السيد صاحب البيت الدكتور جوزي، لما أي حد من العيلة أو الأصدقاء أو المعارف، أو أي حد معدي في الشارع،
يسأله في استشارة طبية،يفضل معاه على الهادي كده، يقول له: اوصف لي مكان الوجع، طب اعمل تحليل كذا،طب أخبار الوزن إيه؟ ويكتب علاج ويقول على البدايل احتياطي كمان،
ويتابع الحالة لحد ما يطمن إن العيان خف.
من أسبوع كان كاتب ل علي اللي بيجيب منه السمك دواء، علي ملقهوش، عادي، ما هو مفيش دواء أساسا دلوقتي،
المهم فوجئت إن علي بيتصل بيه عشان يجي ياخد
عينة هو جابها له.كل ده كويس ويقدر ويحترم.
بالنسبة لنا إحنا بقى شاري لنا (٣ متر ريڤو ) الأخضر ده.
وكل ماحد مننا يشتكي من أي حاجة، رجله.. ودنه ..راسه.. سنانه.. المرارة.. البنكرياس،
يقوم مديله أسبرنتين ريڤو الأخضر قاهر كل الأمراض، ويقول له مع كوباية شاي بس وساعة وهتبقى زي الفل ، تقريبا الريڤو بيحب الشاي، بيفكرني ب الاستاذة عفاف شعيب لما كانت بتاخد ترامدول في المسلسل وتعلي بالشاي، ما إحنا أدمناه من كتر ما بيعالجنا بيه.
إحنا بناخد الحبايتين وصابرين معترضناش، أدي الله وأدي حكمته 🙈 إنما توصل لدرجة إنه يا سيدي يا مؤمن وانتي كمان يا سيدتي يا مؤمنة
بقول له حالا أنا عيني تعبت من القراءة وبحسها مزغللة كتير، أنا عاوزه أعمل نظارة، يقوم مادد إيده ومديني أسبرنتين ريڤو ويقول لي
بكل جسارة وجرأة: خدي دول هيضيعوا الزغللة خالص😂😂
لأااااااااااااا
2
-2
