= طيب اهدى بس يا اشرف مالك مستعجل ليه؟

_ اصل اللي اتقتل يا فندم شخص معروف وكانوا مستضيفينه قريب في التليفزيون.. شخص من بتوع رد المطلقه وجلب الحبيب وشغل السحر والشعوذه ده.. اظن حضرتك تعرفه اسمه شافع ابن تميم

= اه ايوه ايوه.. عرفته الشخص ده من الخليج وفعلا استضفوه قريب في التليفزيون.. طيب خلاص انا جايلك حالا.

...

قفلت مع اشرف المكالمه و نزلت من مكتبه بسرعه وركبت عربيتي واتحركت على اللوكيشن.. لما وصلت كانت عربيات الشرطه في كل مكان وفي عربيه اسعاف والناس كلها واقفه بتتفرج، نزلت من عربيتي ودخلت العماره، شكل العماره من بره عماره فخمه ومش اي حد يسكن فيها

كان قاعد في مدخل العماره راجل كان ماسك دماغه وشكله دايخ، سبته ومشيت ودخلت جوه، لقيت الرائد اشرف بيقولى

_ الموضوع مش سهل خالص يا ادم باشا.. القاتل ده محترف وده واضح من طريقه القتل

= محترف ازاي يعني؟

_ تعالى معايا سيادتك وانا هوريك

...

مشيت مع اشرف لجوه عشان افهم في ايه.. لحد ما وصلنا قدام الاسانسير واللي كان قدامه حاجه مش مفهومه قنبلتين من النوع المسيل للدموع، واللي مش فاهم دي قنابل بتطلع دخان ابيض بيعدم الرؤيه وفي نفس الوقت تاثيره خطير جداً لاي شخص بيعاني من حساسيه على الصدر.. واتكلمت قولت لاشرف

_ واضح ان القاتل استخدم الاسانسير

= مظبوط يا فندم

..

وعشان كده طلعت على السلم.. الشقه كانت في الدور التالت لما وصلت لقيت قدام الاسانسير قنبلتين تانيين وبرده من النوع المسيل للدموع بس قبل ما ادخل للشقه لفت نظري وجود كاميرات بس محبتش اتسرع ودخلت الشقه.. كل حاجه كانت منظمه وتمام

لحد ما وصلت للاوضه اللي فيها الجثه.. جثه الراجل كانت على السرير والموت حدث اثر رصاصه في منتصف الجبين

معنى كده انه القاتل ده فعلا محترف

اصل كل قاتل وليه حيلة بيقتل بيها عشان محدش يكشفه، فيه اللي بيلبس ماسك على وشه، وفيه اللي بيلبس كاب على راسه عشان يخبي وشه من احتمالية وجود كاميرات

وفي حالات الجرائم الغريبة والمستعصية بيكون القاتل محترف وعارف كل حاجه عن المكان قبل ما يدخله وينفذ جريمته لكن المرة دي الجريمة كان غريبة ومعدتش عليا قبل كده

المجرم أستعان بحاجة بعيدة كل البعد عن تفكيرنا.. استعان بالدخان الأبيض

...

من وجهه نظري ان القاتل استعان بالقنابل المسيله للدموع عشان يقدر يدخل الاسانسير من غير ما الكاميرات تلقطه عمل كده مع الدخول والخروج وده واضح لان الموجودين هما اربع قنابل استخدم اتنين منهم

في الدخول للعماره واستخدم اتنين منهم في الخروج من العماره

ومعنى كده ان القاتل عارف مكان الكاميرات فين؟.. يعني ممكن يكون من العماره نفسها، او حد دخل العماره اكتر من مره

ورغم ان القاتل عمل كده الا اني طلبت تسجيل الكاميرات في اقرب وقت..

خرجت من اوضه القتيل.. ولقيت اوضه تانية كانت مقفوله.. طلعت منديل من جيبي عشان البصمات ومسكت بيها اوكره الباب وفتحته

واللي شفته كان مخيف

الاوضه مقرفه جداً.. في طيور ميته وحيوانات مدبوحة ده غير الورق اللي عليه رسومات غريبه ومش مفهومه

لقيت نفسي وبدون سبق انذار بقول اعوذ بالله من الشيطان الرجيم

الباب اترزع واتقفل بعنف ونور الاوضه اتطفى في لحظه

وسمعت اصوات همس في ودني اليمين وودني الشمال.. كنت بلف حوالين نفسي وبقول اعوذ بالله من الشيطان الرجيم، اعوذ بالله من شر ما خلق

...

