مرار الكون سكن حلقه

يادوب عايش بيتنفس

جيوش الهم بتحاوطه

يكش ف نفسه ويقرفص

شبح بيخاف مبيخوفش

كتير حاول يكون أقوى

لكن معرفش

جسد مسكون بروح ماتت

ولسه النبض فيه موقفش

عيون تاهت عن الرؤية

تبص صحيح .. لكن متشوفش

إيدين من كتر تتبيتها

بقت مرعوشة مبتمسكش

شبح مسجون .. في توب إنسان

وروح مقتولة بالأحزان

همومه / مطرقة وسندان

ما بينهم في الحياة معجون

وجوا الكون .. كيان مركون

تقول الناس عليه : (مجنون)

وهو يادوب .. خيال بهتان 

بعين الدنيا مبيتشافش

.............