طبيعي تشتاق للماضي بتفاصيله 

طبيعي تمر عليك ذكراه وتعبيره 

وتقول ياريت يرجع زمان بخيره

تفتكر أحلام بريئة في الطفولة 

تبتسم مع ذكرى طايشة برعونة

طعم أكل زمان وريحته الطيبة   

مكان مع السنين ضاعت معالمه 

باقي منه صورة باهتة.... مضببة 

دعوة صادقة راح صاحبها للخلقه 

ليك معاه ذكرى كانت....... قريبة

طبيعي تشتاق بعد سنين لأحلامك 

وترجع تفتكر ذكرى مع أصحابك

وتَختة حفرت عليها يوم حلمك 

في مدرستك 

وحطيت فوقها كرستك

طبيعي...

طبيعي تكون لك ذكرى في كل مكان 

وتسعى إنك تحقق حلمك مع الأيام

طبيعي تمر بمراحل تكبر فيها الأحلام  

ده الطبيعي لأي إنسان.... إلا أنا  

ذكرياتي من زمان أنا مش فاكرها 

أمنياتي القديمة أنا شوفت غيرها 

هفتكر إيه من زمان؟

طفل كانت ابتسامته 

ترسم البهجة في حكايته 

ابتسامته محسهاش 

طفل كانت كورته تبعد   

لما حاول إنه يجري 

 ملحقهاش

طفل يتأمل زهوره 

هادي وملوش أي صوت

لكنه كان قاعد وحيد

قصته في إيده الأمل 

بس ملقاش إللي يحكي 

فابتسم وحكى لنفسه 

ألف قصة من حكايته 

إللي كانت بين إيديه

فيها صورة ملونة 

وأمنيات مش ممكنة

وعشان كده 

قلبي رافض إنه يكبر 

إنه يتحكم ويعقل 

عقلي مستوعبش لسه 

إن بكرة خلاص انتهى 

وإنه عايش حلمه فعلاً

أيوه أنا لسة طفلة 

لسه بلعب بالعروسة

وأتكسف من أي كلمة 

حتى لو كانت عفيفة 

وأبتسم مع أي ضحكة 

لسة قلبي قلب طفلة 

يحب أي عيون بريئة 

ويتنفض من أي نظرة 

لؤم أو كلمة جريئة 

لسه بحلم إني أطير 

بجناحات زي الفراشة

إني أكتب حلم مخفي 

لما أذاكر لإمتحان

وبسرعة أقطع في الورق 

قبل ما يخوني الكلام 

وأرجع أندم عاللي كان 

وأتصدم 

إن الورق غيّر معالمه 

وإني بحذف ذكرياتي

بلمسة على شاشة حياتي 

ومعدش معنى لكرساتي

ولا حبر أو جرة قلم 

وإن خانة الحظر شالت

ناس بلحظات الألم 

وأتصدم

لما ألاقي الملامح مجهدة  

بخطوط وتجاعيد مبهمة 

وطفل شايب مالشقى 

وضهره مالزمن انحنى

فألاقي عمري عالورق 

محسوب معاه كام مرة

فيها قلبي اتحرق

وأتصدم 

إن لسه بعيش طفولة 

وسهل إني..... أتخدع 

وأعيش حياتي أتوجع