وشوفته.. اكتر مخلوق مرعب شوفته في حياتي رجليه كانت اشبه برجلين الجمال وعينيه كانت بيضاء تماماً ووشوه مشوه

قربت من الباب عشان احاول افتحه لكني معرفتش.. لحد ما المخلوق ده بقى في وشي مسكني من رقبتي وفضل يخنق فيا لكني فوقت على ايد اشرف وهي بتهزني وكان بيقولى

_ مالك يا باشا شكلك مرهق ومنمتش كويس؟

= فعلا يا اشرف انا تعبان وبشوف حاجات صعبه.. انا هرجع على المكتب وبعد ما البواب ده يفوق من الغيبوبه اللي هو فيها هاتهولي على المكتب عشان نعمل التحقيق معاه

ركبت عربيتي وانا مش عارف اللي شوفته ده، وصلت ونزلت من العربيه

ودخلت مكتبي وانا هتجنن طلعت سيجاره وبدات ادخن وانا حاسس انه موضوع كبير ومش هيخلص على خير

..

شويه والباب خبط، ودخل اشرف ومعاه بواب العماره.. وقالى

_ ادم باشا.. عم عطا البواب اللي حضرتك طلبته

= تمام شكراً يا اشرف

...

قعدت الراجل قدامي على الكرسي.. وقولتله

_ عم عطا انا عاوزك تحكيلي كل حاجه حصلت في اليوم ده، وعاوزك كمان تحكيلي كل اللي تعرفه عن شافع ابن تميم

= تمام يا بيه انا تحت امرك، امبارح يا بيه كان يوم عادي زي اي يوم نصفت العماره وجبت الطلبات للسكان والدنيا كانت ماشيه زي الفل، وعلى الساعه 3الفجر كده كان الجو بره برد فدخلت اعملي كوبايه شاي

لكني سمعت صوت عربيه جت وقفت قدام العماره، كانت عربيه يا بيه معليهاش نمر.. بس انا عارف العربيه دي دي عربيه رش المبيدات الحشريه بس جايه تعمل ايه الساعه 3 الفجر.. فقربت عشان افهم في ايه؟

وبمجرد ما قربت ان شباك العربية يا بيه.. الراجل نزل منها وكان لابس ماسك على وشه ومش باين منه غير عينيه وده عادي عشان هما بيستخدموه عشان الريحه.. لكن الراجل خرج راجل ازازه من جيبه ورش منها في وشي، وبعدها انا مدرتش بنفسي الدنيا لفت بيا ووقعت على الارض

...

_طيب مش فاكر اي حاجه من ملامح الراجل ده؟

= ما انا قلتلك يا بيه، في ماسك ومش باين منه غير عينيه

...

طيب يا عم عطا انا بشكرك جدا تقدر دلوقتي تروح.. وبعد ما مشي عطا البواب

طلبت من الفريق اللي معايا.. تحريات عن المجني عليه في اسرع وقت ممكن.. عشان نقدر نتوصل للقاتل

لكن وانا قاعد في المكتب.. النور بدأ يرعش وشوفت على الارض شخص قاعد متربع وجسمه بيتهز لورا ولقدام زي اللي بيفقر

قربت منه عشان اشوفه بيعمل ايه؟

ولما قربت عشان اشوفه في ايد اتحطت على كتفي بصيت ورايا ولقيت..

لقيت اشرف بيقولى

_ مالك يا ادم واقف كده ليه؟

= انت دخلت امتى يا اشرف؟

_ لسه دلوقتي على طول داخل خبطت كذا مره وانت ما ردتش، ولما دخلت لقيتك واقف كده، انت كويس يا ادم؟

= انا كويس.. بس القضيه دي فيها حاجه غريبه الراجل اللي مات وراه اسرار كتير، انا شوفت حاجات غريبه في بيته ومش في بيته بس

_ مش فاهم قصدك ايه؟

= لا أبداً متشغلش بالك، انا تعبان شويه هريح في المكتب هنا ولو في اي حاجه جديده بلغني

_ طيب ما تروح تنام افضل ولو في حاجه حصلت انا هتصل بيك

= لا انا هريح هنا.. شوف انت اللي وراك وبلغني باخر التطورات

...

