وليه إنتي (شعر)

وليه إنتي
تكوني نجمة في مدينتي
وليه في العقل بتوهي
تداري م الهوا خوفي
تقويني على الأيام
تخليني أفوق من وهم
كان عايش في روحي
بيقتل الأحلام
وليه إنتي......
بكلمة تهزي مملكتي
ورغم إني
بكره فيكي ضعف جبان
في لحظة تخلقي قوة
تخليني أهد جبال
وليه إنتي....
وليه ضعفي يبان ليكي
أحاول إني أرضيكي
أقول كلمة تنسيكي
فترجع بسمتك ليكي
يلين قلبي على إديكي
وليه انتي....
بحسك جوة تكويني
بتحميني
رغم إني لازم أحميكي
وليه دائماً
ألاقي نفسي بناديكي
فألاقيكي
نفس اللحظة تناديني
وليه إنتي....
بخاف م الهوا عليكي
ومين يجرأ
وأنا موجود يئذيكي
وليه إنتي....
تكوني بنت أفكاري
تزيد حيرتي
فتحتاري
تكوني نجمة لمداري
وشمس الروح لأذكاري
تهدي كل أسواري
وليه إنتي ...
تهزي فيا تكويني
نفسي وعقلي ويقيني
تعانديني
أخاف مني لتنهاري
فأخليكي
نهار عايش في أفكاري
يابنتي وحيرتي ومراري
وسر غريب
بيكشف كل أسراري
وعودة روح لأسفاري
فكوني إنتي
كما كنتي
نجمة بعيدة في مدنتي