رجال في زمن الحظر

١ * أنتِ ياست أنت..هو طول النهار مافيش حاجة وراكي غير قعدت المطبخ سايبة الشقة كلها وساكنة جوة المطبخ 

يعني انا بعمل أيه في المطبخ. حضرتك عاوز بامية باللحمة الضاني وابنك الكبير عاوز ملوخية بالارانب 

وبنتك كيكة وبسبوسة 

والصغير جلاش باللحمة المفرومة. وعاوز تبعت للست والدتك بطاطس بالفراخ ورز وعمر 

طيب خلي بالك فيه كام حبة رز مدلوقين على الرخامة وبصلة صغيرة واقعة تحت البوتاجاز .أيه التبذير اللي أنت فيه ده 

وانا أقول خزين البيت بيخلص بسرعة ليه

ياخراب بيتك يا سحس 

الغسالة شغالة ٢٤ ساعة وانا اقول فاتورة الكهربا والميه نار ليه 

ولا الغاز ..الرحمة شوية ياخلق يا عالم ياهوووو 

انت في نعمه كبيرة مش عارفة قيمتها قاعدة ست مستته في البيت لا نزول ولا طلوع ولا شعبطة في المواصلات 

ولا حر ولا برد 

انا اللي مكتوب عليه الشقى والغلب 

ولما جيت ارتاح في الحظر حضرتك بتحرقي دمي 

لا سمع ولا طاعة 

أنت يا مدام فيه كوباية ميه من ال٣ اللي جنبي فضيت وانت سعادتك ولا سأله فيه..

يا مدام انتبهي شوية تعالي أقلبي على القناة الاولى عاوز اسمع الأخبار

دي مابقتش عيشة 

يعني علشان الزمن رماني عندك كام يوم في البيت تعملي فيه كده .فعلا الانسان يبان أصله وقت الأزمات  

٢* ايه ده ايه ده كله حضرتك قاعدة على التليفون كل الوقت ده 

يخرب بيت النت على نتتوه 

النت ده هيخرب بيتنا ان شاء الله 

ياراجل انا لسه ماسكة التليفون ماليش ساعة 

بعد كده تعالى هنا ..هي الساعة كام دلوقتي 

الساعة ١١ بالليل 

طيب انا صاحية من أمتى ؟

من الساعة ٧ الصبح 

طيب من ٧ الصبح ل ١٠ ونص بالليل وانا شغالة في الشقة تنضيف وطبيخ وغسيل ومكوى 

وطلبات حضرتك اللي مش بتخلص .الحكومة قفلت لك القهوة فتحتها سيادتك في البيت 

هاتي قهوة .طيب .اعملي شاي حاضر 

جهزي الشيشة أوامرك يا عنيا .وكمان حلبة. طيب شوية يانسون انت تؤمر يا غالي .ونرجع من الأول قهوة .شاى 

وهكذا 

وانا مش مقصرة معاك

وزي ما حضرتك عندك حظر انا كمان لا عارفة اروح لأمي ولا أختي ولا حتى صحبتي 

وحضرتك ماسك الريموت وعامل حجر على التليفزيون 

وانا خلصت كل الشغل اللي ورايا 

أعمل ايه تاني ياني ياغلبي 

نامي .اتخمدي .ريحي نفسك شوية من مسكة المحمول اللي هيخرب بيتك ده 

انا بس يخلص الحظر هجوز واحدة لا ليها في النت ولا المحمول 

ست تعرف قيمة بيتها وجوزها. ست تقدر النعمة اللي في أيديها 

والله شكرا للحظر إللي خلاني اعرفك على حقيقتك 

٣* مش قادر خلاص هتجنن اسبوع بحاله بليله ونهاره في البيت 

انا هخرج الكورونا ارحم 

اهدي أومال يا حبيبي هانت باقي اسبوع تاني ولا اتنين 

اسبوع تاني مستحيل اقعد في البيت اسبوع كمان

علشان تعذرني لما كنت اقولك انا مضايقة عاوزة اخرج اشم نفسي شوية تقولي كفاية عليكي بتروح عند الست والدتك يوم حل ٢١ يوم 