خرج اشرف من المكتب وانا حاسس بصداع هيفرتك دماغي، مش مدرك اللي حصل من شويه، مستحيل يكون اللي بشوفه ده تهيؤات اكيد في حاجه غلط

رميت جسمي على الكنبه اللي في المكتب وروحت في النوم، لما فتحت عينيا مكنتش في المكتب انا كنت في نفس الاوضه اللي شوفتها في بيت شافع ابن تميم

وشوفته قاعد على الارض وقدامه دايره متحوطه من شموع وجوه الدايره دي كانت موجوده بنت صغيره، وبيقول كلام غريب مش فاهم منه ولا كلمه

لكن البنت اللي قدامه على الارض بدأت تتنفض، وكان بيطلع منها اصوات غريبه اصوات عامله زي زمجره الكلاب، وفجأة البنت نزفت دم من بقها وماتت

المشهد اتبدل لمكان انا عارفه كويس جداً، دى وحده قوات مسلحه الوحده دي اللي انفجرت قريب ومات كل اللي فيها، وفعلا شوفت المشهد قدامي مشهد الانفجار

وصحيت، صحيت وانا مش فاهم اي الرابط؟

الرابط ما بين شافع ابن تميم وانفجار الوحدة دي

ممكن مع ضغط الشغل والتهيؤات الاحلام دخلت في بعضها؟

سؤال سألته لنفسي وانا مش مصدقه اصلا

..

في الوقت ده الباب خبط، ودخل الرائد اشرف وهو بيقول

_ تمام يا فندم، ده ملف التحريات الخاص بشافع ابن تميم والسيديهات دي هي تفريغ الكاميرات الخاص بالعماره

= تمام يا اشرف.. هقوم دلوقتي عشان اشوف التحريات والسيديهات وباذن الله يكون فيهم حاجات تفيد

..

قومت من مكاني وقعدت على المكتب

وفتحت الملف

( شافع ابن تميم.. مغربي يمتلك الجنسيه المصريه، ليس له عمل ثابت ولكن معروف انه روحاني ويحاول مساعده الغير

لا توجد له عداوات سابقه.... الخ)

وبعدها كلام كثير مش مهم مش هيفيد بحاجه، بدات افتح السيديهات على الكمبيوتر واول سي دي كان خاص بيوم الحادثه وزي ما قال بوابه العماره بالضبط.. جت عربيه وقفت قدام العماره الساعه 3 الفجر ونزل منها راجل لابس كاب بس الكاميرا مش جايبه ملامحه وواضح انه لابس على وشه زي كمامه ولكن من نوع بلاستيك وده اللي بيستخدم في حالات رش المبيدات، وده طبعا بعد ما خدر البواب

ومن جوه العماره

الكاميرا اللي قدام الاسانسير، اترمي قصادها قنبله مسيلة للدموع طلعت دخان ابيض خلى زاويه الرؤيه منعدمه

وفي الوقت ده القاتل دخل الاسانسير، ولما وصل

عمل نفس الموضوع قبل ما يخرج من الاسانسير، وبعدها خرج حاجه من جيبه وفتح بيها في باب الشقه، وبعد ما خلص على شافع ابن تميم

خرج وعمل نفس الخطوه من تاني رمي قنبله قدام الاسانسير وركب الاسانسير ونزل وقبل ما يخرج رمى الاخيره وخرج من العماره

...

شخص عارف مكان الكاميرات وعنده احترافيه في التعامل ومش سهل اننا نقبض عليه

بدات اراجع باقي التسجيلات.. واللي رصدت دخول اشخاص كتير جداً للعماره، ولشقه شافع ابن تميم بالذات

وعشان كده طلبت من تاني استدعاء عطا البواب

..

