اليوم راسلتني صديقة من السودان مقيمة في مصر،

تريد كورس علاجي لتفتيح البشرة.

أعمل في مجال التجميل العلاجي،

فتشاورت معها حتى أعرف أسباب المشكلة،

فأجابتني: تصبغات وبقع من الحرب!

في العادي أسمع عن تصبغات وبقع من الشمس، من المصيف، من البحر، من الحب...

لكن تصبغات وبقع من الحرب؟! غريبة!

طلبت منها ترسل صور للمناطق اللي بتشتكي منها وعايزة نشتغل عليها.

اتصدمت من آثار الشظايا والجروح والحروق والندبات.

سألتها بخوف شديد: "إيه اللي حصل؟"

قالتلي: كنت في مكان واتضرب علينا قنبلة مرة شديدة يا دكتورة...

سكتت شوية، وسرحت أنا في حال ابني

اللي جاي يبكي علشان قطته خربشته خربوش صغير،

ظاهري، أقل من سنتي، بلا نقطة دم،

وقولت له: "شوية واطلب لك الإسعاف! في لينا عند الدكتور عملية هدية!"

الموقف ده أثر فيَّ حبة حلوين،

وقعدت مع نفسي أفكر...

استغربت قد إيه المواقف الصعبة والحروب والأزمات بتغيّرنا،

وازاي طبيعتنا الرخوة بتتحول للصلابة دي.

مع الوقت عرفت إننا لما نعيش في ظروف صعبة فترة طويلة

نظرتنا للحياة بتتغير،

ومعاييرنا اللي بنقيس بيها الصح والغلط والحلال والحرام بتنضج.

بنفهم أكتر ضعفنا وهشاشتنا كبشر،

وبنتقبل وجعنا وخوفنا، وأحيانًا... بنتصالح معهم.

قعدت مع نفسي أفكر...

إزاي الألم الكبير بيخلق جوا الإنسان سكينة مش مفهومة،

وبيخلي قلبه واسع لدرجة يحتمل الحياة وهي بتقسو عليه كل يوم.

الست دي شوفتها متعافية،

بس حتى في تعافيها كان شكل جلدها وجع...

فما بالك بشكلها وقت الحرب؟

وقت الحروق والخوف والليل الطويل اللي ملوش أمان.

استغربت ازاي قدرت تكمل،

وازاي جواها طاقة للحياة رغم كل اللي شافته.

وازاي إحنا، اللي ما شفناش حاجة من ده،

مكسرين ومحبطين من خربوش قطة...

من كلمة... من موقف بسيط.

اللي شاف الألم الحقيقي بيبطل يشتكي،

وبيفهم إن الوجع ممكن يكون باب نضج،

وإن القلوب الكبيرة عمرها ما اتخلقت في الرفاهية،

اتخلقت في النار... واتطهرت بيها.