حب زوجي

جوزي رجل عملي جدا، سمات شخصيته كده وطبيعة شغله ك دكتور بتخلي دماغه في حته تانيه وكلامه يبان جاف جدا

مبيعرفش يقول كلام رومانسي أبدا

غالبا بحبك بتتحول على لسانه لـ (إزيك) ولو حب يأكد يقول إزيك جدا 😅

لكن بيعرف يعمل حاجات كتير يقول بيها بحبك

على سبيل المثال، أنا بحب الورد جدا، زرع لي أكتر من نوع، منهم اللي في الصورة دول، وكتير أول ما تفتح الوردة يقطفها ويحطها لي في مياه وأسبرينة ريڤو ويحطها في أوضة النوم عشان أفتح ألاقيها.

هنا أنا بسمع بحبك من غير ما يقولها.

لما عزلنا من بيتنا ماتت واحدة من أشجاري الصغيرة،حزنت عليها كتير، جاب لي شجرة كبيرة من نفس النوع ودخلت الشقة لقتها قدامي.

هو كده بيقول بحبك

مبينزلش يلف ويشتري لي هدية في عيد جوازنا مثلا، بس مبينساهوش أبدا، وبيعمل حاجات أجمل

يقطع خشب بإيده و يعمل لي كوستر للمج بتاعي

يعمل لي ترابيزة للاب توب ويقول لي عشان متوطيش.

لو عندي شغل متكدس عليا ممكن يساعدني، يطبع لي ورق، يلخص لي حاجة، يطلع لي بحث، المهم يساعدني أوفر وقت وجهد.

مبيهتمش يقرأ كل اللي بكتبه بس كتابي الأخير مثلا لولاه مكنش خلص،هو اللي جمعهولي، نظرا لتعبي. والموقف ده كان أعظم تعبير عن الحب.

مبيحبش الخروج ومبيفسحنيش غير كل سنة مرة ده حرفيا مش مجاز، وأصلا معندوش وقت يخرجني بس بيعمل لي كل فترة (موڤي نايت) يجيب لي فيلم موجود في السينما، أي فيلم

ونتفرج عليه كلنا في البيت.

عمره ما اشترى لي بوكس عيد الحب مثلا ولا بوكس عيد ميلادي بس بيخصص وقت يصنع لي بإيده منظم اكسسوارات في منتهى الجمال ويهاديني بيه من غير مناسبة. ويعمل لي علبة مجوهرات شيك، تفضل ذكرى حلوة، بفرح بجد وبيكفيني إن حتى هوايته بيمارسها وهو بيفكر يرضيني.

دي أجمل طريقة يعبر بيها عن حبه

مبيحبش التجمعات وبيعتذر عن حضور مناسبات كتير معانا ، ودي حاجة بتزعلني، بس كل مايصحى للفجر يصحينا نصلي جماعة، ويقول لي عشان عاوزك معايا في الجنة.

مبيشتريش بوكيه الورد اللي أصلا شيكولاتة ولا بيعترف بالحاجات دي بس لو دخل محل أدوات منزلية أو جاليري بالصدفة بيفضل فاكر إني محتاجة كذا وكذا للبيت مهما مر من وقت ويشتريهولي ولو بعد حين.

بيزعق ويعمل مشاكل لو جت لي نزلة برد وأخدت أدوية،ويقول لي عاوز جسمك يقاوم، ببقى هموت من التعب، واقول له المشروبات والوصفات الطبيعية بتغيب جدا على ما تجيب نتيجة وأنا عاوزه أشتغل،يفضل مصمم، والتعب يطول معايا وابقى متغاظة منه بس في وقت تعبي بيساعدني وممكن يعمل الأكل وكمان يغسل الأطباق،خصوصا لو عندنا امتحانات، رغم كل مشاغله،وإنه فعليا معندوش وقت، ودي طريقته في إنه يقول بحبك

أنا كتبت الكلام الكتير ده بمناسبة عيد جوازنا، وفكرت أنشره عشان أقول لكتير من الستات إن الرجالة فعلا من المريخ وجوزي ده رجل مريخي بامتياز فيه زيه رجاله كتير في بيوت المصريين

 بس الست الذكية ممكن تبص من شباك الزهرة وتفسر تصرفاته بالشكل اللي يخليها راضية وسعيدة.

هو بس لو يزود لنا المصروف شويتين تلاته هيبقى صاحبي وحبيبي وكفاءة.

كل حب وأنت طيب يا رجل يا طيب.

وعاوزه اقول لك أن أنا كمان إزيك جدا جدا.