وفعلا جيه ووقف قدامي.. وقالى تؤمر يا بيه

= الامر لله يا عم عطا، كنت عايز اسالك كم سؤال كده وحاول تركز معايا

_ انا تحت امرك يا بيه لو اعرف اي حاجه اكيد هجاوب

= طيب تمام عظيم جداً.. كنت عايز اسالك على الناس اللي كانت بتتردد على بيت في المجني عليه.. كانوا بيجولوا ليه؟

_ والله يا بيه على حسب ما اعرف، المرحوم كان بيعالج الناس من المس والسحر وفي ناس كتير كانت بتجيله عشان يساعدهم

= طيب وملحظتش في مره ان في حد زعق معاه، او عمل معاه مشكله

_ والله يا بيه مش فاكر، اصله كان بيجيله ناس كتير قوي، وابقى كداب لو قولت اني فاكر

= طيب هو شافع تسبب في موت حد قبل كده؟

_ لا انا ما شفتش حاجه زي دي.. محصلش قبل كده؟

= طيب هسالك السؤال بصيغه تانيه، شافع متسببش في موت طفله صغيره؟

...

بدات تظهر ملامح التوتر على عطا البواب.. اللي سكت شويه وبعدين قال

_ زي ما قلتلك يا بيه مش فاكر

= طب انت عارف يا عم عطا اللي بيخبي علينا حاجه بنتعتبره مشترك في الجريمه؟

_ ها.. انا مش مخبي حاجه يا بيه، امانه عليك متضغطش عليا اكتر من كده، انا معرفش حاجه

= طيب يا عم عطا، روح دلوقتي بس احتمال نستدعيك تاني

_ انا تحت امرك يا بيه في اي وقت

...

مشي عطا من قدامي وانا متاكد انه بيكدب، قعدت على المكتب وطلبت فنجان قهوه وقعدت افكر لحد ما جالي اشرف وقال

_ ادم باشا.. ده تقرير خبير البصمات مفيش اي بصمات غريبه في مسرح الجريمه كلها بصمات المجني عليه.. وده تقرير الطب الشرعي

وده معروف ده بيوضح سبب الوفاه طلق ناري في منتصف الرأس

لكن المعمل الجنائي لقي شويه حاجات في بيت شافع

منهم حاجه لفتت النظر.. الحاجه دي كانت صوره بنت صغيره في دولاب شافع

...

لما شوفت الصوره اتصدمت.. صوره البنت اللي شوفتها في الحلم اللي ماتت

بصيت لاشرف وقلتله

= في اسرع وقت يا اشرف تعرفلي مين البنت دي... والحق عطا قبل ما يمشي وهاته بسرعه جايز يتعرف عليها

_ ما اهو في حاجه كمان ادم باشا.. ده تقرير خبير المفرقعات بيقول ان القنابل اللي استخدمها القاتل مصنعه يدوي

= مصنعه يدوي ازاي يعني؟

_ يعني حد عمل القنبله دي، يعني من الاخر يا باشا اللي نفذ الجريمه دي واحد ليه علاقة بتصنيع القنابل والمتفجرات

...

وقتها افتكرت الحلم اللي شوفته تاني.. وحده الجيش اللي اتفجرت

معنى كده ان القاتل هو هو الشخص اللي فجر الوحده، بس ايه اللي دخل شافع في تفجير وحده جيش وايه علاقه البنت بكل ده؟

راسي كانت هتنفجر من التفكير

لكن لقيت اشرف وفي ايده عطا.. مسكت الصوره ووريتها لعطا وقلتله تعرفها شوفتها قبل كده

انطق انا عارف انك عارف كل حاجه، بس اكيد خايف تتكلم اتكلم ومتخفش انا هحميك

رد عليا وقال

هتحميني يا بيه.. حد بيقدر يحمي حد من الجن؟

رديت عليه وانا متعصب

بقولك ايه.. بطل امور الجنان دي.. وقولى تعرف ايه؟

...

لكن قبل ما عطا يفتح بقه، برق ومسك رقبته كانه بيتخنق ووقع على الارض وبوقه نزل شلال دم لكن عطا طلع حاجه من جيبه قبل ما يموت ولما بصيت شوفت..

