صدقت الزيف

وقبلت تدنس قلب نضيف

قدمت مشاعر صافية بيور

اتقابلت غش وغدر وزور

ودموع في عنيك بتطَفي النور

طلعت الحلو اللي في قلبك

لقلوب كان همها تغدر بيك

وإدين اتمدت لجل تنول

بالغش غرضها الكامن فيك

صدقني بإن الحق عليك

كان لازم تفهم 

إنك مش منهم 

ولا قلبك يشبه لقلوبهم

متعذب بيهم وبتسكت

ومعاهم دايما تبكي عنيك

مكسور الروح ومطاطي الراس

ومسلم قلبك للإحساس

يتملك نفسك ويذلك

نفضهم من قلبك وارتاح

واعتبر الحب ده وهم وراح

لملم بواقيك من أياديهم

ولنفسك ضم

وسع خطاويك عن أراضيهم

واهرب منهم

الجرح النازف رح يدبل 

بمرور الوقت

والروح الطايرة ورا رضاهم

جواك هتحط

صدقني ابعد واهرب ترتاح

هتشوف بعيونك دنيا براح

وهتعرف إن الفُرقة اهون

من إنك تقضي العمر ضعيف

عَمَّال بيداوي جراح بجراح