انا أسف انا اسف انا بعتذر 

بكل انواع الاعتذارات 

وانا اللي كنت بتريق عليكي لما تسأليني النهاردة كام في الشهر ولا النهاردة ايه في ايام ربنا 

من حقك تنسي الايام والشهور من حقك تنسي حتى اسمك 

لو أول مرة أحس بيكي وبعذاب قعدة البيت 

قعدة البيت اللي بتموت الأفكار وتغتال العقل وتقتل النظرة المستقبلية

قعدة البيت تقصر العمر وتجيب كل الأمراض النفسية المدمرة للنفس والروح 

قعدة البيت بتكسر الطموح والأحلام 

وانا اللي كنت فاكر الخروج من البيت وشقى الشغل بيقصر العمر أتاري فيه اللي أصعب من كده 

السجن اللي بابه مفتوح لكن إجباري تعيشي فيه العادات والتقاليد والعرف 

لازم الست تشتغل في البيت. لازم الست تقعد عمرها في الحبس الافتراضي 

وبعدين معاك بقى

كفاية كده الدمعة فرت من عيني وحسرتني على شبابي وبكيتني على حالي 

اتاريني مضطهدة وانا مش واخدة بالي 

يقطع الحظر وسنينه 

الكورونا ارحم يا اخواتي 

يارب فك الحظر وارحمنا بقى 

٤* ياريت الحظر ده كان من زمان بجد انا كنت فعلا محتاج الحظر ده 

أنا في دوامة الشغل كنت ناسي نفسي وولادي وأهلي ومراتي 

أنا كنت قربت خلاص أصدق إني ماكينة تشتغل حتى توفر الموارد المادية 

نسيت إني إنسان ولازم أدي مساحة لمشاعري أحب ولادي وأقرب منهم وأعرف مشاكلهم 

أشوف احتياجات بيتي اللي شيلاه مراتي 

أحس بالمسؤولية اللي على كتافها .بيت وولاد .ومناسبات ومجاملات لازم هي اللي تعملها علشان انا مش فاضي لأني بشتغل شغلتين 

بجد انا فعلا ما كنتش عايش 

انا كنت بموت بالبطيء 

اللي بعمله دا انتحار 

ان شاء الله بعد ما يخلص الحظر وتفوت الأزمة دي على خير 

هشتغل شغل واحد وهخلي مساحة لبيتي وأهلي وحياتي 

ولكم في الحظر نجاة 

رب ضارة نافعة 

٥* تعالي اقعدي شوية وارتاحي 

معقولة دي حياتك اللي انت عيشاها في البيت الصبح تروحي الشغل ومن الضهر لوقت متأخر من الليل وانت شغالة كأنك في طاحونة ولا ساقية 

هو شغل البيت ده مش بيخلص 

الغسيل والطبيخ والمكوى ووقفة المطبخ اللي ماليها أول ولا أخر 

من النهاردة أنا هساعدك وأعمل كل حاجة معاكي 

مش معقول 

انا اروح الشغل وارجع الاقي الأكل جاهز اتغدى واشرب الشاي وأنام .أصحى أكل فاكهة واشرب شاي وانزل مع صحابي على القهوة اقعد براحتي وأرجع أتعشى وشرب شاي . وقعد على النت لحد ما انام وأنت شغالة مش بتفصلي شغل 

وانا اللي كنت فاكرك بعد ما انزل بتنامي وترتاحي 

من النهاردة ان شاء الله هساعدك أيدي بأيدك 

انت عمود البيت لو وقعتي من المجهود ده كلنا هنقع معاكي .

أنا والولاد هنشتغل معاكي وأكتر منك كمان 

عاش الحظر عاش

في زمن الكورونا