مفتاح.. عطا طلع مفتاح من جيبه قبل ما يموت، المفتاح ده كان مكتوب عليه رقم 7.. لقيت أشرف بيقولى

_مفتاح اي ده يا باشا؟

=ده مفتاح شقة في نفس العماره.. أكيد الشقة دي فيها اجابة عن كل التساؤولات، أشرف كلم الاسعاف تاخد جثة عطا للمشرحة وأنا هروح علي العماره أشوف الشقة دي فيها إى؟

_هتروح لوحدك يا باشا؟

=اه هروح لوحدي.. لازم منلفتش الأنظار أنا لسه معرفش سبب خوف عطا وعشان كده هروح لوحدي

...

خرجت من مكتبي وركبت عربيتي واتحركت علي العماره، الساعة كانت داخلة علي 5 المغرب.. وصلت ودخلت العماره وطلعت السلم لحد ما وصلت لشقة 7.. طلعت المفتاح من جيبي وفتحت باب الشقه وأنا متوقع اني هشوف حاجات غريبة وشعوذة زى اللي شوفتها في شقة شافع، لكنى أتصدمت من اللي شوفته

أنا أول ما نورت نور الشقه.. ودخلت لجوه لقيت جوه ترابيزة أشبه بترابيزة اجتماعات وعليها ورق كتير وصور

لما بصيت في الصور.. كانت صور لمباني حكومية ووحدات ونقط تابعة للجيش.. وخرايط لأمكان الدخول والخروج

طلعت تليفوني بسرعة وبلغت المديرية بالوضع هنا.. وفي نفس الوقت أتصل بيا أشرف وقالى

_آدم باشا يا ريت تيجي بسرعه.. احنا عرفنا مين البنت اللي كانت في الصوره

...

خرجت بسرعه من الشقه ورجعت على المديريه.. واول ما دخلت المكتب لقيت اشرف مستنيني وبيقول

_ ادم باشا الموضوع كبير.. البنت اسمها اميره بنت شخص اسمه حمزه عثمان.. ولما عملنا تحريات عنه عرفنا انه مهندس كيميائي وخبير في صناعه المفرقعات

= طيب ومستني ايه؟... طلع امر بالقبض عليه فوراً

_ تمام يا فندم احنا عملنا ده فعلا بتعليمات من العميد هشام.. لكن اكيد الشخص ده مش هيكون موجود في بيته اكيد هربان بعد الجريمه اللي عملها ومساله القبض عليه مش هتكون سهله

= لازم نلاقيه يا اشرف، القضيه دي كبيره مش مجرد جريمه قتل وخلاص

...

في الوقت ده تليفوني رن.. وكان اللي بيتصل العميد هشام

رديت عليه وانا بقوله

_ تحت امر سيادتك يا فندم؟

= آدم اتحرك فوراً على مباحث امن الدوله.. الناس هناك عندها معلومات مهمه جداً عن المجني عليه شافع ابن تميم وحل القضيه كله هتكون بدايته من هناك

_ تمام يا فندم هتحرك فوراً

...

وفعلا نزلت بسرعه من المديريه واتحركت على مباحث امن الدوله، وهناك قابلت العقيد سامي سلم عليا وبعدين دخلنا غرفه فيها شاشه عرض كبيره

واتكلم وقال

_ اللي وصلت ليه يا سياده المقدم ساعدنا كتير جداً.. اللي قدامك في الصوره ده المفروض انه اسمه شافع ابن تميم ولكن في الحقيقه لا

ده ارها.. بي اسمه الحركي اللي نعرفه ابو براء

قدر هو وجماعته انه يقتل عدد كبير جداً من الجنود المصريين، وبعدها هرب بره مصر لكنه رجع باسم تاني وهيئه تاني

رجع باسم الشيخ شافع ابن تميم وغير شويه في شكله لكن ده كان الظاهر بس اما في الباطن فكان زي ما هو شغال في العمليات الارها.بية

وهو اللي ورا العمليه بتاعت الوحده العسكريه اللي اتفجرت

ولكن الغريبه من العمليه تمت بقنابل c4.. ودي قنابل مدمره جداً بس اللي احنا متاكدين منه ان القنابل دي اتصنعت في مصر وتحت ايد خبير كمان وعشان كده وبعد موت ابو براء لازم نوصل للشخص اللي صنع القنابل دي لانه خطر على الامن العام

...

