قصة وفاء
بابا وماما اتجوزوا سنة١٩٧٤
بابا مهندس، لكن في التوقيت ده كان ضابط في الجيش.
طول فترة خطوبتهم وبعد جوازهم بمدة وطبعا ده كان وقت حرب الاستنزاف وبعدها حرب اكتوبر
بابا كان عنده في رجله آثار كي
ده اللي أنا شفته بعيوني من آثار الحرب،تخيلوا هو وأمي شافوا إيه ومعاناتهم وقتها كان شكلها إيه؟
رغم كده ماما صممت يكتبوا كتابهم
وبالتالي بقت مهددة في أي لحظة انها تبقى أرملة، وحسب كلام بابا
كان اللي بيستشهدوا في الفترة دي كتير جدا
برتجف لما افكر لثواني في مشاعر الرعب المميتة اللي عاشتها أمي في الوقت ده من خوف على أبويا
وبالرغم من كده- وبشهادة بابا -كانت بتدعمه وتقويه من أول ثانيه لأخر ثانية
وكانت دايما تقول له مشوار حياتنا كله خطوة بخطوة لحد القبر هنمشيه سوا يا "أحمد"
بابا كان يستحق، رجل مخلص حد السماء، حنانه أشبه بنسمات هواء في ظهيرة أغسطس.
ضحكته ربتة على الروح، وضمته دنيا من الأمان .
طبعا مفيش حاجة في قصتهم لحد هنا مش عادية،كل ست أصيلة بتعمل كده.وبتفضل كتف بكتف جنب جوزها، ده صحيح.
دي كانت البداية في حياتهم .
وطال المشوار لحد أخر يوم في عمر أبويا وكل واحد فيهم بيوفي بعهده للتاني
استمر جوازهم ٣٢سنة. لحد ما بابا فارق.
عاشت أمي بعدها ١٦ سنة.منسيتهوش يوم ولا بطلت تحكي عن أخلص الرجال لأحفادها ولينا. الأحفاد اللي مشفهوش حبوه من كلامها الحلو عليه.واللي شافوه بيحبوه من فرط حنيته وكاريزمته
هو كان رجل يتحب الحقيقة، يعني ماما كانت معذورة في عشقه.
الغريب بقى في قصة الوفاء دي
إن أبويا قبل ما يموت أصيب بالألزهايمر بس منسيش أمي
وأمي قبل وفاتها بشهرين حصلت لها نفس الإصابة لكن فضلت فاكره بابا وتحكي عنه.رغم انها نسيت حاجات كتير
الأغرب ان أبويا مات يوم الثلاثاء وأمي ماتت في نفس اليوم
و توفى بابا في شهر رجب وأمي كمان يشاء ربنا تتوفى في نفس الأيام المباركة.
والأعجب إن لما والدي تعب خالص قبل الوفاة أخويا طلب اسعاف ولأنه كان لسه صغير ومعندوش خبرة في حاجة
ماما رجعت من الشغل لقتهم دخلوا أبويا مستشفى حكومي وهناك بعد ما وصل بدقايق توفى.
لما أمي تعبت اخر أيام اضطرينا نخرجها من المستشفى الخاص اللي اخترناها طبعا عشان سمعتها وان الرعاية فيها احسن حاجة
وفي المستشفى النظيفة الغالية تتصاب أمي بالكوڤيد وتتنقل لي الإصابة واتغزل في البيت
لكن أمي مكنش ينفع تتعزل في البيت
ويشاء ربنا إننا منلقيش مكان في البلد كلها بيقبل حالات كورونا لا خاص ولا حكومي
مفيش غير مكان واحد في نفس المستشفى اللي خرج منها ابويا
تتغسل أمي وتتكفن في نفس المكان اللي أبويا خرج منه
مش بس كده
عائلة أمي لها مقابر خاصة وقوانين عائلتهم انها تدفن مع أبوها
ولأن القرابة بين أبي وأمي كانت تجعله من أصحاب المقبرة العائلية الأقرب لعائلة جدي
تدفن أمي بجوار أبي في القبر الخاص بالسيدات، وكأنها تصر على الوفاء بالعهد حتى بعد الموت
رحمة الله عليهما.
فعلا صدقت أمي ووفت بالوعد لحد أخر ثانية
دينا سعيد عاصم
هند حمدي عبد الكريم السيد
د. ايمان احمد ابو المجد الدواخلي
آمال محمد صالح احمد
د.خليل السيد خليل محمد
سهر محمد رمضان صيام
عبير عبد الرحيم عبد الحميد السيد
محمد عبد المنعم ابراهيم محمد
د. نهله عبد الحكم احمد عبد الباقي 
د. عبد الوهاب المتولي بدر 
زينب حمدي 
حنان صلاح الدين محمد أبو العنين 
د. محمد عبد الوهاب المتولي بدر 
ياسر محمود سلمي 
د. شيماء أحمد عمارة 
د. نهى فؤاد محمد رشاد 
م. اشرف عبد الصبور الكرم 
1
-1
