أنا حصلت معايا حاجة إيجابية ولازم أقول، لأني من زمان بتنشق عليها في وسط سلبيات كتير في التعامل مع الخدمات خصوصا الحكومية.

 إحنا كان عندنا قطع في المياه، وطلبنا الخط الساخن وردوا علينا بتوع حي المنتزه، ردوا من تاني مرة وده الحقيقة إنجاز عظيم، وقدمنا شكوى ، ادونا رقم، بس محدش جه يشوف العطل تاني يوم. ولا المياه كمان جت.

حاولت أتصل تاني كتير بقى، يسمعوني موسيقى الإنتظار دي ويقولوا جميع ممثلي خدمة العملاء مشغولين، سامحتهم وميأستش. وفكرت في حل تاني ، بعت لهم على رقم شكاوى الواتس اب.

بعتولي الرد، تاني يوم مباشرة،وقالوا أنه تم حل المشكلة، وفعلا المياه رجعت، طبعا مكنتش مصدقة إني قدمت الخدمة الجليلة دي لنفسي وللبرج بتاعنا. وأنهم استجابوا فعلا. 

بس مش ده الإنجاز وبس .

 أنا بشكر خدمة عملاء شركة المياه بالأسكندرية إنهم اتصلوا بيا النهار ده الصبح وتعاملوا بمنتهى الشياكة واللطف، وسألوني هل تم حل المشكلة؟

ولو عندي أي طلبات تانيه، فأنا مصدقتش نفسي،،، وقلت أشارككم الفرحة دي، وأقول إن فيهاحاجةحلوة