بعد ما خلص العقيد سامي كلامه.. وعدته اننا انا هنوصل للشخص ده في اقرب وقت.. بس الموضوع مكنش سهل.. فضل هربان مننا ست شهور مش عارفين نوصله فص ملح وداب

لحد ما في يوم جتلنا اخباريه عن مكانه.. كان في بيت معزول شويه في السويس.. فضلنا مراقبين البيت من بعيد ومن غير ما يعرف لحد ما خرج كان رايح يجيب شويه طلبات وهجمنا عليه حاول يهرب لكن كنا كتير مقدرش يقاوم واستسلم

اخدناه على المديريه.. وفي البدايه كان رافض انه يتكلم لكن مع الضغط عليه اتكلم وقال

_ اسمي حمزه عثمان، مهندس كيميائي عندي 33 سنه مراتي اتوفت في حادثه ومكنش عندي غير بنت واحده لكنها كانت تعبانه معرفش عندها ايه؟

لفيت على دكاتره مصر كلها والكل اجمع انها سليمه ومش بتعاني من اي حاجه.. لحد ما واحد صاحبي ربنا يسامحه قالى ما تجرب توديها لحد من اللي بيعالج من المس والسحر بنتك اكيد معمولها عمل، في البدايه رفضت وقلت جاهل لكن مع زياده تعب بنتي.. سالته لو يعرف حد كويس

فدلني على شيخ اسمه شافع ابن تميم وقال عليه كلام كويس وانه مش بياخد فلوس

روحتله بيته وحكيتله على التعب اللي بتمر بيه بنتي، لكنه طلب مني طلب غريب قالى عاوزك تعملي خمس قنابل من نوعc4

ولما سالته هيعمل بيهم ايه؟.. رفض يقولى وقالى ان حياه بنتك وعلاجها مقابل القنابل دي

في الاول كنت معترض لكني عملتها.. عملتها عشان انقذ بنتي وبعد ما سلمتهم ليه.. حاول يعالج بنتي لكنها ماتت في ايده مستحملتش اللي شافته، ويومها كنت هقتله لكن البواب اتدخل ومنعني وفي نفس اليوم عرفت التفجير وحده الجيش بنفس نوع القنابل اللي انا صنعتها يعني خسرت بنتي واذيت بلدي وفي ناس ماتت ملهاش ذنب

عشان كده قتلته، واستخدمت قنابل مسيله للدموع عشان مخليش الكاميرات تجيبني وانا داخل وخارج بس والله العظيم مكنتش اعرف انه هيعمل كده؟

وعرفت متاخر ان شافع ابن تميم هو شخص منتمي لجماعة متطرفه واستغلني عشان يقتل ناس ملهاش اي ذنب.. انا عارف اني هتعرض لعقاب كبير ومهما حصل محدش هيسامحني

بس صدقني انا اللي هطلب من القاضي الاعدام، انا مش عارف اعيش من بعد اميره

كل يوم بتجيني في المنام، وبتلومني ان انا وديتها لدجال وان انا اللي كنت السبب في موتها

يا ريت تسامحوني

...

بعد ما خلص حمزه كلامه، اتحول لمباحث امن الدوله ورغم اللي حكاه طلع قرار بعتقاله وهو كان متقبل القرار ده جداً

ورغم جهله الا اني كنت متعاطف معاه جداً، شافع او ابو براء زي ما عرفت اسمه استغل خوفه على بنته اسوء استغلال، وقتل ارواح بريئه ملهاش ذنب

الشخص ده لو كان عايش انا كنت قتلته مليون مره.. بعد ما القضيه دي خلصت اترقيت وبقيت العقيد ادم العزازي الحمد لله

لكن مهما عدى عليا الوقت مش هنسى القضيه دي أبداً، انا اطلقت عليها اسم الدخان الابيض وهتفضل في ذاكرتي لاخر يوم في عمري

...

بس بعيدا عن موضوع القضيه عاوز اقولكم نصيحه، بلاش اي تعب عندنا نربطه بموضوع السحر، مش لازم نبقى مسحورين ممكن نكون مقصرين في حق نفسنا وفي حق ربنا، الحل مش ان احنا نروح لدجالين الحل في القرب منه والدعاء والاذكار

وبلاش الجهل يسيطر علينا ومتخلوش الشيطان يبعدكم عن طريق ربنا.